1-2. Ania ti koneksion ti Eclesiastes 11:6 iti panangikasaba iti naimbag a damag ti Pagarian?

ITI dadduma a pagilian, adu ti aginteres iti naimbag a damag. Dayta ti nabayagen nga ur-urayenda! Iti dadduma a lugar, saan unay nga interesado dagiti tattao iti Dios wenno iti Biblia. Ania ti reaksion ti kaaduan iti lugaryo maipapan iti naimbag a damag? Aniaman ti reaksionda, namnamaen ni Jehova nga itultuloytayo ti mangasaba agingga nga ibagana a nalpasen dayta.

² Agpatingga ti trabaho a panangasaba iti tiempo nga inkeddeng ni Jehova. Kalpasanna, “umayton ti panungpalan.” (Mat. 24:14, 36) Kabayatanna, kasanotayo a matungpal ti sasao a “dimo paginanaen ti imam”? *—Basaen ti Eclesiastes 11:6.

3. Ania ti usigentayo iti daytoy nga artikulo?

³ Nausig iti napalabas nga artikulo ti uppat a masapul nga aramidentayo tapno epektibotayo a “mangngalap iti tattao.” (Mat. 4:19) Mailawlawag iti daytoy nga artikulo ti tallo a pamay-an a mapabilegtayo ti determinasiontayo a mangasaba, aniaman ti pakaipasanguantayo a kasasaad. Maammuantayo no apay a napateg nga (1) agtalinaedtayo a nakapokus, (2) agbalintayo a naanus, ken (3) pagtalinaedentayo a nabileg ti pammatitayo.

4. Apay a masapul nga agtalinaedtayo a nakapokus iti trabaho nga inted ni Jehova kadatayo?

⁴ Impadto ni Jesus dagiti pasamak ken kasasaad a pakailasinan ti maudi nga al-aldaw ken mabalin a mangsinga kadagiti pasurotna a mangitungpal iti trabaho a panangasaba. Imparegtana  kadagiti adalanna: “Itultuloyyo ti agbantay.” (Mat. 24:42) Adda dagiti pakasingaan ita nga umasping kadagiti nakasingaan dagiti tattao idi kaaldawan ni Noe isu a dida impangag ti pakdaarna. (Mat. 24:37-39; 2 Ped. 2:5) No kasta, kayattayo ti agtalinaed a nakapokus iti trabaho nga inted ni Jehova kadatayo.

5. Kasano a dineskribir ti Aramid 1:6-8 ti kasaknap ti trabaho a panangasaba?

⁵ Ita, masapul a nakapokustayo iti trabaho a panangikasaba iti Pagarian. Impadto ni Jesus a maisaknap daytoy a trabaho ken agtultuloy kalpasan ti ipapatayna. (Juan 14:12) Kalpasan ti ipapatay ni Jesus, nagsubli ti dadduma nga adalanna iti trabaho a panagkalap. Kalpasan ti panagungarna, nangaramid iti milagro isu a nagadu nga ikan ti nakalap ti dadduma nga adalanna. Inusarna dayta a gundaway tapno ipaganetgetna a ti trabaho a panagkalap iti tattao ket napatpateg ngem iti aniaman a trabaho. (Juan 21:15-17) Sakbay unay a nagpalangit ni Jesus, impakaammona kadagiti adalanna a ti trabaho a panangasaba a rinugianna ket maisaknap iti ruar ti Israel. (Basaen ti Aramid 1:6-8.) Adu a tawen kalpasanna, nangted ni Jesus iti sirmata ken apostol Juan tapno ipakitana ti mapasamak iti “aldaw ti Apo.” * Karaman iti dadduma pay a nakita ni Juan ket daytoy nakaskasdaaw a pasamak: Iti panangiwanwan ti anghel, naikaskasaban ti “agnanayon a naimbag a damag” iti “tunggal nasion ken tribu ken lengguahe ken ili.” (Apoc. 1:10; 14:6) Nalawag a pagayatan ni Jehova ita a makiramantayo iti daytoy a sangalubongan a trabaho a panangasaba agingga a malpas.

