Napeklan a Katoliko da Tatang ken Nanang. Ngem idi naammuanda iti Biblia a ti nagan ti Dios ket Jehova, nagbalinda a naregta a Saksi ni Jehova. Insardeng pay ketdi ni Tatang ti agkitikit kadagiti imahen ni Jesus. Nalaing a karpintero ni Tatang. Inusarna dayta a paglainganna tapno pagbalinenna a Kingdom Hall ti sirok ti balaymi. Dayta idi ti kaunaan a Kingdom Hall iti San Juan del Monte iti Manila a kabesera ti Pilipinas.

Nayanakak idi 1952. Kaduak ti uppat a manongko ken tallo a manangko nga inyadalan dagiti nagannakko iti Biblia. Bayat a dumakdakkelak, pinaregtanak ni Tatang nga inaldaw nga agbasaak iti maysa a kapitulo ti Biblia. Inyadalna met kaniak ti adu a publikasiontayo. No dadduma, awisen dagiti nagannakko dagiti agdaldaliasat a manangaywan ken pannakabagi ti sangay nga agdagus iti balaymi. Permi ti ragsakmi a sangapamiliaan ken maparparegtakami no mangngegmi dagiti kapadasanda. Gapu iti dayta, naparegtakami amin a mangyun-una iti biagmi ti panagserbi ken Jehova.

Nagadu ti nasursurok iti ulidan dagiti nagannakko. Kalpasan a natay ti ipatpategko nga ina gapu iti sakit, nagpayunirkami a dua ken Tatang idi 1971. Ngem idi agtawenak iti 20 idi 1973, natay ni Tatang. Gapu ta natayen dagiti nagannakko, nakalidlidayak ken panagriknak ket agmaymaysaakon. Ngem nakatulong kaniak ti “sigurado ken natibker” a namnama a masarakan iti Biblia tapno agtalinaedak a positibo ken nasinged ken Jehova. (Heb. 6:19) Di nagbayag kalpasan a natay ni Tatang, naawisak nga agbalin nga special pioneer iti naiputputong nga isla ti Coron a probinsia ti Palawan.

Agtawenak iti 21 idi napanak iti Coron. Gapu ta dimmakkelak iti siudad, naikawaak unay idi napanak iti dayta nga isla ta manmano a balbalay ti addaan iti koriente ken gripo, ken manmano dagiti lugan. Nupay adda met ketdi sumagmamano a  kakabsat, awan ti kaduak a payunir. Isu a no dadduma, maymaysaak laeng a mapan mangasaba. Idi umuna a bulanko sadiay, mail-iliwak unayen kadagiti kapamiliak ken gagayyemko. Iti rabii, buybuyaek dagiti bituen bayat nga agar-arubos dagiti luak. Makasarsardengakon iti asaynmentko ken makaaw-awidak payen.

Kadagiti tiempo a nagmaymaysaak, imbukbokko ti linaon ti pusok ken Jehova. Linagipko dagiti makaparegta a nabasak iti Biblia ken kadagiti publikasiontayo. Kanayon a pampanunotek ti Salmo 19:14. Naamirisko a ni Jehova ti “Dakkel a Bato a pagkamangak ken Mannubbotko,” no utobek dagiti banag a mangparagsak kenkuana, kas kadagiti ar-aramiden ken kualidadna. Nagdakkel met a tulong kaniak ti artikulo ti Pagwanawanan a “Saankayo nga Agmaymaysa.” a Namin-aduk a binasa dayta. Kadagita a tiempo nga agmaymaysaak, nabigbigko a kaduak gayam ni Jehova. Gundawayko met dayta idi tapno agkararag, agadal, ken agutob.

Di nagbayag kalpasan a napanak idiay Coron, naapointaranak kas panglakayen. Gapu ta maymaysaak a panglakayen, siak ti linawas nga agikondukta iti Teokratiko nga Eskuelaan ti Panagministro, Gimong ti Serbisio, Panagadal ti Kongrega-sion iti Libro, ken Panagadal iti Pagwanawanan. Linawas met a siak ti mangiparang iti palawag publiko. Ket gapu ta adun ti ar-aramidek, saanakon a naliday!

