1. Kaano nga addan idiay langit ti amin a dinutokan ti espiritu?

 ADUN a tawen ti napalabas, pampanunoten dagiti agserserbi ken Jehova, ‘Kaano nga addan idiay langit ti kaudian kadagiti Kristiano a dinutokan ti espiritu?’ Impagaruptayo idi a posible nga agtalinaed iti Paraiso a daga iti sumagmamano a tiempo ti dadduma kadagiti dinutokan ti espiritu kalpasan ti gubat ti Armagedon. Ngem iti Hulio 15, 2013 a ruar Ti Pagwanawanan, naammuantayo nga amin a dinutokan ti espiritu nga adda pay la ditoy daga ket addanton idiay langit sakbay ti Armagedon.—Mat. 24:31.

2. Ania ti mabalin a tumaud a saludsod, ken ania ti usigentayo iti daytoy nga artikulo?

² Ngem mabalin nga adda mangisaludsod: Anianto ti mapasamak iti ‘sabsabali a karnero’ ni Kristo nga agserserbi ken Jehova a simamatalek ditoy daga bayat ti “dakkel a rigat”? (Juan 10:16; Mat. 24:21) Baka madanagan ti dadduma ita a didanto ammo ti aramidenda wenno mabaybay-anda inton dagiti maipatpateg a dinutokan ti espiritu ket addan idiay langit. Usigentayo ti dua a salaysay ti Biblia a mabalin nga isu ti makagapu a mapanunotda dayta. Kalpasanna, pagsasaritaantayo dagiti rason no apay a masapul a saantayo a madanagan.

ANIA TI SAANTO A MAPASAMAK?

3-4. Ania ti mabalin a mapanunot ti dadduma, ken apay?

³ Nalabit mapanunot ti dadduma a sumardengton nga agserbi ken Jehova ti sabsabali a karnero no awanen ti Bagi a Manarawidwid  a mangiwanwan kadakuada. Apay a kasta ti mapanunotda? Baka adda ngamin dagiti salaysay ti Biblia a nangriing iti kasta a panagdanagda. Usigentayo ti dua a pagarigan. Ti umuna ket ti napasamak idi natayen ti Nangato a Padi a ni Jehoiada a matalek nga adipen ti Dios. Duada idi ken baketna a Jehosabeat a nangsalaknib ken Jehoas idi ubing pay. Tinulonganda nga agbalin a nasayaat ken matalek nga ari. Bayat a sibibiag ti lakay idin a ni Jehoiada, nagtalinaed a matalek ni Jehoas. Ngem idi natayen ni Jehoiada, nagbalin a dakes ni Jehoas. Dimngeg ngamin kadagiti dakes a prinsipe ket pinanawanna ni Jehova.—2 Cron. 24:​2, 15-19.

⁴ Ti sumaruno a pagarigan ket dagiti Kristiano idi maikadua a siglo. Ni Juan ti kaudian a natay nga apostol. Nasayaat idi ti impluensiana iti adu a Kristiano. Tinulonganna ida nga agibtur bayat ti panagserbida ken Jehova. (3 Juan 4) Kas iti dadduma a matalek nga apostol ni Jesus, inkagumaan ni Juan a labanan ti apostasia nga agsaksaknap idin. (1 Juan 2:18; kitaen dagiti study note ti 2 Tes. 2:7.) Ngem idi natayen ni Juan, ti apostasia ket nagbiit a nagramaram a kas iti uram. Iti sumagmamano a dekada, naan-anayen a naapektaran ti amin a kongregasion.

5. Ania koma ti saantayo a panunoten maipapan kadagita a dua a salaysay?

⁵ Dagita kadi a dua a salaysay ti Biblia ti mangipakita a no addan idiay langit dagiti dinutokan ti espiritu, baka mangruginton nga agaramid iti dakes ti sabsabali a karnero ni Kristo, kas iti inaramid idi ni Jehoas? Wenno agapostatada a kas iti napasamak kadagiti Kristiano idi maikadua a siglo idi natayen dagiti apostol? Sigurado a saan! Masiguradotayo a no awanen ditoy daga dagiti dinutokan ti espiritu, maaywananto a naimbag ti sabsabali a karnero ken rumang-ayda iti naespirituan. Apay a masiguradotayo dayta?

