1-2. (a) Apay nga adu ita ti marigatan nga agtalek kadagiti addaan iti autoridad? (b) Ania ti usigentayo iti daytoy nga artikulo?

 ADU ita ti marigatan nga agtalek iti asinoman nga addaan iti autoridad. Makitkitada ngamin a dagiti linteg ken gobierno kaaduanna a pabpaboranda dagiti nabaknang ken naimpluensia a tattao ken ipaidamda ti hustisia kadagiti pobre. Husto laeng ti kuna ti Biblia: “Iturturayan ti tao ti padana a tao iti pakadangranna.” (Ecl. 8:9) Kasta met, adda dagiti lider ti relihion a nakababain dagiti ar-aramidenda, isu a napukawen ti panagtalek ti dadduma a tattao iti Dios. No ngarud adda mayat nga agpayadal kadatayo iti Biblia, masapul a tulongantayo tapno masursurona ti agtalek ken Jehova ken kadagiti inapointaranna a pannakabagina ditoy daga.

² Siempre, saan laeng a dagiti mayad-adalan iti Biblia ti masapul a makasursuro nga agtalek ken Jehova ken iti organisasionna. Uray datayo a nabayagen iti kinapudno, masapul a ditay liplipatan a kanayon a husto ken kasayaatan dagiti ar-aramiden ni Jehova. No dadduma, adda dagiti situasion a mabalin a mangsubok iti panagtalektayo ken Jehova. Iti daytoy nga artikulo, pagsasaritaantayo ti tallo kadagita: (1) bayat a basbasaentayo ti dadduma a salaysay ti Biblia, (2) no makaawattayo iti instruksion manipud iti organisasion ni Jehova, ken (3) no maipasangotayonto kadagiti pannubok.

3. Kasano a mangsubok iti panagtalektayo ken Jehova ti dadduma a salaysay iti Biblia?

 ³ Bayat a basbasaentayo ti Sao ti Dios, mabalin nga adda dagiti saludsodtayo maipapan iti panangtrato ni Jehova iti dadduma  a tattao ken iti dadduma a desision nga inaramidna. Kas pagarigan, iti libro a Numeros, mabasatayo a sinentensiaan ni Jehova ti maysa nga Israelita iti ipapatay gapu ta agum-ummong iti kayo iti aldaw ti Sabbath. Iti maikadua a libro ti Samuel, maammuantayo a ginasut a tawen kalpasanna, pinakawan ni Jehova ni Ari David iti basolna a pannakikamalala ken panangpapatay. (Num. 15:32, 35; 2 Sam. 12:9, 13) Mabalin nga isaludsodtayo, ‘Apay a pinakawan ni Jehova ni David iti basolna a panangpapatay ken pannakikamalala ngem sinentensiaanna ti maysa nga Israelita iti ipapatay ket kasla nalaglag-an met ti basolna?’ Tapno masungbatan dayta, usigentayo ti tallo a banag a masapul a tantandaanantayo bayat a basbasaentayo ti Biblia.

4. Kasano a ti Genesis 18:20, 21 ken Deuteronomio 10:17 patibkerenda ti panagtalektayo kadagiti pangngeddeng ni Jehova?

⁴ Saan a kanayon nga ipaay ti Biblia ti amin a detalye maipapan iti maysa a salaysay. Kas pagarigan, ammotayo a naimpusuan a pinagbabawyan ni David dagiti inaramidna. (Sal. 51:2-4) Ngem ti ngay Israelita a nangsukir iti linteg ti Sabbath? Ania ti kinataona? Nagbabawyanna kadi ti inaramidna? Saan la kadi a namnaminsan a sinukirna dagiti linteg ni Jehova iti napalabas? Saanna kadi nga inkankano dagiti pakdaar wenno linaksidna pay ketdi dagita? Awan ti ibaga ti Biblia. Ngem daytoy ti masiguradotayo: ‘Nalinteg ti amin nga aramid’ ni Jehova. (Deut. 32:4) Ibasbasarna dagiti desisionna iti kompleto nga impormasion​—saan nga iti saosao, manangidumduma a kapanunotan, wenno aniaman a masansan a mangkillo iti pangngeddeng ti tao. (Basaen ti Genesis 18:20, 21; Deuteronomio 10:17.) No ad-adu ti maammuantayo maipapan ken Jehova ken kadagiti pagalagadanna, ad-adda nga agtalektayo kadagiti pangngeddengna. Nupay adda dagiti saludsodtayo maipapan iti basbasaentayo a salaysay ti Biblia a ditay masungbatan ita, umanayen ti ammotayo maipapan iti Diostayo tapno masiguradotayo nga isu ket “nalinteg . . . iti amin a daldalanna.”​—Sal. 145:17.

