Pakasaritaan ti Biag

Narang-ay ken Naragsak a Biag a Situtulok nga Agsakripisio

KAS INSALAYSAY DA MARIAN KEN ROSA SZUMIGA

“Buyogen ti kinatulok agsakripisioakto kenka,” kuna ti Salmo 54:6. Nagbiag a maitunos kadagita a sasao da Marian Szumiga ken ti asawana, ni Rosa, nga agnanaed idiay Francia. Insalaysayda itay nabiit ti dadduma kadagiti tampok ti napaut, nabaknang a biagda iti panagserbi ken ni Jehova.

MARIAN: Dagiti dadakkelko ket Romano Katoliko nga imigrante manipud Poland. Nanumo ni tatangko. Saan pulos a naipaayan iti gundaway nga ageskuela. Ngem bayat ti umuna a gubat sangalubongan, nasursurona ti agbasa ken agsurat bayat ti kaaddana kadagiti pagbabakalan kas soldado. Ni Tatang ket managbuteng iti Dios, ngem masansan a maupay gapu iti simbaan.

Adda maysa a pagteng a kangrunaan a saanna a malipatan. Naminsan, bayat ti kaaddana iti gubat, maysa a tsaplin ti nangbisita iti bunggoy ni Tatang. Idi bimtak ti maysa a bomba iti asideg, silalagaw a timmaray ti tsaplin, a pangpang-orenna ti kabaliona iti krusipiho tapno tumaray. Nakigtot ni Tatang a nakakita a ti maysa a “pannakabagi” ti Dios inusarna ti “nasantuan” a banag tapno mapapartak ti ipapanawna. Iti laksid dagiti kasta a kapadasan ken aligagaw iti gubat, saan a kimmapuy ti panamati ni Tatang iti Dios. Masansan a pagyamananna ti Dios gapu iti natalged a panagsublina manipud iti paggugubatan.

“Bassit a Poland”

Idi 1911, inkasar ni Tatang ti maysa a babai iti kabangibang a purok. Anna Cisowski ti naganna. Di nagbayag kalpasan ti gubat, idi 1919, immakar da Tatang ken Nanang idiay Francia manipud Poland ket sadiay a nakasarak ni Tatang  iti trabaho kas minero iti karbon. Naipasngayak idi Marso 1926 idiay Cagnac-les-Mines, abagatan a laud ti Francia. Kalpasanna, nagnaed dagiti dadakkelko iti maysa a komunidad dagiti Polaco idiay Loos-en-Gohelle, asideg ti Lens iti makin-amianan a Francia. Polaco ti panadero, ti partidor, ken ti padi ti parokia. Di pagsiddaawan a naawagan daytoy a komunidad iti Bassit a Poland. Nairaman dagiti dadakkelko kadagiti aktibidad iti komunidad. Masansan a mangorganisar ni Tatang kadagiti pabuya, a pakairamanan ti drama, panagtokar, ken panagkanta. Kanayon met a makipatang iti padi, ngem saan a napnek iti masansan nga isungbat ti padi a, “Nagadu ti misterio.”

Naminsan idi 1930, nagtuktok iti ridawmi ti dua a babbai. Estudiante ti Biblia dagitoy, kas awag idi kadagiti Saksi ni Jehova. Nakaala ni Tatang iti Biblia kadakuada, maysa a libro nga adun a tawen a kayatna a basaen. Sigagagar a binasada ken ni Nanang dagiti naibatay iti Biblia a publikasion nga imbati dagiti babbai. Nagutugot unay dagiti dadakkelko gapu iti nabasada kadagitoy a publikasion. Iti laksid ti okupado a panagbiagda, rinugian dagiti dadakkelko ti tumabuno kadagiti gimong dagiti Estudiante ti Biblia. Bimmara ti pannakipatang kadakuada ti padi agingga a pinangtaanna ida a no itultuloyda ti makitimpuyog kadagiti Estudiante ti Biblia, maikkat iti katekismo ni manangko nga Stéphanie. “Dika madanagan,” insungbat ni Tatang. “Manipud ita, ikuyogmi ni Stéphanie ken dagiti dadduma pay nga annakmi a tumabuno kadagiti gimong dagiti Estudiante ti Biblia.” Immikkat ni Tatang iti simbaan, ket idi rugrugi ti 1932, nabautisaran dagiti dadakkelko. Agarup 800 laeng idi ti agibumbunannag iti Pagarian idiay Francia.

