“Kayatmi nga Ibaga a ‘Wen!’”

TI SANGA nga opisina dagiti Saksi ni Jehova idiay Nigeria nakaawatda itay nabiit iti maysa a surat a kastoy ti pasetna:

“Pimmusay ti anakmi a ni Anderson idi agtawen iti 14. Idi sibibiag pay, adda dua a manok a tartaraknenna. Tarigagayna nga ilako dagita sana ipatulod ti kuarta iti sanga nga opisina kas kontribusion iti sangalubongan a trabaho a panangasaba. Ngem pimmusay ni Anderson sakbay a nailako dagiti manok.

“Gapu iti tarigagayna, tinaraken ken inlakomi dagiti manok. Ipatulodmi ti naglakuanmi kas kontribusion ni Anderson. Gapu iti kari ni Jehova, agtalekkami nga iti din agbayag, makitaminto manen ni Anderson. Kayatmi nga ibaga a ‘Wen!’ no damagennanto no tinungpalmi met laeng ti kiddawna. Kinapudnona, in-inanamaenmi a makita saan laeng a ni Anderson no di ket ti ‘dakkel nga ulep dagiti saksi’ a mapagungar.”​—Hebreo 12:1; Juan 5:28, 29.

Kas nalawag nga ipakita ti surat, ti pammati iti panagungar ket maysa a namnama a makapabileg kadagiti pudno a Kristiano. Anian a rag-o ti matagiragsakto ti minilion a pamilia no, kas iti pamilia ni Anderson, abrasaendanto dagiti ing-ingungotenda nga indasay ti kabusor a ni patay!​—1 Corinto 15:24-26.

Dakamaten ti sao ti Dios dayta a makaliwliwa a namnama a panagungar kas maysa kadagiti adu a nakaskasdaaw a banag nga asidegen a mapasamak iti nalinteg a baro a lubong iti sidong ti Pagarian ti Dios. (2 Pedro 3:13) Maipapan iti aramiden ti Dios agpaay kadagiti tattao iti dayta a tiempo, kuna ti Biblia: “Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”​—Apocalipsis 21:4.