Paneknekanyo a Nakasaganakayo iti Aldaw ni Jehova

“Paneknekanyo a sisasaganakayo, agsipud ta iti oras a saanyo nga ipagarup nga isu dayta, ti Anak ti tao umay.”​—MATEO 24:44.

1. Apay a masapul a sipapanunottayo iti aldaw ni Jehova?

ALDAW dayta ti gubat ken pungtot, tuok ken rigat, sipnget ken pannakalangalang. Sigurado nga agdissuor ti “naindaklan ken nakaam-amak nga aldaw” ni Jehova iti daytoy dakes a sistema ti bambanag, no kasano a linemmes ti Layus ti dakes a lubong idi kaaldawan ni Noe. Awan ti makalibas. Ngem “tunggal maysa nga umawag iti nagan ni Jehova makatalawto a sitatalged.” (Joel 2:30-32; Amos 5:18-20) Dadaelen ti Dios dagiti kabusorna ken ispalenna ti ilina. Buyogen ti kinaganat, kinuna ni propeta Sofonias: “Ti dakkel nga aldaw ni Jehova asidegen. Asidegen dayta, ket mapagdardaras iti kasta unay.” (Sofonias 1:14) Ngem kaano a maibanag daytoy a panangukom ti Dios?

2, 3. Apay a napateg a nakasaganatayo agpaay iti aldaw ni Jehova?

² “Maipapan iti dayta nga aldaw ken oras awan ti asinoman a makaammo, uray dagiti anghel ti langlangit wenno uray ti Anak, no di laeng ti Ama,” kinuna ni Jesus. (Mateo 24:36) Yantangay ditay ammo ti eksakto nga oras,  napateg nga ipapusotayo ti sasao ti tekstotayo para iti tawen 2004: “Agtultuloykayo nga agbantay . . . Paneknekanyo a sisasaganakayo.”​—Mateo 24:42, 44.

³ Kas panangipakitana no kasano a giddato a maurnong iti natalged a lugar dagidiay nakasagana ken no kasano a mabaybay-an ti dadduma, kinuna ni Jesus: “Dua a lallaki ti addanto iti talon: maysa ti maalanto ket ti sabali mabaybay-an; dua a babbai ti aggilgilingto iti paggilingan babaen iti ima: maysa ti maalanto ket ti sabali mabaybay-an.” (Mateo 24:40, 41) Iti dayta a kritikal a tiempo, anianto ngata ti personal a kasasaadtayo? Nakasaganatayonto ngata, wenno masangpetannatayo dayta nga aldaw a di nakasagana? Agpannuray dayta kadagiti aramidentayo ita. Tapno maipakitatayo a nakasaganatayo iti aldaw ni Jehova, addada nasaknap a kababalin, maysa a naespirituan a kasasaad, ken estilo ti panagbiag a nasken a liklikantayo.

Liklikan ti Agpampamayan

4. Ania ti kababalin dagiti tattao idi kaaldawan ni Noe?

⁴ Usigenyo ti kaaldawan ni Noe. “Babaen iti pammati, kalpasan a naipaayan iti nadibinuan a pakdaar maipapan iti bambanag a saan pay a nakita, nangipakita ni Noe iti nadiosan a buteng ket nangibangon iti daong a pakaisalakanan ti sangakabbalayanna,” kuna ti Biblia. (Hebreo 11:7) Saan a gagangay ti kadakkel ti daong. Maysa pay, “manangaskasaba iti kinalinteg” ni Noe. (2 Pedro 2:5) Ngem saan a nagbalbaliw dagiti tattao iti laksid ti nakitada a daong a binangon ni Noe wenno ti panangasabana. Apay? Gapu ta “mangmangan ken umin-inumda, mangas-asawa dagiti lallaki ken mayas-asawa dagiti babbai.” Dagiti tattao a kinasabaan ni Noe okupadoda unay kadagiti personal nga aktibidad ken ragragsak a “saanda a nangikankano agingga nga immay ti layus ket inyanudna amin ida.”​—Mateo 24:38, 39.