Naragsakak ta nabunga ti ministeriok iti Coron. Idi agangay, nabautisaran ti dadduma nga iyad-adalak iti Biblia. Ngem adda met dagiti narigat a situasion a nakaipasanguak. No dadduma, kagudua aldaw a magmagnaak tapno laeng madanonko ti teritoria. Saanko nga ammo no sadino ti pagturogak inton makadanonak. Ti teritoria ti kongregasionmi ramanenna ti adu a babassit nga isla. Masansan nga agluganak iti bangka a de motor uray no agbagbagyo tapno laeng madanonko dagita, nupay diak ammo ti aglangoy! Kadagitoy amin a napasarak, prinotektaran ken inaywanannak ni Jehova. Idi kuan, naamirisko nga isagsagananak gayam ni Jehova para kadagiti narigrigat pay a situasion iti sumaruno nga asaynmentko.

Idi 1978, naibaonak iti Papua New Guinea nga adda iti amianan ti Australia. Ti Papua New Guinea ket addaan iti adu a bambantay. Ti kadakkel dayta a nasion ket dandani kapada ti Spain. Nasdaawak ta ti agarup tallo a milion a tattao nga aggigian sadiay ket agus-usar iti nasurok a 800 a lengguahe. Imbag laengen ta kaaduan kadakuada ket makasao iti Melanesian Pidgin a gagangay a maaw-awagan iti Tok Pisin.

Temporario a naibaonak iti maysa nga English a kongregasion iti Port Moresby a kabesera ti Papua New Guinea. Idi kuan, immakarak iti maysa a Tok Pisin a kongregasion ken sinursurok dayta a lengguahe. Gapu ta inus-usarko iti pangasabaan dagiti nasursurok iti dayta a lengguahe, nalaklakak a nasursuro dayta. Di nagbayag, nakapagpalawagakon iti Tok Pisin. Diak ninamnama nga uray no awan pay makatawen sipud simmangpetak iti Papua New Guinea, naapointaranak nga agserbi kas manangaywan iti sirkito kadagiti Tok Pisin a kongregasion iti nagduduma a dadakkel a probinsia.

Agiinnaddayo dagiti kongregasion isu a nagadu met nga asamblea sirkito ti masapul nga iyurnosko. Kanayonak nga agbibiahe. Idi damo, panagriknak  ket agmaymaysaak gapu ta barbaroak pay laeng iti dayta a pagilian, ken diak pay unay kabesado ti lengguahe ken ti kulturada. Gapu ta dagiti kongregasion ket adda kadagiti kabambantayan, masapul a dandani linawas nga ageroplanoak tapno makadanonak sadiay. No dadduma, sisiak laeng ti pasahero ti nagbassit ken saan a nakakondision nga eroplano. Makapanerbios ti aglugan kadagiti kasta nga eroplano a kas met laeng iti panaglugan iti bangka!

Manmano laeng ti adda teleponona isu a masapul a suratak dagiti kongregasion. Kaaduanna nga umun-unaak pay a sumangpet kadagita a kongregasion ngem kadagiti suratko. Isu a no sumangpetak, masapul nga agsaludsodak kadagiti lumugar tapno maammuak no sadino ti ayan dagiti kakabsat. Ngem no agkikitakamin, permi a mariknak ti ayat ken apresasionda isu a malagipko no apay nga ar-aramidek dagitoy a sakripisio. Nariknak ti tulong ni Jehova iti adu a pamay-an, isu nga ad-adda pay a simmingedak kenkuana.

Idi damok ti makigimong iti isla ti Bougainville, adda nakaisem nga agassawa nga immasideg kaniak. Insaludsodda, “Malagipnakami pay?” Malagipko a nakasabaak dagitoy nga agassawa idi kasangsangpetko iti Port Moresby. Inyadalak ida iti Biblia sakbay nga impasak ida iti maysa a brother sadiay tapno ituloyna nga iyadalan ida. Bautisadoda itan! Maysa dayta kadagiti nagadu a bendision a naawatko bayat ti tallo a tawen a panagserbik iti Papua New Guinea.

