1. No pampanunoten ti maysa nga awanan asawa a babai no asino ti pakiasawaanna, ania ti dadduma a masapul nga isaludsodna?

AMIN a Kristiano ket masapul nga agpasakup iti perpekto a kinaulo ni Jesu-Kristo. Ngem no makiasawa ti maysa a Kristiano a babai, masapul nga agpasakup iti kinaulo ti maysa nga imperpekto a lalaki. Mabalin a narigat dayta. Isu a no pampanunoten ti maysa nga awanan asawa a babai no asino ti pakiasawaanna, nasayaat no isaludsodna iti bagina: ‘Ania ti mangipakita a daytoy a kabsat a lalaki ket agbalinto a nasayaat nga ulo ti pamilia? Ti kadi panagserbi ken Jehova ti kapatgan iti biagna? No saan, ania ti pakakombinsirak a makatulongto isuna tapno agtalinaed a nabileg ti espiritualidadmi inton agassawakamin?’ Siempre, nasayaat met no isaludsod ti maysa a kabsat a babai iti bagina: ‘Ania dagiti kualidadko a makatulongto iti panagasawami? Naanus ken naparaburak kadi? Natibker kadi ti relasionko ken Jehova?’ (Ecl. 4:9, 12) No nasayaat ti panagdesdesision ti maysa a babai sakbay a makiasawa, makatulong dayta tapno agballigi ken naragsakto ti relasionda nga agassawa.

2. Ania ti usigentayo iti daytoy nga artikulo?

² Nagsayaat nga ulidan ti minilion a Kristiano a kakabsat a babbai nga agpaspasakup iti asawada. Makomendaranda! Maragsakantayo nga agserbi ken Jehova a kadua dagitoy a matalek a babbai! Iti daytoy nga artikulo, usigentayo ti sungbat dagitoy tallo a saludsod: (1) Ania ti dadduma a karit a pakaipasanguan ti assawa a babbai? (2) Apay a pilien ti maysa nga asawa a babai ti agpasakup iti asawana? (3) Ania ti masursuro dagiti Kristiano nga agassawa iti panagpasakup nga inyulidan da Jesus, Abigail, ken Maria, nga asawa ni Jose ken ina ni Jesus?

3. Apay nga awan ita ti perpekto a panagasawa?

³ Ti panagasawa ket perpekto a sagut ti Dios, ngem saan a perpekto dagiti tattao. (1 Juan 1:8) Dayta ti rason nga impakdaar ti Sao ti Dios kadagiti agassawa nga “agrigatdanto iti lasag.” (1 Cor. 7:28) Pagsasaritaantayo ti dadduma a karit a mabalin a pakaipasanguan ti asawa a babai.

4. Apay a mabalin a marikna ti asawa a babai a pakaibabainanna ti agpasakup ken lakayna?

⁴ Nalabit gapu iti pannakapadakkel ti asawa a babai, mabalin a mariknana a pakaibabainanna no agpasakup ken lakayna. Kinuna ni Marisol a taga-United States: “Iti lugarmi, kanayon a maibagbaga kadagiti babbai a masapul a makipadada kadagiti lallaki iti amin a banag. Ammok nga inikkan ni Jehova dagiti assawa a lallaki iti autoridad ken inkeddengna a masapul nga agtulnog dagiti assawa a babbai ngem maikarida met iti panagraem. Ngem narigat a pagtalinaeden ti balanse a panangmatmat maipapan iti kinaulo.”

