ADDA dagiti tiempo nga inulit-ulit dagiti nangisurat iti Biblia ti isu met la a sasao. Kitaentayo ti tallo a posible a rason nga inaramidda dayta:

Ti tiempo a naisurat dayta. Kaaduan nga umili iti nagkauna nga Israel ket awan bukodna a kopia ti Linteg. Kaaduanna a mangngegda ti pannakaibasa ti Linteg no agtataripnongda amin iti tabernakulo. (Deut. 31:​10-12) Kas dakkel a grupo, sigurado nga adda dagiti makasinga bayat a dumdumngeg ken agtaktakderda iti sumagmamano nga oras. (Neh. 8:​2, 3, 7) Kadagiti kasta a panagtataripnong, nakatulong ti panangulit kadagiti kangrunaan a sasao tapno nalaklaka a malagip ken mayaplikar dagiti umili ti naibasa a kasuratan. Ti panangulit kadagita a sasao ti nangnangruna a nakatulong tapno matandaananda dagiti detalyado a banag, kas kadagiti regulasion ken pangngeddeng ti Dios.—Lev. 18:​4-22; Deut. 5:1.

Ti pamay-an ti pannakaisurat dayta. Agarup 10 a porsiento iti Biblia ket naputar a kanta—a pakairamanan ti Salmo, Kanta ni Solomon, ken Un-unnoy. No dadduma, naglaon dagita a kanta iti koro. Dayta ti nangipaganetget iti tema ti naputar a kanta ken nakatulong kadagiti dumdumngeg a mangikabesa kadagiti liriko. Kas pagarigan, kitaem ti mabasa iti Salmo 115:​9-11: “O Israel, agtalekkayo ken Jehova—Isu ti katulongan ken kalasagyo. O sangakabbalayan ni Aaron, agtalekkayo ken Jehova—Isu ti katulongan ken kalasagyo. Dakayo nga agbuteng ken Jehova, agtalekkayo ken Jehova—Isu ti katulongan ken kalasagyo.” Nakitam kadi no kasano a nakatulong ti panangulit kadagita a sasao tapno dagiti napateg a kinapudno ket mayukuok iti isip ken puso dagiti kumakanta?

Ti kinapateg ti panangipaganetget kadagiti importante a banag. Adda dagiti tiempo nga inulit-ulit dagiti nangisurat iti Biblia dagiti napateg a sasao. Kas pagarigan, idi imbilin ni Jehova kadagiti Israelita a saanda a mangan iti dara, imbilinna ken Moises nga ulit-ulitenna nga ibaga ti rason. Kayat ti Dios nga ipaganetget a ti biag ti tunggal parsua ket adda iti dara, kayatna a sawen, ti dara ti mangirepresentar iti biag. (Lev. 17:​11, 14) Idi agangay, insurat dagiti apostol ken panglakayen idiay Jerusalem dagiti masapul nga aramiden dagiti Kristiano tapno maparagsakda ti Dios. Impaganetgetda manen a masapul a liklikanda ti dara.—Ara. 15:​20, 29.

Nupay adda dagiti sasao a naulit-ulit iti Biblia, di kayat a sawen dayta a kayat ni Jehova nga ulit-ulitentayo dagita. Kas pagarigan, imbaga ni Jesus: “No agkararagkayo, diyo ulit-uliten ti isu met laeng a sasao.” (Mat. 6:7) Kalpasanna, dinakamatna dagiti banag a mabalintayo nga iraman iti kararagtayo a maitunos iti pagayatan ti Dios. (Mat. 6:​9-13) Isu a nupay saantayo nga ulit-uliten ti isu met la a sasao kadagiti kararagtayo, mabalintayo met latta nga uliten nga ikararag dagiti isu met la a banag.—Mat. 7:​7-11.

Adda ngarud nasayaat a rason nga adda dagiti naulit-ulit a sasao iti Biblia. Maysa dayta iti adu a pamay-an nga isursuronatayo ti Naindaklan nga Instruktortayo tapno magunggonaantayo.—Isa. 48:​17, 18.