1. Kaano a mabalin a narigat ti agserbi ken Jehova?

PANAGKUNAM, kaano ti karirigatan a tiempo ti panagserbi ken Jehova—no kadi adda dagiti narigat a problemam wenno no medio natalna ti biagmo? No maipaspasangotayo kadagiti pakarigatan, nalakatayo laeng nga agtalek ken Jehova. Ngem ania ti aramidentayo no natalna ti biagtayo? Malipatantayo kadi no dadduma ti kinapateg ti panagserbitayo iti Dios? Pinakdaaran ni Jehova dagiti Israelita a mabalin a mapasamak daytoy.—Deut. 6:10-12.

2. Ania ti nasayaat nga ulidan ni Ari Asa?

² Ni Ari Asa ket nakasaysayaat nga ulidan ta nagtignay a nainsiriban babaen ti naan-anay a panagpannurayna ken Jehova. Nagserbi ken Jehova saan laeng nga iti nariribuk a tiempo no di ket uray iti tiempo ti talna. “Naan-anay ti puso ni Asa ken ni Jehova” uray idi ubing pay. (1 Ar. 15:14, ftn.) Ti maysa a pamay-an nga impakita ni Asa ti debosionna ket ti panangikkatna iti ulbod a panagdaydayaw iti Juda. Kuna ti Biblia nga “inikkatna dagiti altar dagiti sabali a dios ken dagiti nangato a disso, rinebbana dagiti sagrado nga adigi, ken pinukanna dagiti sagrado a poste.” (2 Cron. 14:3, 5) Inikkatna pay ketdi ni lolana a Maaca iti saadna kas ina a reyna iti pagarian. Apay? Gapu ta insaknapna ti ulbod a panagdaydayaw iti maysa nga idolo.—1 Ar. 15:11-13.

3. Ania ti usigentayo iti daytoy nga artikulo?

³ Saan laeng nga inikkat ni Asa ti ulbod a panagdaydayaw. Intandudona ti nadalus a panagdaydayaw ket tinulonganna ti pagarian ti Juda nga agsubli ken Jehova. Binendisionan ni  Jehova ni Asa ken dagiti Israelita iti tiempo ti talna. * Iti uneg ti 10 a tawen bayat ti panagturay ni Asa, “natalna idi ti daga.” (2 Cron. 14:1, 4, 6) Iti daytoy nga artikulo, pagsasaritaantayo no kasano nga inusar ni Asa ti tiempo ti talna. Kalpasanna, usigentayo ti ulidan dagiti Kristiano idi umuna a siglo a nangusar a naimbag iti tiempo ti talna, a kas ken Asa. Kamaudiananna, sungbatantayto daytoy a saludsod: No agnanaedka iti pagilian nga adda wayawaya ti panagdaydayaw, kasanom a mausar a nainsiriban ti tiempo ti talna?

4. Sigun iti 2 Cronicas 14:2, 6, 7, kasano nga inusar ni Asa ti tiempo ti talna?

⁴ Basaen ti 2 Cronicas 14:2, 6, 7. Imbaga ni Asa kadagiti umili a ni Jehova ti ‘nangipaay kadakuada iti naan-anay a talna.’ Saan nga impapan ni Asa a tiempo ti panagrelaks daytoy a tiempo ti talna. Imbes ketdi, rinugianna ti nangaramid kadagiti siudad, pader, torre, ken ruangan. Imbagana kadagiti umili ti Juda: “Kukuatayo pay laeng ti daga.” Ania ti kayat a sawen ni Asa? Kaipapananna a nawayada iti daga nga inted ti Dios kadakuada ken makapagbangonda nga awan ti ibubusor. Pinaregtana dagiti umili a gundawayanda daytoy a tiempo ti talna.

5. Apay a pinapigsa ni Asa ti puersa militarna?

⁵ Inusar met ni Asa ti tiempo ti talna tapno papigsaenna ti puersa militarna. (2 Cron. 14:8) Kaipapanan kadi dayta a saan a nagtalek ken Jehova? Saan. Imbes ketdi, ammo ni Asa a responsabilidadna kas ari nga isagana dagiti umili kadagiti problema a mabalin a pakaipasanguanda. Ammo ni Asa a saan nga agnanayon idi ti tiempo ti talna iti Juda, ket pimmayso dayta.