Rosa: Taga Hungary dagiti dadakkelko ket, kas iti pamilia ni Marian, nagnaedda iti amianan ti Francia tapno agtrabaho iti pagminasan ti karbon. Naipasngayak idi 1925. Idi 1937, maysa kadagiti Saksi ni Jehova, ni Auguste Beugin, wenno Papa Auguste kas awagmi kenkuana, ti nangrugi a mangipaima kadagiti dadakkelko kadagiti magasin a Ti Pagwanawanan iti pagsasao a Hungario. Nagustuanda dagiti magasin, ngem awan kadakuada ti nagbalin a Saksi ni Jehova.

Nupay ubingak pay, nagutugot ti pusok gapu iti nabasak iti Ti Pagwanawanan, ken pinakitaannak iti personal nga interes ti manugang ni Papa Auguste, a ni Suzanne Beugin. Immanamong dagiti dadakkelko nga itugotnak kadagiti gimong. Idi agangay, idi mangrugiak nga agtrabaho, narurod ni Tatang gapu iti Dinomingo a pannakigimongko. Nupay nasayaat ti pakabuklan a kababalinna, inreklamona, “Awanka ditoy bayat ti lawas, sa makigimongka manen iti Domingo!” Ngem intultuloyko ti nakigimong. Naminsan, kinuna ni Tatang, “Agempakeka ket pumanawka!” Adalemen idi ti rabii. Agtawenak la iti 17, ket mariribukanak. Napanak iti balay ni Suzanne nga agan-anug-ogak. Makalawas  a nakipagnaedak ken ni Suzanne sakbay nga imbaon ni Tatang ni manangko a mangyawid kaniak. Managbabainak, ngem ti ebkas iti 1 Juan 4:18 tinulongannak nga agmaingel. Kuna dayta a kasuratan a “ti naan-anay nga ayat paksiatenna ti buteng.” Idi 1942, nabautisaranak.

Nagpateg a Naespirituan a Tawid

Marian: Nabautisaranak idi 1942, agraman da manangko nga Stéphanie ken Mélanie ken ni manongko nga Stéphane. Iti pagtaenganmi, ti biag ti pamiliami ket naipamaysa iti Sao ti Dios. Bayat ti panagsasangomi iti lamisaan, ibasa kadakami ni Tatang ti Polaco a Biblia. No rabii, masansan a denggenmi dagiti dadakkelmi bayat nga isalaysayda dagiti kapadasanda iti trabaho a panangikasaba iti Pagarian. Dagitoy a makaparegta iti naespirituan a momento ti nangparayray iti panagayat ken panagtalekmi ken ni Jehova. Nagsardeng nga agtrabaho ni Tatang gapu iti sakit, ngem intultuloyna nga impaay dagiti naespirituan ken material a kasapulanmi.

Gapu ta ad-adun ti panawenna, maminsan iti kada lawas a mangidaulo ni Tatang iti panagadal iti Biblia iti Polaco kadagiti agtutubo iti kongregasion. Dayta ti nakasursuruak nga agbasa iti Polaco. Pinaregta pay ni Tatang dagiti agtutubo kadagiti dadduma a pamay-an. Idi simmarungkar iti kongregasionmi ni Kabsat Gustave Zopfer, a mangiwanwanwan idi iti trabaho dagiti Saksi ni Jehova iti Francia, nangorganisar ni Tatang iti koro ken maysa a costumed drama a naibatay iti salaysay ti Biblia maipapan iti padaya ni Ari Belsazar ken ti surat ti ima iti diding. (Daniel 5:1-31) Nagakem kas Daniel ni Louis Piéchota, a simamaingel a nagtakder idi agangay maibusor kadagiti Nazi. * Dimmakkelkami iti sidong ti kasta a kasasaad. Napaliiwmi a kanayon nga okupado dagiti dadakkelmi kadagiti naespirituan a banag. Ita, mabigbigko a nagpateg ti impatawid kadakami dagiti dadakkelmi.

