Panangsukay iti Nakristianuan a Panangmatmat iti Kinatan-ok

“Siasinoman a kayatna ti agbalin a naindaklan kadakayo masapul nga agserbi kadakayo.”​—MATEO 20:26.

1. Ania ti panangmatmat ti lubong iti kinatan-ok?

ITI asideg ti nagkauna a siudad ti Egipto a Thebes (Karnak iti agdama), agarup 500 a kilometro iti abagatan ti Cairo, adda 18 metro ti katayagna nga estatua ni Faraon Amenhotep III. Nakabasbassit ti panagriknam no kumitaka iti dayta nakadakdakkel nga estatua. Daytoy a monumento, nga awan duadua a nairanta tapno mangiturong iti dayaw iti dayta nga agturay, ipakitana no ania ti panangmatmat ti lubong iti kinatan-ok​—ti panamagbalin iti bagi a nakadakdakkel ken nakapatpateg ken ti panangiparikna kadagiti dadduma a nakabasbassitda.

2. Ania nga ulidan ti impasdek ni Jesus kadagiti pasurotna, ket ania a salsaludsod ti masapul nga imtuodentayo iti bagitayo?

² Idiligyo daytoy a panangmatmat iti panangmatmat nga insuro ni Jesu-Kristo. Nupay isu ti “Apo ken Mannursuro” kadagiti pasurotna, insuro kadakuada ni Jesus a ti kinatan-ok ket aggubuay iti panagserbi kadagiti sabsabali. Iti maudi nga aldaw ti biagna ditoy daga, impakita ni Jesus  ti kaipapanan ti insurona babaen ti panangbuggona kadagiti saka dagiti adalanna. Anian a napakumbaba a panagserbi! (Juan 13:4, 5, 14) Agserbi wenno pagserbian​—ania ti kaykayatyo? Ti kadi ulidan ni Kristo tignayennakayo nga agpakumbaba a kas kenkuana? Usigentayo ngarud ti panangmatmat ni Kristo iti kinatan-ok a maisupadi iti gagangay a panangmatmat ti lubong.

Liklikan ti Nailubongan a Panangmatmat iti Kinatan-ok

3. Ania dagiti pagarigan iti Biblia a mangipakita iti nakalkaldaang a pagbanagan dagidiay agtarigagay iti panangitan-ok dagiti tattao?

³ Adu ti pagarigan iti Biblia a mangipakita no kasano a ti panangmatmat ti lubong iti kinatan-ok ket mangyeg iti pannakapaay. Panunotenyo ti nabileg a ni Haman, a prominente iti pagarian ti Persia idi kaaldawan da Ester ken Mardokeo. Naibabain ken natay ni Haman gapu iti tarigagayna a maidaydayaw. (Ester 3:5; 6:10-12; 7:9, 10) Ni met ngay Nabucodonosor, a nagmauyong kabayatan ti alimpatok ti panagturayna? Nayebkas ti di umiso a panangmatmatna iti kinatan-ok babaen dagitoy a sasao: “Saan kadi a daytoy ti Babilonia a Dakkel, nga imbangonko a mismo maipaay iti naarian a balay babaen ti pigsa ti pannakabalinko ken maipaay iti dayaw ti kinatan-okko?” (Daniel 4:30) Kasta met ni natangsit a Herodes Agripa I, a di umiso nga immawat iti dayaw imbes nga ipadayagna ti Dios. “Kinnan dagiti igges ket nauyos ti biagna.” (Aramid 12:21-23) Gapu ta dagitoy a lallaki dida minatmatan ti kinatan-ok sigun iti panangmatmat ni Jehova, nakababain a napukawda ti pannakabalinda.