Sakbay a pimmanawak idiay Coron idi 1978, naam-ammok ti napintas ken managsakripisio a sister a ni Adel. Agserserbi idi kas regular pioneer bayat a padpadakkelenna ti dua nga annakna a da Samuel ken Shirley. Ay-aywananna met ti baketen a nanangna. Idi Mayo 1981, nagsubliak ditoy Pilipinas tapno pakasarak ni Adel. Kalpasan ti kasarmi, nagregular payunirkami ken inaywananmi a dua ti pamiliami.

Uray no addan pamiliak, idi 1983, naapointaranak kas special pioneer ken naibaonak iti isla ti Linapacan, iti probinsia ti Palawan. Immakarkami a sangapamiliaan iti daytoy naiputputong a lugar nga awan pay Saksina. Agarup makatawen kalpasanna, natay ti katugangak. Ngem intultuloymi latta ti nagbalin a busy iti ministerio. Dayta ti nakatulong kadakami tapno mailiwliwagmi ti ladingitmi. Nagadu ti inyadalanmi iti Biblia ket kayatda metten ti makigimong. Isu a di nagbayag kalpasanna, kasapulanmin ti bassit a Kingdom Hall isu a nagipatakderkami. Tallo laeng a tawen kalpasan ti isasangpetmi sadiay, makaparagsak ta 110 ti immatender iti Memorial, ket adu kadakuada ti nagpabautisar idi agangay.

Idi 1986, nayakarak idiay Culion, maysa nga isla nga addaan komunidad dagiti adda kukutelna (leprosy). Sumagmamano a tawen kalpasanna, naapointaran met ni Adel kas special pioneer. Idi damo, madandanagankami a mangasaba kadagiti tattao nga addan depekto ti langada gapu iti kukutel. Ngem impasigurado kadakami dagiti kakabsat sadiay a naagasandan isu a bassit laeng ti tsansa a maakarankami. Makigimgimong metten ti dadduma kadakuada iti balay ti maysa a sister. Idi agangay,  nairuamkamin. Maragragsakankami met a mangiranud iti namnama nga isursuro ti Biblia kadagiti tattao a panagriknada ket binaybay-anen ida ti Dios ken dagiti tattao. Nagsayaat met a makita a maragragsakan dagiti tattao nga addaan iti nakaro a sakit gapu iti namnama nga addanto aldaw a perpektonton ti salun-atda.—Luc. 5:​12, 13.

Kasano a nairuam dagiti annakmi iti biag iti Culion? Nangawiskami iti dua nga agtutubo a sister a taga-Coron tapno adda kadkadua dagiti annakmi. Naragsakan da Samuel, Shirley, ken ti dua nga agtutubo a sister iti panangasaba. Inyadalanda met ti nagadu nga ubbing bayat nga inyadalanmi met ken Adel dagiti nagannak dagita nga ubbing. Kinapudnona, adda pay ketdi tiempo nga 11 a pamilia ti iyad-adalanmi iti Biblia. Di nagbayag, gapu ta rumangrang-ay ti adu nga iyad-adalanmi iti Biblia, nangbuangaykami iti kongregasion!

Idi damo, sisiak laeng ti panglakayen iti dayta a lugar. Isu a kiniddaw ti sanga nga opisina a siak ti mangikondukta iti linawas a gimong para iti walo nga agibumbunannag iti Culion. Kasta met laeng ti aramidek iti siam nga agibumbunannag iti barrio a maaw-awagan iti Marily, a masapul a biahienmi iti tallo nga oras babaen ti bangka. Kalpasan ti gimong sadiay, magnakami a sangapamiliaan iti kabambantayan iti adu nga oras tapno mangyadalkami iti Biblia iti barrio a maaw-awagan iti Halsey.

Idi agangay, adu a tattao ti nangawat iti kinapudno idiay Marily ken Halsey. Isu a kinasapulanmin ti agibangon kadagiti Kingdom Hall kadagita a lugar. Kas idiay Linapacan, nagtitinnulong dagiti kakabsat ken dagiti interesado iti panagibangon ken panangipaay iti kaaduan a materiales. Makalaon iti 200 a tattao ti Kingdom Hall idiay Marily ken nalaka laeng dayta a mapalawa tapno pagasambleaan.

