IDI Mierkoles, Enero 18, 2023, adda espesial a pakaammo iti jw.org a da Brother Gage Fleegle ken Jeffrey Winder ket naapointaran nga agserbi kas miembro ti Bagi a Manarawidwid dagiti Saksi ni Jehova. Agpadada a nabayagen a simamatalek nga agserserbi ken Jehova.

Ni Brother Fleegle ket pinadakkel dagiti Saksi a nagannakna iti makinlaud a Pennsylvania, U.S.A. Idi tin-edyer, immakarda a sangapamiliaan iti bassit nga ili nga addaan iti dakdakkel a panagkasapulan. Di nagbayag, nagpabautisar idi Nobiembre 20, 1988.

Kanayon a pinaregta dagiti nagannakna nga agpayunir. Masansan a nangawisda kadagiti manangaywan iti sirkito ken Bethelite iti balayda. Nakita ni Brother Fleegle no kasano karagsak dagita a kakabsat. Di nagbayag kalpasan a nagpabautisar, rinugiannan ti ag-regular pioneer idi Septiembre 1, 1989. Dua a tawen kalpasanna, natungpal met laengen ti kalatna idi 12 ti tawenna—ti agserbi iti Bethel. Ket idi Oktubre 1991, rinugiannan ti agserbi iti Brooklyn Bethel.

Iti Bethel, nagtrabaho ni Brother Fleegle iti Bindery (pagaramidan iti libro) iti walo a tawen. Kalpasanna, nayakar iti Service Department. Bayat dayta a tiempo, naitimpuyog iti sumagmamano a tawen iti Russian a kongregasion. Idi 2006, inkasarna ni Nadia ket nagkaduadan a nagserbi iti Bethel ken timmulong iti panangasaba kadagiti agsasao iti Portugues. Ket iti nasurok a 10 a tawen, timmulongda met iti panangasaba kadagiti agsasao iti Spanish. Kalpasan ti adu a tawen a panagserbi ni Brother Fleegle iti Service Department, nayakar iti Teaching Committee Office ken idi agangay, iti Service Committee Office. Idi Marso 2022, naapointaran kas katulongan ti Service Committee ti Bagi a Manarawidwid.

Dimmakkel ni Brother Winder idiay Murrieta, California, U.S.A. Insuro kenkuana dagiti nagannakna  ti kinapudno ket nagpabautisar idi Marso 29, 1986. Dagus a nag-auxiliary pioneer ni Brother Winder iti simmaruno a bulan. Nagustuanna unay dayta isu nga intuloyna iti sumagmamano pay a bulan. Idi Oktubre 1, 1986, nangrugin nga ag-regular pioneer.

Idi tin-edyeren, binisitana ti dua a manongna nga agserserbi idi iti Bethel. Gapu iti dayta, nagbalin a kalatna ti agserbi iti Bethel. Ket idi Mayo 1990, naawis nga agserbi iti pasilidad ti Bethel idiay Wallkill.

Iti Bethel, nagtrabaho ni Brother Winder iti nadumaduma a departamento, a pakairamanan ti Cleaning Department, Farm Department, ken Bethel Office. Idi 1997, inkasarna ni Angela. Sipud idi, agkaduadan nga agserserbi iti Bethel. Idi 2014, nayakarda idiay Warwick, ket timmulong ni Brother Winder iti pannakaibangon ti pasilidad ti sangalubongan a hedkuarter. Idi 2016, nayakarda iti Watchtower Educational Center iti Patterson ket nagtrabaho ni Brother Winder iti Audio/Video Services. Uppat a tawen kalpasanna, nagsublida idiay Warwick, ket nai-assign ni Brother Winder iti Personnel Committee Office. Idi Marso 2022, naapointaran kas katulongan ti Personnel Committee ti Bagi a Manarawidwid.

Ikarkararagtayo ken Jehova nga ipaayanna dagitoy a “lallaki a kas sagut” iti aglaplapusanan a bendision bayat nga itultuloyda ti sipipinget a panagtrabahoda para kadagiti interes ti Pagarian.—Efe. 4:8.