4. Siasino ti adda iti likudan ti natangsit a kababalin ti lubong?

⁴ Awan dakesna no kayattayo nga usaren ti biagtayo iti wagas a mangyeg kadatayo iti nasayaat a reputasion ken panagraem. Kaskasdi, gundawayan ti Diablo dayta a tarigagay babaen ti panangimulana iti natangsit a kababalin, a mangyanninaw iti mismo a kinaambisiosona. (Mateo 4:8, 9) Diyo pulos liplipatan nga isu “ti dios daytoy a sistema ti bambanag,” ket determinado a mangitandudo iti panagpampanunotna ditoy daga. (2 Corinto 4:4; Efeso 2:2; Apocalipsis 12:9) Gapu ta ammoda ti namunganayan ti kasta a panagpampanunot, liklikan dagiti Kristiano ti nailubongan a panangmatmat iti kinatan-ok.

5. Ti kadi gapuanan, dayaw, ken kinabaknang garantisaranda ti agpaut a pannakapnek? Ilawlawagyo.

⁵ Itantandudo ti Diablo ti kapanunotan a sigurado a mangyeg iti naragsak a biag ti panagbalin a nalatak ken maidaydayaw iti lubong, ken ti panagurnong iti adu a kinabaknang. Pudno kadi dayta? Ti kadi gapuanan, dayaw, ken kinabaknang garantisaranda ti makapnek a biag? Pakdaarannatayo ti Biblia a di paallilaw iti kasta a kapanunotan. Insurat ni Ari Solomon: “Siak nakitak ti isuamin a napinget a panagtrabaho ken isuamin a kinalaing iti trabaho, a kaipapanan dayta ti pannakirinnisiris ti maysa iti sabali; daytoy met ket kinaubbaw ken panangkamkamat iti angin.” (Eclesiastes 4:4) Adu nga indibidual a nangipangpangruna iti panagbalin a natan-ok iti lubong ti mangpasingked a pudno dayta naipaltiing a balakad ti Biblia. Ti maysa a pagarigan ket ti lalaki a timmulong a nangdisenio, nangaramid, ken nangsubok iti lugan iti law-ang nga inusar ti tao a napan iti bulan. Malagipna pay: “Inggaedko ti nagtrabaho agingga a nagbalinak a nasigo iti trabahok. Ngem saan a nangyeg dayta kaniak iti ragsak ken talna ti panunot.” * Ti panangmatmat  ti lubong iti kinatan-ok, iti tay-ak man ti negosio, isport, wenno paglinglingayan, dida garantisaran ti agpaut a pannakapnek.

Kinatan-ok a Resulta ti Panagserbi Gapu iti Ayat

6. Ania ti mangipakita a di umiso ti panangmatmat da Santiago ken Juan iti kinatan-ok?

⁶ Ti maysa a pagteng iti biag ni Jesus ipalgakna no ania ti iraman ti pudpudno a kinatan-ok. Agturong idiay Jerusalem da Jesus ken dagiti adalanna para iti Paskua idi 33 K.P. Iti dalanda, da Santiago ken Juan a kasinsin ni Jesus imparangarangda ti di umiso a panangmatmat iti kinatan-ok. Babaen ti inada, kiniddawda ken ni Jesus: ‘Itedmo ti bilin nga agtugawkami iti makannawan ken makannigidmo, idiay pagariam.’ (Mateo 20:21) Kadagiti Judio, ti panagtugaw iti makannawan wenno iti makannigid ket maibilang a dakkel a dayaw. (1 Ar-ari 2:19) Siaambisioso a tinarigagayan da Santiago ken Juan ti nangato a saad. Kayatda a gun-oden dagitoy a posision ti autoridad. Ammo ni Jesus no ania ti agtartaray iti panunotda isu a ginundawayanna nga aturen ti di umiso a panangmatmatda iti kinatan-ok.

7. Sigun ken Jesus, kasano a maragpat ti pudno a Nakristianuan a kinatan-ok?

⁷ Ammo ni Jesus nga iti daytoy napalangguad a lubong, ti tao a maibilang a natan-ok ket daydiay makabael a mangkontrol ken mangmandar kadagiti sabsabali ken maaramidna ti kaykayatna. Ngem kadagiti pasurot ni Jesus, ti kinatan-ok ket marukod babaen ti kinapakumbaba nga agserbi. Kinuna ni Jesus: “Siasinoman a kayatna ti agbalin a naindaklan kadakayo masapul nga agserbi kadakayo, ket siasinoman a kayatna ti agbalin nga umuna kadakayo masapul nga agbalin nga adipenyo.”​—Mateo 20:26, 27.

