Kuna daytoy mamagpanunot a bersikulo: “No adda makitam a maidaddadanes a napanglaw ken no saan a maipakpakat ti hustisia ken kinalinteg iti lugaryo, dika masdaaw. Ta dayta a nangato nga opisial ket sipsiputan ti nangatngato ngem isuna, ken adda pay dadduma a nangatngato ngem kadakuada.”—Ecl. 5:8.

Adda dagiti mangibaga a dagita a sasao ket tumukoy kadagiti tattao nga adda autoridadda iti gobierno. Ngem no analisarentayo, tumukoy met dayta iti maysa a kinapudno maipapan ken Jehova, isu a makaliwliwa ken makaparegta dayta.

Tumukoy ti Eclesiastes 5:8 iti agturay a mangirurrurumen kadagiti napanglaw ken mangipapaidam kadakuada iti hustisia. Masapul a laglagipen dayta nga agturay nga isu ket sipsiputan ti maysa a nangatngato wenno addaan iti dakdakkel nga autoridad iti gobierno ngem isuna. Kinapudnona, mabalin nga adda dadduma a nangatngato pay ti posisionda. Makapaladingit ta kadagiti gobierno ti tao, mabalin a korap amin dagita nga agtuturay, isu nga agsagsagaba dagiti ordinario a tattao iti di nasayaat a panangiturayda.

Ngem nupay kasla saanen a sumayaat dagiti kasasaad, maliwliwatayo a makaammo a ni Jehova ‘sipsiputanna uray dagiti nangato nga opisial’ kadagiti gobierno ti tao. Mabalintayo ti agpakaasi iti Dios ken ipalladaw kenkuana ti amin a dadagsentayo. (Sal. 55:22; Fil. 4:6, 7) Ammotayo a “sipsiputan dagiti mata ni Jehova ti intero a daga tapno ipakitana ti pigsana kadagidiay naan-anay ti pusoda kenkuana.”—2 Cron. 16:9.

No kasta, ipalagip ti Eclesiastes 5:8 ti agpayso a situasion dagiti agtuturay iti gobierno; kanayon nga adda natantan-ok ti autoridadna ngem kadakuada. Napatpateg pay, ipalagip daytoy a bersikulo a ni Jehova ti Kangatuan, ti Katan-okan nga Autoridad. Agturturay itan babaen ti Anakna a ni Jesu-Kristo, ti Ari ti Pagarian. Ti Mannakabalin-amin a makakitkita iti amin, ket naan-anay a nainkalintegan ken patas, ken kasta met ti Anakna.