Ti Dios Kadi ti Mapabasol Kadagiti Parikuttayo?
Ti Dios Kadi ti Mapabasol Kadagiti Parikuttayo?
IDI nakaro a nadangran ti utek ti adulto nga anakna, inaramid ni Marion ti mabalin nga aramiden ti adu kadatayo. * Inkararagna ti tulong ti Dios. “Dayta pay laeng ti kanito a nakariknaak iti nakaro a kinaawan gaway ken panagmaymaysa,” kuna ni Marion. Idi agangay, dimmegdeg ti kasasaad ti anakna, ket nangrugi a kinuestion ni Marion ti Dios. “Apay a mapaspasamak daytoy?” inyimtuodna. Dina maawatan no apay a ti maysa a naayat ken manangipateg a Dios binaybay-anna ti anakna.
Gagangayen ti kapadasan ni Marion. Adu a tattao iti sangalubongan ti nakarikna a binaybay-an ida ti Dios bayat dagiti tiempo ti panagkasapulan. “Saan pay a nalawag kaniak dagiti makagapu no apay nga ipalubos ti Dios ti panagsagaba,” kuna ni Lisa kalpasan ti pannakapapatay ti apokona. “Saan a naan-anay a napukaw ti pammatik iti Dios, ngem kimmapuy dayta.” Umasping iti dayta, kalpasan ti nakaay-ay-ay a napasaran ti maladagana, kuna ti maysa a babai: “Dinak liniwliwa ti Dios iti napasamak. Diak narikna a maseknan wenno maasian kaniak.” Innayonna: “Diak pulos mapakawan ti Dios.”
Adda dagiti gumura iti Dios gapu iti kasasaad ti lubong. Makitada ti kagimongan nga agsagsagaba iti kinapanglaw ken bisin, dagiti nakaay-ay-ay a nagbakuit gapu iti gubat, nagadu nga ubbing nga agsakit iti AIDS, ken minilion a tattao nga agrigrigat gapu iti dadduma a sakit. Gapu kadagitoy ken dadduma pay nga umasping a trahedia, adu ti mangpabasol iti Dios gapu iti kasla saanna a panagtignay.
Ngem ti kinapudnona, saan a ti Dios ti mapabasol kadagiti parikut a mangparparigat iti sangatauan. Kinaagpaysuanna, adda dagiti nainkalintegan a rason tapno patien a ti Dios asidegen a pasardengenna ti panagsagaba dagiti tattao. Awisendakayo a mangbasa iti sumaganad nga artikulo ket makitayo a pudno a maseknan kadatayo ti Dios.
[Footnote]
^ par. 2 Nabaliwan dagiti nagan.