“INAWATYO nga awan bayadna, itedyo nga awan bayadna.” (Mateo 10:8) Imbilin dayta ni Jesus kadagiti apostolna idi imbaonna ida a mangikasaba iti naimbag a damag. Tinungpal kadi dagiti apostol daytoy a bilin? Wen, ken intultuloyda nga inaramid dayta uray idi awanen ni Jesus ditoy daga.

Kas pagarigan, idi a ti dati a mammadles a ni Simon nakitana ti pannakabalin da apostol Pedro ken Juan nga agaramid iti milagro, pinadasna a bayadan ida tapno ikkanda met iti kasta a pannakabalin. Ngem tinubngar ni Pedro ni Simon, a kunkunana: “Mapukaw koma ti pirakmo a maikanunong kenka, agsipud ta pinanunotmo a babaen iti kuarta matagikuam ti awan bayadna a sagut ti Dios.”—Aramid 8:18-20.

Imparangarang met ni apostol Pablo ti kababalin nga imparangarang ni Pedro. Mabalin koma a makapadagsen ni Pablo kadagiti Kristiano a kakabsatna idiay Corinto no nagpannuray kadakuada iti material a kasapulanna. Kaskasdi, nangged met tapno masuportaranna ti bagina. (Aramid 18:1-3) Gapuna, sikokompiansa a maikunana nga inkasabana ti naimbag a damag kadagiti taga Corinto “nga awan bayadna.”—1 Corinto 4:12; 9:18.

Makapaladingit ta adu nga agkunkuna a pasurot ni Kristo ti di nangipakita iti umasping a kinatulok a ‘mangted nga awan bayadna.’ Kinapudnona, adu kadagiti narelihiosuan a panguluen iti Kakristianuan ti ‘mangisuro maipaay laeng iti maysa a gatad.’ (Mikias 3:11) Dadduma pay ketdi a narelihiosuan a panguluen ti bimmaknang gapu iti panagkolektada iti kuarta kadagiti arbanda. Idi 1989, maysa nga ebanghelista idiay Estados Unidos ti nasentensiaan iti 45 a tawen a pannakaibalud. Ti rason? ‘Linukona dagiti pasurotna iti minilion a doliar ken inusarna ti dadduma a kantidad a pinanggatang kadagiti balay, lugan, kulongan ti aso nga addaan air-condition ken pinagbakasionna.”—People’s Daily Graphic, Oktubre 7, 1989.

Idiay Ghana, sigun iti Ghanaian Times a Marso 31, 1990, maysa a Romano Katoliko a padi ti nangala kadagiti kuarta a nakolekta iti maysa a misa ket impalladawna nga insubli kadagiti nakimisa. “Ti rasonna,” sigun iti pagiwarnak, “ket kas adulto, manamnama a dakdakkel koma ti itedda a kontribusion.” Saan ngarud a pagsiddaawan nga adu a simbaan ti mangilunglungalong iti kinaagum kadagiti miembroda, nga aktibo nga isayangkatda ti panagsugal ken dadduma pay a pamay-an tapno makaur-or iti kuarta.

Maisupadi iti dayta, ikagumaan dagiti Saksi ni Jehova a tuladen ni Jesus ken dagiti nagkauna nga adalanna. Awan ti baybayadanda a klero. Tunggal Saksi ket ministro a nakaitalkan ti annongen a mangikasaba iti “naimbag a damag ti pagarian” iti sabali a tattao. (Mateo 24:14) Gapuna, nasurok nga innem a milion kadakuada ti mangidandanon kadagiti tattao iti libre a “danum ti biag.” (Apocalipsis 22:17) Iti dayta a pamay-an, uray dagidiay ‘awanan iti kuarta’ magunggonaanda manipud iti mensahe ti Biblia. (Isaias 55:1) Nupay ti sangalubongan a trabahoda ket masupsuportaran babaen dagiti boluntario a donasion, dida pulos agur-or iti kuarta. Kas pudno a ministro ti Dios, saanda a “managilako iti sao ti Dios,” no di ket  mangasabada “gapu iti kinapasnek, wen, kas naibaon manipud iti Dios.”—2 Corinto 2:17.