5. Ania dagiti di nainkasuratan a panangmatmat ti dadduma a lallaki iti papel dagiti babbai?

⁵ Iti sabali a bangir, mabalin a nakiasawa ti maysa a babai iti lalaki a mangibilang a nababbaba dagiti babbai. Kinuna ti maysa a kabsat nga agnagan Ivon a taga-South America: “Iti lugarmi, dagiti lallaki ti umuna a mangan sa sumaruno dagiti babbai. Mainanama a dagiti ubbing a babbai ti paraluto ken paradalus, ngem dagiti ubbing a lallaki ibilangda nga adipenda ti ina ken kakabsatda a babbai, ken maibaga kadakuada nga isuda ti ‘ari iti balay.’” Kinuna ti maysa a kabsat nga agnagan Yingling a taga-Asia: “Iti lengguahemi, adda pagsasao a ti kayatna a sawen ket saan a masapul nga intelihente wenno naabilidad dagiti babai. Isuda ngamin ti agobra iti amin a trabaho iti balay, ken saan a maipalubos nga ibagada ken lakayda ti aniaman nga opinionda.” No agpaimpluensia ti asawa a lalaki iti kasta a saan a naayat ken di nainkasuratan a panangmatmat, agkunsumision ni baketna, dina matulad ni Jesus, ken mapagurana ni Jehova.—Efe. 5:28, 29; 1 Ped. 3:7.

6. Ania ti masapul nga aramiden ti assawa a babbai tapno mapatibkerda ti personal a relasionda ken Jehova?

⁶ Kas nadakamat iti napalabas nga artikulo, ekspektaren ni Jehova nga ipaay dagiti Kristiano nga assawa a lallaki ti naespirituan, emosional, ken material a kasapulan ti pamiliada. (1 Tim. 5:8) Ngem uray no okupado ti assawa a babbai, masapul nga iwayaanda ti inaldaw nga agbasa iti Sao ti Dios, utobenda dayta, ken sipapasnek nga agkararagda ken Jehova. Mabalin a narigat dayta. Nagadu ti trabaho ti assawa a babbai isu a mabalin a mariknada nga awanen ti orasda wenno pigsada a mangaramid kadagita. Ngem masapul nga iwayaanda dayta. Apay? Kayat ngamin ni Jehova a ti tunggal maysa kadatayo ket maaddaan iti personal a relasion kenkuana ken taginayonentayo dayta.—Ara. 17:27.

7. Ania ti makatulong tapno nalaklaka nga itungpal ti asawa a babai ti responsabilidadna?

⁷ Natural laeng a mabalin a marigatan ti asawa a babai nga agpasakup iti imperpekto nga asawana. Ngem nalaklakana nga itungpal ti responsabilidad nga inted ni Jehova no maawatan ken akseptarenna dagiti Nainkasuratan a rason no apay a masapul nga agpasakup.

8. Sigun iti Efeso 5:22-24, apay nga agpasakup ti Kristiano nga asawa a babai ken lakayna?

⁸ Ti Kristiano nga asawa a babai ket agpasakup ken lakayna gapu ta dayta ti kidkiddawen kenkuana ni Jehova. (Basaen ti Efeso 5:22-24.) Agtalek dagiti assawa a babbai iti nailangitan nga Amada ta ammoda nga amin  nga ar-aramidenna ket gapu iti ayat, ken ti ipapaaramidna kadakuada ket para iti pagimbaganda.—Deut. 6:24; 1 Juan 5:3.

9. Ania ti mapasamak no raemen ti Kristiano a kabsat a babai ti autoridad ti asawana?

⁹ Ti lubong iparparegtana kadagiti babbai a dida suroten dagiti pagalagadan ni Jehova ken ibilangda a pakaibabainanda no agpasakupda. Siempre, dagiti mangisursuro kadagiti kasta a kapanunotan saanda nga am-ammo ti naayat a Diostayo. Di pulos mangted ni Jehova iti bilin a pakaibabainan dagiti ipatpategna nga annak a babbai. Ti kabsat a babai a mangikagkagumaan a mangitungpal iti responsabilidadna nga inted ni Jehova maitandudona ti talna iti sangakabbalayanna. (Sal. 119:165) Magunggonaan ni lakayna, isuna a mismo, ken uray dagiti annakda.

