1-2. Ania ti mangparagsak kadagiti agdaydayaw iti Dios? (Santiago 1:​22-25)

 KAYAT ni Jehova ken ti ipatpategna nga Anak a naragsaktayo. Imbaga ti nagsurat iti Salmo 119:2: “Naragsak dagidiay mangtungtungpal kadagiti pammalagipna, a mangbirbirok kenkuana iti amin a pusoda.” Inkari met ni Jesus: “Naragragsak ketdi dagidiay dumdumngeg iti sao ti Dios ken mangtungtungpal iti dayta!”—Luc. 11:28.

² Naragsak a tattao dagiti agdaydayaw ken Jehova. Apay? Adu ti rason, ngem maysa kadagiti kapatgan a rason ket gapu ta inaldaw a basbasaentayo ti Sao ti Dios ken ikagkagumaantayo nga iyaplikar dagiti masursurotayo.—Basaen ti Santiago 1:​22-25.

 3. Ania dagiti pagsayaatanna no iyaplikartayo dagiti mabasatayo iti Sao ti Dios?

³ Pagsayaatantayo iti adu a pamay-an no ‘agbalintayo a managtungpal iti sao.’ Kas pagarigan, ammotayo a no aramidentayo dayta, maparagsaktayo ni Jehova ket dayta met ti mangparagsak kadatayo. (Ecl. 12:13) No iyaplikartayo dagiti mabasatayo iti Sao ti Dios, mapasayaattayo ti relasiontayo iti pamiliatayo ken lumagda ti pannakigayyemtayo kadagiti kapammatiantayo. Mabalin a napaneknekamon a mismo dayta. Kasta met, saantayo a mapadasan ti adu a problema dagidiay saan a mangsursurot iti dalan ni Jehova. Umanamongtayo la ketdi ken Ari David. Kalpasan a dinakamatna iti kantana dagiti linteg, bilin, ken panangukom ni Jehova, imbagana: “No tungpalek ida, dakkel a gunggona ti masagrapko.”—Sal. 19:​7-11.

 4. Apay a saan a kanayon a nalaka ti agbalin a managtungpal iti Sao ti Dios?

⁴ Ti agpayso, saan a kanayon a nalaka para kadatayo ti agbalin a managtungpal iti Sao ti Dios. Gapu ta busy-tayo, masapul  nga iwayaantayo ti agbasa ken agadal iti Biblia tapno maammuantayo ti kayat ni Jehova nga aramidentayo. Isu a kitaentayo ti dadduma a suhestion a makatulong kadatayo tapno inaldaw a mabasatayo ti Biblia. Kitaentayo met dagiti makatulong kadatayo a mangutob kadagiti mabasatayo ken mangpanunot no kasanotayo a mayaplikar iti biagtayo dagiti masursurotayo.

IWAYAAM TI AGBASA ITI SAO TI DIOS

 5. Ania dagiti responsabilidad a pangus-usarantayo iti adu a tiempotayo?

⁵ Nakabis-busy ti kaaduan nga agdaydayaw ken Jehova. Us-usarentayo ti adu nga orastayo para kadagiti nakapatpateg a responsabilidad. Kas pagarigan, kaaduan kadatayo ti agtrabtrabaho iti sekular tapno masuportarantayo ti bagitayo ken ti pamiliatayo. (1 Tim. 5:8) Adu met a Kristiano ti mangay-aywan kadagiti masakit wenno nataenganen a kabagianda. Ken siempre, kasapulantayo met ti tiempo tapno maaywanantayo ti bukodtayo a salun-at. Malaksid kadagita a responsabilidad, adda pay dagiti asaynmenttayo iti kongregasion. Ti maysa kadagiti napateg a responsabilidadtayo ket ti naregta a pannakiraman iti trabaho a panangasaba. Gapu iti nakaad-adu a masapul nga aramidem, kasanom a maiwayaan ti agbasa iti Biblia, mangutob kadagiti mabasam, ken mangyaplikar kadagiti masursurom?

