No Ania Dagiti Masursurotayo iti Pamilia ni Jesus Ditoy Daga

ANIA ti ammoyo maipapan iti mismo a pamilia ni Jesus, dagidiay kabbalayna iti immuna a 30 a tawen ti panagbiagna ditoy daga sakbay a nabautisaran? Ania ti ibaga dagiti salaysay ti Ebanghelio? Ania ti masursurotayo no usigentayo ti maipapan iti pamiliana? Adda magunggonayo kadagiti sungbat.

Nanam-ay kadi ti pamilia a nabangonan ni Jesus? Maysa a karpintero ni Jose, ti pannakaama ni Jesus. Maysa dayta a makabannog a pisikal a trabaho, a masansan a ramanenna ti panagpukan kadagiti mausar a kayo. Idi nagturong idiay Jerusalem dagiti nagannak ni Jesus agarup 40 nga aldaw kalpasan ti pannakaipasngayna, nangidatagda iti daton a kalikaguman ti Linteg. Nangidatonda kadi iti maysa a kalakian a karnero ken maysa a pagaw wenno maysa nga atap a kalapati, kas mayannurot iti Linteg? Saan. Agparang a dida kabaelan ti mangidaton kadagita. Nupay kasta, ti Linteg adda probisionna para kadagiti napanglaw. Mayannurot iti dayta nga urnos, nangidaton da Jose ken Maria iti “maysa a paris a pagaw wenno dua nga urbon nga atap a kalapati.” Ti panangidatonda kadagiti nalaka ti balorna nga animal ipakitana a nanumoda a pamilia.​—Lucas 2:22-24; Levitico 12:6, 8.

Dayta ti mangipakita a ni Jesu-Kristo, ti masanguanan nga Agturay iti intero a sangatauan, ket nayanak iti nanumo a pamilia, dagidiay kasapulan nga igaedda ti agtrabaho tapno adda pagbiagda.  Dimmakkel ni Jesus a karpintero, kas iti pannakaamana. (Mateo 13:55; Marcos 6:3) ‘Nupay nabaknang’ ni Jesus kas nabileg nga espiritu a parsua idiay langit, kuna ti Biblia a ni Jesus nagbalin a ‘napanglaw’ maigapu kadatayo. Sipapakumbaba a nagbalin a kas maysa a tao ket dimmakkel iti maysa nga ordinario a pamilia. (2 Corinto 8:9; Filipos 2:5-9; Hebreo 2:9) Saan a nabaknang ti pamilia a nabangonan ni Jesus, ket mabalin a nakatulong dayta kadagiti dadduma a tattao tapno mayasidegda ti riknada kenkuana. Saanda nga alusiisen iti kasasaadna. Naapresiarda ni Jesus gapu kadagiti sursurona, dagiti makaay-ayo a galadna, ken dagiti nakaskasdaaw nga aramidna. (Mateo 7:28, 29; 9:19-33; 11:28, 29) Makitatayo ti sirib ni Jehova a Dios iti panangipalubosna a maipasngay ni Jesus iti maysa nga ordinario a pamilia.

Ita, usigentayo ti maipapan kadagiti kapamilia ni Jesus ket kitaentayo no ania ti masursurotayo kadakuada.

Ni Jose​—Maysa a Nalinteg a Tao

Idi naammuan ni Jose a ti nobiana ket masikog “sakbay a napagmaymaysada,” nariribukan la ketdi agsipud ta ay-ayatenna ni Maria ngem karimonna ti imoralidad a maipagarup a napasamak. Ti intero a kasasaad ket kasla panangipaidam iti kalinteganna kas ti masanguanan nga asawa ni Maria. Idi kaaldawanna, ti naitulag a babai ket mamatmatan kas asawa ti nobiona. Idi naan-anay a nakapagpanunot, inkeddeng ni Jose nga isinana ni Maria ngem iti nalimed a pamay-an tapno saan a maubor ni Maria kas mannakikamalala.​—Mateo 1:18; Deuteronomio 22:23, 24.

Kalpasanna, maysa nga anghel ti nagparang ken ni Jose a kunkunana: “Dika agamak a mangyawid ken Maria nga asawam, ta dayta nabukel kenkuana ket babaen iti nasantuan nga espiritu. Mangipasngayto iti anak a lalaki, ket masapul a panaganam iti Jesus, ta isalakannanto ti ilina kadagiti basolda.” Impangag ni Jose dayta a panangiwanwan ti Dios, ket inyawidna ni Maria.​—Mateo 1:20-24.

