ADDA kadin tiempo a nagproblemaka, ngem panagriknam ket awan ti mabalin a pagpatulongam? Agbibiagtayon kadagiti “delikado ken narigat a tiempo,” isu a mabalin a maupay ken mariknatayo nga agmaymaysatayo. (2 Tim. 3:1) Ngem saan a kasapulan a bukbukodantayo dagiti problematayo. Ibagbaga ti Biblia a makatulong kadatayo dagiti pudno a gagayyem “no adda rigat.”—Prov. 17:17.

Adu ti naitulong dagiti gagayyem ni apostol Pablo a nakaduana iti panagdaliasatna kas misionero. (Col. 4:​7-11) Idi naibalud ni Pablo idiay Roma, inaramid dagiti gagayyemna dagiti saanna a kabaelan nga aramiden. Kas pagarigan, intulod ni Epafrodito dagiti kasapulan ni Pablo nga impaw-it dagiti kakabsat a taga-Filipos. (Fil. 4:18) Intulod met ni Tiquico dagiti surat ni Pablo iti nagduduma a kongregasion. (Col. 4:7; kitaen ti study note.) Iti tulong dagiti gagayyemna, naitultuloy ni Pablo ti panagministeriona uray no nakabalud iti balay wenno agmaymaysa iti pagbaludan. Sika ngay, kasanoka met nga agbalin a pudno a gayyem?

Ipakpakita dagiti kakabsat ita ti kinapateg ti panagbalin a pudno a gayyem. Inlawlawag ni Elisabet a maysa a regular pioneer idiay Spain no kasano a nagbalin a pudno a gayyem kenkuana ti maysa a sister. Idi nadayagnos a nakaron ti kanser ti Nanang ni Elisabet, nagi-send ti sister iti adu a makaparegta a mensahe a naibatay iti Biblia. “Dagita a mensahe,” kinuna ni Elisabet, “ti nangpabileg kaniak iti kada aldaw ket diak narikna nga agmaymaysaak.”—Prov. 18:24.

Mapabilegtayo ti pannakigayyemtayo kadagiti kakabsat no tulongantayo ida a mapan mangasaba wenno makigimong. Kas pagarigan, mabalinmo kadi nga ilugan ti maysa a nataengan a kabsat tapno makagimong wenno makapangasaba? No aramidem dayta, mapabilegnaka ken mapabilegmo met isuna. (Roma 1:12) Ngem adda dagiti kakabsat a saan a makapanaw iti balayda. Kasanotayo nga agbalin a pudno a gayyem kadakuada?

Saan a makaatender kadagiti gimong iti Kingdom Hall ti dadduma a kakabsat gapu iti sakit wenno dadduma pay a rason. Kasta ti situasion ni David a nadayagnos nga adda kanserna. Nagpa-chemotherapy iti nasurok nga innem a bulan. Bayat ti panagpaagasna, makigimgimongda laeng ken baketna a Lidia babaen ti videoconference.

Kasano a pinabileg dagiti kakabsat da David ken Lidia? Kada malpas ti gimong, ikagumaan ti dadduma a kakabsat iti Kingdom Hall ti makisarita kada David ken Lidia iti videoconference. No  met agkomento da David ken Lidia, agteks dagiti kakabsat kalpasan ti gimong tapno komendaranda ida. Ti resultana? Narikna da David ken Lidia a dungdungnguen ida dagiti kakabsat.

Mabalintay kadi nga iraman iti ministeriotayo dagidiay saan a makapanaw iti balayda? Adda dagiti panagbalbaliw a mabalintayo nga aramiden tapno maipariknatayo kadakuada a saantayo ida a nalipatan. (Prov. 3:27) Baka mabalinmo ida a kaduaen a mangasaba babaen iti surat, selpon, wenno telepono? Mabalin nga iyurnos dagiti panglakayen ti taripnong sakbay ti panangasaba babaen iti videoconference. Inapresiar da David ken Lidia dayta nga urnos. Imbaga ni David: “Permi a maparparegtakami uray iti apagbiit laeng a pannakikaduami kadagiti kagrupomi para iti ababa a panagsasarita ken kararag.” No met ipalubos dagita a kakabsat, mabalinmo kadi a sagpaminsan nga ikuyog ti iyad-adalam iti Biblia iti balayda tapno idiaykayon nga agadal?

No makipagtrabahotayo kadagiti kakabsat a saan a makapanaw iti balayda ken obserbarantayo dagiti nagsayaat a kualidadda, sumingedtayo kadakuada. Kas pagarigan, no makikaduaka kadakuada iti ministerio ket makitam ti kinalaingda a mangusar iti Sao ti Dios a mangdanon iti puso dagiti tattao, ad-adda a sumingedka kadakuada. No tulongam dagiti kakabsat kadagiti naespirituan nga aktibidad, umadu ti gagayyemmo.—2 Cor. 6:13.

Idi naipasango ni Pablo iti narigat a kasasaad, sinarungkaran ti gayyemna a ni Tito. Gapu iti dayta, naliwliwa ni Pablo. (2 Cor. 7:​5-7) Isuro dayta a salaysay a makaipaaytayo iti pammaregta, saan laeng nga iti sao, no di ket uray pay no kaduaentayo ida ken no aramidentayo ti amin a kabaelantayo a tumulong kadakuada.—1 Juan 3:18.

Nagsayaat ti ulidan nga ipakpakita dagiti kakabsat iti Russia maipapan iti panagtitinnulong. Kitaentayo ti kapadasan da Sergey ken ti baketna a ni Tatyana. Kalpasan a sinukisok dagiti polis ti balayda, innalada ida tapno pagsaludsodan. Ni Tatyana ti immuna a nawayawayaan ken napagawid. Imbaga ni Sergey: “Idi nakaawiden [ni Tatyana], adda natured a sister nga immay, ken adu pay a kakabsat ti simmaruno, tapno tulongandakami a mangdalus ken mangurnos iti apartmentmi.”

Innayon ni Sergey: “Pabpaboritok ti Proverbio 17:17 a kunana: ‘Ti pudno a gayyem agayat iti amin a tiempo ken maysa a kabsat a mapangnamnamaan no adda rigat.’ Lallalo pay a napaneknekak dayta idi naidadanesak ta kasapulak unay ti tulong dagiti gagayyemmi. Impaayannakami ni Jehova kadagiti gagayyem a situtured a mangsaranay kadakami.”

Bayat a rumigrigat ti tiempo, kasapulantayo ti tulong dagiti gagayyemtayo. Ad-adda a kasapulantayto ida bayat ti dakkel a rigat. Isu nga ita pay laeng, ikagumaantayon ti agbalin a pudno a gayyem!—1 Ped. 4:​7, 8.