Idi bimtak ti Gubat Sangalubongan II idi 1939, naiparit idiay Francia ti panangasaba dagiti Saksi ni Jehova. Naminsan, adda nangsukisok iti purokmi. Linikmut dagiti Aleman a soldado dagiti amin a balay. Iti sirok ti maysa nga aparador, nangaramid ni Tatang iti nalimed a pagidulinanmi kadagiti nadumaduma a naibatay iti Biblia a publikasion. Ngem sumagmamano a kopia ti bokleta a Fascism or Freedom ti naikabil iti uuyosan ti lamisaan a pakaidasaran ti taraon. Dagus nga inlemmeng ni Tatang dagitoy iti bulsa ti maysa a jacket a nakabitin iti pasilio. Dua a soldado ken maysa a Pranses a polis ti nangsukisok iti pagtaenganmi. Kasta unay ti danagmi. Maysa kadagiti soldado ti nangsukimat kadagiti kawes a nakabitin iti pasilio, ket dagus nga inasitgannakami iti kosina nga awitna dagiti bokleta. Minulagatannakami, inkabilna dagiti bokleta iti lamisaan, ket intuloyna ti nagsapul. Dagus nga innalak dagiti bokleta ket inkabilko iti uuyosan ti lamisaan a nalpasen a sinukimat dagiti soldado. Saanen a nagimtuod ti soldado no sadino ti ayan dagiti bokleta​—a kasla namimpinsan a nalipatanna dagita!

Iseserrek iti Amin-Tiempo a Serbisio

Idi 1948, inkeddengko ti agserbi ken ni Jehova iti amin-tiempo kas payunir. Sumagmamano nga aldaw kalpasanna, nakaawatak iti surat manipud iti sanga nga opisina dagiti Saksi ni Jehova idiay Francia. Sigun iti surat, maibabaonak nga agserbi kas payunir iti kongregasion ti Sedan, nga asideg ti Belgium. Naragsakan dagiti dadakkelko iti panangawatko iti dayta a pribilehio manipud ken Jehova. Ngem inggunamgunam ni Tatang a saan nga ang-angaw ti panagpayunir. Kasapulan ti kinasaet. Ngem kinunana a kanayon a silulukat ti pagtaenganna para kaniak ken mabalinko ti agpannuray kenkuana no adda dagiti parikutko. Nupay nanumo laeng dagiti dadakkelko, inggatangandak iti baro a bisikleta. Adda pay laeng kaniak dayta  a bisikleta, ket makaluaak no makitak dayta. Pimmusay da Tatang ken Nanang idi 1961, ngem malaglagipko latta dagiti nainsiriban a sasao ni Tatang; dagita ti nangparegta ken nangliwliwa kaniak bayat dagiti tawtawen ti panagserbik.

Sabali pay a gubuayan ti pammaregta isu ti agtawen iti 75 a Kristiano a kabsat a babai a ni Elise Motte iti kongregasion ti Sedan. Bayat ti kalgaw, agbisikletaak a mapan kadagiti adayo a purok tapno mangasaba, ket kaduaennak ni Elise babaen ti panagluganna iti tren. Ngem naminsan, nagprotesta dagiti inheniero ti tren, ket saan a makaawid ni Elise. Ti laeng napanunotko a pamuspusan isu ti panangiluganko kenkuana iti kargadera ti bisikletak ket nagawidkami, nupay saan a komportable dayta a pamay-an. Kabigatanna, nangitugotak iti pungan a pagtugawan ni Elise iti bisikletak sa dinagasko iti pagtaenganna. Saanen a naglugan iti tren sipud idi, ket gapu ta saanen nga agplete, nakagatang iti napudot nga inumenmi iti pangngaldaw. Asino ti mangipagarup nga agbalin a pangpasahero ti bisikletak?

