1. Ania ti inyawis ni Jesus iti uppat a mangngalap, ken ania ti reaksionda?

DAGITI adalan a da Pedro, Andres, Santiago, ken Juan ket addaan iti negosio a panagkalap. Panunotenyo ti siddaawda idi inyawis ni Jesus: “Surotendak, ket pagbalinenkayto a mangngalap iti tattao.” * Ania ti reaksionda? Kuna ti Biblia: “Dagus a pinanawanda dagiti iketda ket simmurotda kenkuana.” (Mat. 4:18-22) Dayta a desision ti nangbalbaliw iti intero a biagda. Imbes a nagkalapda iti literal nga ikan, nagbalinda a “mangngalap iti tattao.” (Luc. 5:10, ftn.) Ita, kasta met la ti iyaw-awis ni Jesus kadagiti nasingpet a tattao a mangay-ayat iti kinapudno. (Mat. 28:19, 20) Inawatmo kadin ti awis ni Jesus nga agbalin a mangngalap iti tattao?

2. Asino ti masapul a mangpanunot a naimbag no kayatdan ti agbalin a mangngalap iti tattao, ken ania ti makatulong kadakuada a mangaramid iti dayta?

² Nalabit medio nabayagkan a makipagad-adal iti Biblia ken addan dagiti binalbaliwam iti biagmo. Ket ita, masapul nga agdesisionkan no kayatmo ti agbalin nga agibumbunannag iti naimbag a damag. No agpangpangaduaka a mangawat iti awis ni Jesus, dika maupay. Mabalin a kaipapanan dayta nga ammom a nakapatpateg dayta a desision. Pudno nga ibaga ti Biblia a “dagus” a pinanawan ni Pedro ken dagiti kakaduana dagiti literal nga iketda. Ngem saan a sidadarasudos a nagdesision  ni Pedro ken ti kabsatna. Ngamin, innem a bulan sakbay dayta, naam-ammon ken inakseptardan ni Jesus kas ti Mesias. (Juan 1:35-42) Kasta met, mabalin nga adun ti naadalmo maipapan ken Jehova ken ni Jesus, ket kayatmo ti agtultuloy a rumang-ay iti naespirituan. Ngem masapul nga agpanunotka a naimbag sakbay nga agdesisionka. Ania ti nakatulong kada Pedro, Andres, ken iti dadduma pay nga agdesision?

3. Ania dagiti kualidad a makatulong tapno mas determinadoka a mangawat iti awis ni Jesus?

³ Dagiti immuna nga adalan ni Jesus ket determinado, natured, disiplinado, ken nalaingda iti trabahoda. Nakatulong la ketdi dagita a kualidad tapno agbalinda nga epektibo a mangngalap iti tattao. Ilawlawag daytoy nga artikulo no kasano a mapatanormo dagita a kualidad tapno agbalinka nga epektibo nga adalan ni Kristo.

4. Apay a kayat ni Pedro ti agkalap iti ikan?

⁴ Nagkalap ni Pedro iti ikan tapno masuportaranna ti pamiliana, ngem saan la a trabaho dayta para kenkuana. Nalawag a pagay-ayatna ti agkalap. (Juan 21:3, 9-15) Nasursurona met nga ipateg ti trabahona a panagkalap iti tattao. Ket iti tulong ni Jehova, nagbalin ni Pedro a nakalalaing iti dayta a trabaho.—Ara. 2:14, 41.

5. Sigun iti Lucas 5:8-11, apay a mabuteng ni Pedro, ken ania ti makatulong kadatayo a manglaban iti dayta a rikna?

⁵ Mangaskasabatayo gapu ta ay-ayatentayo ni Jehova; dayta ti kangrunaan a rason nga ar-aramidentayo daytoy a trabaho. Makatulong ti ayattayo ken Jehova tapno malabanantayo ti aniaman a rikna a saantayo a kualipikado. Idi inawis ni Jesus ni Pedro nga agbalin a mangngalap iti tattao, imbagana: “Dikan agbuteng.” (Basaen ti Lucas 5:8-11.) Saan a madanagan  ni Pedro iti posible a mapasamak no agbalin nga adalan. Nasdaaw ketdi iti kaadu ti ikan a nakalapda gapu iti milagro nga inaramid ni Jesus, isu a nariknana a saan a kualipikado a makipagtrabaho ken Jesus. Iti sabali a bangir, mabalin a madanaganka no panunotem dagiti masapul nga aramidem tapno agbalinka nga adalan ni Kristo. No kasta ti marikriknam, pabilgem ti ayatmo ken Jehova, ken Jesus, ken iti padam a tao. Iti kasta, situtulokkanton a mangawat iti awis ni Jesus nga agbalin a mangngalap iti tao.—Mat. 22:37, 39; Juan 14:15.