 6. Kasanom nga iprioridad ti panagbasam iti Biblia? (Kitaen met ti ladawan.)

⁶ Ti panagbasa iti Biblia ket maysa kadagiti “napatpateg a bambanag” nga aramidentayo kas Kristiano, isu a masapul nga iprioridadtayo dayta. (Fil. 1:10) Kuna ti kaunaan a salmo maipapan iti naragsak a tao: “Pagragsakanna ti linteg ni Jehova, ken basbasaenna dayta iti nakapsut a timek iti aldaw ken rabii.” (Sal. 1:​1, 2) Nalawag ngarud nga iparparegtana a masapul nga iwayaantayo ti kasta a panagbasa. Kaano ti kasayaatan a panagbasa iti Biblia? Mabalin nga agduduma ti eskediultayo. Ngem ti napateg, adda espesipiko nga oras a pilientayo tapno inaldaw a mabasatayo ti Biblia. Kuna ti maysa a brother  a ni Victor: “Kaykayatko ti agbasa iti Biblia iti agsapa uray no saanak a managsapsapa. Ngamin, basbassit ti pakaistorbuan no bigbigat. Mas alerto ti panunotko ken nalaklakaak nga agpokus.” Kastaka met kadi? Isaludsodmo iti bagim, ‘Kaano ti kasayaatan para kaniak nga agbasa iti Biblia?’

UTOBEM TI BASBASAEM

7-8. Ania ti mabalin a manglapped kadatayo a naan-anay a magunggonaan iti basbasaentayo? Iyilustrar.

⁷ Ngem ti agpayso, baka kanayon nga adu ti basbasaentayo ngem saantayo met unay a maaw-awatan dagita. Napadasmo kadin ti nagbasa sa dagus a nalipatam dayta? Sigurado a napadasantayon amin dayta. Mabalin a kasta met laeng ti mapasamak iti panagbasatayo iti Biblia. Baka kalattayo ti agbasa iti sumagmamano a kapitulo iti Biblia iti kada aldaw. Makomendaran dayta. Masapul nga adda kalattayo ken ikagumaantayo a suroten dagita. (1 Cor. 9:26) Agpayso a ti panagbasa iti Biblia ket nagsayaat a pangrugian—ngem pangrugian laeng dayta. Adu pay ti masapul nga aramidentayo tapno naan-anay a magunggonaantayo iti panagbasatayo iti Sao ti Dios.

⁸ Panunotem daytoy a pagarigan: Kasapulan dagiti mula ti tudo tapno agbiagda. Ngem no napigsa unay ti tudo uray apagbiit laeng, mabalin a saan a maagsep ti daga ti amin a danum. No mapasamak dayta, sayang laeng ti tudo ken saan a magunggonaan dagiti mula. Kasapulan ti tiempo tapno agsepen ti daga ti tudo a mausar dagiti mula. Kasta met laeng ti panagbasa iti Biblia. No agap-apuratayo, saantayo a maagsep a dagus dagiti basbasaentayo. Mabalin pay ketdi a ditay maawatan, malagip, ken mayaplikar dagita.—Sant. 1:24.

