1. No imbaga ti maysa a pinakawannakan, apay a masansan a narigat a maawatan ti kayatna a sawen?

 “PINAKAWANKAN.” Makapabang-ar a mangngeg dayta, lallalo no ammom a nakaibaga wenno nakaaramidka iti banag a nakasaktan ti maysa! Ngem ania a talaga ti kayat a sawen ti sao a “pinakawankan”? Ti kayatna kadi a sawen ket aggayyemkayo manen? Wenno imbagana la dayta ta kayatna a diyon pagsaritaan ti napasamak? Talaga a masansan a narigat a maawatan ti kayat a sawen ti maysa a tao no ibagana, “pinakawankan.”

 2. Ania ti ibagbaga ti Biblia maipapan iti panangpakawan ni Jehova? (Kitaen met ti footnote.)

² Ti panangpakawan ni Jehova kadatayo nga imperpekto a tattao ket naiduma unay iti panangpakawantayo iti maysa ken maysa. Awan kapadana ti panangpakawan ni Jehova. Kuna ti salmista maipapan ken Jehova: “Talaga a pakawanem dagiti tattao, tapno agsiddaawda kenka.” a (Sal. 130:4) Wen, ‘talaga a mangpakawan’ ni Jehova. Ipakpakitana ti pudpudno a kaipapanan ti panangpakawan. Iti dadduma a bersikulo ti Hebreo a Kasuratan, nangusar dagiti mannurat iti Biblia iti sao a mangiladawan iti panangpakawan ni Jehova a saanda a pulos inusar a mangiladawan iti panangpakawan dagiti tattao.

 3. Kasano a naiduma ti panangpakawan ni Jehova iti panangpakawantayo? (Isaias 55:​6, 7)

³ No pakawanen ni Jehova ti basol ti maysa a tao, interamenten a punasenna dayta. Maisubli ti nasayaat a relasionna kenkuana. Agyamantayo unay ta naan-anay ken maulit-ulit a pakpakawanennatayo ni Jehova.—Basaen ti Isaias 55:​6, 7.

 4. Kasanonatayo a tultulongan ni Jehova tapno maawatantayo ti talaga a kaipapanan ti panangpakawan?

 ⁴ No ti panangpakawan ni Jehova ket naiduma iti panangpakawan dagiti imperpekto a tattao, kasanotayo ngarud a maawatan ti talaga a kaipapanan ti panangpakawan? Us-usaren ni Jehova dagiti nagpipintas nga ilustrasion tapno maawatantayo ti panangpakawanna kadatayo. Adalentayo ti dadduma kadagita iti daytoy nga artikulo. Ipakita dagita a no agbabawitayo, pakawanennatayo ni Jehova ken agbalintayo manen a nasinged a gagayyemna. Bayat a reprepasuentayo dagitoy nga ilustrasion, umuneg ti ayat ken panagyamantayo iti nadungngo ken naasi nga Amatayo a mangipakpakita iti panangpakawanna iti adu a pamay-an.

IKKATEN NI JEHOVA DAGITI BASOLTAYO

 5. Ania ti mapasamak no pakawanen ni Jehova dagiti basoltayo?

⁵ Iti Biblia, dagiti basol ket masansan a mayarig iti nadagsen nga awit. Kastoy ti panangdeskribir ni Ari David kadagiti basolna: “Nalapunosak iti kaadu dagiti biddutko; kasda la iti nadagsen nga awit a diak kabaelan a susuonen.” (Sal. 38:4) Ngem no agbabawi dagiti nakabasol, pakawanen ida ni Jehova. (Sal. 25:18; 32:5) Ti Hebreo a sao a naipatarus kas “pakawanen” kaipapananna ti “ikkaten” wenno “bagkaten.” Isu a no pakawanennatayo ni Jehova, arigna ikkaten wenno ipanawna dagiti awittayo a mangpadpadagsen kadatayo.