6. Ania pay ti dadduma a rason a kayattayo ti mangasaba?

⁶ Usigentayo ti dadduma a rason no apay a kayattayo ti mangasaba. Kayattayo ti agtulnog iti bilin ni Jesus: “Inkayo . . . kadagiti tattao . . . ket pagbalinenyo ida nga adalak.” (Mat. 28:19, 20) Kasta met, mangaskasabatayo ta ‘nalalatan ken naiwarawara’ dagiti tattao isu a masapul a maammuanda ti kinapudno maipapan iti Pagarian. (Mat. 9:36) Kayat ni Jehova a maammuan ti amin a kita ti tattao ti umiso a pannakaammo iti kinapudno tapno maisalakanda.—1 Tim. 2:4.

7. Kasano nga ipakita ti Roma 10:13-15 a napateg ti trabaho a panangasaba?

⁷ Matignaytayo la ketdi a mangasaba no panunotentayo a makatulong dayta iti pannakaisalakan dagiti tattao. Saan a kas iti mangngalap iti ikan a mangilako wenno mangan iti nakalapanna, ‘agkalaptayo’ iti tattao tapno maisalakan ti biagda.—Basaen ti Roma 10:13-15; 1 Tim. 4:16.

8-9. Ania ti masapul nga ammo ti mangngalap, ken apay?

⁸ Idi kaaldawan ni Jesus, masapul nga ammo ti Israelita a mangngalap no ania a klase nga ikan ti kalapenna. (Lev. 11:9-12) Masapul met nga ammona no sadino ti pagkalapanna iti kasta nga ikan. Kaaduanna nga agyan dagiti ikan iti lugar a magustuanda ti kasasaad ti danum ken adu ti makanda. Napateg met kadi no ania nga oras a mapan agkalap ti mangngalap? Maipapan iti kasayaatan nga oras ti panagkalap, usigentayo ti imbaga ti maysa a Saksi nga agnanaed iti maysa nga isla iti Pacifico. Idi inawisna ti maysa a misionero a mapanda agkalap, imbaga ti misionero, “Agkitata iti alas nuebe inton bigat.” Insungbat ti kabsat, “Saan. Mapanta iti oras nga adu ti ikan, saan nga iti oras a kayatta.”

⁹ Kasta met la ti inaramid dagiti mangngalap iti tattao idi umuna a siglo. Napanda iti lugar nga ayan ti adu nga “ikan” ken iti oras a kaadda dagita sadiay. Kas pagarigan, nangasaba dagiti pasurot ni Jesus iti templo, sinagoga, binalaybalay, ken plasa. (Ara. 5:42; 17:17; 18:4) Masapul met a pamiliartayo iti ugali ken kababalin dagiti tattao iti teritoriatayo. Masapul a mannakibagaytayo ken mangasabatayo iti lugar nga ayanda ken iti oras a kaaddada sadiay.—1 Cor. 9:19-23.

10. Ania dagiti alikamen nga ipapaay kadatayo ti organisasion ni Jehova?

¹⁰ Kasapulan ti mangngalap dagiti umiso nga alikamen ken masapul nga ammona nga usaren dagita. Iti trabahotayo, masapul met nga umiso dagiti alikamentayo ken ammotayo nga usaren dagita. Nangted ni Jesus kadagiti adalanna iti nalawag nga instruksion no kasanoda nga agkalap iti tattao. Imbagana no ania ti itugotda, no sadino ti pangasabaanda, ken no ania ti ibagada. (Mat. 10:5-7; Luc. 10:1-11) Ita, mangipapaay ti organisasion ni Jehova iti Toolbox iti Panangisuro a naglaon kadagiti alikamen a talaga nga epektibo. * Maisursuro met kadatayo no kasanotayo nga usaren dagita  nga alikamen. Iti kasta, maaddaantayo iti kompiansa ken abilidad a kasapulan tapno agbalintayo nga epektibo iti trabahotayo.—2 Tim. 2:15.