6. Kasano nga inusar dagiti Kristiano idi umuna a siglo ti tiempo ti talna?

⁶ Nupay masansan a maidadanes dagiti Kristiano idi umuna a siglo, adda met dagiti tiempo a tinagiragsakda ti talna. Ania ti inaramid dagiti adalan kadagita a gundaway? Intultuloy dagita a matalek a lallaki ken babbai nga ikasaba ti naimbag a damag. Kuna ti salaysay iti Aramid a ‘nagbutengda ken Jehova.’ Saanda a simmardeng a nangikasaba iti naimbag a damag isu a “nagtultuloyda nga immadu.” Nalawag a binendisionan ni Jehova ti naregta a panangasabada bayat ti tiempo ti talna.—Ara. 9:26-31.

7-8. Ania ti inaramid ni Pablo ken ti dadduma pay idi adda gundawayda? Ilawlawag.

⁷ Kanayon nga inkasaba dagiti adalan idi umuna a siglo ti naimbag a damag. Kas pagarigan, idi nabigbig ni apostol Pablo a nailukat kenkuana ti dakkel a ruangan bayat nga adda idiay Efeso, ginundawayanna ti nangasaba ken nangaramid kadagiti adalan iti dayta a siudad.—1 Cor. 16:8, 9.

⁸ Adda met gundaway ni Pablo ken ti dadduma a Kristiano a mangasaba idi nasolbar ti isyu maipapan iti panagkugit idi 49 C.E. (Ara. 15:23-29) Kalpasan a naipakaammo ti desision kadagiti kongregasion, inkagumaan dagiti adalan nga ideklara ti “naimbag a damag maipapan iti sao ni Jehova.” (Ara. 15:30-35) Ania ti resultana? Ibaga ti Biblia a “nagtultuloy a timmibker ti pammati dagiti kongregasion ken inaldaw nga immadu ti bilangda.”—Ara. 16:4, 5.

9. Ania ti situasion ita iti adu a pagilian, ken ania dagiti mabalintayo nga isaludsod iti bagitayo?

⁹ Iti adu a pagilian ita, nawayatayo a makapangasaba. Agnanaedka kadi iti pagilian nga adda wayawaya ti panagdaydayaw? No wen, isaludsodmo iti bagim, ‘Kasanok nga us-usaren daytoy a wayawaya?’ Bayat dagitoy makapagagar a maudi nga al-aldaw, okupado ti organisasion ni Jehova iti kadakkelan a kampania a panangasaba ken panangisuro iti intero a lubong. (Mar. 13:10) Adu ti mabalin nga aramiden ita ti ili ni Jehova.

10. Ania ti iparegta ti 2 Timoteo 4:2 nga aramidentayo?

¹⁰ Ania ti nasayaat nga aramidem iti tiempo ti talna? (Basaen ti 2 Timoteo 4:2.) Panunotem koma ti kasasaadmo. Mabalinmo kadi wenno ti maysa a kapamiliam ti makipaset iti panangasaba iti ad-adu nga oras, wenno nalabit agpayunir pay ketdi? Saan a tiempo ita ti panagurnong iti kinabaknang wenno material a sanikua—bambanag a saantayo a kadua a makalasat inton dakkel a rigat.—Prov. 11:4; Mat. 6:31-33; 1 Juan 2:15-17.

11. Ania ti inaramid ti dadduma tapno maipakaammoda ti naimbag a damag iti adu a tattao?

¹¹ Adu nga agibumbunannag ti nagsursuro iti baro a lengguahe tapno mausarda dayta iti panangasaba ken panangisuro. Tultulongan ida ti organisasion ti Dios babaen ti panagaramidna kadagiti publikasion a naibatay iti Biblia iti adu a lengguahe. Kas pagarigan, idi 2010, magun-odanen dagiti publikasiontayo iti agarup 500 a lengguahe. Ita, immadu daytan iti nasurok a 1,000 a lengguahe!