Adu-adu nga Annongen

Idi 1950, nakiddaw nga agserbiak kas manangaywan ti sirkito iti intero a makin-amianan a Francia. Madanaganak idi damo yantangay agtawenak laeng iti 23. Impagarupko a nagkamali laeng ti sanga nga opisina! Adu ti napampanunotko a saludsod: ‘Kualipikadoak kadi iti naespirituan ken pisikal? Pagdagusak ngay iti linawas?’ Kanayonanna, sipud agtawenak iti innem, maysa kadagiti matak ket ballag. Kanayon a mababainak gapu iti daytoy, a pakadanagak ti panangdillaw ti sabsabali. Agyamanak ta iti dayta a kanito, tinulongannak ni Stefan Behunick, maysa a nagturpos iti Gilead nga eskuelaan dagiti misionero. Napapanaw ni Kabsat Behunick manipud Poland gapu iti panangasabana sa nayakar manen iti Francia. Nagustuak ti kinaturedna. Raraemenna unay ni Jehova ken ti kinapudno. Addada mangipapan nga isu ket nainget kaniak, ngem adu ti naadalko kenkuana. Ti kinaturedna ti timmulong kaniak a maaddaan iti nabileg a pakinakem.

Gapu iti panagserbik iti sirkito, naaddaanak kadagiti nakaay-ayat a kapadasan iti tay-ak ti serbisio. Idi 1953, nakiddaw a sarungkarak ti agnagan iti Mr. Paoli, taga abagatan a Paris a nagsuskribir iti Ti Pagwanawanan. Nagsarakkami, ket naammuak a nagretiro iti kinasoldadona ken nagustuanna Ti Pagwanawanan. Imbagana a kalpasan a nabasana ti maysa nga artikulo maipapan iti Panglaglagip iti ipapatay ni Kristo iti nabiit pay nga isyu, rinambakanna nga agmaymaysa ti Panglaglagip sa binasana dagiti Salmo iti dayta a rabii. Napaut ti panagsaritami iti dayta a malem. Sakbay a pimmanawak, nagsaritaanmi apagbiit ti maipapan iti bautismo. Idi agangay, pinatulodak iti imbitasion tapno tumabuno iti asamblea sirkitomi, a naangay idi rugrugi ti 1954. Timmabuno, ket maysa isuna kadagiti 26 a nabautisaran iti dayta nga asamblea. Pagragsakak pay laeng a lagipen dagiti kasta a kapadasan.

Rosa: Idi Oktubre 1948, nangrugiak a nagpayunir. Kalpasan ti panagserbik idiay Anor, asideg ti Belgium, naibaonak idiay Paris, a kaduak ti sabali pay a payunir, ni Irène Kolanski (Leroy itan).  Nagnaedkami iti bassit a kuarto idiay Saint Germain-des-Près iti sentro ti siudad. Agsipud ta maysaak a taga away, matmatak a natan-ok dagiti taga Paris. Impagarupko a narang-ay ken agkakalaingda amin. Ngem di nagbayag, naammuak babaen ti panangasabak kadakuada a saanda a naiduma a tattao. Masansan a papanawendakami dagiti agay-aywan iti balay, ket narigat ti mangirugi kadagiti panagadal iti Biblia. Nupay kasta, adda dagiti tattao nga immawat iti mensahemi.

Bayat ti asamblea sirkito idi 1951, nainterbiukami ken ni Irène maipapan iti panagpayunirmi. Ammoyo kadi no siasino ti nanginterbiu kadakami? Maysa nga agkabannuag a manangaywan iti sirkito nga agnagan iti Marian Szumiga. Nagam-ammokami idin iti napalabas, ngem sakami la nagsinnurat kalpasan dayta nga asamblea. Adu ti pagpadaanmi ken ni Marian, agraman ti tawen a panagbautisarmi ken ti tawen a panagpayunirmi. Ngem kapatgan iti amin, agpada a tarigagayanmi ti agtalinaed iti amin-tiempo a serbisio. Isu a kalpasan ti nainkararagan a panagplano, nagkasarkami idi Hulio 31, 1956. Nabalbaliwan ti inaldaw nga aktibidadko gapu iti panagasawak. Nasken a mairuamak saan laeng a kas asawa no di ket iti panangkadua ken ni Marian iti trabahona iti sirkito, a kaipapananna ti panagnaed iti nagduduma a balay kada lawas. Narigatanak idi damo, ngem naisangsangayan ti rag-omi idi agangay.

