No Ania a Talaga ti Kasapulan Tapno Agbiag a Naragsak

NI Jehova, “ti naragsak a Dios,” ken ni Jesu-Kristo, “ti naragsak ken maymaysa a Mannakabalin nga Agturay,” ti kangrunaan a makaammo no ania ti kasapulan tapno agbiag a naragsak. (1 Timoteo 1:11; 6:15) Gapuna, di pagsiddaawan a ti tulbek ti kinaragsak ket masarakan iti Sao ti Dios, ti Biblia.​—Apocalipsis 1:3; 22:7.

Iti nalatak a Sermonna iti Bantay, dineskribir ni Jesus dagidiay naragsak. Kunana: “Naragsak dagidiay” (1) sipapanunot iti naespirituan a kasapulanda, (2) agleddaang, (3) naalumamay, (4) mabisin ken mawaw iti kinalinteg, (5) naasi, (6) nasin-aw ti pusoda, (7) mannakikappia, (8) maidaddadanes maigapu iti kinalinteg, ken (9) maumsi ken maidadanes maigapu kenkuana.​—Mateo 5:3-11. *

Umiso Kadi Dagiti Sinao ni Jesus?

Saan a kasapulan a paneknekan ti kinahusto ti dadduma kadagiti balikas ni Jesus. Siasino ti makailibak a ti naalumamay, naasi, ken natalna a tao a tinignay ti nasin-aw a puso ket naragragsak ngem iti naunget, mannakiringgor, nauyong a tao?

Ngem nalabit a pagsiddaawanyo no apay a maawagan a naragsak dagiti tattao a mabisin ken  mawaw iti kinalinteg wenno agleddaang. Dagiti kasta nga indibidual realistiko ti panangmatmatda kadagiti kasasaad iti lubong. ‘Agsensennaay ken umas-asugda gapu iti amin a nakarimrimon a bambanag a maar-aramid’ iti kaaldawantayo. (Ezequiel 9:4) Saan a dagita ti mamagbalin kadakuada a naragsak. Nupay kasta, aglaplapusanan ti rag-oda no maammuanda a panggep ti Dios nga iyeg ti nalinteg a kasasaad iti daga ken ipaayanna iti hustisia dagiti mairurrurumen.​—Isaias 11:4.

Gapu iti panagayatda iti kinalinteg, pagladingitan met dagiti indibidual ti masansan a pannakapaayda nga agaramid iti naimbag. Gapuna, sipapanunotda iti naespirituan a kasapulanda. Dagiti kasta a tattao sidadaanda nga agpaiwanwan iti Dios agsipud ta mabigbigda nga isu laeng ti makatulong kadagiti tattao tapno maparmekda dagiti pagkapuyanda.​—Proverbio 16:3, 9; 20:24.

Dagiti tattao nga agleddaang, mabisin ken mawaw gapu iti kinalinteg, ken sipapanunot iti naespirituan a kasapulanda ammoda ti kinapateg ti maaddaan iti nasayaat a relasion iti Namarsua. Mangyeg iti kinaragsak ti nasayaat a relasion iti pada a tao, ngem naragragsak ti maaddaan iti nasayaat a relasion iti Dios. Wen, talaga a maawagan a naragsak dagiti napasnek a managayat iti nalinteg, a sidadaan nga agpaiwanwan iti Dios.

Ngem nalabit a narigatyo a patien a makapagbiag a naragsak ti maysa a maidaddadanes ken maum-umsi. Ngem pudno la ketdi dayta yantangay ni Jesus a mismo ti nangibaga. Gapuna, kasanotayo a tarusan dagiti sasaona?

Maidaddadanes Ngem Naragsak​—Kasano a Posible Dayta?

Imutektekanyo ta saan a kinuna ni Jesus a mangyeg iti kinaragsak ti pannakaumsi ken pannakaidadanes. Inlawlawagna: “Naragsak dagidiay maidaddadanes maigapu iti kinalinteg, . . . inton umsiendakayo dagiti tattao ken idadanesdakayo . . . maigapu kaniak.” (Mateo 5:10, 11) Gapuna, ti pannakaumsi ket sa la mangyeg iti kinaragsak iti maysa a tao no maigapu dayta iti panagbalinna nga adalan ni Kristo ken gapu iti panagbiagna a maitunos kadagiti nalinteg a prinsipio nga insuro ni Jesus.

