1-2. (a) Ania ti dadduma a mabalin a pagduaduaan dagiti agserserbi ken Jehova ita? (b) Ania ti usigentayo iti daytoy nga artikulo?

 ADDA dagiti tiempo nga agduaduatayo, a aniaman ti edadtayo. Kas pagarigan, panunotem ti maysa nga agtutubo a mangpampanunot no talaga met laeng nga ipatpateg isuna ni Jehova. Gapu iti dayta, mabalin nga agduadua no agpabautisar wenno saan. Wenno panunotem ti maysa a brother nga idi agtutubo, pinilina nga iyun-una ti agserbi ken Jehova imbes nga agpabaknang iti daytoy a lubong. Ngem ita ta nataenganen ken umdas laeng ti kuarta a mabirbirokanna para iti kasapulan ti pamiliana, mabalin nga agduaduan no umiso met la ti inaramidna a desision idi agtutubo pay. Imadyinem met ti maysa a baket a sister a nakapsuten. Mabalin a maup-upay ta dinan kabaelan nga aramiden dagiti dati nga ar-aramidenna. Naisalsaludsodmo met kadin dagitoy: ‘Talaga kadi nga ipatpategnak ni Jehova? Saan kadi a sayang dagiti insakripisiok para ken Jehova? Adda pay la kadi maar-aramidak para ken Jehova?’

² No saantayo nga ammuen ti sungbat dagitoy a saludsod, mabalin a kumapuy ti pammatitayo ken Jehova wenno baka sumardengtayo pay ketdin nga agserbi kenkuana. Iti daytoy nga artikulo, usigentayo no kasano a makatulong dagiti prinsipio ti Biblia no agduaduatayo nga (1) ipatpategnatayo ni Jehova, (2) umiso dagiti inaramidtayo a desision, wenno  (3) adda pay la maar-aramidantayo para ken Jehova.

DAGITI MAKATULONG TAPNO MALABANAM TI PANAGDUADUA

3. Ania ti mabalintayo nga aramiden tapno malabanantayo ti panagduaduatayo?

³ No agduaduatayo, napateg a birokentayo iti Biblia ti sungbat dagiti saludsodtayo. No aramidentayo dayta, bumilegtayo, lumagda ti relasiontayo ken Jehova, ken ‘tumibker ti pammatitayo.’—1 Cor. 16:13.

4. Kasanotayo a ‘masigurado ti amin a banag’? (1 Tesalonica 5:21)

⁴ Basaen ti 1 Tesalonica 5:21. Iparparegta ti Biblia kadatayo: “Siguraduenyo ti amin a banag.” Kasanotayo nga aramiden dayta? No saantayo a sigurado iti maysa a banag, masapul nga ammuentayo ti ibagbaga ti Biblia maipapan iti dayta. Kas pagarigan, panunotentayo ti agtutubo nga agduadua no talaga met laeng nga ipatpateg isuna ni Jehova. Itultuloyna latta kadin ti agduadua? Saan, masapul a ‘siguraduenna ti amin a banag.’ Kasano? Masapul nga adalenna ti Biblia tapno maammuanna no ania a talaga ti pampanunoten ni Jehova maipapan kenkuana.

5. Kasanotayo a maammuan ti sungbat ni Jehova kadagiti saludsodtayo?

⁵ No basbasaentayo ti Biblia, arigna makisarsarita ni Jehova kadatayo. Ngem saan la a basta panagbasa iti Biblia ti kasapulan tapno maammuantayo ti sungbat ni Jehova kadagiti saludsodtayo. Masapul a biroken ken adalentayo dagiti teksto a mangsungbat kadagiti espesipiko a saludsodtayo. Maaramidtayo dayta no ag-research-tayo kadagiti publikasion nga ipapaay ti organisasion ni Jehova. (Prov. 2:​3-6) Ikararagtayo ken Jehova a tulongannatayo nga ag-research ken mangbirok kadagiti sungbat dagiti saludsodtayo. Kalpasanna, birokentayo dagiti prinsipio ti Biblia ken dagiti impormasion a makatulong iti situasiontayo. Nasayaat met no adalentayo dagiti salaysay ti Biblia maipapan kadagiti matalek nga adipen ni Jehova a nakapadas met iti kas iti situasiontayo ita.