10. Ania dagiti masursurotayo iti imbaga ni Carol?

¹⁰ Ti asawa a babai nga agpasakup iti imperpekto nga asawana pampaneknekanna nga ay-ayaten ken raraemenna ni Jehova—daydiay nangyurnos iti kinaulo. “Ammok nga agkamali ni lakayko,” kinuna ni Carol a taga-South America. “Ammok met a no raemek latta isuna uray agkamali, ipakpakitak nga ipatpategko unay ti pannakigayyemko ken Jehova. Isu nga ikagkagumaak ti kanayon nga agpasakup ta kayatko a maparagsak ti nailangitan nga Amak.”

11. Ania ti nakatulong iti kabsat nga agnagan Aneese tapno agbalin a manangpakawan, ken ania ti masursurotayo iti imbagana?

¹¹ Mabalin a marigatan ti asawa a babai a mangraem ken agpasakup no mariknana a saan nga ikabkabilangan ni lakayna ti rikriknana ken dagiti pakaseknanna. Ngem kitaentayo ti reaksion ti kabsat nga agnagan Aneese no kasta ti mapasamak. Kinunana: “Ikagkagumaak ti saan nga agunget. Laglagipek nga agkamalitayo amin. Kayatko ti situtulok a mangpakawan a kas iti ar-aramiden ni Jehova. No mamakawanak, natalna ti panunotko.” (Sal. 86:5) No manangpakawan ti asawa a babai, nalaklaka nga agpasakup.

12. Ania dagiti ulidan a linaon ti Biblia?

¹² Mabalin a marikna ti dadduma a nakapuy ti managpasakup a tao. Ngem saan a pulos nga agpayso dayta. Naglaon ti Biblia iti adu  nga ulidan dagiti managpasakup ngem nakaturtured a tattao. Usigentayo ti masursurotayo kada Jesus, Abigail, ken Maria.

13. Apay nga agpaspasakup ni Jesus ken Jehova? Ilawlawag.

¹³ Agpaspasakup ni Jesus ken Jehova, ngem sigurado a saan a gapu ta nakapuy ti panunotna wenno saan a nalaing. Dagiti simple ken nalawag a pannursurona ti mangpaneknek nga intelihente unay. (Juan 7:45, 46) Binigbig ni Jehova ti abilidad ni Jesus, isu nga impalubosna a makipagtrabaho kenkuana idi pinarsuana ti uniberso. (Prov. 8:30; Heb. 1:2-4) Ket sipud idi napagungar ni Jesus, intalek kenkuanan ni Jehova ti “amin nga autoridad idiay langit ken ditoy daga.” (Mat. 28:18) Uray no nakalalaing ni Jesus, agpapaiwanwan latta ken Jehova. Apay? Gapu ta ay-ayatenna ni Amana.—Juan 14:31.

14. Ania ti masursuro ti assawa a lallaki (a) iti panangmatmat ni Jehova kadagiti babbai? (b) kadagiti punto a nadakamat iti Proverbio 31?

¹⁴ Ti masursuro ti assawa a lallaki. Saan nga inyurnos ni Jehova nga agpasakup ti asawa a babai ken lakayna gapu ta ibilangna a nababbaba dagiti babbai ngem kadagiti lallaki. Pinaneknekan dayta ni Jehova ta nangpili iti babbai ken lallaki a makipagturay ken Jesus. (Gal. 3:26-29) Impakita ni Jehova ti panagtalekna iti Anakna babaen ti panangtedna kenkuana iti autoridad. Kasta met laeng ti masirib nga asawa a lalaki, ikkanna ni baketna iti autoridad. Dineskribir ti Sao ti Dios ti responsabilidad ti nagsayaat nga asawa a babai: Maaywananna ti sangakabbalayanna, kayana ti gumatang ken mangimanehar iti sanikua, ken mangasikaso iti pinansial a transaksion. (Basaen ti Proverbio 31:15, 16, 18.) Isu ket saan nga adipen nga awanan iti kalintegan a mangibaga iti opinionna. Imbes ketdi, agtalek kenkuana ni lakayna ken dumngeg iti kapanunotanna. (Basaen ti Proverbio 31:11, 26, 27.) No kasta ti panagraem ti asawa a lalaki ken baketna, maragsakan nga agpasakup ken lakayna.