5. Ania ti kababalin dagiti agnanaed iti Sodoma idi kaaldawan ni Lot?

⁵ Kasta met laeng idi kaaldawan ni Lot. Ibaga kadatayo ti Kasuratan: “Mangmanganda, umin-inumda, gumatgatangda, aglaklakoda, agmulmulada, agibangbangonda. Ngem iti aldaw a rimmuar ni Lot iti Sodoma nagtudo iti apuy ken asupre manipud langit ket dinadaelna ida amin.” (Lucas 17:28, 29) Kalpasan ti panangpakdaar dagiti anghel ken ni Lot maipapan iti umad-adani a pannakadadael, impakaammona dayta kadagiti manugangna. Ngem para kadakuada, ‘kasla agang-angaw’ ni Lot.​—Genesis 19:14.

6. Ania a kababalin ti nasken a liklikantayo?

⁶ Kas idi kaaldawan da Noe ken Lot, “kastanto ti kaadda ti Anak ti tao,” kinuna ni Jesus. (Mateo 24:39; Lucas 17:30) Kinapudnona, agpampamayan ti kaaduan a tattao ita. Nasken nga agannadtayo di la ket ta matnagtayo iti kasta a kababalin. Awan dakesna ti panangtagiragsak kadagiti naimas a taraon wenno iti natimbeng a panaginum iti naingel nga inumen. Umasping iti dayta, urnos ti Dios ti panagasawa. Kaskasdi, no dagita a banag ti agbalin a kapatgan iti biagtayo ket maliwayan dagiti naespirituan a banag, makuna kadi a personal a sagsaganaantayo ti nakaam-amak nga aldaw ni Jehova?

7. Ania ti nasken nga imtuodentayo sakbay a mangaramid iti aniaman a kalat, ken apay?

⁷ “Ti tiempo a nabati ket ababan,” kinuna ni apostol Pablo. “Manipud ita dagiti lallaki nga addaan assawa agbalinda koma a kasla awanan.” (1 Corinto 7:29-31) Nagababan ti nabatbati a tiempo tapno mairingpastayo ti inted-Dios a trabahotayo a panangikasaba iti Pagarian. (Mateo 24:14) Indagadag ni Pablo uray kadagiti naasawaan a dida unay agbalin nga okupado kadagiti assawada ket agbalin laengen a maikadua iti biagda dagiti interes ti Pagarian. Nalawag, ti kababalin nga idagdagadag ni Pablo ket kasungani ti panagpampamayan. Kinuna ni Jesus: “Itultuloyyo, ngarud, a sapulen nga umuna ti pagarian ken ti kinalinteg [ti Dios].” (Mateo 6:33) Sakbay a mangaramid iti aniaman a pangngeddeng wenno kalat, ti napateg nga imtuoden ket, ‘Kasano a makaapektar daytoy iti panangyun-unak kadagiti interes ti Pagarian?’

8. Ania ti nasken nga aramidentayo no naigaluttayo kadagiti inaldaw nga aktibidad ti biag?

 ⁸ Kasano no madlawtay a naigaluttayo kadagiti gagangay nga inaldaw nga aktibidad nga uray la maliwayantayo dagiti naespirituan a banag? Adda pay kadi nakaidumaan ti estilo ti panagbiagtayo kadagiti kaarrubatayo nga awanan iti umiso a pannakaammo iti Kasuratan ken saan a mangiwarwaragawag iti Pagarian? No kasta ti kasasaad, nasken nga ikararagtayo dayta. Matulongannatayo ni Jehova a maaddaan iti umiso a panangmatmat. (Roma 15:5; Filipos 3:15) Matulongannatayo a mangyun-una kadagiti interes ti Pagarian, nga agaramid iti umiso, ken mangtungpal iti obligasiontayo kenkuana.​—Roma 12:2; 2 Corinto 13:7.