5. Kasano nga apektaran ti kinaimperpekto ti ibilangtayo a kinahustisia? (Kitaen met ti kahon a “ Ti Kinaimperpekto Apektaranna ti Panangkitatayo iti Kinahustisia.”)

⁵ Ti kinaimperpekto apektaranna ti ibilangtayo a kinahustisia. Pinarsuanatayo ti Dios a kaladladawanna, isu a kayattayo a patas koma ti pannakatrato ti amin a tao. (Gen. 1:26) Ngem gapu ta imperpektotayo, mabalin a kamali ti  panangtingitingtayo kadagiti bambanag, uray no pagarupentayo a kompleto nga impormasion ti iggemtayo. Kas pagarigan, lagipentayo a kasta unay ti suron ni Jonas iti desision ni Jehova a kaasianna dagiti umili ti Nineve. (Jon. 3:10–4:1) Ngem panunotentayo ti resulta dayta. Nasalbar ti biag ti nasurok a 120,000 nga agbabbabawi a taga-Nineve! Ni ngarud Jonas ti masapul a makorehir​—saan a ni Jehova.

6. Apay a saan nga obligado ni Jehova nga ilawlawag kadatayo dagiti desisionna?

⁶ Saan nga obligado ni Jehova nga ilawlawag kadagiti tattao dagiti desisionna. Agpayso nga iti napalabas, impalubos ni Jehova nga iyebkas dagiti adipenna dagiti riknada maipapan kadagiti desision nga inaramidna wenno kadagiti aramidenna pay laeng. (Gen. 18:25; Jon. 4:2, 3) Ken adda dagiti tiempo nga inlawlawagna ti desisionna. (Jon. 4:10, 11) Nupay kasta, saan nga obligado ni Jehova nga ilawlawag kadatayo dagiti desisionna. Kas Namarsua kadatayo, dina kasapulan nga aprobarantayo dagiti desisionna, sakbay nga aramidenna wenno kalpasan nga inaramidna dagita.​—Isa. 40:13, 14; 55:9.

7. Ania a karit ti mabalin a pakaipasanguantayo, ken apay?

⁷ Siento porsiento nga umanamongtayo a kanayon a husto ti ar-aramiden ni Jehova. Ngem mabalin a karit kadatayo ti agtalek kadagiti tattao nga inapointaranna kas pannakabagina. Mabalin a pampanunotentayo no dagiti naikkan iti autoridad iti organisasion ni Jehova ket agdesdesision met laeng sigun kadagiti instruksion ni Jehova wenno iti bukodda a kapanunotan. Posible a kasta ti pampanunoten ti dadduma a tattao idi panawen ti Biblia. Usigentayo dagiti pagarigan iti  parapo 3. Baka pinampanunot ti maysa a kabagian ti Israelita a simmukir iti linteg ti Sabbath no talaga met laeng a nagkonsulta ni Moises ken Jehova sakbay a naipataw ti sentensia nga ipapatay. Ken mabalin nga impapan ti maysa a gayyem ni Urias a Heteo, ti asawa ti nakikamalalaan ni David, nga inusar ti ari ti posisionna tapno malisianna ti pannusa a pakaikarianna koma. Daytoy ti nalawag a kinapudno: saantayo a maibaga nga agtaltalektayo ken Jehova no saantayo nga agtalek kadagiti pannakabagina ditoy daga​—dagidiay pagtaltalkan ni Jehova.