6. Kasanotayo nga agtalinaed a nakapokus iti trabaho a panangasaba?

⁶ Makapagtalinaedtayo a nakapokus iti trabaho a panangasaba no panunotentayo ti nagadu nga ar-aramiden ni Jehova a mangtulong kadatayo. Kas pagarigan, mangipapaay iti aglaplapusanan a naespirituan a taraon kadagiti nayimprenta ken digital a publikasion, audio  ken video recording, ken Internet broadcast. Panunotem daytoy: Iti opisial a website-tayo, magun-odan ti impormasion iti nasurok a 1,000 a lengguahe! (Mat. 24:45-47) Iti lubong a nasinasina gapu iti politika, relihion, ken ekonomia, nasurok a walo a milion nga agserserbi iti Dios ti talaga nga agkaykaysa kas sangalubongan nga agkakabsat. Kas pagarigan, idi Biernes, Abril 19, 2019, nagkaykaysa dagiti Saksi iti intero a lubong a nangbuya iti video a nangilawlawag iti teksto ti Biblia iti dayta nga aldaw. Karabiyanna, nagtataripnong ti 20,919,041 tapno laglagipenda ti Memorial ti ipapatay ni Jesus. Matignaytayo nga agtalinaed a nakapokus iti trabaho ti Pagarian no panunotentayo ti dakkel a pribilehiotayo a makakita ken agbalin a paset daytoy a milagro iti kaaldawantayo.

7. Kasano a makatulong ti ulidan ni Jesus tapno agtalinaedtayo a nakapokus?

⁷ Ti sabali pay a pamay-an a makapagtalinaedtayo a nakapokus iti panangasaba ket ti panangtuladtayo iti ulidan ni Jesus. Dina impalubos a masinga iti panangsaksina iti kinapudno. (Juan 18:37) Saan a nasulisog idi intukon kenkuana ni Satanas ti “amin a pagarian ti lubong ken ti kinadayagda.” Saan met a nagpasulisog idi kayat dagiti tattao a pagbalinen nga ari. (Mat. 4:8, 9; Juan 6:15) Dina tinarigagayan ti material a kinabaknang. Saan a nagsardeng uray naipasango iti nakaro nga ibubusor. (Luc. 9:58; Juan 8:59) No masubok ti pammatitayo, makapagtalinaedtayo a nakapokus no laglagipentayo ti balakad ni apostol Pablo. Imparegtana kadagiti Kristiano a surotenda ti ulidan ni Jesus tapno ‘dida mabannog ken sumuko’!—Heb. 12:3.

8. Ania ti kinaanus, ken apay a nangnangruna a kasapulan dayta ita?

⁸ Ti kinaanus ket kalmado a panaguray nga agbaliw ti situasion. Magagarantay man nga agpatingga ti maysa a di nasayaat a kasasaad wenno matungpal ti nabayagen a tarigagaytayo, kasapulantayo ti kinaanus. Tinarigagayan idi ni propeta Habakuk nga agpatingga dagiti naranggas a kasasaad idiay Juda. (Hab. 1:2) Ninamnama dagiti adalan ni Jesus nga “umay a dagus” idin ti Pagarian tapno maisalakanda iti panangirurumen dagiti Romano. (Luc. 19:11) Segseggaantayo ti aldaw inton ti Pagarian ti Dios ikkatenna ti kinadakes ken iyegna ti nalinteg a baro a lubong. (2 Ped. 3:13) Nupay kasta, masapul nga aganustayo ken urayentayo ti tiempo nga inkeddeng ni Jehova. Usigentayo ti dadduma a pamay-an nga isursuronatayo ni Jehova nga aganus.

9. Ania dagiti pagarigan a mangipakita iti kinaanus ni Jehova?

⁹ Impakita ni Jehova ti perpekto nga ulidan ti kinaanus. Inikkanna ni Noe iti umdas a tiempo a mangibangon iti daong ken ‘mangikasaba iti kinalinteg.’ (2 Ped. 2:5; 1 Ped. 3:20) Dimngeg ni Jehova iti maulit-ulit a panagsaludsod ni Abraham maipapan iti desisionna a mangdadael kadagiti umili dagiti dakes a siudad ti Sodoma ken Gomorra. (Gen. 18:20-33) Iti adu a siglo, impakita ni Jehova ti nagpaiduma a kinaanusna iti di matalek a nasion ti Israel. (Neh. 9:30, 31) Makitkitatayo ti ebidensia ti kinaanus ni Jehova ita bayat nga ik-ikkanna ti amin iti gundaway nga “agbabawi.” (2 Ped. 3:9; Juan 6:44; 1 Tim. 2:3, 4) Gapu iti dayta nga ulidan ni Jehova, agan-anustayo met koma bayat nga itultuloytayo ti mangasaba ken mangisuro. Isursuronatayo met nga aganus babaen ti maysa nga ilustrasion a masarakan iti Saona.