 6. Kasano kaadayo ti pangipanan ni Jehova kadagiti basoltayo?

⁶ Adda pay sabali nga ilustrasion a mangipakita no kasano kaadayo ti pangipanan ni Jehova kadagiti basoltayo. Kuna ti Salmo 103:12: “No kasano ti kaadayo ti pagsingisingan ti init iti paglennekanna, kasta met ti kaadayo ti nangikabilanna kadagiti basoltayo.” Ti daya ti kaadaywan a lugar manipud iti laud. Dinto pulos agsabat dagita. Kayatna ngarud a sawen nga ipanaw ni Jehova ti basoltayo iti kaadaywan a lugar a mapanunottayo. Ipasigurado dayta kadatayo a talaga a naan-anay ti panangpakawan ni Jehova kadatayo!

 7. Sigun iti Biblia, ania ti aramiden ni Jehova kadagiti basoltayo? (Mikias 7:​18, 19)

⁷ Gapu ta arigna iyadayo ni Jehova dagiti basoltayo, kayatna kadi a sawen nga awit-awitna latta dagita? Saan. Insurat ni Ari Ezekias maipapan ken Jehova: “Impuruakmo amin a basolko iti likudam.” Wenno iti footnote, “inikkatmo amin a basolko iti imatangmo.” (Isa. 38:​9, 17; ftn.) Ipakita dayta nga ilustrasion nga ipuruak ken saanen a taliawen ni Jehova dagiti basol dagiti agbabbabawi. Mabalin a maipatarus met dayta iti kastoy: “Pinagbalinmo [dagiti basolko] a kas man la saan a napasamak dagita.” Impaganetget ti Biblia dayta a punto iti sabali pay nga ilustrasion a mabasa iti Mikias 7:​18, 19. (Basaen.) Ibagbaga dagita a bersikulo nga ipalladaw ni Jehova dagiti basoltayo iti adalem a baybay. Idi un-unana, imposiblen a maala ti maysa a banag a naipuruak iti kaadalman a paset ti baybay.

 8. Ania ti nasursurotayo?

⁸ Babaen kadagitoy nga ilustrasion, nasursurotayo a no pakawanennatayo ni Jehova, naan-anay nga ikkatenna dagiti basoltayo a mangpadpadagsen kadatayo. Pudno ti imbaga ni David: “Naragsak dagidiay napakawan dagiti dakes nga aramidda ken naabbongan dagiti basolda; naragsak ti tao a saanto a pulos singiren ni Jehova ti basolna.” (Roma 4:​7, 8) Talaga a naan-anay ti panangpakawan ni Jehova!

PUNASEN NI JEHOVA DAGITI BASOLTAYO

 9. Ania nga ilustrasion ti inusar ni Jehova a mangilawlawag iti naan-anay a panangpakawanna?

⁹ Gapu iti subbot, mabalin a punasen ni Jehova ti basol dagiti agbabbabawi. Kitaentayo  ti panangdeskribir ti Biblia iti aramidenna. Iti Biblia, mabasatayo a bugbugguan ken ug-ugasanna dagita a basol. Iti kasta, madalusan ti managbasol. (Sal. 51:7; Isa. 4:4; Jer. 33:8) Dineskribir a mismo ni Jehova ti resulta daytoy a proseso: “Uray no nakalablabbaga dagiti basolyo, mapapurawdanto a kas iti niebe; uray no dagita ket kas kalabaga ti tela a krimson, mapapurawdanto a kas iti delana.” (Isa. 1:18) Ti mansa a kolor eskarlata wenno krimson ket nakarigrigat nga ikkaten iti bado. Ngem babaen daytoy nga ilustrasion, ipaspasigurado kadatayo ni Jehova a dagiti basoltayo ket mabalin a mapapuraw agingga a saantayon a makita ti mansa wenno ti basol.

10. Ania ti sabali pay nga ilustrasion nga inusar ni Jehova a mangdeskribir iti kinaaglaplapusanan ti panangpakawanna?

¹⁰ Kas nadakamaten iti napalabas nga artikulo, dagiti basoltayo ket kas iti ‘utang.’ (Mat. 6:12; Luc. 11:4) Isu a kada agbasoltayo ken Jehova, kas man la mailumlumlomtayo iti utang. Dumakkel a dumakkel dayta nga utang! Ngem no pakawanennatayo ni Jehova, arigna kanselarenna dagiti utangtayo. Saanna a singiren dagiti basoltayo a pinakawannan. No kasano a permi ti ragsak ti tao a nakanselar ti utangna, nakaragragsaktayo met no pakawanennatayo ni Jehova!

