1-2. Apay a pagsayaatantayo ti pannakaparsuatayo nga addaan iti abilidad nga agbalin a naragragsak no mangtedtayo?

 IDI pinarsua ni Jehova dagiti tattao, diniseniona ida nga addaan iti abilidad nga agbalin a naragragsak no mangtedda ngem no umawatda. (Ara. 20:35) Kayatna kadi a sawen dayta a saantayo a naragsak no adda maawattayo a regalo? Saan. Siempre, naragsaktayo. Ngem naragragsaktayo pay no datayo ti mangted. Ket talaga a pagsayaatantayo a pinarsuanatayo ni Jehova a kasta. Apay?

² Gapu ta kasta ti panangparsua kadatayo ni Jehova, adda maaramidantayo tapno agbalintayo a naragragsak. Naragragsaktayo no mangbiroktayo kadagiti gundaway a mangted. Anian a nakaskasdaaw ta kasta ti pannakaparsuatayo!—Sal. 139:14.

3. Apay a nailadawan ni Jehova kas “ti naragsak a Dios”?

³ Ipasigurado kadatayo ti Kasuratan a naragsaktayo no mangtedtayo, isu a ditay pakasdaawan nga inladawan ti Biblia ni Jehova kas “ti naragsak a Dios.” (1 Tim. 1:11) Isuna ti immuna a nangted ket awan ti makaartap iti kinaparaburna. Gapu kenkuana, “adda biagtayo, makagunay ken addatayo,” kas dinakamat ni apostol Pablo. (Ara. 17:28) Talaga a “tunggal nasayaat ken perpekto a sagut” ket naggapu ken Jehova.—Sant. 1:17.

4. Ania ti aramidentayo tapno naragragsaktayo?

⁴ Nalabit kayattayo amin a mapadasan ti agbalin a naragragsak gapu iti panangted. Mapadasantayo dayta no tuladentayo ti kinaparabur ni Jehova. (Efe. 5:1) Iti daytoy nga artikulo, adalentayo dayta a nagpintas a kualidadna. Ammuentayo met ti aramidentayo no panagriknatayo ket saan a maap-apresiar ti dadduma ti ar-aramidentayo para kadakuada. Makatulong daytoy tapno agtalinaedtayo a naragsak ken agbalintayo pay a naragragsak no mangtedtayo.

 TULADENTAYO TI KINAPARABUR NI JEHOVA

5. Ania dagiti material a bambanag nga ipapaay kadatayo ni Jehova?

⁵ Ania ti dadduma a pamay-an nga ipakpakita ni Jehova ti kinaparaburna? Kitaentayo ti dadduma a pagarigan. Ipapaay ni Jehova dagiti material a kasapulantayo. Mabalin a saan a kanayon a komportable ti biagtayo, ngem sigsiguraduen ni Jehova a kanayon nga adda dagiti kasapulantayo. Kas pagarigan, gapu kenkuana, adda makan, bado, ken pagyanantayo. (Sal. 4:8; Mat. 6:​31-33; 1 Tim. 6:​6-8) Ipapaay kadi ni Jehova dagiti material a kasapulantayo gapu laeng ta obligado isuna? Saan a pulos! Apay ngarud nga ar-aramiden dayta ni Jehova para kadatayo?

6. Ania ti masursurotayo iti Mateo 6:​25, 26?

⁶ Ipapaay ni Jehova dagiti material a kasapulantayo gapu ta ay-ayatennatayo. Kitaentayo ti imbaga ni Jesus iti Mateo 6:​25, 26. (Basaen.) Adda insuro ni Jesus maipapan kadagiti parsua. Kas pagarigan, maipapan kadagiti billit, imbaga ni Jesus: “Saanda nga agmula iti bin-i wenno agani wenno agipempen kadagiti kamarin.” Ngem kitaentayo ti simmaruno nga imbagana: “Pakanen ida ni Amayo nga adda idiay langit.” Kalpasanna, insaludsod ni Jesus: “Saan kadi a napatpategkayo ngem kadakuada?” Ania ti punto? Para ken Jehova, adayo a napatpateg dagiti agdaydayaw kenkuana ngem dagiti animal. No ipapaay ni Jehova dagiti kasapulan dagiti animal, masiguradotayo nga ipaayna met dagiti kasapulantayo! Kas iti naayat a tao nga ama, ipaay ni Jehova dagiti kasapulan ti pamiliana gapu ta ay-ayatenna ida.—Sal. 145:16; Mat. 6:32.