8. Ania ti kaipapanan ti agbalin a ministro, ket ania a salsaludsod ti imtuodentayo iti bagitayo?

⁸ Ti Griego a sao a naipatarus iti Biblia kas “ministro” tukoyenna daydiay siaanep ken sipipinget a mangikagumaan nga agserbi kadagiti sabsabali. Napateg ti leksion a kayat nga isuro ni Jesus kadagiti adalanna: Ti maibilang a natan-ok ket daydiay agserbi kadagiti sabsabali gapu iti ayat, saan ket a daydiay nalaing a mangmandar. Imtuodenyo ti bagiyo: ‘Ania ngata ti reaksionko no siak ni Santiago wenno ni Juan? Maawatak kadi a ti pudno a kinatan-ok ket resulta ti panagserbi maigapu iti ayat?’​—1 Corinto 13:3.

9. Ania nga ulidan ti impasdek ni Jesus no maipapan iti pannakilangen kadagiti sabsabali?

⁹ Impakita ni Jesus kadagiti adalanna a ti estandarte ti lubong iti kinatan-ok ket naiduma iti estandarte dagiti Kristiano. Pulos a dina imparikna nga isu ket nangatngato ngem kadagiti pinagserbianna wenno awan pakaimudinganda  kenkuana. Komportable a nakilangen kenkuana ti amin a kita ti tattao​—lallaki, babbai, ubbing, nabaknang, napanglaw, ken agtuturay, agraman dagiti pagaammo a managbasol. (Marcos 10:13-16; Lucas 7:37-50) Masansan a dagiti tattao dida maanusan dagidiay addaan kadagiti pagkapuyan. Naiduma ni Jesus. Uray pay nadarasudos ken mannakiriri no dadduma dagiti adalanna, inan-anusanna nga insuro ida, nga impakitana kadakuada nga isu ket pudno a napakumbaba ken managteppel.​—Zacarias 9:9; Mateo 11:29; Lucas 22:24-27.

10. Kasano a ti intero a biag ni Jesus iyanninawna ti awan panagimbubukodan a panagserbina kadagiti sabsabali?

¹⁰ Ti di managimbubukodan nga ulidan daytoy kangatuan nga Anak ti Dios ipakitana no ania ti pudno a kaipapanan ti kinatan-ok. Saan nga immay ni Jesus ditoy daga tapno pagserbian no di ket tapno agserbi kadagiti sabsabali, a pinaimbagna ti “nadumaduma a sakit” ken winayawayaanna dagiti tattao manipud iti panangkontrol dagiti demonio. Nupay nabannog ken kasapulanna met ti aginana, kanayon nga inyun-unana ti kasapulan dagiti dadduma imbes a ti bukodna a pagimbagan, nga inkagumaanna a liniwliwa ida. (Marcos 1:32-34; 6:30-34; Juan 11:11, 17, 33) Gapu iti ayatna tinulonganna dagiti tattao iti naespirituan, a dinaliasatna ti ginasut a kilometro a natapok a kalsada tapno ikasabana ti naimbag a damag ti Pagarian. (Marcos 1:38, 39) Awan duadua a nagpateg ken ni Jesus ti panagserbi kadagiti sabsabali.

