No Kasano a Mapagballigian ti Pannakaupay

MAUP-UPAYKA kadi? Iti daytoy tiempo ti rigat ken kinaawan namnama, adu a tattao ti maup-upay. Adda dagiti maup-upay gapu ta awan trabahoda. Dadduma ti mangdadaer iti resulta ti pannakaaksidente. Idinto ta makidangdangadang dagiti dadduma kadagiti parikut iti pamilia, nakaro a sakit, wenno ladingit.

No maup-upayka, sadino ti mabalin a pagpatulongam? Minilion iti sangalubongan ti naliwliwa babaen ti panangbasada iti Sao ti Dios, ti Biblia. Nakariknada iti kompiansa babaen dagiti sasao ni apostol Pablo, a kunana: “Bendito koma ti Dios ken Ama ni Apotayo a Jesu-Kristo, ti Ama dagiti nadungngo nga asi ken ti Dios ti amin a liwliwa, a mangliwliwa kadakami iti amin a rigatmi.” (2 Corinto 1:3, 4) Apay a dika basaen daytoy ken dagiti dadduma pay a teksto iti Bibliam? No aramidem dayta, ‘maliwliwa ti pusom ken mapatibkerka.’​—2 Tesalonica 2:17.

Ti pannakitimpuyog kadagidiay agserserbi ken ni Jehova ti sabali pay a tulong tapno mapagballigiantayo ti pannakaupay. Kuna ti Proverbio 12:25: “Ti panagdanag nga adda iti puso ti maysa a tao isunto ti mamagrukob iti dayta, ngem ti naimbag a sao isu ti mamagrag-o iti dayta.” No tumabunotayo kadagiti Nakristianuan a gimong, mangngegtayo dayta a “naimbag a sao,” a “nasam-it iti kararua ken makapaimbag kadagiti tulang.” (Proverbio 16:24) Apay a dika tumabuno iti gimong iti Kingdom Hall dagiti Saksi ni Jehova tapno mapadasam a mismo no ania ti makapabileg nga epekto kenka ti kasta a panagtataripnong?

Magunggonaanka met iti bileg ti kararag. No malapunoska kadagiti pakarigatan iti biag, ipakaammom dagiti adda iti kaunggam iti daydiay “Managdengngeg iti kararag.” (Salmo 65:2) Ti Namarsua kadatayo, a ni Jehova a Dios, naun-uneg ti pannakaawatna kadatayo ngem ti pannakaawattayo iti bagitayo. Makapagpannuraytayo iti tulongna. Ikari kadatayo ti Saona: “Ipalladawmo ti dadagsenmo ken Jehova a mismo, ket isu saranayennakanto. Saannanto a pulos ipalubos nga agdiwengdiweng daydiay nalinteg.” (Salmo 55:22) Wen, “dagidiay mangin-inanama ken Jehova mapasublidanto ti bilegda.”​—Isaias 40:31.

Ni Jehova a Dios nangipaay kadatayo kadagiti nabileg a probision a makatulong tapno mapagballigiantayo ti pannakaupay. Usarem kadi dagita?