SAANTO A MARUGITAN TI NADALUS A PANAGDAYDAYAW

6. Ania ti tallo a tiempo a pagsasaritaantayo?

⁶ Apay a makapagtalektayo a saanto a marugitan ti nadalus a panagdaydayaw uray kadagiti narigat a tiempo iti masanguanan? Ilawlawag ngamin ti Biblia a ti tiempo a pagbibiagantayo ket naiduma unay iti tiempo dagiti nagkauna nga Israelita ken iti tiempo kalpasan a natay dagiti apostol idi maikadua a siglo. Usigentayo dagitoy a tallo a tiempo: (1) Ti tiempo ti nagkauna nga Israel, (2) ti tiempo kalpasan a natay dagiti apostol, ken (3) ti tiempotayo, “ti tiempo a pannakaisubli ti amin a banag.”—Ara. 3:21.

7. Idi tiempo ti nagkauna nga Israel, apay a saan a naupay dagiti matalek a tattao uray no nagaramid iti dakes ti adu nga Israelita ken ti adu nga ari ti nasionda?

⁷ Ti tiempo ti nagkauna nga Israel. Di nagbayag kalpasan ti ipapatay ni Moises, imbagana kadagiti Israelita: “Ammok a kalpasan ti ipapatayko, agaramidkayto iti dakes ken suminakayo iti dalan nga imbilinko.” (Deut. 31:29) Impakdaar met ni Moises a no agrebelde dagiti Israelita, maipanawda iti nasionda. (Deut. 28:​35, 36) Pimmayso kadi dagita a sasaona? Wen. Iti ginasut a tawen, adu nga ari ti sipapakinakem a nagaramid iti dakes, ken inimpluensiaanda dagiti agserserbi iti Dios. Gapu iti dayta, dinusa ni Jehova dagiti dakes a tattao ken awanen ti pinalubosanna nga Israelita nga agari kadakuada. (Ezek. 21:​25-27) Ngem pimmigsa ti pakinakem dagiti matalek nga Israelita idi nakitada a pimmayso dagiti imbaga ti Dios.—Isa. 55:​10, 11.

8. Masdaawtayo kadi a ti kongregasion Kristiano idi maikadua a siglo ket naapektaran iti apostasia? Ilawlawag.

⁸ Ti tiempo kalpasan a natay dagiti apostol. Masdaawtayo kadi a ti kongregasion Kristiano idi maikadua a siglo ket naapektaran iti apostasia? Saan. Impakpakauna ni Jesus nga  agramaram ti apostasia. (Mat. 7:​21-23; 13:​24-30, 36-43) Pinaneknekan da apostol Pablo, Pedro, ken Juan a nangrugin a matungpal ti padto ni Jesus idi umuna a siglo C.E. (2 Tes. 2:​3, 7; 2 Ped. 2:1; 1 Juan 2:18) Kalpasan a natay ti kaudian nga apostol, dagiti nagapostata a Kristiano ket nagbalin a paset ti Babilonia a Dakkel, ti sangalubongan nga imperio ti ulbod a relihion. Talaga a natungpal ti impadto ni Jesus!

9. Kasano a naiduma ti tiempotayo iti tiempo a nagbiagan ti nagkauna nga Israel ken iti kongregasion Kristiano idi maikadua a siglo?