Liklikan ti Naespirituan a Panagdungsa

9. Sigun iti Apocalipsis 16:14-16, apay a nasken a liklikantayo ti naespirituan a panagdungsa?

⁹ Mabalin nga adda dagiti agdungsa. Dayta ti mismo a ballaag ti padto a nangdakamat iti umad-adani a “gubat ti naindaklan nga aldaw ti Dios a Mannakabalin-amin” inton Armagedon. “Adtoy! Umayak a kas maysa a mannanakaw,” kuna ni Apo Jesu-Kristo. “Naragsak daydiay agtalinaed a siririing ket aywananna dagiti makinruar a kawesna, tapno saan koma a magna a lamolamo ket dagiti tattao makitada ti ibainna.” (Apocalipsis 16:14-16) Ti nadakamat ditoy a makinruar a kawes tukoyenna ti pakabigbigantayo kas Kristiano a Saksi ni Jehova. Ramanenna ti trabahotayo kas manangiwaragawag iti Pagarian ken ti Nakristianuan a konduktatayo. No agbalintayo a di aktibo, mabalin a mauksob ti Nakristianuan a pakabigbigantayo. Nakababain ken napeggad dayta. Nasken a liklikantayo ti matnag iti naespirituan a panagdungsa wenno kinaginad. Kasanotayo a maliklikan ti kasta a pagannayasan?

10. Apay a ti inaldaw a panagbasa iti Biblia tulongannatayo nga agtalinaed a naridam iti naespirituan?

¹⁰ Iyunay-unay ti Biblia ti kinapateg ti panagtalinaed a siririing ken sisasalukag. Kas pagarigan, palagipandatayo dagiti salaysay ti Ebanghelio: “Agtultuloykayo nga agbantay” (Mateo 24:42; 25:13; Marcos 13:35, 37); “paneknekanyo a sisasaganakayo” (Mateo 24:44); “agtultuloykayo a kumita, agtultuloykayo a siririing” (Marcos 13:33); “agtalinaedkayo a nakasagana” (Lucas 12:40). Kalpasan ti panangdakamatna iti di ninamnama nga idadateng ti aldaw ni Jehova iti daytoy a lubong, indagadag ni apostol Pablo kadagiti pada a manamati: “Saantay koma a maturog a kas iti ar-aramiden ti dadduma, no di ket agtalinaedtayo koma a siririing ken agtalinaedtayo a sipupuot.” (1 Tesalonica 5:6) Iti maudi a  libro ti Biblia, ni naipadayag a Kristo Jesus ipaganetgetna ti kellaat nga iyaayna, a kunkunana: “Umayak a sidadaras.” (Apocalipsis 3:11; 22:7, 12, 20) Adu kadagiti Hebreo a mammadto ti nangiladawan ken namakdaar maipapan iti naindaklan nga aldaw ti panangukom ni Jehova. (Isaias 2:12, 17; Jeremias 30:7; Joel 2:11; Sofonias 3:8) Ti inaldaw a panagbasa iti Sao ti Dios, ti Biblia, ken ti panangmennamenna iti nabasatayo tulongannatay nga agtalinaed a naridam iti naespirituan.

11. Apay a napateg ti personal a panagadal iti Biblia iti panagtalinaed a siririing iti naespirituan?

¹¹ Wen, anian a makapariing iti naespirituan ti naanep a personal a panagadal iti Kasuratan babaen ti panangusar kadagiti naibatay-Biblia a publikasion nga ipapaay ti “matalek ken masirib nga adipen”! (Mateo 24:45-47) Ngem tapno makagunggona ti personal a panagadal, nasken nga agtultuloy dayta ken adda panagrang-ayna. (Hebreo 5:14–6:3) Nasken a regular a mangipaunegtayo iti nakired a naespirituan a taraon. Kadagitoy nga al-aldaw, mabalin a narigat nga iwayaan dayta. (Efeso 5:15, 16) Ngem saan nga umdas no satay la agbasa iti Biblia ken kadagiti Nainkasuratan a publikasion no adda tiempotayo. Napateg ti regular a personal a panagadal no kayattayo nga agtalinaed a ‘nasalun-at iti pammati’ ken siririing.​—Tito 1:13.