Ngem apay a situtulok dagiti Saksi ni Jehova a tumulong kadagiti sabsabali, nga aramidenda dayta nga awan bayadna? Ania ti mangtigtignay kadakuada? Ti panangaramid iti dayta a libre kaipapananna kadi a naan-anay nga awan ti magunggona ti panagreggetda?

Dagiti pudno a Kristiano ita ket kangrunaanna a tinignay ti tarigagay a mangay-ayo ken ni Jehova—saan a tapno agpabaknang. Iti kasta, masungbatanda ti karit a pinataud ni Satanas a Diablo sinigsiglon ti napalabas. No maipapan iti nalinteg a tao nga agnagan iti Job, ni Satanas kinaritna ni Jehova babaen daytoy a saludsod: “Agpaay aya iti awan kapapay-anna a ni Job nagbuteng iti Dios?” Kinuna ni Satanas nga agserserbi kano laeng ni Job iti Dios gapu ta salsalakniban ni Jehova. Ngem no ikkatenna dagiti material nga ik-ikutan ni Job, rupanrupa kano nga ilunodna ti Dios!—Job 1:7-11.

Tapno masungbatan dayta a karit, pinalubosan ti Dios ni Satanas a subokenna ni Job, a kunkunana: “Isuamin nga adda kenkuana adda ita imam.” (Job 1:12) Ti resultana? Pinaneknekan ni Job nga ulbod ni Satanas. Aniaman a rigat ti simmangbay kenkuana, nagtalinaed a nasungdo ni Job. “Agingga a mauyos ti biagko saankonto nga ikkaten kaniak ti kinatarnawko!” kinunana.—Job 27:5, 6.

Dagiti pudno nga agdaydayaw ita iparangarangda met ti kababalin ni Job. Ti panagserbida iti Dios ket saan a maigapu iti material a gunggona.

Ti sabali pay a rason no apay a sidadaan dagiti pudno a Kristiano a ‘mangted nga awan bayadna’ ket gapu ta ‘immawatda nga awan bayadna’ iti Dios. Naadipen ti sangatauan iti basol ken ipapatay gapu iti basol ti amatayo a ni Adan. (Roma 5:12) Siaayat nga inyurnos ni Jehova ti sakripisio nga ipapatay ti Anakna—maysa a dakkel a sakripisio iti biang ti Dios. Saan a maikari ti sangatauan iti dayta. Talaga a sagut dayta ti Dios.—Roma 4:4; 5:8; 6:23.

Kas nailanad iti Roma 3:23, 24, kinuna ngarud ni Pablo kadagiti napulotan a Kristiano: “Amin nagbasol ken agkurang iti dayag ti Dios, ket kas awan bayadna a sagut a maidekdeklarada a nalinteg babaen ti di kaikarian a kinamanangngaasina baeten iti pannakaluk-at babaen ti subbot nga imbayad ni Kristo Jesus.” Umawat met iti “awan bayadna a sagut” dagidiay mangnamnama iti biag nga agnanayon ditoy daga. Daytoy a sagut ket iramanna ti pribilehio a maideklara kas nalinteg a gayyem ni Jehova.—Santiago 2:23; Apocalipsis 7:14.

Ti pangsubbot a daton ni Kristo pinagbalinna met a posible a makapagserbi kas ministro ti Dios ti amin a Kristiano. Insurat ni apostol Pablo: “Nagbalinak a ministro daytoy [sagrado a palimed] maitunos iti awan bayadna a sagut ti di kaikarian a kinamanangngaasi ti Dios.” (Efeso 3:4-7) Gapu ta naayabanda iti daytoy a ministerio babaen ti probision a dida pakaikarian wenno dida nagbannogan, awan ngarud ti rumbeng a namnamaen dagiti ministro ti Dios a material a mateggedanda no ipakaammoda kadagiti dadduma ti damag maipapan iti daytoy a probision.

Gapuna, kaipapananna kadi dayta nga awan ti aniaman a gunggona a rumbeng a namnamaen dagiti Kristiano nga agserserbi iti Dios? Saan, ta kinuna ni apostol Pablo kadagiti padana a manamati: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna.” (Hebreo 6:10) Adda met kinahustisia ken ni Jehova. (Deuteronomio 32:4) Iti sabali a bangir, ni Jehova ti “mananggunggona kadagidiay sipapasnek a mangsapsapul kenkuana.” (Hebreo 11: 6) Ngem saan aya a panangiparegta iti kinaagum ti kari a biag nga agnanayon iti Paraiso?—Lucas 23:43.