⁹ “Ti tiempo a pannakaisubli ti amin a banag.” Naiduma ti tiempo a pagbibiagantayo iti tiempo ti nagkauna nga Israel ken iti tiempo a panagramaram ti apostasia bayat ti maikadua a siglo C.E. Ania ti awagtayo iti tiempo a pagbibiagantayo? Masansan nga aw-awagantayo dayta iti “maudi nga al-aldaw” daytoy a dakes a sistema ti bambanag. (2 Tim. 3:1) Ngem ipakita met ti Biblia nga addan nangrugi a napatpateg ken at-atiddog a tiempo. Agtultuloy dayta agingga a ti Mesianiko a Pagarian maisublinan ti amin a tattao iti kinaperpekto ken napagbalinnan a paraiso ti intero a daga. Dayta a panawen ket maawagan iti “tiempo a pannakaisubli ti amin a banag.” (Ara. 3:21) Nangrugi dayta idi 1914. Ania ti naisubli idi? Naitrono ni Jesus kas Ari idiay langit isu nga adda manen ti agturay a kaputotan ti matalek a ni Ari David a mangirepresentar ken Jehova. Ngem saan laeng a dayta ti insubli ni Jehova. Di nagbayag kalpasan dayta, naisubli met laengen ti nadalus a panagdaydayaw! (Isa. 2:​2-4; Ezek. 11:​17-20) Marugitanto kadi manen dayta?

10. (a) Ania ti impadto ti Biblia maipapan iti nadalus a panagdaydayaw iti tiempotayo? (Isaias 54:17) (b) Apay a makapabileg dagita a padto?

¹⁰ Basaen ti Isaias 54:17. Panunotem daytoy a padto: “Saanto nga agballigi ti aniaman nga armas a naaramid maibusor kenka”! Matungtungpalen ita dagiti sasao dayta a padto. Agaplikar met iti tiempotayo ti sumaruno a makaliwliwa a sasao: “Sursuruanto ni Jehova ti amin nga annakmo, ket saanto nga agpatingga ti talna dagiti annakmo. Maipasdekkanto a sititibker iti kinalinteg. . . . Awanto ti pagbutngam ken pagamkam, ta saanto a makaasideg dayta kenka.” (Isa. 54:​13, 14) Uray ni Satanas, “ti dios daytoy a sistema ti bambanag,” saanna a kabaelan a pasardengen ti trabaho a panangisuro nga ar-aramiden ti ili ni Jehova. (2 Cor. 4:4) Naisublin ti nadalus a panagdaydayaw, ken pulos a saanto manen a marugitan dayta. Agtalinaed dayta iti agnanayon. Saanto nga agballigi ti aniaman nga armas maibusor kadatayo!

 ANIANTO TI MAPASAMAK?

11. Apay a kombinsidotayo a saanto a mabaybay-an ti dakkel a bunggoy inton addan idiay langit dagiti dinutokan ti espiritu?

¹¹ Anianto ti mapasamak inton addan idiay langit ti amin a dinutokan ti espiritu? Laglagipem a ni Jesus ti Pastortayo. Isu ti ulo ti kongregasion Kristiano. Imbaga ni Jesus: “Maymaysa ti Lideryo, ti Kristo.” (Mat. 23:10) Saanto a pulos maliwayan ti agturturayen nga Aritayo a ni Kristo nga aramiden ti trabahona. Awanto a pulos ti pagbutngan dagiti pasurotna ditoy daga ta isuna a mismo ti mangiwanwanwan kadakuada. Siempre, ditay ammo ti amin a detalye no kasano nga iwanwan ni Kristo ti ilina iti dayta a tiempo. Usigentayo ngarud ti dadduma a pagarigan iti Biblia a mabalin a mangpabileg kadatayo.

12. Kasano nga inaywanan ni Jehova ti ilina (a) kalpasan a natay ni Moises? (b) kalpasan a nayakar ni Elias iti sabali a lugar a pagserbianna? (Kitaen met ti ladawan.)