12. Kasano a dagiti Nakristianuan a gimong, asamblea, ken kombension tulongandatayo a mangdaer iti naespirituan a panagdungsa?

¹² Dagiti Nakristianuan a gimong, asamblea, ken kombension tulongandatayo met a mangdaer iti naespirituan a panagdungsa. Kasano? Babaen dagiti instruksion a maaw-awattayo. Kadagitoy a taripnong, saan kadi a regular a maipalagip kadatayo ti kinaasideg ti aldaw ni Jehova? Dagiti linawas a Nakristianuan a gimong mangipaayda met iti gundaway tapno ‘makapagpipinnaregta iti ayat ken nasayaat nga ar-aramid.’ Ti kasta a panagpipinnaregta ket napateg iti panagtalinaed a siririing iti naespirituan. Saan ngarud a pakasdaawan a naibilin a regular nga agtataripnongtayo bayat a “makitkitatayo nga umas-asidegen ti aldaw.”​—Hebreo 10:24, 25.

13. Kasano a ti Nakristianuan a ministerio tulongannatayo nga agtalinaed a siririing iti naespirituan?

¹³ Makapagtalinaedtayo met a siririing no naimpusuan a makiramantayo iti Nakristianuan a ministerio. Adda pay kadi nasaysayaat a pamay-an tapno agtalinaedtayo a sipapanunot kadagiti pagilasinan dagiti tiempo ken kadagiti kaipapananda ngem iti panangisarita iti dayta kadagiti sabali a tattao? Ken bayat a makitkitatayo ti panagrang-ay dagiti iyad-adalantayo iti Biblia ken iyaplikarda ti maad-adalda, dumegdeg ti pannakariknatayo iti kinaganat. “Patibkerenyo dagiti panunotyo maipaay iti trabaho,” kinuna ni apostol Pedro, “sipupuotkayo a naan-anay.” (1 Pedro 1:13) Maliklikan ti naespirituan a panagdungsa no ‘kankanayon nga aduantayo iti aramiden iti trabaho ti Apo.’​—1 Corinto 15:58.

Lillikan Dagiti Estilo ti Panagbiag a Makadangran iti Naespirituan

14. Kas nadeskribir iti Lucas 21:34-36, namakdaar ni Jesus maibusor kadagiti ania nga estilo ti panagbiag?

¹⁴ Iti naindaklan a padtona maipapan iti pagilasinan ti kaaddana, adda sabali pay nga impakdaar ni Jesus. Kinunana: “Asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro a panagin-inum ken kadagiti pakaringgoran iti biag, ket giddato a dayta nga aldaw kellaat nga umay kadakayo kas maysa a silo. Ta dumtengto dayta kadagidiay amin nga agnanaed iti rabaw ti intero a daga. Ngarud, agtalinaedkayo a siririing iti isuamin a tiempo nga umar-ararawkayo tapno makapagballigikayo iti pananglisi kadagitoy amin a banag a naikeddeng a mapasamak, ken iti panagtakder iti sanguanan ti Anak ti tao.” (Lucas 21:34-36) Siuumiso ti panangdeskribir ni Jesus kadagiti estilo ti panagbiag ti kaaduan a tattao: kinabuklis, panagbartek, ken panagbiag a mangyeg kadagiti pakaringgoran.

