NADLAWMO kadi nga adu a tattao iti daytoy a lubong ti makarikna a maikarida iti espesial a pribilehio, kalintegan, wenno pannakatrato? Ngem uray no matrattratodan iti espesial a pamay-an, pampanunotenda latta a maikarida iti ad-adu pay a pribilehio. Dayta a kapanunotan ket nairamut iti managimbubukodan ken saan a managyaman a kababalin dagiti tattao bayat ti maudi nga al-aldaw.—2 Tim. 3:2.

Siempre, sipud pay idi, addan dagiti managimbubukodan a tattao. Kas pagarigan, kayat da Adan ken Eva ti maaddaan iti kalintegan a mangidesision iti bagida no ania ti naimbag ken dakes. Gapu iti dayta a desisionda, agsagsagaba ti amin. Ti sabali pay a pagarigan ket ni Uzias a nagbalin nga ari ti Juda. Impagarupna a maikari isuna nga agpuor iti insienso iti templo. Ngem awan a pulos ti kalinteganna a mangaramid iti dayta. (2 Cron. 26:​18, 19) Kasta met, patien dagiti Fariseo ken Saduceo a maikarida iti espesial nga atension ti Dios gapu laeng ta kaputotan ida ni Abraham.—Mat. 3:9.

Napalikmutantayo kadagiti managimbubukodan ken napannakkel a tattao ket mabalin a maimpluensiaantayo kadagiti kasta a kababalin. (Gal. 5:26) Baka mapanunottayo pay ketdin a maikaritayo iti maysa a pribilehio wenno espesial a pannakatrato. Kasanotayo a maliklikan ti kasta a panagpampanunot? Masapul a maawatantayo ti panangmatmat ni Jehova iti daytoy a banag. Makatulong kadatayo ti dua a prinsipio ti Biblia.

Ni Jehova ti agdesision no ania ti maikari para kadatayo. Kitaentayo ti sumagmamano a pagarigan.

•   Iti uneg ti pamilia, kayat ni Jehova a marikna ti asawa a lalaki a raraemen isuna ni baketna. Kayatna met a marikna ti asawa a babai nga ay-ayaten isuna ni lakayna. (Efe. 5:33) Ibagbaga ni Jehova nga iti laeng asawada ti rumbeng a pangipakitaanda iti romantiko nga ayatda. (1 Cor. 7:3) Kasta met, umiso laeng nga ekspektaren dagiti nagannak nga agtulnog kadakuada dagiti annakda. Iti sabali a bangir, husto laeng met nga ekspektaren dagiti annak nga ayaten ken suportaran ida dagiti nagannakda.—2 Cor. 12:14; Efe. 6:2.

• Iti kongregasion, maikari dagiti panglakayen iti respetotayo gapu iti kinagagetda. (1 Tes. 5:12) Nupay kasta, awan ti kalinteganda a mangituray kadagiti kakabsat.—1 Ped. 5:​2, 3.

• Inikkan ni Jehova ti gobierno ti tao iti kalintegan nga agkolekta iti buis ken umawat iti dayaw kadagiti iturturayanda.—Roma 13:​1, 6, 7.

Siaayat nga ipapaay ni Jehova ti nalablabes ngem ti maikari kadatayo. Gapu ta managbasoltayo, maikaritayo laeng a matay. (Roma 6:23) Ngem ipapaayannatayo ni Jehova iti adu a bendision gapu iti napudno nga ayatna kadatayo. (Sal. 103:​10, 11) Tunggal bendision wenno pribilehio a maawattayo kenkuana ket gapu iti nagpaiduma a kinaimbagna.—Roma 12:​6-8; Efe. 2:8.

Agannad tapno saan a maimpluensiaan iti kababalin ti lubong. Baka ditayo madmadlaw a mangrugrugin a panunotentayo a mas maikaritayo iti ad-adu ngem iti dadduma. Insuro ni Jesus no kasano kalaka nga agtubo ti kasta a kapanunotan babaen ti panangusarna iti ilustrasion maipapan kadagiti trabahador a natangdanan iti maysa a denario. Dadduma ti nasapa a nagtrabaho ken nagmalmalem iti kapudotan, idinto ta maysa laeng nga oras a nagtrabaho ti dadduma. Impagarup ti umuna a grupo a maikarida iti dakdakkel a tangdan gapu iti napapaut a panagtrabahoda. (Mat. 20:​1-16) Iti dayta nga ilustrasion, insuro ni Jesus a masapul nga agbalin a kontento dagiti pasurotna iti pagragsakan ti Dios nga ipaay kadakuada.

Agbalin a managyaman imbes nga agbirok ken mangnamnama iti ad-adu pay. (1 Tes. 5:18) Tuladem ti ulidan ni apostol Pablo. Saan a nagkiddaw iti  material a suporta dagiti kakabsat iti Corinto, uray no adda kalinteganna koma a mangaramid iti dayta. (1 Cor. 9:​11-14) Masapul nga apresiarentayo ti tunggal bendision a maaw-awattayo ken liklikantayo ti agbirok ken mangnamnama iti ad-adu pay.

Agbalin a napakumbaba. No nangato unay ti panagkita ti maysa iti bagina, kaaduanna a mariknana a maikari isuna nga umawat iti ad-adu pay. Ti kinapakumbaba ti pangsumra wenno panglaban iti kasta a makasabidong a panagpampanunot.

Nangipakita ni propeta Daniel iti nagsayaat nga ulidan iti kinapakumbaba. Naggapu iti prominente a pamilia, naguapo, nasirib, ken adu ti paglainganna. Isu a mabalin koma a nariknana a maikari isuna kadagiti naawatna nga espesial a pannakatrato ken pribilehio. (Dan. 1:​3, 4, 19, 20) Ngem nagtalinaed a napakumbaba ni Daniel. Gapu iti dayta, impatpateg unay isuna ni Jehova.—Dan. 2:30; 10:​11, 12.

Laksidentayo ti managimbubukodan ken napannakkel a kababalin daytoy a lubong. Itultuloytayo ketdi nga apresiaren ti tunggal bendision nga ipapaay ni Jehova gapu iti nagpaiduma a kinaimbagna.