¹² Natay ni Moises sakbay a nakastrek ti Israel iti Naikari a Daga. Ania ti napasamak iti ili ti Dios? Nabaybay-an kadi gapu ta natayen dayta a matalek a lalaki? Saan. Intultuloy nga impaay ni Jehova dagiti kasapulan dagiti nagtalinaed a matalek kenkuana. Sakbay a natay ni Moises, imbilin ni Jehova a dutokanna ni Josue a mangidaulo iti ilina. Dinekdekada a sinanay ni Moises ni Josue. (Ex. 33:11; Deut. 34:9) Kasta met, adu pay ti dadduma a makabael a lallaki a nangidaulo iti ilina—dagiti panguluen ti rinibu, ginasut, limapulo, ken uray sangapulo. (Deut. 1:15) Naaywanan a naimbag ti ili ti Dios. Kasta met laeng ti napasamak idi tiempo ni Elias. Dinekdekada nga inkagumaanna a tulongan dagiti Israelita nga agdaydayaw ken Jehova. Ngem idi agangay, inyakar isuna ni Jehova tapno agserbi iti makin-abagatan a paset ti Juda. (2 Ar. 2:1; 2 Cron. 21:12) Nabaybay-an kadi dagiti matalek a tattao iti 10 a tribu a pagarian ti Israel? Saan. Adun a tawen a sinanay ni Elias ni Eliseo. Adda met dagiti “annak dagiti propeta” a nalawag nga immawat iti pannakasanay. (2 Ar. 2:7) Isu nga adu a matalek a lallaki ti timmulong a mangidaulo iti ili ti Dios. Bayat nga intultuloy ni Jehova a tungpalen ti panggepna, intultuloyna met nga inaywanan dagiti matalek nga agdaydayaw kenkuana.

13. Ania ti ipasigurado kadatayo ti Hebreo 13:5b? (Kitaen met ti ladawan.)

¹³ Maibatay kadagidiay a pagarigan, anianto ti mapasamak inton addan idiay langit ti kaudian kadagiti dinutokan ti espiritu? Saantayon nga agpangadua ta adda simple a kinapudno nga ipasigurado ti Biblia: Saanto a pulos baybay-an ni Jehova ti ilina ditoy daga.  (Basaen ti Hebreo 13:5b.) Kas kada Moises ken Elias, maawatan ti bassit a grupo dagiti Kristiano a dinutokan ti espiritu ti kinapateg ti panangsanay iti dadduma. Dinekdekadan a sansanayen ti Bagi a Manarawidwid dagiti lallaki manipud sabsabali a karnero a mangidaulo. Kas pagarigan, nangorganisarda iti adu nga eskuelaan a mangsanay kadagiti panglakayen, agdaldaliasat a manangaywan, miembro ti Branch Committee, overseer iti Bethel, ken dadduma pay. Personal met a sansanayen ti Bagi a Manarawidwid dagiti agserbi a katulongan ti nadumaduma a komite ti Bagi a Manarawidwid. Simamatalek nga ibakbaklay dagitoy a katulongan ti nadagsen a responsabilidadda. Nakasaganada a naimbag a mangitultuloy iti trabaho a panangaywan kadagiti karnero ni Kristo.

14. Ania ti kangrunaan a punto daytoy a pagsasaritaantayo?

¹⁴ Daytoy ti kangrunaan a punto daytoy a pagsasaritaantayo: Inton addan idiay langit ti amin a dinutokan ti espiritu inton dandanin agngudo ti dakkel a rigat, agtultuloyto latta ti nadalus a panagdaydayaw ditoy daga. Gapu iti panangidaulo ni Jesu-Kristo, saanto nga agsardeng dagiti adipen ti Dios nga agdaydayaw kenkuana uray iti apagbiit. Agpayso met ketdi a rautennatayto ni Gog iti Magog, ti bumusbusor nga aliansa dagiti nasion. (Ezek. 38:​18-20) Ngem mapaayto dayta nga apagbiit a panangraut; saannanto a mapasardeng ti ili ti Dios iti panagdaydayawda ken Jehova. Sigurado nga isalakannanto ida! Iti maysa a sirmata, nakita ni apostol Juan ti “dakkel a bunggoy” ti sabsabali a karnero ni Kristo. Naibaga kenkuana a daytoy a “dakkel a bunggoy” ket “nakalasat iti dakkel a rigat.” (Apoc. 7:​9, 14) Wen, sigurado nga isalakanto ida ni Jehova!