Narang-ay a Biag

Marian: Kadagiti naglabas a tawtawen, naaddaankami iti pribilehio a tumulong iti panangisagana iti nagduduma a kombension. Nangruna a malaglagipko ti kombension idi 1966, idiay Bordeaux. Iti dayta a tiempo, maiparit ti aktibidad dagiti Saksi ni Jehova idiay Portugal. Isu a ti programa ti asamblea ket naiparang met iti Portuguese tapno magunggonaan dagiti Saksi a nakapan iti Francia. Ginasut a Kristiano a kakabsat manipud Portugal ti timmabuno, ngem parikut no sadino ti pagdagusanda. Gapu ta awan ti umdas a kuarto kadagiti pagtaengan dagiti Saksi  idiay Bordeaux, nangabangkami iti bakante a pagsinean a maaramat kas dormitorio. Inikkatmi dagiti amin a tugaw, ken nausar ti kurtina iti pagsinean kas dibision tapno agbalin a dua ti dormitorio, maysa para kadagiti lallaki ken maysa para kadagiti babbai. Nangikabilkami met kadagiti pagdigusan ken paginnawan, ken nangikabilkami iti garami iti sementado a suelo sa inap-apanmi iti tolda. Napnek ti amin iti dayta nga urnos.

Kalpasan dagiti sesion ti kombension, binisitami dagiti kakabsat iti dormitorio. Nagsayaat ti kasasaad. Anian ti pannakaparegtami kadagiti kapadasanda iti laksid ti adu a tawen a panangdaerda iti ibubusor! Agluluakami amin idi agawiddan kalpasan ti asamblea.

Dua a tawen sakbay dayta, idi 1964, sabali pay a pribilehio ti naitalek kaniak idi nakiddaw nga agserbiak kas manangaywan iti distrito. Naminsan pay, nagduaduaak no kualipikadoak a mangawat iti dayta. Ngem kinunak iti bagik a no kiddawen dagiti responsable a kakabsat nga awatek ti annongen, nalawag a nautobda a kabaelak nga ibaklay dayta. Maysa a nagsayaat a kapadasan ti maaddaan iti nasinged a pannakipagtrabaho kadagiti dadduma nga agdaldaliasat a manangaywan. Adu ti naadalko kadakuada. Adu kadakuada ti talaga a mapagulidanan iti kinaanus ken kinapinget, dagiti galad a napateg iti panangmatmat ni Jehova. Nabigbigko a no naanustayo, ammo ni Jehova no ania ti pangusaranna kadatayo.

Idi 1982, kiniddaw pay ti sanga nga opisina nga aywananmi ti maysa a bassit a grupo dagiti 12 a Polaco nga agibumbunannag idiay Boulogne-Billancourt, kadagiti away ti Paris. Maysa dayta a sorpresa. Ammok dagiti teokratiko a sasao iti Polaco, ngem marigatanak a mangusar kadagita. Ngem dakkel ti naitulong kaniak ti kinaanus ken ti sidadaan a pannakitinnulong dagidiay a kakabsat. Ita, addan agarup 170 nga agibumbunannag iti dayta a kongregasion, agraman ti agarup 60 a payunir. Idi agangay, binisitami met ken ni Rosa dagiti grupo ken kongregasion dagiti Polaco idiay Alemania, Austria, ken Denmark.

Panagbaliwbaliw ti Kasasaad

Naipamaysa ti biagmi iti panagbisita kadagiti nadumaduma a kongregasion, ngem nagsardengkami idi 2001 iti panagdaliasat a ministerio gapu iti panagkapuy ti salun-atko. Nakasarakkami iti apartment iti ili ti Pithiviers, a pagnanaedan ni adingko a Ruth. Siaasi a dinutokannakami ti sanga nga opisina kas special pioneer ken basbassit nga oras ti busbosenmi iti ministerio gapu iti kasasaadmi.