Idi 1993, idi adulton dagiti annakmi, nangrugikami nga agserbi ken Adel iti sirkito iti Pilipinas. Idi 2000, naawisak iti Ministerial Training School tapno masanay nga agbalin nga instruktor para iti dayta nga eskuelaan. Panagriknak ket diak kabaelan, ngem kanayon a pinaregtanak ni Adel. Impalagipna a papigsaennak ni Jehova a mangibaklay iti dayta a baro nga annongek. (Fil. 4:13) Naibaga dayta ni  Adel gapu ta naitultuloyna latta ti asaynmentna uray no adda dagiti problemana iti salun-at.

Idi 2006, bayat a mangisursuroak, nadayagnos nga adda Parkinson’s disease ni Adel. Nakigtotkami! Idi imbagak ken Adel nga agsardengkami lattan iti asaynmentmi tapno maaywanak isuna, insungbatna, “Saan. Mangbirokka laengen iti doktor a makatulong kaniak iti sakitko. Ammok a tulongannata ni Jehova tapno maitultuloyta ti asaynmentta.” Iti simmaruno nga innem a tawen, intultuloy ni Adel ti panagserbina ken Jehova a saan a nagrekreklamo. Idi saanen a makapagna, mangasaba a naka-wheelchair. Idi marigatanen nga agsao, agkomento latta iti gimong uray maysa wenno dua laeng a sasao. Adu met a kakabsat ti nangipatulod ken Adel kadagiti mensahe a mangyeb-ebkas iti apresasionda iti nagsayaat nga ulidanna iti panagibtur, agingga iti ipapatayna idi 2013. Nasurok a 30 a tawen a nagkaduakami ti matalek ken naayat nga asawak. Isu nga idi naturogen ken patay, simken manen ni liday ken nariknak manen nga agmaymaysaak.

Kayat ni Adel nga itultuloyko ti asaynmentko, isu a kasta ti inaramidko. Nagtalinaedak a busy ket nakatulong dayta tapno diak unay marikna nga agmaymaysaak. Manipud idi 2014 agingga idi 2017, naibaonak a mangbisita kadagiti Tagalog a kongregasion kadagiti pagilian a maiparparit idi ti trabahotayo. Kalpasan dayta, binisitak dagiti Tagalog a kongregasion iti Taiwan, United States, ken Canada. Idi 2019, nangisuroak iti English a klase ti School for Kingdom Evangelizers iti India ken Thailand. Permi ti ragsakko bayat nga ar-aramidek dagita nga asaynmentko. Nakaragragsakak no nakaad-adu ti ar-aramidek para ken Jehova.

Iti tunggal asaynment a nakaibaonak, nasursurok nga ayaten dagiti kakabsat. Isu a nadagsen ti riknak kada umakarak. Kadagita a tiempo, nasursurok ti naan-anay nga agtalek ken Jehova. Kanayon a tultulongannak isu a situtulok a maawatko ti aniaman a panagbalbaliw iti biagko. Ita, maysaakon nga special pioneer ditoy Pilipinas. Nakaragragsakak iti baro a kongregasionko. Kanayon a tultulongan, ay-aywanan, ken ibilbilangdak a kapamiliada. Maragragsakanak met a makakita a tultuladen da Samuel ken Shirley ti pammati ni nanangda.—3 Juan 4.

Agpayso a nagadu dagiti napadasak a pakasuotan iti biag, agraman ti pannakakitak a nagrigrigat ti ipatpategko nga asawa agingga a natay gapu iti nakaro a sakit. Masapul met a makibagayak iti adu a baro a situasion. Ngem nakitak a ni Jehova ket “saan nga adayo iti tunggal maysa kadatayo.” (Ara. 17:27) “Saan nga ababa ti ima” ni Jehova a tumulong ken mangpabileg kadagiti adipenna, uray kadagiti naiputputong a lugar. (Isa. 59:1) Kanayon a kaduak ni Jehova, ti Bato a Pagkamangak, ken agyamyamanak unay kenkuana ta diak pulos nagmaymaysa.