7. Ania ti maysa a pamay-an a matuladtayo ti kinaparabur ni Jehova? (Kitaen met ti ladawan.)

⁷ Kas ken Jehova, mabalintayo met ti mangted iti material a bambanag iti sabsabali, gapu iti ayat. Kas pagarigan, adda kadi am-ammom a kabsat nga agkasapulan iti makan wenno bado? Mabalin nga usarennaka ni Jehova tapno maipaay dayta a kasapulanna. Ti ili ni Jehova ket pagaammo a dagus nga agtitinnulong no adda rigat. Kas pagarigan, bayat ti COVID-19 pandemic, nangted dagiti kakabsat iti makan, bado, ken dadduma pay a suplay kadagiti agkasapulan. Adu met ti sibubuslon a nagdonar para iti sangalubongan a trabaho. Nakatulong dagiti donasionda para iti trabaho a panangsaranay iti intero a lubong. Impapusoda ti Hebreo 13:16: “Diyo liplipatan ti agaramid iti nasayaat ken ti mangibingay  kadagiti bambanag nga adda kadakayo, ta maragsakan unay ti Dios kadagita a daton.”

8. Ania dagiti pagsayaatanna no agkiddawtayo iti pannakabalin ni Jehova? (Filipos 2:13)

⁸ Mangipapaay ni Jehova iti pannakabalin wenno bileg. Awan ti limitasion ti pannakabalin wenno bileg ni Jehova. Maragsakan met a mangiranud iti dayta kadagiti matalek nga agdaydayaw kenkuana. (Basaen ti Filipos 2:13.) Napadasmo kadin nga inkararag a pabilgennaka tapno malabanam ti sulisog wenno tapno adda pigsam a mangibtur iti narigat a pakasuotan? Mabalin nga inkararagmo metten a maaddaanka iti umdas a pigsa tapno laeng maisakadmo ti maysa pay nga aldaw. Idi nasungbatan ti kararagmo, immanamongka la ketdi iti insurat ni apostol Pablo: “Ta adda pigsak a mangsango iti amin a banag gapu iti daydiay mangpabpabileg kaniak.”—Fil. 4:13.

9. Kasanotayo a matulad ti naparabur a panangusar ni Jehova iti pannakabalinna? (Kitaen met ti ladawan.)

⁹ Uray no imperpektotayo, matuladtayo ti naparabur a panangusar ni Jehova iti pannakabalinna. Saantayo a literal a maited ti bileg wenno ti pigsatayo iti dadduma. Ngem matuladtayo ni Jehova no usarentayo ti pigsatayo a tumulong iti dadduma. Kas pagarigan, mabalintayo a tulongan dagiti nataengan wenno masakit a kakabsat a mangasikaso iti balayda wenno mapan makitienda para kadakuada. No ipalubos ti kasasaadtayo, mabalintayo nga agboluntario iti panagdalus ken panangmantener iti Kingdom Hall. No usarentayo ti pigsatayo kadagita a pamay-an, adu ti nasayaat a maaramidantayo para kadagiti kakabsat.

10. Kasanotayo a mapabileg ti dadduma iti ibagbagatayo?

¹⁰ Laglagipem met nga adda bileg ti sao. Adda kadi am-ammom nga agkasapulan iti pammaregta wenno komendasion? Adda kadi asinoman nga agkasapulan iti liwliwa? No adda, siguraduem a maammuanna nga ipatpategmo isuna. Mabalinmo a personal a bisitaen, tawagan, teksan, patulodan iti card, wenno email. Saanmo unay a pakadanagan no ania ti ibagam. Baka naimpusuan ken simple laeng a sasao ti eksakto a kasapulan ti kabsat tapno maibturanna ti maysa pay nga aldaw wenno tapno mabang-aran iti situasionna.—Prov. 12:25; Efe. 4:29.

11. Kasano nga us-usaren ni Jehova ti siribna?

¹¹ Mangipapaay ni Jehova iti sirib. Insurat ni adalan Santiago: “No agkurang iti sirib ti asinoman kadakayo, agtultuloy koma nga agdawat iti Dios, ta sipaparabur nga ikkanna ti amin ken saan a mangumsi.” (Sant. 1:5; ftn.) Ipakita dagita a sasao a saan a bukbukodan ni Jehova ti siribna. Sipaparabur nga iranudna dayta iti dadduma. Kitaem met ta imbaga ni Santiago a no mangted ni Jehova iti sirib, “saan a mangumsi” wenno “agsapul iti biddut.”  Saanna met a kayat a mariknatayo a kas man la pakabasolantayo no agpapaiwanwantayo kenkuana. Ti agpayso, isuna pay ketdi ti mangiparparegta nga agpatulongtayo kenkuana.—Prov. 2:​1-6.