6. Ania ti maitulong dagiti gimong tapno malabanantayo ti panagduaduatayo?

⁶ No ad-adalentayo ti Biblia kadagiti gimong, arigna “dumdumngegtayo” ken Jehova. No regular a makigimgimongtayo, baka adda mangngegtayo iti maysa a palawag wenno komento nga isu ti eksakto a kasapulantayo a manglaban iti panagduaduatayo. (Prov. 27:17) Pagsasaritaantayo itan dagiti makatulong kadatayo a manglaban iti dadduma a pagduaduaantayo.

NO PAGDUADUAAM NGA IPATPATEGNAKA NI JEHOVA

7. Ania ti mabalin nga isaludsod ti dadduma?

⁷ Napampanunotmo kadin, ‘Talaga kadi a makitkitanak ni Jehova?’ No kasta ti marikriknam, baka mapanunotmo nga imposible nga agbalin a gayyemmo ti Namarsua iti uniberso. Mabalin a napanunot met dayta idi ni Ari David. Nasdaaw iti panangipateg ni Jehova kadagiti tattao isu a naisaludsodna: “O Jehova, ania ti tao tapno panunotem, ti anak ti tao tapno asikasuem?” (Sal. 144:3) Pakasarakam iti sungbat iti saludsod a, ‘Talaga kadi nga ipatpategnak ni Jehova?’

8. Sigun iti 1 Samuel 16:​6, 7, 10-12, ania ti kitkitaen ni Jehova kadagiti tattao?

⁸ Isursuro ti Biblia a makitkita ni Jehova dagidiay ibilang ti dadduma a kasla awan serserbida. Kas pagarigan, imbaon ni Jehova ni Samuel a mapan iti balay ni Jesse tapno dutokanna ti maysa kadagiti annakna nga agbalinto nga ari ti Israel. Inayaban ni Jesse ti pito kadagiti walo nga annakna tapno makita ida ni Samuel.  Ngem dina inayaban ti buridekna a ni David. b Ngem ni David ti pinili ni Jehova. (Basaen ti 1 Samuel 16:​6, 7, 10-12.) Nakita ni Jehova no asino a talaga ni David. Ammona nga ay-ayaten unay isuna daytoy nga agtutubo.

9. Apay a masiguradom nga ipatpategnaka ni Jehova? (Kitaen met ti ladawan.)

⁹ Panunotem no kasanon a pinaneknekan ni Jehova nga ipatpategnaka. Ipapaayannaka iti kasayaatan a balakad a maibagay iti agdama a situasionmo. (Sal. 32:8) Kasano koma a maaramidna dayta no saannaka nga am-ammo a naimbag? (Sal. 139:1) No iyaplikarmo ti balakad ni Jehova ken no makitam no kasano a nakatulong dayta kenka, makombinsirkanto nga ipatpategnaka ni Jehova. (1 Cron. 28:9; Ara. 17:​26, 27) Makitkita ni Jehova ti amin a panagreggetmo, dagiti nasayaat a kualidadmo, ken kayatna nga agbalinka a gayyemna. (Jer. 17:10) Maragsakan met unay no kayatmo isuna nga agbalin a Gayyemmo.—1 Juan 4:19.