10. Ania ti masursurotayo maipapan iti mannalon iti Santiago 5:7, 8?

¹⁰ Basaen ti Santiago 5:7, 8. Masursurotayo ti aganus iti ulidan ti mannalon a mangpadpadakkel  kadagiti mulana. Adda dagiti mula nga alisto a dumakkel. Ngem nabaybayag a dumakkel ti dadduma a mula, nangruna dagiti agbunga. Agarup innem a bulan ti panagdakkel dagiti mula idiay Israel. Imula ti mannalon dagiti bin-ina kalpasan ti nasapa a panagtutudo (katengngaan ti Oktubre), sa iti ngudo ti innem a bulan (katengngaan ti Abril), agapit kalpasan ti naladaw a panagtutudo. (Mar. 4:28) Masiribtayo no tuladentayo ti kinaanus ti mannalon. Ngem mabalin a saan a nalaka dayta.

11. Kasano a makatulong ti kinaanus iti ministeriotayo?

¹¹ Gagangay a kayat dagiti imperpekto a tattao a makita a dagus ti resulta ti panagreggetda. Ngem no kayattayo a dumakkel ken agbunga dagiti imulatayo, masapul nga itultuloytayo a taripatuen dagita. Masapul nga agkalitayo, agmula, agiruot, ken sibugantayo dagiti immulatayo. Kasta met, masapul ti agtultuloy a panagregget iti trabaho a panagaramid iti adalan. Kasapulan ti tiempo tapno maparuttayo dagiti arig ruot a panangidumduma ken kinaawan pannakaseknan iti puso dagiti iyad-adalantayo. No naanustayo, ditay maupay no maipasangotayo kadagiti pakarigatan. No adda dagiti masarakantayo nga interesado, masapul latta nga agan-anustayo. Ditay mapapartak ti naespirituan nga irarang-ay ti iyad-adalantayo. Adda idi tiempo nga uray dagiti adalan ni Jesus saanda a dagus a naawatan ti kaipapanan ti insurona. (Juan 14:9) Laglagipentayo a mabalintayo ti agmula ken agsibug, ngem ti Dios ti mangpadakkel iti dayta.—1 Cor. 3:6.

12. Kasano a maipakitatayo ti kinaanus no kaskasabaantayo dagiti di manamati a kabagiantayo?

¹² Ti maysa a kasasaad a mabalin a marigatantayo nga agbalin a naanus ket no kaskasabaantayo dagiti di manamati a kabagiantayo. Makatulong kadatayo ti prinsipio iti Eclesiastes 3:1, 7. Kunana: “Adda . . . tiempo ti panagulimek ken tiempo ti panagsao.” Ti nasayaat  nga ugalitayo ti makatulong kadagiti kabagiantayo a dumngeg iti mensahetayo. Ngem masapul met a kanayon a nasiputtayo kadagiti gundaway a mabalintayo nga ibaga kadakuada ti kinapudno. (1 Ped. 3:1, 2) Naanustayo iti amin a tattao—agraman kadagiti kapamiliatayo—bayat a sireregta a mangaskasaba ken mangisursurotayo.

13-14. Ania ti dadduma nga ulidan ti kinaanus a mabalintayo a tuladen?

¹³ Masursurotayo ti kinaanus manipud iti ulidan dagiti matalek a tattao idi panawen ti Biblia ken iti panawentayo. Kayat unay idin ni Habakuk nga agpatingga ti kinadakes, ngem impakitana ti kinaanus idi imbagana: “Agtalinaedakto a nakatakder iti pagguardiaak.” (Hab. 2:1) Inyebkas ni apostol Pablo ti naimpusuan a tarigagayna a ‘mangileppas’ iti ministeriona. Ngem siaanus nga intultuloyna a ‘naan-anay nga ikasaba ti naimbag a damag.’—Ara. 20:24.

¹⁴ Usigentayo ti kapadasan ti maysa nga agassawa a naggraduar iti Gilead ken naidestino iti pagilian a manmano dagiti Saksi ken saan a Kristiano ti kangrunaan a relihion. Manmano dagiti mayat a makipagadal iti Biblia. Iti sabali a bangir, dagiti kaklaseda iti Gilead nga agserserbi iti sabali a pagilian ket nagipatpatulod iti makaparagsak a damdamag maipapan iti adu a nabunga a panangyadalda iti Biblia. Nupay nabuntog ti irarang-ay iti teritoriada, nagan-anus ti agassawa a nangitultuloy iti ministerioda. Kalpasan ti walo a tawen a panangasabada iti teritoria a kasla saan a nabunga, nariknada met laengen ti rag-o idi nakitada a nagpabautisar ti maysa kadagiti iyad-adalanda iti Biblia. Ania ti nagpapadaan dagitoy a pagarigan idi un-unana ken iti agdama? Dagitoy a matalek nga agserserbi ken Jehova saanda a nagbalin a nasadut wenno saanda a pinaginana ti imada, isu a binendisionan ni Jehova ti kinaanusda. Sapay koma ta “tuladen[tayo] dagidiay umawat kadagiti kari babaen ti pammati ken kinaanusda.”—Heb. 6:10-12.