12. Kadagiti ania a gundaway a mairanudtayo ti siribtayo?

¹² Datayo ngay met? Kasanotayo a matulad ni Jehova iti panangiranud iti siribtayo? (Sal. 32:8) Adu ti gundaway dagiti adipen ni Jehova a mangiranud kadagiti nasursuroda. Kas pagarigan, masansan a sansanayentayo dagiti kabbaro iti ministerio. Nakaan-anus met dagiti panglakayen a tumulong kadagiti ministerial nga adipen ken kadagiti bautisado a brother tapno masursuroda nga ibaklay dagiti responsabilidadda iti kongregasion. Tumultulong met dagiti eksperiensiadon iti konstruksion ken panagmantener iti panangsanay kadagiti bassit pay ti kapadasanda iti panagibangon kadagiti pasilidad ti organisasion.

13. No sansanayentayo ti dadduma, kasanotayo a matulad ti pamay-an ni Jehova a mangiranud iti siribna?

¹³ Dagiti mangsansanay tultuladenda a naimbag ti pamay-an ni Jehova a mangiranud iti siribna. Ammotayon a sipaparabur nga ipapaay ni Jehova ti siribna. Isu a sipaparabur met nga iranudtayo ti ammotayo ken dagiti kapadasantayo kadagiti sansanayentayo. Ditay koma iyimut ti ammotayo ta baka mabutengtayo a suktannatayto inton agangay ti sansanayentayo. Wenno saantayo koma nga ibagbaga: ‘Awan ti nangsanay kaniak! Makaammo met isunan a nga agsursuro.’ Ti kasta a tao ket awan ti lugarna iti ili ni Jehova. Imbes ketdi, naragsaktayo koma a mangipaay saan laeng nga iti ammotayo, ‘no di pay ket ti mismo a biagtayo’ kadagiti sansanayentayo. (1 Tes. 2:8) Mangnamnamatayo nga ‘agbalindanto met a kualipikado a mangisuro iti sabsabali.’ (2 Tim. 2:​1, 2) No sipaparabur nga iranudtayo ti siribtayo, agbalintayo amin a nasirsirib ken naragragsak.

NO KASLA SAAN A MAAP-APRESIAR DAGITI IT-ITEDTAYO

14. Ania ti kaaduan nga aramiden ti dadduma no adda maited kadakuada?

¹⁴ No naparaburtayo lalo kadagiti kakabsat, kaaduanna nga agyamanda kadatayo. Mabalin nga iyebkasda ti panagyamanda iti card wenno iti dadduma pay a pamay-an. (Col. 3:15) No makaawattayo iti kasta a panagyaman, talaga a nakaragragsaktayo.

15. Ania ti masapul nga aramidentayo no saan a maapresiar ti dadduma ti ar-aramidentayo para kadakuada?

¹⁵ Ngem ti agpayso, baka saan a kanayon a maapresiar ti dadduma ti ar-aramidentayo. Kas pagarigan, mabalin nga intedtayo ti tiempo, pigsa, wenno kuartatayo. Ngem kalpasanna, kasla saan man la a naapresiar ti inaramidtayo. No mapasamak dayta, ania ti aramidentayo tapno saan a mapukaw ti rag-otayo wenno tapno saan nga agsakit ti nakemtayo? Laglagipentayo ti sasao ti Aramid 20:35 a pannakatema a tekstotayo. Ti kinaragsaktayo ket saan a nakadepende iti apresasion ti dadduma. Naragsaktayo latta a mangted uray no kasla saan a maapresiar dayta ti dadduma. Kasano? Usigentayo ti sumagmamano a pamay-an.

16. Ania ti masapul a panunotentayo no mangmangtedtayo?

¹⁶ Panunotentayo a tultuladentayo ni Jehova no mangmangtedtayo. Ipapaayan ni Jehova dagiti tattao iti agkakaimbag a bambanag, apresiarenda man dayta wenno saan. (Mat. 5:​43-48) Ikarkari ni Jehova a no ‘saantayo a mangnamnama a maisubli’ ti aniaman nga intedtayo, wenno saan a mapagyamanan ti inaramidtayo, “dakkelto ti gunggona[tayo].” (Luc. 6:35) Apresiaren man ti dadduma wenno saan ti inaramidtayo, kanayon  a subadan ni Jehova ti kinaimbagtayo iti dadduma gapu ta ‘naragsaktayo a mangmangted.’—Prov. 19:17; 2 Cor. 9:7.