Saan a pulos. Kinaagpaysuanna, ti Dios a mismo ti namunganayan ti tarigagay nga agbiag nga agnanayon iti Paraiso a daga. Isu ti nangipakaammo iti daytoy a namnama iti umuna a pagassawaan. (Genesis 1:28; 2:15-17) Nupay napukaw da Adan ken Eva dayta a namnama agpaay kadagiti annakda, inyurnosna a maibanagto latta dayta a namnama. Iti Saona, inkari ngarud ti Dios “a ti mismo a sangaparsuaan met mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios.” (Roma 8:21) Naan-anay ngarud a maiparbeng kadagiti Kristiano ita, kas ken Moises idi un-unana, a matmatan a ‘sipapasnek ti pannakabayad ti gunggona.’ (Hebreo 11:26) Saan nga ipaay ti Dios daytoy a gunggona kas pasuksok. Ipaayna gapu iti pudno nga ayatna kadagidiay agserserbi kenkuana. (2 Tesalonica 2:16, 17) Kas panagsubalit, “agayattayo, agsipud ta isu ti immuna a nagayat kadatayo.”—1 Juan 4:19.

Kaskasdi, masapul a kanayon nga usigen dagiti Kristiano ita ti mismo a motiboda no apay nga agserserbida iti Dios. Iti Juan 6:10-13, mabasatayo ti milagro a panangpakan ni Jesus iti nasurok a lima a ribu a tattao. Kalpasanna, dadduma ti simmurot ken ni Jesus gapu laeng iti inaagum a rason. Kinuna kadakuada ni Jesus: “Sapsapulendak . . . gapu ta nangankayo kadagiti tinapay ket napnekkayo.” (Juan 6:26) Sumagmamano a dekada kalpasanna, dadduma a dedikado a Kristiano ti nagserbi met iti Dios ngem “saan a buyogen ti nadalus a motibo.” (Filipos 1:17) Dagiti dadduma a ‘di immannugot iti makapasalun-at a sasao ni Jesu-Kristo’ ginundawayanda pay ketdi ti nakitimpuyog kadagiti Kristiano maipaay iti personal a pagimbaganda.—1 Timoteo 6:3-5.

Ita, makuna met nga agserserbi gapu iti inaagum a motibo no ti maysa a Kristiano ket agserserbi gapu laeng ta kayatna ti agbiag nga agnanayon iti Paraiso. Inton agangay, agresulta daytoy iti naespirituan a panagkapuyna. Gapu ta agparang a nabayag ti sistema ti bambanag ni Satanas ngem iti namnamaenna, mabalin nga isu ket “mabannog,” gapu ta ti panagriknana kasla naladaw ti panungpalan. (Galacia 6:9) Mabalin pay ketdi a sayangenna dagiti indatonna a material. Palagipannatayo ni Jesus: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” (Mateo 22:37) Wen, no ayat ti kangrunaan a rason ti tao nga agserserbi iti Dios, saanna a kedngan ti kapaut ti panagserbina. Determinado nga agserbi ken ni Jehova iti agnanayon! (Mikias 4:5) Saanna a sayangen ti aniaman nga indatonna mainaig iti panagserbina iti Dios. (Hebreo 13:15, 16) Ti panagayat iti Dios ti mangtignay kenkuana a mangyun-una iti biagna dagiti bambanag nga agpaay iti Dios.—Mateo 6:33.

Ita, nasuroken nga innem a milion a pudno nga agdaydayaw ti ‘situtulok a mangidatdaton iti bagbagida’ iti panagserbi ken ni Jehova. (Salmo 110:3) Maysakay kadi kadakuada? No saan pay, utobenyo koma ti ituktukon ti Dios: nasin-aw a pannakaammo iti kinapudno; (Juan 17:3) pannakawayawaya manipud pannakaadipen kadagiti ulbod a narelihiosuan a sursuro; (Juan 8:32) ti namnama a biag nga agnanayon. (Apocalipsis 21:3, 4) Matulongandakayo dagiti Saksi ni Jehova a mangadal no kasanoyo a magun-odan amin dagitoy manipud iti Dios—nga awan bayadna.