Gapu iti dayta nga inaramidna, daytoy a nalinteg ken matalek a lalaki ket nagbalin a paset iti kaitungpalan ti imbaga ni Jehova babaen ken ni propeta Isaias: “Adtoy! Ti met laeng balasang pudno nga agsikogto, ket mangipasngay iti anak a lalaki, ket pudno unay a panaganannanto iti Emmanuel.” (Isaias 7:14) Sigurado a naespirituan a lalaki ni Jose a nangapresiar iti pribilehio nga agbalin kas pannakaama ti Mesias, iti laksid ti kinapudno a saanna a putot ti inauna nga anak ni Maria.

Ni Jose saanna a dinennaan ni Maria agingga a saan a nagpasngay. (Mateo 1:25) Kas kabbaro nga agassawa, nalabit a narigat ti panangliklik iti sekso, ngem nabatad a dida kayat a mangpataud iti panagduadua no siasino a talaga ti Ama ti sikog. Anian a nagsayaat a pagarigan iti panagteppel! Impangpangruna ni Jose dagiti naespirituan a banag imbes a dagiti natural a tarigagayna.

Iti uppat a gundaway, nakaawat ni Jose iti panangiwanwan ti anghel maipapan iti panangpadakkel iti siumanna. Ti tallo kadagitoy ket mainaig iti lugar a pangpadakkelan iti ubing. Napateg ti insigida a panagtulnog tapno maispal ti ubing. Kadagita amin a gundaway, dagus a nagtignay ni Jose, nga umuna, impanna ti ubing idiay Egipto ken kalpasanna, insublina idiay Israel. Daytoy ti nangsalaknib ken ni Jesus manipud iti panangpapatay ni Herodes kadagiti maladaga. Ti panagtulnog ni Jose ket nagresulta met iti pannakatungpal dagiti padto mainaig iti Mesias.​—Mateo 2:13-23.

Ni Jose insurona ni Jesus iti trabaho tapno masuportaranna ti bagina. Gapuna, naawagan ni Jesus saan laeng a kas “ti anak ti allawagi” no di ket kas “ti allawagi.” (Mateo 13:55; Marcos 6:3) Insurat ni apostol Pablo a ‘nasubok ni Jesus iti amin a banag kas kadatayo.’ Siempre,  nairaman iti dayta ti panangigaedna nga agtrabaho tapno masuportaranna ti pamiliada.​—Hebreo 4:15.

Kamaudiananna, ti debosion ni Jose iti pudno a panagdayaw ket makitatayo iti maudi a salaysay a nakadakamatanna iti Kristiano a Griego a Kasuratan. Ni Jose impanna ti pamiliana idiay Jerusalem para iti Paskua. Dagiti laeng lallaki ti kasapulan a dumar-ay, ngem inyugali ni Jose nga ikuyog ti pamiliana a mapan idiay Jerusalem iti “tinawen.” Nangaramid kadagiti adu a panagsakripisio, yantangay kasapulan a magnada iti agarup 100 a kilometro manipud Nazaret agingga iti Jerusalem. Ngem iti pagteng a nailanad iti Kasuratan, simmina ni Jesus iti grupo. Nasarakanda idiay templo, a dumdumngeg ken agsalsaludsod kadagiti mannursuro ti Linteg. Nupay agtawen laeng idi iti 12, nangiparangarang ni Jesus iti naisangsangayan a sirib ken pannakaammo iti Sao ti Dios. Ipakita kadatayo dayta a pasamak a ni Jesus ket sinuruan a naimbag dagiti nagannak kenkuana, a pinadakkelda kas ubing a naespirituan ti panagpampanunotna. (Lucas 2:41-50) Agparang a pimmusay ni Jose sumagmamano a tiempo kalpasan dayta, yantangay awan ti nadakamat maipapan kenkuana kadagiti naud-udi a salaysay iti Kasuratan.

Wen, ni Jose ket maysa a nalinteg a lalaki a nangaywan a naimbag iti naespirituan ken pisikal a kasapulan ti pamiliana. Kas ken ni Jose, ipangpangrunayo kadi iti biagyo dagiti naespirituan a banag no matarusanyo ti pagayatan ti Dios kadatayo ita? (1 Timoteo 2:4, 5) Situtulok kadi a pagtulnoganyo ti ibaga ti Dios kas nailanad iti Saona, a tuladenyo ti panagpasakup nga imparangarang ni Jose? Isursuroyo kadi dagiti annakyo tapno kabaelanda ti makipatang kadagiti sabsabali maipapan kadagiti naespirituan a banag?