11. Ania ti kayat a sawen ti Biblia no ibagana a “mapunas” dagiti basoltayo? (Aramid 3:19)

¹¹ Saan laeng a basta kanselaren ni Jehova dagiti utangtayo wenno basoltayo. Punasenna pay ketdi dagita. (Basaen ti Aramid 3:19.) No makanselar ti utang, mabalin a mapanunottayo a kas man la namarkaan iti dakkel nga X ti nakailistaan dagiti utangtayo. Ngem mabalin a makita latta ti naisurat nga utangtayo. Nupay kasta, sabali ti mapasamak no mapunas dayta. Tapno lalo a maawatantayo dayta nga ilustrasion, masapul a laglagipentayo a ti tinta nga us-usaren dagiti nagkauna a tattao ket nalaka laeng a mapunas wenno mabura iti danum. Mabalin nga agusarda iti nabasa nga espongha tapno mabura dagiti nakasurat. Isu a no “mapunas” dagiti utangtayo, saanen a pulos a makita dagita. Saantayon a makita ti lamma dagiti dati a nakasurat iti listaan. Kas man la saantayo a pulos a nakautang. Agyamyamantayo unay ken Jehova ta saanna la a basta kanselaren dagiti basoltayo no di ket punasenna pay dagita, a kas man la saan a pulos a napasamak dagita!—Sal. 51:9.

12. Ania ti masursurotayo iti ilustrasion maipapan iti napuskol nga ulep?

¹² Adda sabali pay nga ilustrasion nga inusar ni Jehova a mangipakita a naan-anay a pakawanennatayo. Imbagana: “Punasekto dagiti biddutmo a kasla maabbongan iti ulep, ken dagiti basolmo a kasla maabbongan iti napuskol nga ulep.” (Isa. 44:22) No mangpakawan ni Jehova, arigna agusar iti napuskol nga ulep tapno ilemmengna dagiti bidduttayo isu a saantayon a makita dagita.

13. No pakawanen ni Jehova dagiti basoltayo, ania ti masapul a reaksiontayo?

¹³ Ania ti masursurotayo kadagitoy nga ilustrasion? No pakawanennatayo ni Jehova, saantayon a masapul nga agtultuloy a makonsiensia maipapan kadagiti basoltayo. Gapu iti dara ni Jesu-Kristo, interamenten a nakanselar dagiti utangtayo. Saan pay ketdin a makita ti listaan dagiti utangtayo. Naan-anay ken talaga a pakawanennatayo ni Jehova no pagbabawyantayo dagiti basoltayo.

ISUBLI NI JEHOVA TI NASINGED A PANNAKIGAYYEMNA KADATAYO

14. Apay a makapagtalektayo a naan-anay a pakawanennatayo ni Jehova? (Kitaen met dagiti ladawan.)

¹⁴ No pakawanennatayo ni Jehova, masiguradotayo a gayyemtayo manen isuna. Makatulong dayta tapno saantayo a kanayon a  makonsiensia gapu kadagiti basoltayo. Rumbeng a saantayo metten a pakadanagan a makaunget latta ni Jehova kadatayo ken mangbirbirok iti pamay-an tapno dusaennatayo. Pulos a dina aramiden dayta. Apay a makapagtalektayo ken Jehova no ibagana a pinakawannatayon? Imbaga ni Jehova ken propeta Jeremias: “Pakawanekto ti kamalida ken diakton lagipen ti basolda.” (Jer. 31:34) Kinotar dayta ni apostol Pablo idi imbagana: “Diakton lagipen dagiti basolda.” (Heb. 8:12) Ngem ania ti talaga a kaipapanan dayta?