15. Ania ti masursuro ti assawa a babbai iti ulidan ni Jesus?

¹⁵ Ti masursuro ti assawa a babbai. Iti laksid ti nagadu a naaramidan ni Jesus, saanna a narikna a pakaibabainanna ti agpasakup iti kinaulo ni Jehova. (1 Cor. 15:28; Fil. 2:5, 6) Kasta met laeng ti nagsayaat nga asawa a babai a mangtultulad iti ulidan ni Jesus. Saanna a marikna a pakaibabainanna ti agpasakup ken lakayna. Suportaranna ni lakayna saan laeng a gapu ta ay-ayatenna no di ket kangrunaan iti amin, ay-ayaten ken raraemenna ni Jehova.

16. Sigun iti 1 Samuel 25:3, 23-28, ania dagiti problema a nakaipasanguan ni Abigail? (Kitaen ti ladawan iti akkub.)

¹⁶ Ti asawa ni Abigail ket ni Nabal. Naagum, natangsit, ken saan a managyaman ni Nabal. Nupay kasta, saan nga inremedio ni Abigail ti sumina ken lakayna. Mabalin a nagulimek latta koman ken impalubosna a matay ni lakayna iti ima ni David ken dagiti tattaona. Imbes ketdi, nangaramid kadagiti praktikal a pamay-an tapno masalaknibanna ni Nabal agraman ti dakkel a sangakabbalayanda. Panunotenyo ti kinatured ni Abigail nga immasideg iti 400 nga armado a lallaki ken siraraem a nakirinnason ken David. Imbagana pay ketdi nga isu la koman ti masingir kadagiti inaramid ni lakayna. (Basaen ti 1 Samuel 25:3, 23-28.) Naamiris ni David nga inusar ni Jehova daytoy natured a babai a mangbalakad kenkuana tapno di makaaramid iti nakaro a kamali.

17. Ania ti masursuro ti assawa a lallaki iti salaysay maipapan kada David ken Abigail?

¹⁷ Ti masursuro ti assawa a lallaki. Masirib a babai ni Abigail. Imbag laengen ta impangag ni David ti balakadna. Gapu iti dayta, naliklikanna ti panangpapatayna koma iti adu nga  inosente a tattao. Kasta met laeng ti masirib nga asawa a lalaki. Usigenna a naimbag dagiti opinion ni baketna no mangaramid kadagiti napateg a desision. Nalabit ti opinion ni baketna ti makatulong kenkuana tapno saan a makaaramid iti di nainsiriban a desision.

18. Ania ti masursuro ti assawa a babbai iti ulidan ni Abigail?

¹⁸ Ti masursuro ti assawa a babbai. Ti asawa a babai a mangay-ayat ken mangraraem ken Jehova dakkel ti maitulongna iti pamiliana, uray saan nga agserserbi ken Jehova ni lakayna wenno saan nga agtultulnog kadagiti prinsipio ti Dios. Saan nga agbirok iti di nainkasuratan a rason tapno sinaanna ni lakayna. Imbes ketdi, babaen ti panagraem ken panagpasakupna, ikagumaanna a guyugoyen ni lakayna nga agsursuro maipapan ken Jehova. (1 Ped. 3:1, 2) Ngem uray saan a matignay ni lakayna iti nasayaat nga ulidanna, maragsakan ni Jehova iti panagpasakupna ken lakayna ken iti kinamatalekna Kenkuana.