Tuladenyo ti Kinapakumbaba ni Kristo

11. Ania dagiti galad a makalikaguman kadagiti kakabsat a madutokan nga agserbi kas manangaywan iti kongregasion?

¹¹ Idi arinunos ti 1800, ti umiso a kababalin a nasken nga iparangarang dagiti manangaywan a Kristiano ket naipaganetget idi mapili dagiti agdaldaliasat a pannakabagi nga agserbi kadagiti kasapulan dagiti adipen ti Dios. Sigun iti Zion’s Watch Tower a Setiembre 1, 1894, ti makalikaguman ket lallaki a ‘naemma tapno saanda nga agpannakkel . . . , a napakumbaba ti isipda a saan a ti bagida ti itandudoda no di ket ni Kristo, a dida ipasindayag ti laingda no di ket ti Saona a simple ngem nabileg.’ Nalawag a dagiti pudno a Kristiano dida koma tarigagayan ti maysa nga annongen tapno mapennekda ti personal nga ambisionda wenno tapno lumatakda ken madominaranda ti sabsabali. Silalagip ti napakumbaba a manangaywan a dagiti annongenna ket paset ti “nasayaat nga aramid,” saan ket a maysa a natan-ok a saad a mangipadayag iti bagina. (1 Timoteo 3:1, 2) Amin a panglakayen ken ministerial nga adipen aramidenda koma ti amin a kabaelanda nga agserbi a sipapakumbaba kadagiti sabsabali ken idauluanda ti sagrado a panagserbi, a mangipasdekda iti nasayaat nga ulidan a tuladen ti sabsabali.​—1 Corinto 9:19; Galacia 5:13; 2 Timoteo 4:5.

12. Ania a salsaludsod ti mabalin nga iyimtuodda iti bagbagida dagidiay gumawgaw-at kadagiti pribilehio iti kongregasion?

¹² Asinoman a kabsat a gumawgaw-at kadagiti pribilehio ti nalabit kasapulan a mangimtuod iti bagina: ‘Ikagkagumaak kadi a pagserbian ti  dadduma, wenno kayatko a siak ti mapagserbian? Sidadaanak kadi a mangitungpal kadagiti makatulong nga annongen nga uray awan ti makaammo?’ Kas pagarigan, mabalin a ti maysa nga agkabannuag a kabsat a lalaki ket sidadaan nga agpalawag iti kongregasion Kristiano ngem agkedked a tumulong kadagiti lallakay ken babbaket. Mabalin a kaykayatna ti makilangen kadagiti kakabsat nga addaan iti pribilehio iti kongregasion ngem agkedked a makiraman iti panangasaba. Imtuoden koma ti kasta nga agkabannuag a kabsat: ‘Interesadoak kadi laeng kadagiti aspeto ti panagserbi iti Dios a mangyeg iti pannakabigbig ken pammadayaw? Ikagkagumaak kadi ti agbalin a nalatak?’ Saan la ketdi a Nakristianuan ti pananggun-od iti personal a pannakaidayaw.​—Juan 5:41.

13. (a) Kasano a ti kinapakumbaba ti manangaywan apektaranna ti dadduma? (b) Apay a makuna a ti kinapakumbaba ket saan a banag a sukayen laeng no kayat ti maysa?

¹³ No pagreggetantayo a tuladen ti kinapakumbaba ni Kristo, matignaytayo nga agserbi kadagiti sabsabali. Usigenyo ti kapadasan ti maysa a manangaywan iti sona a mangpalpaliiw iti panagandar ti trabaho iti maysa a sanga nga opisina dagiti Saksi ni Jehova. Iti laksid ti okupado nga eskediul ken dakkel a responsabilidadna, tinulonganna ti maysa nga agkabannuag a kabsat a marigrigatan a mangiplastar iti umiso a setting ti maysa a makina. “Nagsayaat dayta nga inaramidna!” kuna ti kabsat. “Imbagana kaniak nga inusarna met ti kasta a makina idi agkabannuag pay laeng nga agserserbi iti Bethel, ket imbagana no kasano karigat nga iplastar ti umiso a setting. Binusbosna ti sumagmamano nga orasna a timmulong kaniak uray adu ti napateg nga obraenna. Pudno a natukay ti riknak.” Dayta a kabsat, a manangaywan itan iti maysa kadagiti sanga nga opisina dagiti Saksi ni Jehova, malaglagipna pay la dayta a kinapakumbaba. Sapay koma ta ditay ibilang a nakangatngatotayo tapno mangaramid kadagiti babassit nga annongen wenno nakaim-importantetayo tapno mangitungpal kadagiti simple a trabaho. Imbes ketdi, bariksantayo ti bagitayo iti “kinapakumbaba ti isip.” Saan a banag dayta a satay la sukayen no kayattayo. Paset dayta “ti baro a personalidad” a nasken nga ikawes ti maysa a Kristiano.​—Filipos 2:3; Colosas 3:10, 12; Roma 12:16.