12. Kasano a magunggonaan dagiti tattao no mangngegda ti mensahe maipapan iti Pagarian iti bukodda a lengguahe? Mangted iti pagarigan.

¹² Ania ti marikna dagiti tattao no mangngegda ti kinapudno ti Sao ti Dios iti bukodda a lengguahe? Kitaentayo ti kapadasan ti maysa a kabsat a babai a Kinyarwanda ti lengguahena, a nagunggonaan iti maysa a rehional a kombension idiay Memphis, Tennessee, U.S.A. Naiparang ti kombension iti lengguahe a Kinyarwanda, a kangrunaanna a maus-usar idiay  Rwanda, Congo (Kinshasa), ken Uganda. Kalpasan ti kombension, kinuna ti kabsat: “Ita pay laeng a naawatak a naimbag ti naespirituan a programa sipud idi immayak ditoy United States 17 a tawenen ti napalabas.” Nalawag a natukay ti puso daytoy a kabsat idi nangngegna ti programa iti bukodna a lengguahe. No ipalubos ti kasasaadmo, mabalinmo kadi ti agsursuro iti sabali a lengguahe tapno matulongam ti dadduma iti teritoriayo? Saan kadi a nagsayaat dayta ta adda dagidiay masarakan iti teritoria ti kongregasionyo a nalaglag-an ti riknada a makisarita kadagidiay makasao iti bukodda a lengguahe? Sigurado a makaparagsak ti resulta dagiti panagreggetmo.

13. Kasano idi nga inusar dagiti kakabsat idiay Russia ti tiempo ti talna?

¹³ Saan nga amin a kakabsattayo ket nawaya a makapangasaba. No dadduma, limitado unay ti maaramidantayo iti ministerio gapu kadagiti restriksion ti gobierno. Kas pagarigan, panunotentayo dagiti kakabsattayo idiay Russia. Kalpasan ti pinullo a tawen a panangidadanes, inikkan ida ti gobierno iti wayawaya nga agdaydayaw idi Marso 1991. Iti dayta a tiempo, agarup 16,000 laeng ti bilang dagiti mangiwarwaragawag iti Pagarian idiay Russia. Duapulo a tawen kalpasanna, immadu ti bilangda iti nasurok a 160,000! Nalawag a nagtignay a nainsiriban dagiti kakabsattayo idi adda gundaway a nawayada a makapangasaba. Saan a nagpaut dayta a tiempo ti talna. Ngem uray nagbalbaliw ti kasasaad, saan a bimmaaw ti regtada iti nadalus a panagdaydayaw. Ar-aramidenda ti amin a kabaelanda tapno makapagtultuloyda nga agserbi ken Jehova.

14-15. Kasano nga impakita ni Jehova ti pannakabalinna a tumulong ken Asa?

¹⁴ Ti tiempo ti talna idi kaaldawan ni Asa ket nagpatingga idi agangay. Rimmaut kenkuana  ti nakadakdakkel a puersa militar—maysa a milion a soldado—manipud Etiopia. Sigurado idi ti komander dayta nga armada a ni Zera a maabakna ti Juda. Ngem saan nga iti bilang ti nagtalkan ni Ari Asa no di ket iti Diosna a ni Jehova, isu nga inkararagna: “Tulongannakami, O Jehova a Diosmi, ta agtalekkami kenka, ken makilabankami iti daytoy nga armada babaen ti naganmo.”—2 Cron. 14:11.

¹⁵ Nupay dandani doble ti kaadu dagiti soldado ti Etiopia, mamati idi ni Asa a mannakabalin ni Jehova ken tulonganna ti ilina. Kasta ti inaramid ni Jehova, isu a nagsagaba ti armada ti Etiopia iti nakababain a pannakaabak.—2 Cron. 14:8-13.

