1. Ania a klase ti pammagbaga ti mabalin a maawattayo, ken apay a kasapulantayo amin dayta?

 AMINTAYO ket agkasapulan no dadduma iti pammagbaga. Adda dagiti situasion a datayo ti umuna nga agpabalakad iti maysa a raraementayo. Adda met dagiti kasasaad a mabalin nga asitgannatayo ti maysa a maseknan a kabsat ken sipaprangka nga ibagana kadatayo a dandanitayon makaaramid iti “di umiso”​—banag a pagbabawyantayto. (Gal. 6:1) Wenno mabalin a makaawattayo iti pammagbaga a mangkorehir kalpasan a nakaaramidtayo iti nakaro a kamali. Aniaman a klase ti pammagbaga ti maawattayo, masapul a dumngegtayo iti dayta. Pagsayaatantayo ken masalbar ti biagtayo no aramidentayo dayta!​—Prov. 6:23.

2. Maitunos iti Proverbio 12:15, apay a masapul a dumngegtayo iti pammagbaga?

² Iparparegta ti pannakatema a tekstotayo a ‘dumngegtayo iti ibaga ti masirib.’ (Prov. 22:17) Awan ti tao nga ammona ti amin; adda nga adda ti tao a nalalaing wenno mas eksperiensiado ngem datayo. (Basaen ti Proverbio 12:15.) Pagilasinan ngarud iti kinapakumbaba no dumngegtayo iti pammagbaga. Ipakita dayta nga ammotayo dagiti limitasiontayo; ken bigbigentayo a kasapulantayo ti tulong tapno maragpattayo dagiti kalattayo. Iti panangiwanwan ti Dios, insurat ni masirib nga Ari Solomon: “Adda maitungpal no adu ti mamalbalakad [wenno “mammagbaga,” ftn.].”​—Prov. 15:22.

3. Kadagiti ania a pamay-an a makaawattayo iti pammagbaga?

³ Mabalin a makaawattayo iti saan a direkta wenno direkta a pammagbaga. Ania ti kayat a sawen ti saan a direkta a pammagbaga? Mabalin nga adda mabasatayo iti Biblia wenno iti maysa kadagiti publikasiontayo a mamagpanunot kadatayo no husto met laeng dagiti ar-aramidentayo ken mangtignay kadatayo nga  agbalbaliw. (Heb. 4:12) Maawagan dayta iti saan a direkta a pammagbaga. Ti ngay met direkta a pammagbaga? Mabalin nga adda panglakayen wenno sabali a kualipikado a kabsat a mangibaga kadatayo no ania ti masapul a parang-ayentayo. Maawagan dayta iti direkta a pammagbaga. No adda mangbalakad kadatayo manipud iti Biblia gapu ta ay-ayatennatayo unay, masapul nga apresiaren, denggen, ken ipapusotayo dayta.

4. Sigun iti Eclesiastes 7:9, ania koma ti ditay ar-aramiden no makaawattayo iti pammagbaga?

⁴ Kinaagpaysuanna, mabalin a marigatantayo unay a mangakseptar iti direkta a pammagbaga. Baka agsakit pay ketdi ti nakemtayo. Apay? Nupay nalakatayo nga aminen nga imperpektotayo, mabalin a marigatantayo a mangakseptar iti pammagbaga no espesipiko a maibaga kadatayo ti kamalitayo. (Basaen ti Eclesiastes 7:9.) Baka agikalintegantayo. Baka kuestionarantayo dagiti motibo ti nangbagbaga kadatayo wenno sakiten ti nakemtayo ti pamay-anna a nangbagbaga. Baka ibirokantayo pay ketdi iti kamali ti nangbagbaga kadatayo, ken panunotentayo: ‘Ania koma ti karbenganna a mangbagbaga kaniak? Uray isuna met agkamkamali!’ Ket no ditay kayat ti pammagbaga, baka ditay ikankano dayta, wenno umasidegtayo iti sabali a ti pammagbagana ti kayattayo a denggen.

5. Ania ti usigentayo iti daytoy nga artikulo?

⁵ Iti daytoy nga artikulo, pagsasaritaantayo dagiti karakter iti Biblia a nangilaksid iti pammagbaga ken dagidiay nangakseptar iti dayta. Usigentayo met no ania ti makatulong tapno maakseptartayo ti pammagbaga ken magunggonaantayo iti dayta.

