Ti Panangsapul iti Kinaragsak

SUMAGMAMANO a tawenen ti napalabas, nayimtuod kadagiti umili idiay Alemania, Estados Unidos, Francia, ken Gran Britania, “Ania ti kasapulan tapno agbiag a naragsak?” Kadagidiay napagsaludsodan, 89 a porsiento ti nangibaga a kasapulan ti nasayaat a salun-at; 79 a porsiento ti nangdakamat iti makapnek a relasion wenno panagbinnulig kas agassawa; 62 a porsiento ti nangtukoy kadagiti gunggona iti panagbalin a nagannak; ken 51 a porsiento ti nangibaga a kasapulan ti naballigi a propesion tapno maaddaan iti kinaragsak. Ken uray no nakairuaman nga ibaga ti kaaduan a ti kuarta ket saan a mangipasigurado iti kinaragsak, 47 a porsiento kadagidiay napagsaludsodan ti mamati iti dayta. Ania ti ipakita dagiti pasamak?

Umuna, utobenyo ti naipagarup a koneksion ti kuarta ken kinaragsak. Ti maysa a surbey kadagiti sangagasut a kabaknangan a tao iti Estados Unidos ipakitana a saanda a naragragsak ngem kadagiti gagangay a tattao. Kanayonanna, nupay adu idiay Estados Unidos ti dandani nadoble ti material a sanikuada iti naglabas a tallo a dekada, saanda a naragragsak ngem iti dati, sigun kadagiti eksperto iti salun-at ti isip. Kinapudnona, kuna ti maysa a report: “Iti las-ud ti isu met laeng a tiempo, dakkel ti ngimmatuan dagiti kaso ti panagleddaang. Nagtriple ti kaadu dagiti agtutubo nga agpakpakamatay. Nagdoble dagiti kaso ti diborsio.” Iti agarup 50 a nadumaduma a pagilian, dagiti managsirarak a nangadal iti nakainaigan ti kuarta iti kinaragsak naammuanda a ti kuarta saanna a magatang ti kinaragsak.

Sumaganad, ania ti pakainaiganna iti kinaragsak dagiti banag a kas iti nasayaat a salun-at, makapnek a relasion kas agassawa, ken naballigi a propesion? Bueno, no dagitoy laeng a banag ti kasapulan tapno agbiagtayo a naragsak, kasano ngaruden dagiti minilion a saan a nasalun-at ken dagiti amin a saan a makapnek ti panagasawada? Dagiti ngay agassawa nga awanan kadagiti annak ken amin a lallaki ken babbai nga awanan iti naballigi a propesion? Kaipapananna kadi a saanda a naragsak? Ken agpatingga kadi ti makuna a kinaragsak dagidiay agdama nga addaan iti nasayaat a salun-at ken makapnek a panagasawa no agbaliw ti kasasaadda?

Agsapsapultayo Kadi Kadagiti Umiso a Gubuayan?

Amin a tao tarigagayanda ti agbalin a naragsak. Saan a pakasdaawan daytoy agsipud ta ti Namarsua iti tao ket nadeskribir kas ti “naragsak a Dios,” ken naaramid ti tao iti ladawan ti Dios. (1 Timoteo 1:11; Genesis 1:26, 27) Gapuna, normal laeng kadagiti tattao a sapulenda ti kinaragsak. Ngem naammuan ti adu a ti panangtaginayon iti kinaragsak ket kas iti panangiggem iti darat​—agpadada a nalaka a maregreg wenno mapukaw.

 Ngem mabalin kadi a nalabes ti panangikagumaan ti dadduma a mangsapul iti kinaragsak? Kasta ti kapanunotan ni Eric Hoffer a pilosopo mainaig iti timpuyog dagiti tattao. Kinunana: “Ti panangsapul iti kinaragsak ket maysa kadagiti kangrunaan a makagapu iti kinaawan ragsak.” Talaga a pudno dayta no sapulentayo ti kinaragsak kadagiti di umiso a gubuayan. Sigurado a mangibunga dayta iti pannakaupay ken pannakapaay. Saan a makaited iti kinaragsak ti panagregget nga agbalin a nabaknang; panangikagumaan nga agbalin a nalatak wenno mabigbigbig; panangragpat iti napolitikaan, sosial, wenno namaterialan a kalat; wenno basta panagbiag a managimbubukodan ken panagagawa a mangpennek iti tarigagay. Di pagsiddaawan nga adda dagiti umanamong iti naiduma a panangmatmat ti maysa nga autor, a nagkuna: “Naragsaktayo koma no ditay ikagkagumaan ti agbalin a naragsak”!

Makapainteres, ti surbey a nadakamat iti daytoy nga artikulo ipakitana nga 4 iti kada 10 kadagiti napagsaludsodan ti nangibaga a ti kinaragsak ket resulta ti panangaramid iti naimbag ken panangtulong kadagiti sabsabali. Ken 1 iti kada 4 ti nangipaganetget a dakkel ti paset ti pammati ken narelihiosuan a patpatien iti panagbalin a naragsak. Nalawag, kasapulan nga usigentayo pay nga ad-adda no ania dagiti kasapulan tapno agbalintayo a pudpudno a naragsak. Tulongannatayo ti sumaganad nga artikulo a mangaramid iti daytoy.

[Dagiti Ladawan iti panid 3]

Adu ti mangipapan a ti kuarta, makapnek a biag ti pamilia, wenno naballigi a propesion ti tulbek ti kinaragsak. Umanamongkayo kadi?