15-16. Sigun iti Apocalipsis 17:​14, anianto ti aramiden dagiti Kristiano a dinutokan ti espiritu bayat ti gubat ti Armagedon, ken apay a makaparegta dayta?

¹⁵ Ngem baka mapanunot latta ti dadduma: ‘Kasano ngay dagiti dinutokan ti espiritu? Anianto ngay ti aramidenda inton addadan idiay langit?’ Adda direkta a sungbat ti Biblia kadagita a saludsod. Ipakitana a dagiti gobierno daytoy a lubong “gubatendanto ti Kordero.” Ngem siempre, maabakdanto. Mabasatayo:  “Abakento ida ti Kordero.” Ken siasino dagiti tumulong iti Kordero? Ibaga ti bersikulo. Dagidiay “naayaban,” “napili,” ken “matalek.” (Basaen ti Apocalipsis 17:14.) Siasino dagitoy? Dagiti napagungaren a dinutokan ti espiritu! Isu nga inton addan idiay langit ti amin a dinutokan ti espiritu inton dandanin agngudo ti dakkel a rigat, ti maysanto kadagiti kaunaan nga aramidenda ket makigubat. Anian a naisangsangayan dayta nga annongen! Dadduma a Kristiano a dinutokan ti espiritu ket makilablaban idi sakbay a nagbalinda a Saksi ni Jehova. Soldado pay ketdi idi ti dadduma kadakuada iti daytoy a lubong. Ngem idi nagbalindan a pudno a Kristiano, nasursuroda ti dalan ti talna. (Gal. 5:22; 2 Tes. 3:16) Insardengdan a suportaran dagiti gubat. Ngem inton mapagungarda tapno agbiagda idiay langit, makikaduadanto ken Kristo ken kadagiti nasantuan nga anghelna a lumaban iti kaudian a gubat kontra kadagiti kabusor ti Dios.

¹⁶ Panunotem daytoy! Lallakayen ken nakapsut payen ti dadduma a Kristiano a dinutokan ti espiritu nga adda ditoy daga. Ngem inton mapagungarda tapno agbiag idiay langit, agbalindanto a mannakabalin ken immortal nga espiritu a parsua. Maibaondanto a makigubat a kadua ti Mannakigubat nga Arida a ni Jesu-Kristo. Kalpasan ti gubat ti Armagedon, makikaduadanto ken Kristo a tumulong kadagiti tattao nga agbalin a perpekto. Sigurado nga ad-adunto ti maaramidanda para kadagiti patpatgenda a kakabsat ditoy daga inton addadan idiay langit ngem iti naaramidanda ditoy daga kas imperpekto a tattao!

17. Kasanotayo nga ammo a natalgedto ti amin nga agserserbi iti Dios bayat ti gubat ti Armagedon?

¹⁷ Karamanka kadi iti sabsabali a karnero? No wen, anianto ti masapul nga aramidem inton mangrugi ti nakapatpateg a gubat ti Armagedon? Simple laeng. Agtalekka ken Jehova, ken surotem ti instruksionna. Ania ti karaman iti dayta? Adda makaliwliwa nga ibaga ti Biblia: “Sumrekka kadagiti makin-uneg a kuartom, ket irikepmo dagiti ruanganmo. Aglemmengka iti apagbiit agingga a lumabas ti pungtot.” (Isa. 26:20) Amin a matalek nga adipen ti Dios idiay man langit wenno ditoy daga ket natalgedto bayat dayta a tiempo. Kas ken apostol Pablo, kombinsidotayo a “dagiti gobierno wenno ti bambanag nga addan wenno ti bambanag nga umayto . . . saandatayo a kabaelan nga isina iti ayat ti Dios.” (Roma 8:​38, 39) Kanayon a tantandaanam: Ay-ayatennaka ni Jehova, ken dinakanto pulos baybay-an!