Dayta ti ipakita ti napagteng kadagiti nagkauna a Kristiano. Dagiti miembro ti Sanhedrin, ti nangato a pangukoman dagiti Judio, “inayabanda dagiti apostol, sinaplitda ida, ket binilinda ida nga isardengda ti agsasao maipuon iti nagan ni Jesus, ket binulosanda ida.” Ania ti tignay dagiti apostol? “Dagitoy, ngarud, pimmanawdan iti sanguanan ti Sanhedrin, nga agragrag-oda agsipud ta naibilangda a maikari a maibabain maigapu iti naganna. Ket iti tunggal aldaw idiay templo ken iti binalaybalay nagtultuloyda nga awan sarday a mangisuro ken mangideklara iti naimbag a damag maipapan iti Kristo, a ni Jesus.”​—Aramid 5:40-42; 13:50-52.

Nangted ni apostol Pedro iti kanayonan a panangilawlawag iti koneksion ti pannakaumsi ken kinaragsak. Insuratna: “No maum-umsikayo gapu iti nagan ni Kristo, naragsakkayo, agsipud ta ti espiritu ti dayag, ti mismo nga espiritu ti Dios, agtataeng kadakayo.” (1 Pedro 4:14) Wen, ti panagsagaba ti maysa a Kristiano gapu iti panagaramidna iti umiso, nupay saanna a pakaay-aywan ti kasta a panagsagaba, mangibunga iti kinaragsak gapu ta ammona a maaw-awatna ti nasantuan nga espiritu ti Dios. Kasano a ti espiritu ti Dios nainaig iti kinaragsak?

Dagiti Aramid ti Lasag Wenno Bunga ti Espiritu?

Ti nasantuan nga espiritu ti Dios agtignay kadagidiay laeng agtulnog kenkuana kas agturay. (Aramid 5:32) Ni Jehova saanna nga ited ti espirituna kadagidiay ‘nainlasagan ti aramidda.’ Dagitoy nga aramid isu ti “pannakiabig, kinarugit, nalulok a kababalin, idolatria, panangannurot iti espiritismo, guranggura, ringgor, imon, dagiti irarasuk ti unget, rinnupir, pannakabingbingay, dagiti sekta, ap-apal, panagbarbartek, naariwawa a panagragragsak, ken bambanag nga umasping kadagitoy.” (Galacia 5:19-21) Pudno nga agraraira ita “dagiti aramid ti lasag.” Ngem dagiti mangar-aramid kadagita awananda iti napaypayso ken permanente a kinaragsak. Imbes ketdi, daydiay mangar-aramid kadagita madadaelna ti nasayaat a relasionna kadagiti kabagian, gagayyem,  ken am-ammona. Kanayonanna, ibaga ti Sao ti Dios a dagidiay “mangannurot iti kakasta a banag saandanto a tawiden ti pagarian ti Dios.”

Iti sabali a bangir, ti Dios ipaayna ti espirituna kadagidiay mangsukay iti “bunga ti espiritu.” Dagiti galad a mangbukel iti daytoy a bunga isu ti “ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.” (Galacia 5:22, 23) No iparangarangtayo dagitoy a galad, makapataudtayo kadagiti kasasaad a mangyeg kadatayo iti natalna a relasion kadagiti sabsabali ken iti Dios, a mangibunga iti pudno a kinaragsak. (Kitaenyo ti kahon.) Napatpateg pay, no mangipakitatayo iti ayat, kinamanangngaasi, kinaimbag ken dadduma pay a nadiosan a galad, maay-ayotayo ni Jehova ken maaddaantayo iti naragsak a namnama a biag nga agnanayon iti nalinteg a baro a lubong ti Dios.