11. Apay a masapul a natured dagiti mangngalap?

¹¹ Masapul a natured dagiti mangngalap iti ikan ta mabalin a bigla nga agbaliw ti paniempo wenno agbagyo, ken masansan a rabii ti panagkalapda. Masapul met nga agbalin a natured dagiti mangngalap iti tattao. No mangrugitayon a mangasaba ken ibagatayo a maysatayo a Saksi ni Jehova, mabalin a maipasangotayo kadagiti “bagyo” kas iti ibubusor ti pamilia, pananguyaw ti gagayyem, ken kinaawan interes dagiti tattao iti mensahetayo. Ngem ditay masdaaw ta impakpakauna ni Jesus nga ibaonna dagiti pasurotna a mangasaba kadagidiay mangbusor kadakuada.—Mat. 10:16.

12. Maitunos iti Josue 1:7-9, ania ti makatulong kadatayo nga agbalin a natured?

¹² Kasanoka nga agbalin a natured? Umuna, masapul a mamatika nga iwanwanwan ni Jesus daytoy a trabaho manipud langit. (Juan 16:33; Apoc. 14:14-16) Sumaruno, pabilgem ti pammatim iti kari ni Jehova nga aywanannaka. (Mat. 6:32-34) No nabilbileg ti pammatim, naturturedka. Impakita ni Pedro ken dagiti kakaduana a nabileg ti pammatida idi pinanawanda ti pagsapulanda tapno sumurotda ken Jesus. Kasta met, impakitam ti nabileg a pammatim idi impakaammom kadagiti  gayyemmo ken kapamiliam a makipagad-adalkan iti Biblia kadagiti Saksi ni Jehova ken umat-atenderkan kadagiti gimongda! Sigurado nga adun ti binalbaliwam iti kababalin ken estilo ti panagbiagmo tapno masurotmo dagiti nalinteg a pagalagadan ni Jehova. Agkasapulan met dayta iti pammati ken tured. Bayat a tumurturedka, masiguradom a “ni Jehova a Diosmo ket adda kenka iti sadinoman a papanam.”—Basaen ti Josue 1:7-9.

13. Kasano a makatulong ti panagutob ken panagkararag tapno tumuredka?

¹³ Ania pay ti aramidem tapno agbalinka a natured? Ikararagmo dayta. (Ara. 4:29, 31) Sungbatan ni Jehova dagiti kararagmo ken dinaka pulos baybay-an. Kanayon a nakasagana a tumulong kenka. Mabalinmo pay nga utoben no kasano nga insalakan ni Jehova ti dadduma a tattao idi un-unana. Panunotem met no kasano a tinulongannaka idi a mangsolbar kadagiti problemam ken no kasano a pinabilegna ti pakinakemmo a mangbalbaliw iti panagbiagmo. Sigurado a Daydiay nangiballasiw kadagiti adipenna iti Nalabaga a Baybay matulongannaka met nga agbalin nga adalan ni Kristo. (Ex. 14:13) Tuladem ti determinasion ti salmista a nangibaga: “Adda ni Jehova iti abayko; saanakto nga agbuteng. Ania ti maaramidan kaniak ti tao?”—Sal. 118:6.

14. Ania ti masursurom kadagiti kapadasan da Masae ken Tomoyo?

¹⁴ Agbalinka met a natured no maammuam no kasano a tinulongan ni Jehova dagiti managbabain tapno agbalinda a natured. Usigentayo ti kapadasan ti kabsat a babai a ni Masae. Managbabain idi ken mariknana a dina pulos kabaelan ti mangasaba. Para kenkuana, ti pannakisarita kadagiti dina am-ammo ket kasla nangato a pader a dina pulos mauli. Isu nga inkagumaanna a paunegen ti ayatna iti Dios ken iti padana a tao. Pinampanunotna a naganat ti tiempo a pagbibiagantayo ken inkararagna a tumured koma a mangasaba. Nalabananna ti butengna ket nakapag-regular pioneer pay ketdi. Matulongan met ni Jehova dagiti kabbaro nga agibumbunannag a ‘mangpapigsa iti pakinakemda.’ Kitaentayo ti kapadasan ti kabsat a babai a ni Tomoyo. Idi nangrugi a mangasaba iti binalaybalay, imbugkaw ti umuna a bumalay: “Diak kayat a kasarita dagiti Saksi ni Jehova!” sana inlibag ti ridaw. Saan a nabutngan ni Tomoyo ket imbagana iti kaduana: “Nangngegmo ti imbagana? Awan pay imbagbagak ngem ammonan a maysaak a Saksi ni Jehova. Nakaragragsakak!” Regular pioneer itan ni Tomoyo.