No Kasano a Sukayen ti Nakristianuan a Panangmatmat iti Kinatan-ok

14. Kasano a ti panangmennamenna iti relasiontayo iti Dios ken iti padatayo a tattao matulongannatayo a mangsukay iti umiso a panangmatmat iti kinatan-ok?

¹⁴ Kasanotay a masukay ti umiso a panangmatmat iti kinatan-ok? Ti maysa a pamay-an ket babaen ti panangmennamenna iti relasiontayo ken ni Jehova a Dios. Ti kinatan-ok, pannakabalin, ken kinasirib ti Dios ket adayo a natantan-ok ngem kadagiti gapuanan dagiti imperpekto a tattao. (Isaias 40:22) Ti panangmennamenna iti relasiontayo kadagiti padatayo a tattao matulongannatayo met a mangsukay iti kinapakumbaba ti isip. Kas pagarigan, adda dagiti benneg a mabalin a nalalaingtayo ngem kadagiti dadduma, ngem mabalin a nalalaingda met ngem kadatayo kadagiti napatpateg nga aspeto ti biag, wenno addaan dagiti kapammatiantayo kadagiti galad nga awan kadatayo. Kinapudnona, adu kadagiti ipatpateg ti Dios ti saan a nalatak gapu ta naemma ken napakumbaba ti kababalinda.​—Proverbio 3:34; Santiago 4:6.

15. Kasano a ti kinatarnaw dagiti adipen ti Dios paneknekanna nga awan ti asinoman a mabalin a mangipapan nga isu ket nangatngato ngem iti dadduma?

¹⁵ Dagiti kapadasan dagiti Saksi ni Jehova a naipasango iti pannubok gapu iti pammatida paneknekanna dayta a punto. Dagidiay ibilang ti lubong nga ordinario a tattao ti masansan a nakapagtalinaed a natarnaw iti Dios iti sidong dagiti nakaro a pannubok. Ti panangmennamenna kadagiti kasta a kapadasan ket makatulong kadatayo nga agtalinaed a napakumbaba ken  mangisuro kadatayo a ‘saan a mangpanunot nga ad-adda iti bagitayo ngem iti rebbeng a panangpanunottayo.’​—Roma 12:3. *

16. Kasano a dagiti amin a kameng ti kongregasion masukayda ti umiso a panangmatmat iti kinatan-ok kas panangtulad iti ulidan ni Jesus?

¹⁶ Amin a Kristiano, ubbing ken nataengan, nasken nga ikagumaanda a sukayen ti Nakristianuan a panangmatmat iti kinatan-ok. Iti kongregasion, nadumaduma dagiti nasken a mairingpas a trabaho. Saan koma pulos a pagkedkedan nga aramiden dagiti trabaho nga agparang a nanumo. (1 Samuel 25:41; 2 Ar-ari 3:11) Dakayo a nagannak, parparegtaenyo kadi dagiti annakyo nga aramidenda a siraragsak ti aniaman a trabaho a naited kadakuada, idiay man Kingdom Hall, iti pagasambleaan, wenno pagkombensionan? Makitkitada met kadi a makipaspasetkayo kadagiti nanumo a trabaho? Maysa a kabsat, nga agserserbi itan iti sangalubongan a hedkuarter dagiti Saksi ni Jehova, nalawag pay iti lagipna ti ulidan dagiti dadakkelna. Kinunana: “Gapu iti pannakiramanda iti panagdalus iti Kingdom Hall wenno pagkombensionan, impakitada kaniak nga ibilangda a napateg dayta a trabaho. Masansan nga agboluntarioda a mangaramid kadagiti trabaho a pagsayaatan ti kongregasion wenno dagiti kakabsat, uray agparang a nakanumnumo dagita a trabaho. Dayta a kababalin ti timmulong kaniak a sidadaan a mangakseptar iti aniaman a trabaho a maipaannong kaniak ditoy Bethel.”

