Surat Para ken ni Noe

“PATGEK a Noe, sumagmamano a daras a binasak iti Biblia ti maipapan kenka ken no kasanom nga imbangon ti daong a nangispal kenka ken iti pamiliam idi Layus.”

Kasta ti panglukat a sasao ti surat ti agtawen iti 15 a ni Minnamaria idi nakiraman iti pasalip iti panagsurat para kadagiti estudiante nga agtawen iti 14 agingga 21. Ti pasalip ket inyusuat ti opisina ti koreo idiay Finland, ti Federation for Finnish Mother Tongue Teachers, ken ti Finnish Literature Society. Naikalikagum kadagiti nakisalip nga agaramidda iti surat a naibasar iti maysa a libro. Mabalin a surat dayta para iti autor ti libro wenno iti maysa a karakter iti libro. Nangpili dagiti mannursuro iti nasurok a 1,400 a surat manipud kadagiti estudianteda sa naipatulod kadagiti hurado ti pasalip. Napili ti kasayaatan, ti sangapulo a maikadua a kasayaatan, ken ti sangapulo a maikatlo a kasayaatan. Naragsakan ni Minnamaria ta maysa ti suratna kadagiti maikatlo a kasayaatan.

Apay a ni Minnamaria, a maysa a tin-edyer nga estudiante, nagsurat ken ni Noe, maysa a tao a nagbiag 5,000 a tawenen ti napalabas? Inkomentona: “Ti Biblia ti immuna a napanunotko. Kabesadok dagiti karakter iti Biblia. Nagadu ti nabasak maipapan kadakuada a kasda la sibibiag kaniak. Napilik ni Noe agsipud ta makapagagar unay ti biagna ken naiduma kaniak.”

Kastoy ti pangserra a sasao ti surat ni Minnamaria ken ni Noe: “Agingga ita, maysaka nga ulidan ti pammati ken panagtulnog. Ti panagbiagmo ket makaparegta kadagiti amin a mangbasbasa iti Biblia nga agtignayda sigun iti pammatida.”

Daytoy a surat ti maysa nga agtutubo a managbasa iti Biblia ipakitana a ti Biblia ket pudno a “nabiag ken adda bilegna” kadagiti tattao, agpadpada kadagiti agtutubo ken nataengan.​—Hebreo 4:12.