15. Apay a nasken a liklikantayo ti kinabuklis ken panagbartek?

¹⁵ Ti kinabuklis ken panagbartek ket saan a maitunos kadagiti prinsipio ti Biblia. Nasken a liklikan dagita. “Dika makikadua kadagiti nakaro ti panagin-inumna iti arak, kadagidiay a nabuklis a mannangan iti lasag,” kuna ti Biblia. (Proverbio 23:20) Ngem uray no saan a nabuklis ken managbartek ti maysa, nasken nga agannad latta iti pannangan ken panaginum ta mabalin  a dagita ti pakaigapuan ti panagdungsa ken panagbalin a nasadut. “Daydiay nasadut ipakpakitana nga isu agtartarigagay,” kuna ti maysa a proverbio ti Biblia, “ngem ti kararuana awanan.” (Proverbio 13:4) Mabalin a ti kasta a tao kayatna nga aramiden ti pagayatan ti Dios, ngem saanna a maibanag dayta gapu iti kinaliwayna.

16. Kasano a maliklikantayo ti madagsenan kadagiti pakaringgoran maipapan iti pamiliatayo?

¹⁶ Nangpakdaar ni Jesus mainaig kadagiti ania a pakaringgoran iti biag? Iramanda dagiti personal a pakaseknan, panangipaay iti kasapulan ti pamilia, ken bambanag nga umasping kadagita. Anian a kinamaag no ipalubostayo a madagsenantayo kadagitoy! “Siasino kadakayo nga iti panagbalinna a maringgoran manayonanna iti maysa a kasiko ti kaatiddog ti biagna?” inyimtuod ni Jesus. Indagadagna kadagiti agdengdengngeg: “Dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ Ta amin dagitoy isuda ti bambanag a sigagagar a sapsapulen dagiti nasion. Ta ammo ti nailangitan nga Amayo nga amin dagitoy a banag ket kasapulanyo.” Maliklikantayo ti madagsenan kadagiti pakaringgoran ken makapagtalinaedtayo a siririing no ipangpangrunatayo iti biagtayo dagiti interes ti Pagarian ken agtalektayo nga ipaay ni Jehova dagiti kasapulantayo.​—Mateo 6:25-34.

17. Kasano a mangyeg iti pakaringgoran dagiti material a kalat?

¹⁷ Dagiti materialistiko a kalat mabalin a mangyegda met kadagiti pakaringgoran. Kas pagarigan, pagbalinen ti dadduma a komplikado ti biagda babaen ti pananggun-odda kadagiti bambanag a dida kabaelan. Nagargari ti dadduma kadagiti napartak a panguartaan ken napeggad a panagpuonan. Nagbalin a silo kadagiti dadduma ti panangipagarup a bumaknangda babaen ti sekular nga edukasion. Pudno, nalaklaka ti agbirok iti panggedan no adda ti nalpas a kurso. Ngem kinaagpaysuanna, nadangran ti espiritualidad ti dadduma gapu iti pananggun-odda kadagiti kanayonan nga edukasion a mangibus iti tiempo. Anian a nakaam-amak ti maisagmak iti kasta a kasasaad bayat nga umas-asideg ti aldaw ni Jehova!  Impakdaar ti Biblia: “Dagidiay determinado a bumaknang matnagda iti sulisog ken iti silo ken iti adu a minamaag ken makapasakit a tartarigagay, a mangipalned kadagiti tattao iti pannakadadael ken pannakarba.”​—1 Timoteo 6:9.

18. Tapno saan a matnag iti materialistiko nga estilo ti panagbiag, ania nga abilidad ti nasken a sukayentayo?

¹⁸ Tapno saan a matnag iti materialistiko a wagas ti panagbiag, napateg ti panangsukay iti abilidad a mangilasin iti umiso ken di umiso no agaramid kadagiti desision. Mapatanor dayta nga abilidad babaen ti regular a panangipauneg ‘iti nakired a taraon agpaay kadagiti nataengan a tattao’ ken ‘ti panangsanay iti pannakabalin ti pannakaawat babaen ti panangusar.’ (Hebreo 5:13, 14) Maliklikantayo met ti makaaramid kadagiti di umiso a pangngeddeng no aramidentayo a prioridad ‘dagiti napapateg a bambanag.’​—Filipos 1:10.