Rosa: Naikawaak unay iti umuna a tawen kalpasan ti panagsardengmi a bumisita iti sirkito. Nariknak a kasla awan serbik gapu iti dakkel a panagbalbaliw. Ngem kinunak iti bagik, ‘Mausarmo latta ti panawen ken ti nabatbati a pigsam nga agserbi kas payunir.’ Ita, naragsakak nga agtartrabaho a kadua dagiti dadduma a payunir iti kongregasionmi.

Kanayon nga Inaywanannakami ni Jehova

Marian: Agyamanak unay ken ni Jehova ta ni Rosa ti nagbalin a katakunaynayko iti naglabas nga 48 a tawen. Iti unos dagidi a tawen iti trabaho a panagdaliasat, dakkel ti naitulongna kaniak. Dina pulos imbaga, ‘Tarigagayak nga agsardengtan ket maaddaanta iti bukod a pagtaengan.’

Rosa: Adda dagiti mangibaga no dadduma, “Saan a normal ti biagyo. Kanayonkayo la a makipagnaed kadagiti sabsabali.” Ngem ania a talaga ti “normal a biag”? Masansan a malikmutkami iti adu a bambanag a mabalin a manglapped iti panangitultuloymi kadagiti naespirituan nga aktibidad. Ti laeng talaga a kasapulanmi ket komportable a pagiddaan, lamisaan, ken sumagmamano a napateg a bambanag.  Kas payunir, saankami nga aduan iti material, ngem adda kadakami ti amin a kasapulanmi a mangaramid iti pagayatan ni Jehova. Mayimtuod kaniak no dadduma, “Ania ti aramidem inton bumaketka nga awan ti balay ken pensionmo?” Sawek kadakuada ti kuna ti Salmo 34:10: “No maipapan kadagidiay mangsapul ken Jehova, saandanto nga agkurang iti aniaman a naimbag.” Kanayon nga inaywanannakami ni Jehova.

Marian: Agpayso dayta! Kinapudnona, impaayannakami ni Jehova iti ad-adu ngem iti kasapulanmi. Kas pagarigan, idi 1958, napiliak a mangibagi iti sirkito iti internasional a kombension idiay New York. Ngem awan ti panggatangmi iti tiket ni Rosa. Maysa a rabii, adda kabsat a nangipaima iti maysa a sobre a nasuratan iti “New York.” Naikuyogko ni Rosa idiay New York gapu iti sagut a linaon dayta!

Saanmi a pulos nagbabawyan ken ni Rosa dagiti tawen a panagserbimi ken ni Jehova. Awan ti napukawmi no di ket nagun-odanmi ti amin​—ti narang-ay ken naragsak a biag iti amin-tiempo a serbisio. Talaga a nakaay-ayat a Dios ni Jehova. Nasursuromi ti naan-anay nga agtalek kenkuana, ken rimmayray ti panagayatmi kenkuana. Adda dagiti Kristiano a kakabsattayo a nasapa a naisakripisio ti biagda gapu iti kinamatalekda. Ngem nakitak nga iti las-ud ti adu a tawenen, ti maysa a tao mabalinna met nga isakripisio ti biagna babaen ti inaldaw a panagserbina ken ni Jehova. Kasta ti biag nga ikagkagumaanmi ken ni Rosa agingga ita, ket dayta ti determinado nga itultuloymi nga aramiden.

[Footnote]

[Ladawan iti panid 20]

Da François ken Anna Szumiga ken dagiti annakda a da Stéphanie, Stéphane, Mélanie, ken Marian idi 1930. Nakatakder ni Marian iti bangkito

[Ladawan iti panid 22]

Ngato: Panangipaima kadagiti publikasion iti tiendaan idiay Armentières, makin-amianan a Francia, idi 1950

[Ladawan iti panid 22]

Kannigid: Ni Stefan Behunick ken Marian idi 1950

[Ladawan iti panid 23]

Ni Rosa (ti umuna manipud kannigid) ken ti kaduana a payunir a ni Irène (maikapat manipud kannigid), iyaw-awisda ti asamblea idi 1951

[Ladawan iti panid 23]

Da Marian ken Rosa iti aldaw sakbay ti kasarda

[Ladawan iti panid 23]

Bisikleta ti kangrunaan idi a mausar bayat ti panagbisita iti sirkito