 9. Ania ti masapul nga aramidentayo no nayugalitayon ti agdardaras nga agbasa iti Biblia?

⁹ Adda kadi dagiti tiempo a nadlawmo nga agdardaraska laengen nga agbasa iti Biblia? Ania ti masapul nga aramidem? Saanka nga agap-apura. Ikagumaam a tarusan dagiti basbasaem wenno dagiti binasam. Saan a narigat dayta. No panagriknam ket narigat ti agutob, baka makatulong no ibilangmo dayta a kas panangpanunot  laeng a naimbag iti nabasam. Mabalinmo nga iyat-atiddog ti panagadalmo tapno maiwayaam ti kasta a panagpanunot wenno panagutob. Iti sabali a bangir, mabalin a bassit laeng ti basaem a bersikulo ken usarem ti nabatbati a tiempo a mangpanunot iti binasam. “Ababa laeng ti panagbasak iti Biblia. No dadduma, maysa laeng a kapitulo,” kuna ni Victor a nadakamat itay. “Iti bigbigat ti panagbasak iti Biblia, isu a mapampanunotko dayta iti agmalmalem.” Adda kenka no kasano kaadu ti kayatmo a basaen. Ti napateg ket saanka nga agdardaras tapno magunggonaanka iti panagbasam iti Biblia.—Sal. 119:97; kitaen ti kahon a “ Dagiti Saludsod a Pagpanunotan.”

10. Mangted iti pagarigan no kasanom a mayaplikar dagiti masursurom. (1 Tesalonica 5:​17, 18)

¹⁰ Aniaman ti eskediulmo nga agbasa iti Biblia, ken kasano man kapaut ti panangaramidmo iti dayta, siguraduem a panunoten no kasanom a mayaplikar ti nabasam. Bayat a basbasaem ti maysa a paset ti Sao ti Dios, isaludsodmo iti bagim, ‘Kasanok a mayaplikar daytoy nga impormasion ita wenno iti masanguanan?’ Kas pagarigan, ipapantayo a basbasaem ti 1 Tesalonica 5:​17, 18. (Basaen.) Kalpasan a binasam dagita a dua a bersikulo, mabalinmo ti agsardeng ken agpanunot no kasano kasansan ken kapasnek ti panagkararagmo. Kasta met, mabalinmo a panunoten dagiti banag a pagyamyamanam. Baka adda tallo nga espesipiko a banag a napanunotmo a pagyamyamanam ken Jehova. Uray sumagmamano la a minuto a pinanunotmo dagiti nasursurom iti Biblia, mabalin a makatulongen dayta tapno agbalinka a managdengngeg ken managtungpal iti Sao ti Dios. Bayat nga inaldaw nga iyap-aplikarmo dagiti mabasbasam iti Biblia, agbalinkanto a nasaysayaat nga adipen ni Jehova iti panaglabas ti tiempo. Ngem kasanon no kasla nakaad-adu dagiti masapul a parang-ayem?

MANGARAMIDKA KADAGITI REALISTIKO A KALAT

11. Apay a mabalin a maupayka no dadduma? Mangted iti pagarigan.

¹¹ No agbasbasaka iti Biblia, baka maupayka no dadduma gapu ta makitam a nagadu ti masapul a parang-ayem wenno balbaliwam. Kas pagarigan: Ita nga aldaw, nabasam iti Biblia a masapul a saanka a mangipakita iti paboritismo. (Sant. 2:​1-8) Nakitam a mapasayaatmo pay ti panangtratom iti dadduma isu nga adda dagiti inkeddengmo a balbaliwan. Nagsayaat dayta! Kabigatanna, nabasam a kasapulan a kontrolem ti panagsasaom. (Sant. 3:​1-12) Naamirismo a medio negatibo ti panagsasaom no dadduma. Isu a nagdesisionka nga agbalinka a  mas positibo ken makaparegta. Iti sumaruno nga aldaw, nabasam ti pakdaar maipapan iti saan a pannakigayyem iti daytoy a lubong. (Sant. 4:​4-12) Nabigbigmo a masapul nga agbalinka a naan-annad iti panangpilim kadagiti paglinglingayan. Ngem iti maikapat nga aldaw, baka naupaykan gapu ta nagadu gayam ti masapul a balbaliwam.

12. Bayat nga agbasbasaka iti Biblia, apay a dika koma maupay no nakitam nga adda dagiti masapul a balbaliwam? (Kitaen met ti footnote.)