19. Ania ti nasken nga aramidentayo no madlawtayo a bassit ti tiempotayo agpaay kadagiti naespirituan a kalat?

¹⁹ Mabalinnatayo nga iyaw-awan ti materialistiko nga estilo ti panagbiag. Kas resultana, bassit wenno awan pay ketdin ti panawentayo kadagiti naespirituan a kalat. Kasanotayo a masukimat ti bagitayo tapno maliklikan ti maisagmak iti kasta nga estilo ti panagbiag? Nasken a sikakararag nga utobentayo no kasano ken agingga iti ania a mabalintayo nga aramiden a simple ti biagtayo. Kinuna ni Solomon, ti ari ti nagkauna nga Israel: “Nasam-it ti turog daydiay agserserbi, uray pay no bassit wenno adu ti kanenna; ngem ti aglaplapusanan a kukua daydiay nabaknang saan a mangipalubos kenkuana a maturog.” (Eclesiastes 5:12) Busbusbosentay kadi ti adu nga oras ken pigsatayo iti panangsalimetmet kadagiti saan a nesesita a material a sanikua? Bayat nga ad-adu ti ik-ikutantayo, ad-adu ti masapul nga aywanan, salimetmetan, ken saluadantayo. Pagimbagantayo kadi no aramidentayo a simple ti biagtayo babaen ti panangkissay kadagiti ik-ikutantayo?

Ikagumaanyo a Paneknekan a Nakasaganakayo

20, 21. (a) Ania ti ipanamnama ni apostol Pedro maipapan iti aldaw ni Jehova? (b) Ania ti masapul nga itultuloytayo nga aramiden tapno maipakitatayo a nakasaganatayo iti aldaw ni Jehova?

²⁰ Nanungpal ti lubong idi kaaldawan ni Noe, ket kastanto met ti mapasamak iti agdama a sistema ti bambanag. Ipanamnama kadatayo ni apostol Pedro: “Ti aldaw ni Jehova umayto a kasla mannanakaw, nga iti dayta aglabasto ti langlangit buyogen ti sumayetset a daranudor, ngem marunawto dagiti elemento yantangay nakapudpudotda unay, ket ti daga ken ti ar-aramid nga adda iti dayta matakuatanto.” Uray ti simboliko a langlangit​—dagiti dakes a gobierno​—wenno ti simboliko a daga​—ti sangatauan a simmina iti Dios​—dida maliklikan ti gumilgil-ayab a pungtot ti Dios. Iti panangipamatmatna no kasanotayo a maipakita a nakasaganatayo iti dayta nga aldaw, indagadag ni Pedro: “Yantangay marunawto a kasta dagitoy amin a banag, anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova!”​—2 Pedro 3:10-12.

²¹ Ti regular nga itatabunotayo kadagiti Nakristianuan a gimong ken pannakiraman iti panangikasaba iti naimbag a damag ket karaman kadagiti aramid ti nadiosan a debosion. Sapay koma ta aramidentayo dagita buyogen ti naimpusuan a debosion iti Dios bayat nga agan-anustayo nga aguray iti naindaklan nga aldaw ni Jehova. ‘Aramidentayo ti amin a kabaelantayo tapno iti kamaudiananna masarakannatayo ti Dios a di namulitan ken awan pakapilawanna.’​—2 Pedro 3:14.

Malagipyo Pay?

• Apay a nasken a nakasaganatayo agpaay iti aldaw ni Jehova?

• Ania ti nasken nga aramidentayo no naigaluttayo kadagiti gagangay nga aktibidad ti biag?

• Ania ti makatulong kadatayo a mangdaer iti naespirituan a panagdungsa?

• Aniada a makadangran nga estilo ti panagbiag ti nasken a liklikantayo, ken kasano?

[Salsaludsod]

[Dagiti Ladawan iti panid 20, 21]

Dagiti tattao idi kaaldawan ni Noe dida inkankano ti umad-adani a panangukom​—kastakay kadi?

[Ladawan iti panid 23]

Mabalinyo kadi nga aramiden a simple ti biagyo tapno ad-adu ti panawenyo kadagiti naespirituan a kalat?