8. Ania ti pagpadaan ti urnos a nadakamat iti Aramid 16:4, 5 ken iti panagandar ita ti kongregasion Kristiano?

⁸ Ita, idadauluan ni Jehova ti naindagaan a paset ti organisasionna babaen “ti matalek ken masirib nga adipen.” (Mat. 24:45) Kas iti bagi a manarawidwid idi umuna a siglo, daytoy nga adipen ti mangay-aywan iti ili ti Dios iti intero a lubong ken mangmangted iti instruksion kadagiti panglakayen iti kongregasion. (Basaen ti Aramid 16:4, 5.) Ipatpatungpal met dagiti panglakayen dagita nga instruksion kadagiti kongregasion. Ipakpakitatayo nga agtaltalektayo a kanayon a husto ti ar-aramiden ni Jehova no agtulnogtayo kadagiti instruksion a maaw-awattayo iti organisasion ken kadagiti panglakayen.

9. Kaano a mabalin a marigatantayo a mangsuporta iti desision dagiti panglakayen, ken apay?

⁹ No dadduma, baka marigatantayo a mangsuporta kadagiti desision dagiti panglakayen. Kas pagarigan, iti nabiit pay a tawtawen, naorganisar manen ti adu a kongregasion ken sirkito. Iti dadduma a situasion, kiniddaw dagiti panglakayen kadagiti agibumbunannag a suportaranda ti dadduma a kongregasion tapno ad-adu a tugaw kadagiti Kingdom Hall-tayo ti mausar agingga a posible. No makiddaw nga umakartayo iti baro a kongregasion, mabalin a marigatantayo a mangpanaw kadagiti gagayyem ken kapamiliatayo. Umaw-awat kadi dagiti  panglakayen iti nadiosan a panangiwanwan a mangibagbaga kadakuada no sadino ti pakitimpuyogan ti tunggal agibumbunannag? Saan. Gapu iti dayta, baka marigatantayo a mangsurot kadagiti instruksionda. Ngem agtaltalek ni Jehova kadagiti panglakayen a mangaramid iti kasta a desision, ket masapul nga agtalektayo met kadakuada. *

10. Maitunos iti Hebreo 13:17, apay a masapul a makikooperartayo kadagiti panglakayen?

¹⁰ Apay a masapul a makikooperartayo kadagiti panglakayen ken suportarantayo dagiti desisionda uray no ditay koma kayat dagita? Ngamin no aramidentayo dayta, tumultulongtayo tapno agtalinaed nga agkaykaysa ti ili ti Dios. (Efe. 4:2, 3) Rumang-ay dagiti kongregasion no sipapakumbaba nga agpasakup ti amin kadagiti desision ti bagi dagiti panglakayen. (Basaen ti Hebreo 13:17.) Napatpateg pay, ipakpakitatayo nga agtaltalektayo ken Jehova no makikooperartayo kadagidiay pagtaltalkanna a mangaywan kadatayo.​—Ara. 20:28.

11. Ania ti mangpatibker iti panagtalektayo kadagiti instruksion kadatayo dagiti panglakayen?

¹¹ Mapatibkertayo ti panagtalektayo kadagiti instruksion a maaw-awattayo kadagiti panglakayen no laglagipentayo nga ikarkararagda nga idalan ida ti nasantuan nga espiritu kadagiti tiempo a pagsasaritaanda dagiti banag a mangapektar iti kongregasion. Usigenda met a naimbag dagiti maitutop a prinsipio ti Biblia ken agkonsultada kadagiti pagannurotan nga ipapaay ti organisasion ni Jehova. Ti talaga a tarigagayda ket paragsaken ni Jehova ken mangipaay iti kasayaatan a panangaywan kadagiti adipenna agingga a posible. Ammo dagitoy a matalek a lallaki a manungsungbatda iti Dios iti pamay-an ti panangasikasoda kadagiti responsabilidadda. (1 Ped. 5:2, 3) Panunotem daytoy: Iti lubong a nasinasina gapu iti puli, relihion, ken politika, ti ili ni Jehova ket agkaykaysa iti panagdaydayaw iti maymaysa a pudno a Dios. Posible laeng daytoy gapu iti panangbendision ni Jehova iti organisasionna!