15. Ania ti maysa a pamay-an no kasano a ti pammati mapabilegna ti determinasiontayo a mangasaba?

¹⁵ Mamatitayo iti mensahe nga ikaskasabatayo, isu a magagarantayo a mangipakaammo iti dayta iti adu a tattao. Agtalektayo kadagiti kari a masarakan iti Sao ti Dios. (Sal. 119:42; Isa. 40:8) Makitkitatayo a matungtungpalen dagiti padto ti Biblia ken sumaysayaat ti biag dagiti tattao no iyaplikarda ti balakad ti Biblia. Gapu iti dayta, mas kombinsidotayo a masapul a maammuan ti amin ti naimbag a damag ti Pagarian.

16. Maitunos iti Salmo 46:1-3, kasano a ti pammatitayo ken Jehova ken ni Jesus mapabilegna ti determinasiontayo a mangasaba?

¹⁶ Adda met pammatitayo ken Jehova, ti Gubuayan ti mensahe nga ikaskasabatayo, ken ni Jesus, daydiay intronona nga Ari ti Pagarian. (Juan 14:1) Aniaman ti mapasamak kadatayo, kanayon a ni Jehova ti kamang ken bilegtayo. (Basaen ti Salmo 46:1-3.) Kasta met, agtalektayo nga iwanwanwan ni Jesus idiay langit ti trabaho a panangasaba, ket us-usarenna ti pannakabalin ken autoridad nga inted ni Jehova kenkuana.—Mat. 28:18-20.

17. Mangted iti pagarigan no apay a masapul nga itultuloytayo ti mangasaba.

¹⁷ Ti pammati pabilgenna ti panagtalektayo a bendisionan ni Jehova dagiti panagreggettayo, a no dadduma iti pamay-an a ditay namnamaen. (Ecl. 11:6) Kas pagarigan, inaldaw a rinibu a tattao ti makakitkita iti literature display ken cart-tayo. Epektibo kadi daytoy a pamay-an ti panangasaba? Wen! Iti Nobiembre 2014 a ruar ti Ministeriotayo iti Pagarian, nadakamat ti maysa nga agtutubo nga  estudiante iti unibersidad a kayatna ti agsurat iti essay maipapan kadagiti Saksi ni Jehova. Awan ti Kingdom Hall a nasarakanna, ngem adda nakitana a literature display-tayo iti eskuelaan, ken nakasarak met iti publikasion para iti essay-na. Idi agangay, nagbalin a bautisado a Saksi ken regular pioneer itan. Dagita a kapadasan ti mangparegta kadatayo nga agtultuloy a mangasaba gapu ta adda pay laeng dagiti tattao a masapul a makangngeg iti mensahe ti Pagarian.

18. Apay a siguradotayo a mairingpasto ti trabaho a panangikasaba iti Pagarian sigun iti kayat ni Jehova?

¹⁸ Masiguradotayo a ti trabaho a panangikasaba iti Pagarian ket mairingpasto iti umiso a tiempo. Usigentayo ti napasamak idi kaaldawan ni Noe. Impakita ni Jehova a kanayon nga aramidenna ti bambanag iti kasayaatan a tiempo. Agarup 120 a tawen sakbay ti Layus, inkeddengen ni Jehova ti tiempo a dumteng dayta. Pinullo a tawen kalpasanna, imbaga ni Jehova ken Noe a mangbangon iti daong. Nalabit 40 wenno 50 a tawen sakbay ti Layus a sipipinget a nagtrabaho ni Noe. Nupay saan a dimngeg kenkuana dagiti tattao, intultuloyna nga ikasaba ti pakdaar agingga nga imbaga ni Jehova a tiempon nga iserrekna iti daong dagiti animal. Ket kalpasanna, iti umiso a tiempo, “inrikep ni Jehova ti ruangan.”—Gen. 6:3; 7:1, 2, 16.

19. Ania ti mainanamatayo no ditay paginanaen ti imatayo?

¹⁹ Asidegen a pagpatinggaen ni Jehova ti trabaho a panangikasaba iti Pagarian. ‘Irikepnanton ti ruangan’ para iti sistema ti bambanag ni Satanas ket iyegnan ti nalinteg a baro a lubong. Bayat nga ur-urayentayo dayta, tuladentay koma da Noe, Habakuk, ken ti dadduma pay a dida pinaginana ti imada. Agtalinaedtay koma a nakapokus, agbalintayo a naanus, ken pagtalinaedentayo a nabileg ti pammatitayo ken Jehova ken kadagiti karina.