19. Kadagiti ania a situasion a saan nga agtulnog ti asawa a babai ken lakayna?

¹⁹ Nupay kasta, ti managpasakup a Kristiano nga asawa a babai dina suportaran ni lakayna no adda banag nga ipaaramidna a maikontra kadagiti linteg wenno prinsipio ti Biblia. Kas pagarigan, ibaga ti di manamati nga asawana nga isu ket agulbod, agtakaw, wenno mangaramid iti banag a kagura ni Jehova. Amin a Kristiano, a pakairamanan dagiti naasawaan a kakabsat a babbai, masapul a ni Jehova a Dios ti umuna a pagtulnoganda. No adda ipaaramid ti asawa a lalaki a maikontra kadagiti prinsipio ti Biblia, masapul a sipaprangka nga ibaga ti kabsat a babai a dina maaramid dayta ken ilawlawagna dayta a siaalumamay.—Ara. 5:29.

20. Kasano nga ammotayo nga adda nasinged a personal a relasion ni Maria ken Jehova?

²⁰ Adda nasinged a personal a relasion ni Maria ken Jehova. Nalawag a kabesadona ti Kasuratan. Iti pannakisarita ni Maria ken Elisabet nga ina ni Juan a Mammautisar, nasurok a namin-20 a nagkotar iti Hebreo a Kasuratan. (Luc. 1:46-55) Ken panunotenyo daytoy: Uray no naikarin ni Maria a mayasawa ken Jose, saan a ni Jose ti damo a nagparangan ti anghel ni Jehova. Ni Maria ti immuna  ken direkta a nakisaritaan ken nangipakaammuan ti anghel nga iyanakna ti Anak ti Dios. (Luc. 1:26-33) Am-ammo la unay ni Jehova ni Maria ken agtalek nga ayaten ken aywananna ti Anakna. Ket sigurado nga intultuloy ni Maria ti nasayaat a relasionna ken Jehova uray idi natay, napagungar, ken nagpalangiten ni Jesus.—Ara. 1:14.

21. Ania ti masursuro ti assawa a lallaki iti salaysay ti Biblia maipapan ken Maria?

²¹ Ti masursuro ti assawa a lallaki. Naragsak ti masirib nga asawa a lalaki no kabesado ni baketna ti Kasuratan. Dina marikna nga ag-agawen ni baketna ti kinaulona. Maamirisna ketdi a no nalaing ni baketna iti Biblia ken kadagiti prinsipio iti dayta, isu ket makatulong iti pamiliada. Siempre, uray mas edukado ti asawa a babai, responsabilidad latta ni lakayna nga idauluan ti panagdaydayaw ti pamiliada ken ti dadduma pay a nateokratikuan nga aktibidad.—Efe. 6:4.

22. Ania ti masursuro ti assawa a babbai ken Maria?

²² Ti masursuro ti assawa a babbai. Masapul nga agpasakup ti asawa a babai ken lakayna, ngem responsabilidadna latta a pagtalinaeden a nabileg ti espiritualidadna. (Gal. 6:5) Masapul ngarud a mangyeskediul iti tiempo para iti personal a panagadal ken panagutob. Dayta ti makatulong tapno kanayon nga ayaten ken raemenna ni Jehova ken maragsakan nga agpasakup ken lakayna.

23. No managpasakup ti assawa a babbai, ania ti epekto dayta kadakuada, iti pamiliada, ken iti kongregasion?

²³ Ti assawa a babbai a managpasakup iti asawada gapu iti ayatda ken Jehova ket naragragsak ken mas kontento ngem kadagiti saan a mangsursurot iti urnos ni Jehova maipapan iti kinaulo. Nasayaatda nga ulidan kadagiti agtutubo a lallaki ken babbai. Makatulongda met tapno kanayon nga adda ayat ken talna iti pamilia ken kasta met iti kongregasion. (Tito 2:3-5) Ita, babbai ti kaaduan kadagiti matalek nga agserserbi ken Jehova. (Sal. 68:11) Ngem amintayo, lalaki man wenno babai, adda napateg a pasettayo iti kongregasion. Ilawlawag ti sumaruno nga artikulo no kasano a maaramid dayta ti tunggal maysa kadatayo.