Ti Kinaragsak ket Maysa a Pangngeddeng

Idi sipapasnek a nagadal iti Biblia da Wolfgang ken Brigitte, maysa nga agassawa nga agnanaed idiay Alemania, adu ti ik-ikutanda a material a sanikua a matmatan dagiti tattao a kasapulan tapno agbiag a naragsak. Nasalibukag ken nasalun-atda. Nangingina ti kawesda, agnanaedda iti nakapimpintas ti pannakaarkosna a balay, ken naballigi ti negosioda. Adu a panawen ti busbusbosenda a mangpaadu iti material a sanikuada, ngem saan a nangted dayta kadakuada iti pudno a kinaragsak. Ngem idi agangay, nangaramid da Wolfgang ken Brigitte iti dakkel a pangngeddeng. Inrugida nga iwayaan ken pagreggetan nga ad-adda ti panangparang-ay iti espiritualidadda ken nangsapulda kadagiti pamay-an tapno ad-adda a sumingedda ken ni Jehova. Di nagbayag, nagbalbaliw ti kababalinda gapu iti pangngeddengda, a nangtignay kadakuada a mangpasimple iti biagda ken agserbi kas payunir, wenno amin-tiempo nga ebanghelisador ti Pagarian. Ita, agserserbida kas boluntario iti sanga nga opisina dagiti Saksi ni Jehova idiay Alemania. Kanayonanna, ad-adalenda ti maysa a lenguahe iti Asia tapno matulonganda dagiti ganggannaet a mangadal iti kinapudno a masarakan iti Sao ti Dios, ti Biblia.

Naaddaanda kadi iti pudno a kinaragsak? Kuna ni Wolfgang: “Sipud idi pinarayraymi ti panangragpat kadagiti naespirituan a kalat, ad-adda a naaddaankami iti kinaragsak ken pannakapnek. Bimmileg met ti relasionmi kas agassawa gapu iti naimpusuan a panagserbimi ken ni Jehova. Naragsak idi ti relasionmi kas  agassawa, ngem addaankami kadagiti agsupadi nga obligasion ken pagesman a mangsingsinga iti naragsak a relasionmi. Ita, adda maymaysa a kalat nga ipangpangrunamin.”

Ania ti Kasapulan Tapno Agbiag a Naragsak?

Ti ababa a sungbat: Liklikan “dagiti aramid ti lasag,” ken sukayen “ti bunga ti espiritu” ti Dios. Tapno agbiag a naragsak, masapul a tarigagayan ti maysa a tao ti maaddaan iti nasinged a relasion iti Dios. Ti tao a mangikagumaan a mangragpat iti dayta ket maipada iti naragsak a tao a dineskribir ni Jesus.

Gapuna, saanyo a sibibiddut a panunoten a saankayo a makapagbiag a naragsak. Pudno, mabalin a masakitkayo ita wenno mabalin nga adda pay ketdi parikutyo kas agassawa. Nalabit a saanen a posible a maaddaankayo iti annak wenno marigrigatankayo a maaddaan iti naballigi a propesion. Nalabit a saanen a kas iti dati nga adu ti kuartayo. Nupay kasta, bumilegkayo; awan ti rason tapno maawanankayo iti namnama! Ti Pagarian ti Dios risutenna dagita ken dagiti ginasgasut pay a parikut. Kinapudnona, iti din agbayag, aramiden ni Jehova a Dios ti karina nga inyebkas ti salmista: “Ti kinaarim maysa a kinaari iti amin a tiempo a di nakedngan . . . Uk-ukradem ta imam ken pempennekem ti tarigagay ti tunggal sibibiag a banag.” (Salmo 145:13, 16) Kas mapatalgedan dagiti minilion nga adipen ni Jehova iti sangalubongan, ti panangpadpadaan iti dayta a mangpatalged a kari ni Jehova ket dakkel ti maitulongna tapno agbiagtayo a naragsak ita.​—Apocalipsis 21:3.

[Footnote]

[Kahon/Ladawan panid 6]

Dagiti Makaited Kadatayo iti Kinaragsak

Ti Ayat tignayenna ti dadduma tapno ayatendaka met.

Ti rag-o pabilgennaka tapno mapagballigiam dagiti parikut.

Ti talna tulongannaka a mangtaginayon iti natalna a relasion.

Ti mabayag a panagitured tulongannaka nga agtalinaed a naragsak uray iti sidong ti pannubok.

Ti kinamanangngaasi iyadaninaka kadagiti sabsabali.

Ti panagbalin a naimbag tignayenna dagiti sabsabali a tumulong no agkasapulanka.

Ti pammati ipanamnamana kenka ti naayat a panangiwanwan ti Dios.

Ti kinaalumamay ket mangyeg kenka iti kalmado a rikna, panunot, ken bagi.

Ti panagteppel ilikliknaka nga agaramid iti adu a biddut.

[Dagiti Ladawan iti panid 7]

Tapno magun-od ti kinaragsak, masapul a pennekem dagiti naespirituan a kasapulam