15. Ania ti kayat a sawen ni Jehova idi imbagana a dinan lagipen dagiti basoltayo?

¹⁵ Iti Biblia, ti sao a “lagipen” ket saan a kanayon a tumukoy iti pananglagip wenno panangpanunot kadagiti napasamaken. Imbes ketdi, mabalin a tumukoy dayta iti aramiden ti maysa a tao. Kas pagarigan, kiniddaw ti maysa a kriminal a nakalansa iti kayo iti abay ni Jesus: “Jesus, laglagipennak inton addakan iti Pagariam.” (Luc. 23:​42, 43) Saanna la a basta kidkiddawen idi ken Jesus a panunotenna isuna iti daydi a tiempo. Kayatna nga adda aramiden ni Jesus para kenkuana, isu nga imbaga ni Jesus a pagungarenna dayta a kriminal. No ngarud ibaga ni Jehova a saannan a lagipen dagiti basoltayo, kayatna a sawen a saan a mangaramid iti banag a maikontra kadatayo. Saannatayto a dusaen gapu kadagiti basol a pinakawannan.

16. Kasano a dineskribir ti Biblia ti wayawaya a resulta ti naan-anay a panangpakawan ni Jehova?

¹⁶ Nangusar ti Biblia iti sabali pay nga ilustrasion tapno maawatantayo ti wayawaya a resulta ti naan-anay a panangpakawan ni Jehova. Gapu ta managbasol ken imperpektotayo, kaslatay la ‘adipen ti basol.’ Ngem gapu ta pinakawannatayon ni Jehova, kaslatay la adipen a ‘nawayawayaan iti basol.’ (Roma 6:​17, 18; Apoc. 1:5) Wen, gapu ta ammotayo a pinakawannatayon ni Jehova, nakaragragsaktayo ta kaslatay la iti adipen a nawayawayaanen iti pannakaadipenna.

17. Kasano a ti panangpakawan ni Jehova ket agresulta iti pannakapaimbagtayo? (Isaias 53:5)

 ¹⁷ Basaen ti Isaias 53:5. Ibaga ti Biblia a gapu ta managbasoltayo, kas man la adda makapapatay a sakittayo. Ngem gapu iti subbot nga impaay ni Jehova babaen ti Anakna, kas man la napaimbagtayon. (1 Ped. 2:24) No agbasoltayo, madadael ti relasiontayo ken Jehova. Ngem gapu iti subbot, pakawanennatayo ken isublina ti nasinged a relasiontayo kenkuana. No kasano a permi ti ragsak ti tao nga immimbag iti grabe a sakitna, nakaragragsaktayo met no umimbagtayo iti naespirituan ken agbalintayo manen a nasinged a gayyem ni Jehova gapu iti panangpakawanna.

DAGITI MAGUNGGONATAYO ITI PANANGPAKAWAN NI JEHOVA

18. Ania dagiti nasursurotayo kadagiti ilustrasion iti Biblia maipapan iti panangpakawan ni Jehova? (Kitaen met ti kahon a “No Kasano a Pakpakawanennatayo ni Jehova.”)

¹⁸ Ania dagiti nasursurotayo kadagiti ilustrasion iti Biblia maipapan iti panangpakawan ni Jehova? No mangpakawan, naan-anay ken permanente dayta. Gapu iti dayta, agbalin a gayyemtayo ti nailangitan nga Amatayo. Kasta met, laglagipentayo a ti naan-anay a panangpakawan ni Jehova ket regalona kadatayo. Gapu dayta iti ayat ken nagpaiduma a kinaimbagna, saan ket a gapu ta maikaritayo iti dayta.—Roma 3:24.

19. (a) Ania ti rumbeng a pagyamanantayo? (Roma 4:8) (b) Ania dagiti pagsasaritaantayo iti sumaruno nga artikulo?

¹⁹ Basaen ti Roma 4:8. Rumbeng laeng nga agyaman ti tunggal maysa kadatayo ta ni Jehova ket ti Dios a ‘talaga a mangpakpakawan’! (Sal. 130:4) Ngem tapno mapakawan dagiti basoltayo, adda masapul nga aramidentayo. Inlawlawag ni Jesus: “No saanyo a pakawanen dagiti nakabasol kadakayo, saanto met a pakawanen ni Amayo dagiti basolyo.” (Mat. 6:​14, 15) Nalawag ngarud a masapul a tuladentayo ti panangpakawan ni Jehova. Ngem kasanotayo nga aramiden dayta? Maammuantayo dayta iti sumaruno nga artikulo.