6. Ania ti masursurotayo iti reaksion ni Ari Rehoboam iti pammagbaga a naawatna?

⁶ Usigentayo ti inaramid ni Rehoboam. Idi nagbalin nga ari ti Israel, adda kiniddaw kenkuana dagiti iturturayanna. Impakaasida a palag-anenna ti nadagsen nga awit nga impabaklay kadakuada ni Solomon nga amana. Nasayaat ta nagkonsulta ni Rehoboam kadagiti lallakay ti Israel tapno maammuanna no ania ti masapul nga isungbatna kadagiti umili. Imbalakad dagiti lallakay iti ari a no patganna ti kiddaw dagiti umili, kanayonto a suportaranda isuna. (1 Ar. 12:3-7) Agparang a saan a napnek ni Rehoboam iti dayta a balakad, isu a nagkonsulta kadagiti kapatadanna a lallaki. Posible nga agarup 40 ti tawen dagidiay a lallaki, isu nga adda metten kapadasanda iti biag. (2 Cron. 12:13) Ngem iti daytoy a gundaway, dakes ti imbalakadda ken Rehoboam. Imbagada a nayonanna ti nadagsen nga awit dagiti umili. (1 Ar. 12:8-11) Gapu ta agduma ti naibalakad ken Rehoboam, mabalin koma a nagkararag ken Jehova tapno agkonsulta no ania a balakad ti masapul a surotenna. Ngem inkeddengna a suroten ti ad-adda a magustuan ti lapayagna ket inaramidna ti imbaga dagiti ub-ubing a nangbalakad kenkuana. Makadidigra ken Rehoboam ken kadagiti umili ti Israel dagiti resulta dayta. Datayo met ngay? Mabalin a saan a kanayon a ti kayattayo a denggen ti maawattayo a balakad. Ngem no naibatay dayta iti Sao ti Dios, masapul nga akseptarentayo.

7. Ania ti masursurotayo iti inaramid ni Ari Uzias?

⁷ Linaksid ni Ari Uzias ti pammagbaga. Napan iti paset ti templo ni Jehova a dagiti laeng papadi ti maipalubos a sumrek, ken pinadasna ti agpuor iti insienso. Imbaga kenkuana dagiti papadi ni Jehova: “Saan nga umiso, Uzias, nga agpuorka iti insienso para ken Jehova! Dagiti laeng papadi ti rumbeng nga agpuor iti insienso.” Ania ti reaksion ni Uzias? No sipapakumbaba nga inakseptarna ti pammagbaga ken pimmanaw a dagus iti templo, posible koma a pinakawan ni Jehova. Ngem “nakapungtot ni Uzias.” Apay a linaksidna ti pammagbaga? Nalawag a  nariknana a gapu ta isu ti ari, adda kalinteganna a mangaramid iti aniaman a kayatna. Ngem saan a nagustuan ni Jehova ti inaramidna. Kas resulta ti kinatangsitna, nagkukutel ni Uzias ken ‘nagtalinaed nga agkukutel agingga iti aldaw ti ipapatayna.’ (2 Cron. 26:16-21) Isuro kadatayo ti inaramid ni Uzias nga uray asinotayo man, no laksidentayo ti pammagbaga a naibatay iti Biblia, mapukawtayo ti pabor ni Jehova.

8. Ania ti reaksion ni Job iti pammagbaga?

⁸ Napagsasaritaantayon dagiti mamakdaar a pagarigan. Kitaentayo met ita dagidiay nasayaat a pagarigan iti Biblia a nabendisionan ta inakseptarda ti pammagbaga. Usigentayo ni Job. Uray no adda panagbutengna iti Dios, isu ket saan a perpekto. Gapu iti nakaro a rigat a mapaspasaranna, nakaibaga kadagiti di umiso a kapanunotan. Kas resultana, nakaawat iti direkta a pammagbaga, manipud ken Elihu ken ni Jehova. Ania ti reaksion ni Job? Sipapakumbaba nga inakseptarna ti pammagbaga. Kinunana: “Nagsaoak ngarud ngem diak idi maaw-awatan ti ibagbagak . . . Ibabawik dagiti imbagak, ken agbabawiak iti tapok ken dapdapo.” Binendisionan ni Jehova ni Job gapu iti kinapakumbabana.​—Job 42:3-6, 12-17.