17. Kadagiti ania a wagas nga agbalin a bendision iti kongregasion dagiti napakumbaba a babbai?

¹⁷ No maipapan iti panangyun-una kadagiti pagimbagan dagiti sabsabali, mapagwadantayo ni Ester, a nagbalin a reyna iti Imperio ti Persia idi maikalima a siglo K.K.P. Nupay agnanaed iti palasio, sidadaan a nangirisgo iti biagna agpaay kadagiti adipen ti Dios, a nagtignay maitunos iti pagayatanna. (Ester 1:5, 6; 4:14-16) Aniaman ti kasasaadda iti biag, dagiti Kristiano a babbai ita mabalinda a tuladen ti kababalin ni Ester babaen ti panangliwliwada kadagiti malmaldaangan, panangsarungkar kadagiti masakit, pannakiraman iti panangasaba, ken pannakitunos kadagiti panglakayen. Anian a bendision iti kongregasion dagiti kasta a napakumbaba a kakabsat a babbai!

Dagiti Bendision ti Nakristianuan a Kinatan-ok

18. Ania dagiti gunggona nga iyeg ti panangiparangarang iti Nakristianuan a kinatan-ok?

¹⁸ Adu dagiti masagrapyo a gunggona no taginayonenyo ti Nakristianuan a panangmatmat iti kinatan-ok. Ti sidadaan a panagserbi kadagiti sabsabali ket mangyeg iti rag-o kenka ken kadakuada. (Aramid 20:35) Bayat a sidadaan ken sigagagar a pagserbianyo dagiti kakabsatyo, iyas-asidegyo ti bagiyo kadakuada. (Aramid 20:37) Kangrunaanna, ti panangipangpangrunayo iti pagimbagan dagiti pada a Kristiano ket matmatan ni Jehova a makaay-ayo a sakripisio ti panagdayaw kenkuana.​—Filipos 2:17.

19. Ania koma ti determinasiontayo mainaig iti Nakristianuan a panangmatmat iti kinatan-ok?

¹⁹ Tunggal maysa kadatayo nasken a sukimatenna ti bukodna a puso ket imtuodenna: ‘Agingga la kadi iti sao ti panangsukayko iti Nakristianuan a panangmatmat iti kinatan-ok, wenno pagregreggetak nga iyaplikar dayta?’ Nalawag no ania ti panangmatmat ni Jehova kadagiti natangsit. (Proverbio 16:5; 1 Pedro 5:5) Sapay koma ta ipakita dagiti tigtignaytayo a pagragsakantayo nga iparangarang ti Nakristianuan a panangmatmat iti kinatan-ok, iti uneg man ti kongregasion Kristiano, iti pamilia, wenno iti inaldaw a pannakilangentayo kadagiti padatayo a tattao​—nga aramiden ti amin a bambanag agpaay iti dayag ken dayaw ti Dios.​—1 Corinto 10:31.

[Footnotes]

Mailawlawagyo Kadi?

• Apay a liklikantayo ti panangmatmat ti lubong iti kinatan-ok?

• Ania ti pagrukodan ni Jesus iti kinatan-ok?

• Kasano a matulad dagiti manangaywan ti kinapakumbaba ni Kristo?

• Ania ti makatulong kadatayo a mangsukay iti Nakristianuan a kinatan-ok?

[Salsaludsod]

[Kahon iti panid 17]

Asino ti Addaan iti Nakristianuan a Kinatan-ok?

Daydiay kayatna a mapagserbian wenno daydiay sidadaan nga agserbi?

Daydiay kaykayatna nga isu ti sentro ti atension wenno daydiay umawat kadagiti nanumo a trabaho?

Daydiay mangitan-ok iti bagina wenno daydiay mangitan-ok kadagiti dadduma?

[Ladawan iti panid 14]

Ti nakadakdakkel nga estatua ni Faraon Amenhotep III

[Ladawan iti panid 15]

Ammoyo kadi no apay a nadadael ni Haman?

[Dagiti Ladawan iti panid 16]

Ikagkagumaanyo kadi a pagserbian dagiti sabsabali?