Ni Maria​—Maysa a Di Managimbubukodan nga Adipen ti Dios

Ni Maria, nga ina ni Jesus, ket maysa a mapagwadan nga adipen ti Dios. Naklaat idi impakaammo ni anghel Gabriel ti panagsikogna. Kas maysa a birhen, ‘saan a nakidenna iti lalaki.’ Idi naammuanna a ti panagsikogna ket babaen ti nasantuan nga espiritu, sipapakumbaba nga inawatna ti mensahe, a kunkunana: “Adtoy! Ti adipen a babai ni Jehova! Maaramid koma kaniak sigun iti deklarasionmo.” (Lucas 1:30-38) Kasta unay ti panangipategna iti naespirituan a pribilehio isu a situtulok a nangibtur iti aniaman a rigat a resulta ti pangngeddengna.

Kinapudnona, nagbalbaliw ti intero a biagna kas maysa a babai gapu iti panangawatna iti annongen. Idi napan idiay Jerusalem tapno magugoran, maysa a mararaem a lakay nga agnagan Simeon ti nagkuna kenkuana: “Maysa nga atiddog  a kampilan ti maisalputto iti kararuam met laeng.” (Lucas 2:25-35) Nalawag a tuktukoyenna ti marikna ni Maria apaman a makitananto ni Jesus a laksiden ti adu a tao ken mailansa iti kayo a pagtutuokan.

Bayat ti panagdakkel ni Jesus, silalagip ni Maria kadagiti napagteng iti biag ni Jesus, a “nangbukel kadagiti panangipapan iti pusona.” (Lucas 2:19, 51) Kas ken ni Jose, ni Maria ket maysa a naespirituan a persona ken impategna dagiti pasamak ken sasao a kaitungpalan dagiti padto. Naitukit la ketdi iti panunotna ti imbaga kenkuana ni anghel Gabriel: “Daytoy ket naindaklanto ken maawaganto iti Anak ti Kangatuan; ket ni Jehova a Dios itednanto kenkuana ti trono ni David nga amana, ket agturayto kas ari iti balay ni Jacob iti agnanayon, ket awanto ti panungpalan ti pagarianna.” (Lucas 1:32, 33) Wen, imbilangna a nagpateg a pribilehio ti agbalin nga ina ti Mesias ditoy daga.

Naiparangarang manen ti espiritualidad ni Maria idi nagkitada ken ni Elisabet, ti kabagianna a milagro met a nagsikog. Idi makitana ni Elisabet, ni Maria indayawna ni Jehova ken impakitana ti panangipategna iti Sao ti Dios. Tinukoyna ti kararag ni Anna a nairekord iti 1 Samuel kapitulo 2 ken inramanna dagiti sasao manipud iti dadduma a libro ti Hebreo a Kasuratan. Ti kasta a pannakaammo iti Kasuratan impakitada a kualipikado ni Maria nga agbalin a kas ina a nasungdo ken managbuteng iti Dios. Nakitinnulong ken ni Jose iti naespirituan a panangpadakkel iti anakna.​—Genesis 30:13; 1 Samuel 2:1-10; Malakias 3:12; Lucas 1:46-55.

Nabileg ti pammati ni Maria iti anakna kas ti Mesias, ket nagtultuloy dayta uray kalpasan ti ipapatay ni Jesus. Di nagbayag kalpasan ti panagungar ni Jesus, maysa ni Maria kadagiti matalek nga adalan a nagtitipon tapno agkararag a kadua dagiti apostol. (Aramid 1:13, 14) Tinaginayonna ti kinamatalekna, uray kasapulan nga agtuok iti pannakakitana iti ing-ingungotenna nga anak a matay iti kayo a pagtutuokan.

Ania ti masursuroyo iti panangammo iti maipapan iti biag ni Maria? Awatenyo kadi ti pribilehio nga agserbi iti Dios uray kasapulan nga agsakripisiokayo? Maseknankayo kadi iti kinapateg daytoy a pribilehio ita? Silalagipkayo kadi iti impakpakauna ni Jesus ken idiligyo dayta iti mapaspasamak ita, a ‘mangbukbukelkayo iti kapanunotan iti pusoyo’? (Mateo, kapitulo 24 ken 25; Marcos, kapitulo 13; Lucas, kapitulo 21) Tuladenyo kadi ni Maria iti kinasigona iti Sao ti Dios, a masansan nga usarenyo dayta iti pannakipatangyo? Taginayonenyo kadi ti pammatiyo ken ni Jesus iti laksid dagiti saem nga iyeg ti panagbalinyo a pasurotna?