17. Ania ti kapatgan a rason a kayattayo ti mangted? (Lucas 14:​12-14)

¹⁷ Ti maysa pay a pamay-an a matuladtayo ni Jehova no mangmangtedtayo ket ti panangaramidtayo iti imbaga ni Jesus iti Lucas 14:​12-14. (Basaen.) Saan met ketdi a dakes a padagusen wenno agbalintayo a naparabur kadagiti makasubad met laeng kadatayo. Ngem no madlawtayon a masansan a mangmangtedtayo gapu laeng ta mangnamnamatayo iti subad iti inaramidtayo, padasentayo nga aramiden ti imbaga ni Jesus. Agbalintayo a naparabur ken padagusentayo ti asinoman nga awan ti maisubadna. No aramidentayo dayta, naragsaktayto ta tultuladentayo ni Jehova. Makatulong met dayta tapno agtalinaedtayo a naragsak uray no saan nga apresiaren ti dadduma ti ar-aramidentayo.

18. Ania ti masapul a ditay ar-aramiden ken apay?

¹⁸ Liklikantayo a kuestionaran ti motibo ti dadduma. (1 Cor. 13:7) No saan nga iyebkas ti dadduma ti apresasionda, mabalin nga isaludsodtayo iti bagitayo: ‘Talaga kadi a saanda a managyaman, wenno baka nalipatanda laeng ti nagyaman?’ Posible nga adda ti dadduma pay a rason no apay a saan a kas iti namnamaentayo ti panangyebkasda iti apresasion. Mabalin nga agyamyaman met ti dadduma ngem marigatanda laeng a mangyebkas iti dayta. Baka mabain met ti dadduma nga umawat iti tulong lalo no isuda idi ti tumultulong iti dadduma. Aniaman ti rason, no talaga nga ay-ayatentayo dagiti kakabsat, saantayo a pagduaduaan ti motiboda ken itultuloytayo latta ti agbalin a naragsak a manangted.—Efe. 4:2.

19-20. Ania pay ti makatulong kadatayo nga agbalin a naragsak no mangmangtedtayo? (Kitaen met ti ladawan.)

¹⁹ Agan-anuska. No maipapan iti kinaparabur, insurat ti masirib a ni Ari Solomon: “Ipuruakmo ti tinapaymo iti danum, ta masarakamto manen kalpasan ti adu nga aldaw.” (Ecl. 11:1) Isuro kadatayo dagita a sasao a no  dadduma, maawattayo laeng ti apresasion ti sabsabali “kalpasan ti adu nga aldaw” wenno napaut a tiempo. Kitaentayo ti maysa a kapadasan a mangipakita nga agpayso dayta.

²⁰ Adun a tawen ti napalabas, sinuratan ti asawa ti maysa a manangaywan iti sirkito ti kababautisar a sister. Pinaregtana ti sister nga agtalinaed a matalek. Kalpasan ti agarup walo a tawen, nagsubalit ti sister. Imbagana: “Saanmo nga ammo daytoy, ngem talaga a kayatko a maammuam a nagdakkel ti naitulongmo kaniak iti napalpalabas a tawen.” Imbagana pay: “Makaparegta [ti suratmo], ngem ti talaga a nakatukayan ti pusok ket ti teksto nga inranudmo. Diakto pulos malipatan dayta.” a Kalpasan nga inlawlawagna dagiti naipasango kenkuana a pakasuotan, imbaga ti sister: “No dadduma, kayatko idin ti sumuko ken agsardeng nga agserbi ken Jehova. Ngem kanayon a malaglagipko ti teksto nga insuratmo. Ket dayta ti nangpabileg kaniak . . . nga agtalinaed a matalek.” Innayonna pay: “Iti uneg ti walo a tawen, nagdakkel a pammaregta kaniak ti suratmo ken ti teksto nga inranudmo.” Panunotem laengen no kasano karagsak ti asawa ti manangaywan iti sirkito idi naawatna dayta a surat “kalpasan ti adu nga aldaw”! Mabalin met a satay la maawat ti apresasion ti dadduma a tinultulongantayo kalpasan ti napaut a tiempo.

21. Apay a determinadoka nga agtultuloy a mangtulad iti kinaparabur ni Jehova?

²¹ Kas nadakamaten, pinarsuanatayo ni Jehova nga agbalin a naragragsak no mangtedtayo ngem no umawattayo. Nagmayat ti riknatayo no matulongantayo dagiti kapammatiantayo ken naragsaktayo no iyebkasda ti apresasionda. Ngem agyamanda man wenno saan iti inaramidtayo, naragsaktayo latta ta ammotayo nga inaramidtayo ti umiso. Laglagipem nga aniaman ti maipaaymo, “kabaelannaka nga ikkan ni Jehova iti ad-adu ngem iti dayta.” (2 Cron. 25:9) Saantayto pulos a maartapan ti kinaparabur ni Jehova! Ken ti kasayaatan a gunggona a maawattayo ket ti gunggona nga ipaay ni Jehova. Determinadotayo ngarud koma nga agtultuloy a mangtulad iti naparabur a nailangitan nga Amatayo.