12. Ania dagiti masapul nga ikonsiderar dagiti panglakayen bayat a tingtingitingenda no agbabbabawi ti nakabasol?

¹² Intalek ni Jehova kadagiti panglakayen ti nadagsen a responsabilidad a pagtalinaeden a nadalus ti kongregasion. No nakaaramid ti maysa a Kristiano iti nadagsen a basol, ekspektaren ni Jehova a tingitingen dagiti panglakayen no dayta a tao ket mabalin nga agtalinaed iti kongregasion. Karaman kadagiti masapul nga ammuenda ket no talaga a maladingitan dayta a tao iti naaramidna. Mabalin nga ibagana nga agbabbabawin, ngem talaga kadi a kagurana ti inaramidna? Determinado kadi a dinan uliten ti basolna? No dakes a kakadua ti nangisungsong kenkuana nga agbasol, situtulok kadi a mangisardeng iti pannakigayyemna kadakuada? Agkararag dagiti panglakayen, usigenda dagiti detalye ken ti ibagbaga ti Biblia, ken tingitingenda ti rikna ti nakabasol iti naaramidanna. Kalpasanna, agdesisionda no mabalin nga agtalinaed iti kongregasion ti nakabasol. Iti dadduma a kaso, masapul a mailaksid ti nakabasol.​—1 Cor. 5:11-13.

13. Ania ti mabalin a reaksiontayo no nailaksid ti maysa a gayyem wenno kabagiantayo?

¹³ Kasano a masubok ti panagtalektayo kadagiti panglakayen? No ti nailaksid ket saantayo a nadekket a gayyem wenno kabagian, mabalin a nalakatayo nga awaten ti desision dagiti panglakayen. Ngem no ngay ti nailaksid ket nadekket kadatayo? Baka ipapantayo a saan nga inkonsiderar dagiti panglakayen ti amin a detalye, wenno mabalin a panunotentayo no talaga met laeng a tinamingda ti kaso iti pamay-an  ni Jehova. Ania ti makatulong kadatayo tapno umiso ti reaksiontayo iti naaramid a desision?

14. Ania ti makatulong kadatayo no inkeddeng dagiti panglakayen a mailaksid ti maysa a nadekket kadatayo?

¹⁴ Masapul a laglagipentayo a ti panangilaksid ket urnos ni Jehova ken pagsayaatan ti kongregasion ken mabalin nga uray ti nakabasol. No mapalubosan ti maysa a nakabasol nga agtalinaed iti kongregasion, mabalin nga impluensiaanna ti dadduma nga agbasol. (Gal. 5:9) Baka dina pay ketdi mabigbig ti kadagsen ti basolna, ken mabalin a dina makita ti rason a masapul a balbaliwanna ti panagpampanunot ken aramidna tapno maawatna manen ti pabor ni Jehova. (Ecl. 8:11) Masiguradotayo nga ibilang dagiti panglakayen a serioso a responsabilidad ti panangikeddengda no mailaksid ti maysa. Kas kadagiti ukom iti nagkauna nga Israel, bigbigenda a ‘mangukomda saan a para iti tao no di ket para ken Jehova.’​—2 Cron. 19:6, 7.

15. Apay a masapul a lallalo nga agtalektayo ita iti instruksion ni Jehova?

¹⁵ Bayat nga umas-asideg ti panungpalan daytoy sistema ti bambanag, masapul a lallalo nga agtalektayo ita a kanayon a husto ti ar-aramiden ni Jehova. Apay? Bayat ti dakkel a rigat, mabalin a makaawattayo kadagiti instruksion a kasla karkarna, saan a praktikal, wenno saan a lohikal. Siempre, saanto a personal a makisarita ni Jehova kadatayo. Posible a mangipaayto iti instruksion babaen kadagiti inapointaranna a pannakabagina. Saanto a pulos a tiempo dayta a pagduaduaantayo ti instruksion wenno panunotentayo, ‘Talaga kadi a naggapu ken Jehova dayta, wenno inar-aramid laeng dagiti mangidadaulo a kakabsat?’ Agtalekkanto kadi ken Jehova ken iti organisasionna bayat dayta a nagpateg a tiempo? Ti sungbat dayta a saludsod ket agdepende iti reaksionmo ita kadagiti instruksion ti organisasion ti Dios. No agtalek ken sisasaganaka nga agtulnog kadagiti instruksion a maaw-awattayo ita, posible unay a kastanto met ti aramidem bayat ti dakkel a rigat.​—Luc. 16:10.