 Dagiti Kakabsat ni Jesus​—Posible ti Panagbalbaliw

Dagiti kakabsat ni Jesus agparang a saanda nga inalagad ti pammati kenkuana agingga iti ipapatayna. Nalabit a dayta ti makagapu nga awanda idi matay ni Jesus iti kayo a pagtutuokan isu a ni apostol Juan ti nangitalkanna iti inana. Dagiti kabagian ni Jesus impakitada nga awan panagraemda kenkuana, a naminsan kinunada pay ketdi a “napukawnan ti nakemna.” (Marcos 3:21) Yantangay addada kapamilia ni Jesus a di manamati, dagidiay addaan ita kadagiti di manamati a kabagian manamnamada a maawatan ni Jesus ti riknada no laisen ida dagiti kabagianda gapu iti pammatida.

Nupay kasta, kalpasan ti panagungar ni Jesus, nalawag a namati kenkuana dagiti kakabsatna. Karamanda iti grupo a nagtataripnong idiay Jerusalem sakbay ti Pentecostes 33 K.P. ken sipapasnek a nakipagkararag kadagiti apostol. (Aramid 1:14) Nabatad a ti panagungar ti kabsatda iti ina ti nangtignay kadakuada nga agbabawi, agingga a nagbalinda nga adalanna. Ditay koma maawanan iti namnama nga agtignayto met laeng dagiti di manamati a kabagiantayo.

Ni Santiago, ti kabsat ni Jesus a personal a nagparanganna, ket addaan iti naisangsangayan nga akem iti kongregasion Kristiano sigun iti Kasuratan. Pinaltiingan ti Dios nga agsurat kadagiti padana a Kristiano, nga indagadagna a taginayonenda ti pammatida. (Aramid 15:6-29; 1 Corinto 15:7; Galacia 1:18, 19; 2:9; Santiago 1:1) Ni Judas, ti sabali pay a kabsat ni Jesus iti ina, napaltiingan met nga agsurat tapno paregtaenna dagiti kapammatianna a makidangadangda a sipipinget maipaay iti pammati. (Judas 1) Nakadkadlaw ta iti suratda, saan nga inusar da Santiago ken Judas ti relasionda ken ni Jesus iti lasag tapno matignayda dagiti padada a Kristiano. Anian a naisangsangayan a leksion ti kinaemma ti maadaltayo kadakuada!

Isu nga ania ti sumagmamano a banag a masursurotayo iti pamilia ni Jesus? Sigurado, isu dagiti pagarigan ti debosion a mabalin a maiparangarang kadagiti pamay-an a kas kadagitoy: (1) Simamatalek nga agpasakup iti nayebkas a pagayatan ti Dios ken sanguen dagiti amin a pakasuotan a resulta ti panangaramid iti dayta. (2) Ipangpangruna dagiti naespirituan a banag, uray kaipapananna dayta ti panagsakripisio. (3) Sanayenyo dagiti annakyo maitunos iti Kasuratan. (4) Dikay maawanan iti namnama nga agtignayto dagiti kapamilia a di manamati. (5) Saanyo nga ipasindayag ti aniaman a relasionyo kadagiti prominente iti kongregasion Kristiano. Wen, ti panangammo iti maipapan iti pamilia ni Jesus ditoy daga iyadaninatayo nga ad-adda kenkuana ken pabilgenna ti apresasiontayo iti panangpili ni Jehova iti maysa nga ordinario a pamilia a mangpadakkel ken ni Jesus.

[Dagiti Ladawan iti panid 4, 5]

Ni Jose innalana ni Maria kas asawana ket nagbalin a paset ti kaitungpalan dagiti Mesianiko a padto

[Dagiti Ladawan iti panid 6]

Da Jose ken Maria insuroda kadagiti annakda dagiti naespirituan a banag ken ti paset ti sekular a trabaho

[Dagiti Ladawan iti panid 7]

Nupay dimmakkelda iti maysa a naespirituan a sangakabbalayan, dagiti kakabsat ni Jesus saanda nga inalagad ti pammati kenkuana agingga iti ipapatayna

[Dagiti Ladawan iti panid 8]

Dagiti kakabsat ni Jesus iti ina a da Santiago ken Judas pinaregtada dagiti padada a Kristiano