NO PAGDUADUAAM NO HUSTO MET LAENG DAGITI INARAMIDMO A DESISION

10. No panunotentayo dagiti inaramidtayo idi a desision, ania dagiti mabalin nga isaludsodtayo?

¹⁰ Adda tiempo a baka mapanunot ti maysa no husto met laeng dagiti inaramidna a desision. Nalabit nagdesision idi nga umikkat iti napintas a trabahona wenno isardengna ti narang-ay a negosiona tapno ad-adu ti tiempona nga agserbi ken Jehova. Ngem limmabasen ti adu a tawen, ken nalabit adu payen a dekada. Mabalin a makitana dagiti am-ammona a nangyun-una kadagiti kayatda iti biag. Ita, kasla nagadun ti kuartada ken nanam-ayen ti biagda. Isu a baka mapanunotna: ‘Saan met la kadi a sayang dagiti insakripisiok para ken Jehova? Wenno gapu kadagita, naikapisak iti  adu nga oportunidad tapno umadu koma ti kuartak?’

11. Ania ti pakaburiboran idi ti nangisurat iti Salmo 73?

¹¹ No maburiboran met ti panunotmo kadagita a saludsod, panunotem ti narikna ti nangisurat iti Salmo 73. Nakitana ti dadduma a kasla nasalun-at, nabaknang, ken awan problemada iti biag. (Sal. 73:​3-5, 12) Bayat a palpaliiwenna ida ken ti kasla nanam-ay a biagda, nariknana a kasla awan serserbi dagiti panagreggetna nga agserbi ken Jehova. ‘Agmalmalem a maburburiboran’ gapu iti makapaupay a pampanunotenna. (Sal. 73:​13, 14) Ania ti inaramidna tapno malawlawagan ti panunotna?

12. Iti Salmo 73:​16-18, ania ti inaramid ti salmista tapno malawlawagan ti panunotna?

¹² Basaen ti Salmo 73:​16-18. Napan ti salmista iti nakataltalna a lugar—iti santuario ni Jehova. Nakapagpampanunot a naimbag sadiay. Naawatanna nga uray kasla nanam-ay ti biag ti dadduma, awan ti namnamada a nasayaat a masakbayan. Gapu iti dayta, saanen a naupay ken naawatanna a ti kasayaatan a desision ket ti panangyun-unana iti panagserbi iti Dios. Kas resultana, determinado manen nga agtultuloy nga agserbi ken Jehova.—Sal. 73:​23-28.

13. Ania ti aramidem tapno malabanam ti panagduaduam maipapan kadagiti inaramidmo idi a desision? (Kitaen met ti ladawan.)

¹³ Kas iti salmista, malabanam met dagiti panagduaduam iti tulong ti Sao ti Dios. Kasano? Panunotem dagiti nagsayaat nga adda kenka, agraman dagiti bendision ni Jehova. Laglagipem nga awan dagita kadagiti saan nga agserserbi kenkuana. Para kadakuada, ti nanam-ay a biag ita ti kapatgan ta awan metten ti namnamada para iti masanguanan. Ngem para kenka, adayo a nasaysayaat dagiti bendision nga ikarkari ni Jehova ngem iti  mapanunotmo ita. (Sal. 145:16) Panunotem met daytoy: Siguradoka kadi a nasaysayaat koma ti biagmo ita no sabali dagiti inaramidmo a desision? Maysa a banag ti sigurado: Dagidiay mangaramid kadagiti desision gapu ta ay-ayatenda ti Dios ken ti padada a tattao ket saanto a pulos maikapis iti aniaman a talaga a mangparagsak unay iti biag.

NO PAGDUADUAAM NO ADDA PAY LA MAAR-ARAMIDAM PARA KEN JEHOVA

14. Ania ti situasion ti dadduma, ket ania ti mabalin a maisaludsodda?

¹⁴ Ti dadduma nga agserserbi ken Jehova ket tumataenganen, kumapkapuyen, wenno addan pisikal a depektoda. Gapu iti dayta, baka mariknada a saandan a napateg ken Jehova. Mabalin a maisaludsodda, ‘Adda pay la kadi maar-aramidak para ken Jehova?’