9. Apay a nasayaat nga ulidan ni Moises no iti panangakseptar iti pammagbaga?

⁹ Ni Moises ket nasayaat a pagarigan ti maysa a nangakseptar iti panangkorehir kalpasan a nakaaramid iti nakaro a kamali. Naminsan, nakaunget ken dina pinadayawan ni Jehova. Gapu iti dayta, napukaw ni Moises ti pribilehiona a sumrek iti Naikari a Daga. (Num. 20:1-13) Impakaasi ni Moises a baliwan koma ni Jehova ti desisionna. Ngem kinuna ni Jehova: “Saanmon nga ibagbaga kaniak dayta.” (Deut. 3:23-27) Saan a nagsakit ti nakem ni Moises. Inakseptarna ketdi ti desision ni Jehova, isu nga intultuloy ni Jehova nga usaren isuna a mangidalan iti Israel. (Deut. 4:1) Agpada da Job ken Moises a nasayaat a pagtuladantayo no iti panangakseptar iti pammagbaga. Binaliwan ni Job ti panangmatmatna; saan a nagrason. Pinaneknekan ni Moises nga inakseptarna ti pammagbaga ni Jehova ta nagtalinaed a matalek uray napukawna ti ipatpategna a pribilehio.

10. (a) Ania dagiti pagsayaatan nga ibaga ti Proverbio 4:10-13 iti panangakseptar iti pammagbaga? (b) Ania a nasayaat a reaksion ti impakita ti dadduma idi nakaawatda iti pammagbaga?

¹⁰ Pagsayaatantayo no tuladentayo dagiti matalek a lallaki a kas kada Job ken Moises. (Basaen ti Proverbio 4:10-13.) Kasta ti inaramid ti adu a kakabsattayo a lallaki ken babbai. Siputanyo ti imbaga ti kabsat a ni Emmanuel a taga-Congo maipapan iti pakdaar a naawatna: “Nakita dagiti kakongregasionko a nataengan iti naespirituan a dandaniakon lumned iti naespirituan, isu nga inkagumaandak nga alawen. Inyaplikarko ti pammagbagada, isu a naliklikak ti adu a problema.” * Kinuna ti payunir a taga-Canada nga agnagan Megan maipapan iti pammagbaga: “Saan a dayta ti kayatko koma a mangngeg, ngem dayta ti kasapulak idi.” Kinuna met ni Marko a maysa a kabsat idiay Croatia: “Napukawko ti pribilehiok iti kongregasion. Ngem no panunotek ti napasamak, maamirisko no kua a nakatulong ti pammagbaga a naawatko tapno tumibker manen ti relasionko ken Jehova.”

11. Ania ti imbaga ni Brother Karl Klein maipapan iti panangakseptar iti pammagbaga?

¹¹ Ti sabali pay a pagarigan a nagsayaatanna ti panangakseptar iti pammagbaga ket ni Brother Karl Klein, a nagserbi kas miembro ti Bagi a Manarawidwid. Iti pakasaritaan ti biag ni Brother Klein, inyestoriana nga adda idi tiempo a tinubngar isuna ni Joseph F. Rutherford, a nadekket a gayyemna. Inamin ni Brother Klein nga idi damo, madi ti reaksionna iti pammagbaga a naawatna. Imbagana: “Idi nagkitakami  manen [ken Brother Rutherford], siraragsak a kinunana, ‘Hello Karl!’ Ngem gapu ta nasakit pay la ti riknak, kinablaawak laeng iti nakapsut. Insungbatna, ‘Karl, agannadka! Kamkamatennaka ti Diablo!’ Nabainanak isu nga imbagak, ‘Ay, awan daydiayen, Brother Rutherford.’ Ngem ammona ti agpayso, isu nga inulitna ti pakdaarna, ‘Saan a bale. Basta agannadka. Kamkamatennaka ti Diablo.’ Husto isuna! No adda ing-ingpentayo a sakit ti nakem a maibusor iti maysa a kabsat, nangruna no adda naisaona a banag nga adda kalinteganna a mangibaga . . . , isarsarangtayo ti bagitayo kadagiti silo ti Diablo.” * (Efe. 4:25-27) Inakseptar ni Brother Klein ti pammagbaga ni Brother Rutherford, isu a nagtalinaedda a nadekket nga aggayyem.

12. Kasano a makatulong ti kinapakumbaba tapno maakseptartayo ti pammagbaga? (Salmo 141:5)

¹² Ania ti makatulong kadatayo a mangakseptar iti pammagbaga? Masapul nga agbalintayo a napakumbaba ken laglagipentayo nga imperpektotayo ken makaaramidtayo iti minamaag no dadduma. Kas naadaltayon, kamali idi ti panangmatmat ni Job. Ngem binalbaliwanna ti panagpampanunotna, isu a binendisionan ni Jehova. Apay? Gapu ta napakumbaba ni Job. Pinaneknekanna a napakumbaba ta inakseptarna ti pammagbaga ni Elihu, uray no adayo nga ub-ubing ngem isuna. (Job 32:6, 7) Kasta met, makatulong ti kinapakumbaba tapno mayaplikartayo ti pammagbaga, uray mariknatayo a ditay maikari iti dayta wenno ub-ubing ngem datayo ti mangbagbaga. Kinuna ti maysa a panglakayen idiay Canada, “Gapu ta saantayo a makita ti bagitayo a kas iti panangkita ti dadduma, kasanotayo a rumang-ay no awan ti mangbagbaga kadatayo?” Asino kadatayo ti dina kasapulan ti rumang-ay iti panangyaplikarna iti bunga ti espiritu ken iti panangitungpalna iti Nakristianuan a ministerio?​—Basaen ti Salmo 141:5.