16. Kasano a masubok iti asidegen a masanguanan ti panagtalektayo kadagiti panangukom ni Jehova?

¹⁶ Adda pay ti sabali a masapul nga ikabilangantayo​—ti reaksiontayo kadagiti panangukom ni Jehova iti panungpalan daytoy sistema ti bambanag. Ita, mangnamnamatayo nga adu kadagiti saan nga agserserbi ken Jehova, agraman dagiti saan a Saksi a kabagiantayo, ti agdaydayawto kenkuana sakbay ti panungpalan. Ngem inton Armagedon, ni Jehova, babaen ken Jesus, ti mangaramid iti pinal a desision maipapan iti masakbayanda. (Mat. 25:31-33; 2 Tes. 1:7-9) Saan a datayo ti agdesision no siasino laeng ti kaasianto ni Jehova. (Mat. 25:34,  41, 46) Makapagtalektayto kadi kadagiti panangukom ni Jehova, wenno maitibkoltayto kadagita? Nalawag a masapul a patibkerentayo ti panagtalektayo ken Jehova itan tapno siento porsiento a makapagtalektayo kenkuana iti masanguanan.

17. Kasano a pagimbagantayo dagiti panangukom ni Jehova iti panungpalan daytoy sistema ti bambanag?

¹⁷ Imadyinentayo no kasanotayto karagsak iti baro a lubong ti Dios inton makitatayo ti resulta dagiti panangukom ni Jehova. Mapukawton ti ulbod a relihion ken ti naagum a sistema ti komersio, agraman ti napolitikaan a sistema a nangimameg ken nabayag a nangparigat kadagiti tattao. Ditayton agsakit, lumakay wenno bumaket, ken matayan iti patpatgen. Maipupokto ni Satanas ken dagiti demoniona iti sangaribu a tawen. Awanton dagiti dakes nga epekto ti panagrebeldeda. (Apoc. 20:2, 3) Napalalonto ti panagyamantayo ta nagtalektayo a kanayon a husto ti ar-aramiden ni Jehova!

18. Ania dagiti leksion a masursurotayo iti inaramid dagiti Israelita a mabasa iti Numeros 11:4-6 ken 21:5?

¹⁸ Idiay baro a lubong ti Dios, addanto ngata dagiti karit a mangsubok iti panagtalektayo a kanayon a husto ti ar-aramiden ni Jehova? Usigentayo ti napasamak di nagbayag kalpasan a nawayawayaan dagiti Israelita iti pannakaadipenda idiay Egipto. Adda dagiti nagreklamo gapu ta mailiwdan kadagiti sadiwa ken presko a kinkinnanda idi addada sadiay ken imbilangda a makauma ti manna nga ipapaay ni Jehova. (Basaen ti Numeros 11:4-6; 21:5.) Posible ngata a kastanto met ti mapanunottayo kalpasan nga agpatingga ti dakkel a rigat? Ditay ammo no kasanonto kadakkel ti trabaho a kasapulan tapno maikkat dagiti epekto ti pannakadadael ken in-inut a mapagbalin a paraiso ti daga. Sigurado nga adunto ti trabahuentayo ken mabalin a saan a kombiniente ti kasasaadtayo iti damo. Maituredtayto kadi ti agreklamo maipapan kadagiti ipaay ni Jehova iti dayta a tiempo? Maysa a banag ti sigurado: No mas apresiarentayo dagiti probision ni Jehova ita, mas posible a kastanto met ti aramidentayo iti dayta a tiempo.

19. Isumariom dagiti kangrunaan a punto iti daytoy nga artikulo.

¹⁹ Kanayon a husto ti ar-aramiden ni Jehova. Masapul a kombinsidotayo iti dayta. Masapul met nga agtalektayo kadagidiay pagtaltalkan ni Jehova a mangipatungpal kadagiti instruksionna. Ditay pulos liplipatan ti imbaga ni Jehova babaen ken propeta Isaias: “Napigsakayo no agtalinaedkayo a kalmado ken no agtalekkayo.”​—Isa. 30:15.