15. Iti ania a kombinsido ti nangisurat iti Salmo 71?

¹⁵ Kasta met laeng ti pakaburiboran idi ti nangisurat iti Salmo 71. Inkararagna: “Saannak nga ibelleng ita ta lakayakon; saannak a baybay-an ita ta nakapsutakon.” (Sal. 71:​9, 18) Ngem kombinsido ti salmista a kanayon nga iwanwan ken tulongan isuna ni Jehova no itultuloyna ti matalek a panagserbina. Kas iti napaneknekanna, maragsakan ni Jehova kadagiti mangar-aramid iti amin a kabaelanda nga agserbi kenkuana, uray no limitadon dagiti maar-aramidanda.—Sal. 37:​23-25.

16. Ania pay dagiti mabalin nga aramiden dagiti nataengan tapno mariknada nga adda latta maar-aramidanda para ken Jehova? (Salmo 92:​12-15)

¹⁶ Dakayo a nataenganen, panunotenyo ti panangmatmat ni Jehova kadakayo. Matulongannakayo nga agtalinaed a matalek uray limitadon dagiti maar-aramidanyo. (Basaen ti Salmo 92:​12-15.) Imbes a sangkapanunotyo dagiti saanyon a maaramidan, agpokuskayo kadagiti kabaelanyo pay nga aramiden. Kas pagarigan, maparegtayo ti dadduma babaen  ti kinamatalekyo ken pannakaseknanyo kadakuada. Mabalinyo nga iyestoria no kasano a tinulongannakayo ni Jehova iti panaglabas dagiti tawen, ken no ania kadagiti karina ti kayatyo la unayen a matungpal. Nagdakkel met ti maitulong ti naimpusuan a panangikararagyo iti dadduma. (1 Ped. 3:12) Adda nga adda ti maaramidantayo amin para ken Jehova ken iti sabsabali.

17. Apay a masapul a saantayo nga ikompara ti bagitayo iti sabsabali?

¹⁷ No nalidayka gapu ta panagriknam ket bassiten ti maar-aramidam para ken Jehova, masiguradom nga ap-apresiarenna ti aniaman a kabaelam nga aramiden ita. Mabalin nga adda tendensiam a mangikompara iti maar-aramidam iti maar-aramidan ti sabsabali. Ngem dimo ar-aramiden dayta! Apay? Ngamin, saan nga ar-aramiden dayta ni Jehova. (Gal. 6:4) Kas pagarigan, imbukbok ni Maria kadagiti saka ni Jesus ti nabanglo ken nakanginngina a lana. (Juan 12:​3-5) Ngem dua laeng a nakabasbassit ti pategna a sinsilio ti inted ti maysa a napanglaw a balo idiay templo. (Luc. 21:​1-4) Nupay kasta, saan a pinagkompara ni Jesus dagiti inted dagita a babbai. Imbilangna ketdi dagiti inted ni Maria ken ti napanglaw a balo kas ebkas ti pammatida. Perpekto ti panangtulad ni Jesus ken Amana. Isu a masiguradom a makitkita ni Jehova ti amin nga ar-aramidem gapu iti pammatim ken ayatmo kenkuana, uray no mariknam a nagbassiten dagiti maar-aramidam.

18. Ania ti makatulong tapno malabanantayo ti panagduaduatayo? (Kitaen met ti kahon a “ Matulongannaka ti Sao ni Jehova a Manglaban iti Panagduadua.”)

¹⁸ Agduaduatayo amin no dadduma. Ngem kas nakitatayon, makatulong kadatayo ti Sao ti Dios tapno malabanantayo dayta. Aramidem ngarud ti amin a kabaelam tapno mapukaw ti panagduaduam. Talaga a personal nga am-ammonaka ni Jehova. Ap-apresiarenna dagiti panagsakripisiom ken sigurado a tungpalennanto ti karina a gunggonaannaka. Masiguradom nga ibilang ni Jehova ti amin a matalek nga adipenna a maikari iti ayat ken panangipategna.