13. Ania koma ti pangibilangantayo iti pammagbaga a maawattayo?

¹³ Ibilangtayo ti pammagbaga kas ebkas ti ayat ti Dios. Kayat ni Jehova ti kasayaatan para kadatayo. (Prov. 4:20-22) No bagbagaannatayo babaen ti Saona, naibatay-Biblia a publikasion, wenno kapammatian a nataengan iti naespirituan, ipakpakitana nga ay-ayatennatayo. “Ar-aramidenna dayta a pagsayaatantayo,” kuna ti Hebreo 12:9, 10.

14. Ania koma ti pagpokusantayo no mabagbagaantayo?

¹⁴ Agpokus iti pammagbaga, saan a ti pannakaibagana. No dadduma, baka mariknatayo a saan a naited ti pammagbaga iti kasayaatan a pamay-an. Siempre, asinoman a mangbalakad masapul nga ikagumaanna a nasayaat koma ti panagsaad ti pammagbagana tapno nalaka  a maakseptar dayta. * (Gal. 6:1) Ngem no datayo ti mabagbagaan, nasayaat no agpokustayo iti mensahe​—uray no panagriknatayo ket adda pay koma ti nasaysayaat a pannakaibaga dayta. Mabalin nga isaludsodtayo iti bagitayo: ‘Uray no diak magustuan ti pannakaited ti pammagbaga, adda kadi masursurok iti ibagbagana? Mabalinko kadi a palabsen ti kinaimperpekto ti mangibagbaga ken agpokusak iti mismo a pammagbaga?’ Masiribtayo no panunotentayo no kasano a makatulong ti aniaman a pammagbaga a maawattayo.​—Prov. 15:31.

15. Apay a masapul nga agkiddawtayo iti pammagbaga?

¹⁵ Iparparegta ti Biblia nga agkiddawtayo iti pammagbaga. Kuna ti Proverbio 13:10: “Masirib dagidiay agpabalakad.” Agpayso dayta! Dagidiay agkiddaw iti pammagbaga imbes nga urayenda nga adda mangbagbaga kadakuada ket masansan a narangrang-ay iti naespirituan ngem kadagidiay saan nga agpabpabalakad. Isu a sikan ti agdisnudo nga agkiddaw iti pammagbaga.

16. Kadagiti ania a situasion a mabalintayo nga agkiddaw iti pammagbaga?

¹⁶ Kaano nga agkiddawtayo iti pammagbaga kadagiti kapammatiantayo? Usigentayo ti sumagmamano a situasion. (1) Adda sister a nagkiddaw iti maysa nga eksperiensiado a kabsat a makikadua iti panangyadalna sa agpabalakad kalpasanna no kasanona a maparang-ay dagiti teknikna a mangisuro. (2) Kayat ti maysa a single a sister ti gumatang iti pantalon, isu a dinamagna iti maysa a nataengan a sister no ania ti agpayso a makunana iti pilina. (3) Damdamo ti maysa a brother ti mangipaay iti palawag publiko. Kiniddawna iti maysa nga eksperiensiado nga ispiker a dumngeg a naimbag iti palawagna ken ibagana no ania dagiti parang-ayenna. Uray ti brother nga adun a tawen nga agpalpalawag pagsayaatanna no agkiddaw iti kasta a balakad kadagiti eksperiensiado nga ispiker ken iyaplikarna ti pammagbagada.

17. Ania ti aramidentayo tapno magunggonaantayo iti pammagbaga?

¹⁷ Kadagiti sumaruno a lawas wenno bulan, amintayo ket makaawatto iti pammagbaga​—direkta man wenno saan a direkta. No mapasamak dayta, laglagipentayo dagiti leksion a napagsasaritaantayo. Agtalinaedka a napakumbaba. Agpokuska iti pammagbaga, saan nga iti pannakaibagana, ken iyaplikarmo dagiti naawatmo a pammagbaga. Awan kadatayo ti nayanak a masirib. Ngem no ‘denggentayo ti balakad ken awatentayo ti disiplina,’ ikari ti Sao ti Dios nga agbalintayto a “masirib.”​—Prov. 19:20.