Suksukayem Kadi ti Rikna ti Panagsiddaaw?

NADLAWYO kadi a dagiti mannurat iti Biblia maulit-ulit a mariknada ti panagsiddaaw no bigbigenda dagiti ar-aramid ken galad ti Dios? “Nakaskasdaaw ti pannakaaramidko,” impakaammo ti salmista. (Salmo 139:14) “O Jehova,” insurat ni propeta Isaias, “sika ti Diosko. Itan-okka, idayawko ti naganmo, ta nagaramidka kadagiti nakaskasdaaw a banag.” (Isaias 25:1) Wenno panunotenyo ti panagsiddaaw wenno panagamanga a nayebkas iti sasao ni apostol Pablo: “O nagunegen ti kinabaknang ken sirib ken pannakaammo ti Dios!”​—Roma 11:33.

Ti The Oxford Encyclopedic English Dictionary depinarenna ti “siddaaw” kas “ti emosion a naabbukay gapu iti banag a di ninamnama, di pamiliar, wenno di mailawlawag, nangruna ti pannakasorpresa a nabuyogan iti apresasion wenno tarigagay a mangammo ken dadduma pay.”

Saan aya a makaparag-o a makita dagiti babassit nga ubbing a masmasdaaw a makakita, mangiggem, wenno makangngeg kadagiti banag a baro kadakuada? Ngem makapaladingit ta ti kasta a panagsiddaaw dagiti inosente wenno agdadamo ket masansan a mapukaw bayat ti panagdakkelda.

Nupay kasta, dagiti mannurat iti Biblia nga immunan a nadakamat, nagbalin a paset ti kinataoda ti pannakarikna iti siddaaw. Kanayon a mariknada dayta. Apay? Sinukayda ngamin ti rikna ti panagsiddaaw babaen ti siyayaman a panangmennamenna kadagiti aramid ti Dios. Inkararag ti salmista: “Minennamennak dagidi tawtawen, dagiti amin a malagipko nga inaramidmo; mapampanunotko dagiti nakaskasdaaw a parsuam.”​—Salmo 143:5, The New English Bible.

Nagsayaat la ketdi ta masarakan daytoy a rikna ti panagsiddaaw kadagiti agdama a managdaydayaw iti Dios! Addaanka kadi iti kasta a rikna? Suksukayem kadi dayta?