¹² No makitam nga adu ti masapul a balbaliwam iti bagim, saanka koma a maupay. Ebidensia laeng dayta a napakumbabaka ken nasayaat ti motibom. No napakumbaba ti maysa ken napudno iti bagina, ti siputanna no agbasa iti Biblia ket dagiti masapul a parang-ayenna. a Laglagipem met a ti panangisuot iti “baro a personalidad” ket agtultuloy a proseso. (Idilig ti study note iti Col. 3:10 nga “is being made new.”) Ania ti makatulong kenka tapno agtultuloyka nga agbalin a managtungpal iti Sao ti Dios?

13. Kasanoka a makaaramid kadagiti realistiko a kalat? (Kitaen met ti ladawan.)

¹³ Imbes a paggigiddanem nga iyaplikar ti amin a nabasam, mangaramidka ketdi kadagiti realistiko a kalat. (Prov. 11:2) Mabalinmo nga aramiden daytoy: Ilistam dagiti masapul a balbaliwam. Kalpasanna, mangpilika iti maysa wenno dua kadagitoy nga unaem, sa isarunomto ti dadduma. Ngem ania ti masapul nga unaem?

14. Ania a kalat ti mabalinmo nga unaen?

¹⁴ Mabalinmo nga unaen ti kalat a nalaklakam nga aramiden, wenno ti panagkunam ket isu ti kangrunaan a parang-ayem. No napanunotmon ti kalat a masapul nga unaem,  ag-research-ka kadagiti publikasiontayo. Mabalinmo nga usaren ti Watch Tower Publications Index wenno ti Giya iti Panagsukimat Para Kadagiti Saksi ni Jehova. Ikararagmo ken Jehova ti kalatmo. Dawatem “ti tarigagay ken ti pannakabalin a mangaramid iti amin a banag.” (Fil. 2:13) Kalpasanna, iyaplikarmo ti nasursurom. No makitam nga addan nagbalbaliwam, wenno addan dagiti naparang-aymo a Nakristianuan a kualidad, posible a mas inspiradokanton a mangaramid iti dadduma pay a panagbalbaliw ket nalaklakanton dayta para kenka.

IPALUBOSMO A “TULONGANNAKA” TI SAO TI DIOS

15. Apay a naidumduma dagiti Saksi ni Jehova no maipapan iti panagbasa iti Biblia? (1 Tesalonica 2:13)

¹⁵ Adda dagiti tattao a mangibagbaga a namin-adudan a nabasa ti Biblia. Ngem talaga kadi a mamatida iti Biblia? Iyap-aplikarda kadi dagiti mabasbasada? Wenno ipalpalubosda a dayta ti tumulong kadakuada? Makapaladingit ta kaaduanna a saan. Ngem naiduma dagiti adipen ni Jehova! Kas kadagiti Kristiano idi umuna a siglo, ti Biblia ket ‘inawattayo no ania a talaga dayta, kas sao ti Dios.’ Kasta met, ikagkagumaantayo nga ipakita a dayta ti tumultulong iti biagtayo.—Basaen ti 1 Tesalonica 2:13.

16. Ania ti makatulong kadatayo nga agbalin a managtungpal iti Sao?

¹⁶ Saan a kanayon a nalaka ti agbasa iti Sao ti Dios ken mangyaplikar kadagiti mabasatayo. Mabalin a marigatantayo a mangiwaya iti tiempo nga agbasa. Wenno mabalin nga adda tendensiatayo nga agap-apura nga agbasa isu a saantayon a maagsep wenno maawatan dagiti mabasbasatayo. Wenno posible a maupaytayo gapu iti nagadu a masapul a balbaliwantayo. Aniaman ti situasionmo ita, mapagballigiam dayta iti tulong ni Jehova. Sapay koma ta determinadotayo a mangawat iti tulongna ken agbalin a managtungpal iti Sao imbes a mananglilipat a managdengngeg. No itultuloytayo a basaen ti Biblia ken iyaplikar dagiti maad-adaltayo, sigurado a naragragsaktayo.—Sant. 1:25.