15. Ania ti kaipapanan ti panagbalin a disiplinado, ken apay a napateg dayta kadagiti Kristiano?

¹⁵ Disiplinado dagiti naballigi a mangngalap. Ti panagbalin a disiplinado kaipapananna “ti abilidad a mangaramid iti bambanag a masapul a maileppas.” Masapul a disiplinado dagiti mangngalap tapno nasapada nga agriing, agtalinaedda iti baybay agingga nga adda makalapda, ken itultuloyda ti agkalap uray dakes ti paniempo. Masapul met a disiplinadotayo tapno makapagibturtayo ket maileppastayo ti trabahotayo.—Mat. 10:22.

16. Ania ti makatulong kadatayo nga agbalin a disiplinado?

¹⁶ Saantayo a matawid ti panagbalin a disiplinado. Kaaduanna, kaykayattayo nga aramiden dagiti bambanag iti kalakaan a pamay-an. Ngem no dadduma, saan a kaskarina nga aramiden dagiti kapatgan isu a masapul a sursuruentayo ti agteppel. Masapul ngarud a sanayentayo ti bagitayo a mangaramid kadagiti narigat a banag. Tulongannatayo ni Jehova babaen ti nasantuan nga espirituna.—Gal. 5:22, 23.

17. Sigun iti 1 Corinto 9:25-27, ania ti imbaga ni apostol Pablo a masapul nga aramidenna tapno agbalin a disiplinado?

 ¹⁷ Disiplinado ni apostol Pablo. Ngem inaminna a masapul a ‘danogenna’ ti bagina tapno maaramidna ti umiso. (Basaen ti 1 Corinto 9:25-27.) Imparegtana iti dadduma a disiplinaenda ti bagida ken aramidenda ti amin a banag iti “desente a pamay-an ken sigun iti urnos.” (1 Cor. 14:40) Masapul a disiplinaentayo ti bagitayo tapno mamantenertayo ti nasayaat a naespirituan a rutinatayo, a pakairamanan ti regular a pannakiramantayo iti simboliko a trabaho a panagkalap.—Ara. 2:46.

18. Ania ti aramidentayo tapno ibilangnatayo ni Jehova a naballigi?

¹⁸ Naballigi ti mangngalap no adu ti makalapna. Ngem saantayo nga ibatay ti balligitayo iti bilang dagiti tattao a maiserrektayo iti organisasion ti Dios. (Luc. 8:11-15) No la ketdi itultuloytayo nga ikasaba ti naimbag a damag ken isuro ti sabsabali, ibilangnatayo ni Jehova a naballigi. Apay? Gapu ta agtultulnogtayo kenkuana ken iti Anakna.—Mar. 13:10; Ara. 5:28, 29.

19-20. Ania ti naisangsangayan a rason a masapul a mangasabatayo ita?

¹⁹ Iti dadduma a pagilian, adda laeng dagiti bulan a maipalubos ti panagkalap. Kadagita a lugar, mabalin a lallalo nga agganat ti mangngalap no dandanin agpatingga dagita a bulan. Kas mangngalap iti tattao, daytoy ti kanayonan a rason a mangasabatayo ita: Dandanin ti panungpalan daytoy a sistema! Nakabasbassiten ti tiempo a nabati a makiramantayo iti daytoy a trabaho a makaispal iti biag. Dimo itantantan wenno dimo urayen a sumayaat dagiti kasasaad sakbay a makipasetka iti daytoy a napateg a trabaho.—Ecl. 11:4.

²⁰ Pabilgem itan ti determinasionmo, paunegem ti pannakaammom iti Biblia, ken sursuruem ti agbalin a natured ken disiplinado. Makikaduaka iti nasurok a walo a milion a mangngalap iti tattao, ket mariknamto ti rag-o nga ipaay ni Jehova. (Neh. 8:10) Determinadoka koma a naan-anay a makiraman iti daytoy a trabaho agingga nga ibaga ni Jehova a nalpasen. Ilawlawag ti sumaruno nga artikulo ti tallo a pamay-an a bumileg ti determinasiontayo a mangitultuloy iti trabaho a panangikasaba iti Pagarian kas mangngalap iti tattao.