16. Kasanotayo nga ammo nga agpatingganto ti tiempo ti talna?

¹⁶ Nupay ditay ammo ti amin a detalye ti mapasamak iti tunggal maysa kadatayo iti masanguanan, ammotayo a temporario ti aniaman a tiempo ti talna a mapaspasaran ita ti ili ti Dios. Kinapudnona, impadto ni Jesus nga iti maudi nga al-aldaw, dagiti adalanna ket ‘guraento ti amin a nasion gapu iti naganna.’ (Mat. 24:9) Imbaga met ni apostol Pablo a “maidadanesto . . . ti amin nga agtarigagay nga agbiag maitunos iti debosionda iti Dios kas adalan ni Kristo Jesus.” (2 Tim. 3:12) ‘Kasta unay ti pungtot’ ni Satanas ket loklokuentayo ti bagitayo no panunotentayo a maliklikantayo ti pungtotna.—Apoc. 12:12.

17. Kadagiti ania a pamay-an a mabalin a masubokto ti pammatitayo?

¹⁷ Asidegen a maipasangotayo amin kadagiti suot a mangsubok iti kinamatalektayo. Dandanin mapasaran ti lubong ti “dakkel a rigat a saan pay a napaspasamak manipud idi panangrugi ti lubong agingga ita, ken dinto met mauliten.” (Mat. 24:21) Bayat dayta a tiempo, mabalin a busorendatayo dagiti kapamiliatayo ken maiparit ti trabahotayo. (Mat. 10:35, 36) Kas ken Asa, agtalektayto kadi ken Jehova a tulongan ken salaknibannatayo?

18. Sigun iti Hebreo 10:38, 39, ania ti makatulong tapno masaganaantayo ti panagpatingga ti talna?

¹⁸ Isagsagananatayo ni Jehova tapno nabilegto ti pammatitayo a mangsango iti masanguanan. Iwanwanwanna ti “matalek ken masirib nga adipen” a mangipaay iti makapasalun-at a naespirituan a ‘taraon iti umiso a tiempo’  tapno makapagtalinaedtayo a matalek. (Mat. 24:45) Ngem masapul nga aramidentayo ti pasettayo ket patibkerentayo ti pammatitayo ken Jehova.—Basaen ti Hebreo 10:38, 39.

19-20. Kalpasan a nabasatayo ti 1 Cronicas 28:9, ania dagiti masapul nga isaludsodtayo iti bagitayo, ken apay?

¹⁹ Kas ken Ari Asa, masapul a ‘sapulentayo ni Jehova.’ (2 Cron. 14:4; 15:1, 2) Marugiantayo dayta a panagsapul babaen ti panangam-ammotayo ken Jehova ken panagpabautisar. Kalpasanna, itultuloytayo ti amin a kabaelantayo a mangpauneg iti ayattayo ken Jehova. Tapno makita no ar-aramidentayo dayta, mabalin nga isaludsodtayo iti bagitayo, ‘Regularak kadi nga umat-atender iti gimong?’ No umatendertayo kadagiti gimong nga inyurnos ti organisasion ni Jehova, mapabilegtayo nga agtultuloy nga agserbi ken Jehova ken maparegtadatayo dagiti kakabsat. (Mat. 11:28) Mabalin met nga isaludsodtayo iti bagitayo, ‘Adda kadi nasayaat nga eskediulko iti personal a panagadal?’ No adda pamiliam, adda kadi linawas a panagdaydayaw ti pamiliayo? Wenno no agsolsoloka, adda kadi eskediulmo para iti kasta a panagdaydayaw? Ar-aramidem met kadi ti amin a kabaelam iti trabaho a panangasaba ken panagaramid iti adalan?’

²⁰ Apay a masapul nga isaludsodtayo dagita? Kuna ti Biblia a suksukimaten ni Jehova ti panunot ken pusotayo isu a masapul a kasta met ti aramidentayo. (Basaen ti 1 Cronicas 28:9.) No makitatayo nga adda masapul a balbaliwantayo kadagiti kalat, kababalin, wenno panagpampanunottayo, kiddawentayo ken Jehova a tulongannatayo nga agbalbaliw. Itan ti tiempo nga agsaganatayo para kadagiti pannubok iti masanguanan. Dimo ipalubos nga adda makalapped iti nainsiriban a panangusarmo iti tiempo ti talna!