Ania ti Kababalinmo Bayat nga Agur-urayka?

KAADUAN ita ti matektekan nga aguray iti maysa a tao wenno iti maysa a banag. Nupay kasta, ti Kasuratan paregtaenna dagiti adipen ti Dios a sukayenda “ti panagur-uray.” Saan a kas kadagiti tattao iti aglawlawna, kinuna ni mammadto a Mikias: “Ipakitakto ti panagur-uray iti Dios ti pannakaisalakanko.”​—Mikias 7:7; Un-unnoy 3:26.

Ngem ania ti kaipapanan ti panaguray ken Jehova? Kasano koma ti panaguray ti maysa a Kristiano iti Dios? Adda kadi umiso ken di umiso a kababalin iti panagur-uray? Mainaig iti dayta, adda maadaltayo iti kapadasan ni mammadto a Jonas idi maikasiam a siglo K.K.P.

Di Umiso a Motibo ti Panagur-uray

Ni Jehova a Dios imbaonna ni Jonas a mangasaba kadagiti taga Nineve, ti kabesera ti Imperio ti Asiria. Nalatak ti Nineve kas “ti siudad ti panagibukbok iti dara” gapu iti agdadata a kinaranggas ken kinaulpitna, maysa a kinapudno a patalgedan dagiti historiador ken arkeologo. (Nahum 3:1) Idi damo, pinadas ni Jonas a liniklikan ti mapan idiay Nineve, ngem sinigurado ni Jehova a mapan ti mammadto sadiay.​—Jonas 1:3–3:2.

“Nangrugi a sumrek ni Jonas iti siudad iti kaadayo a mapagpagna iti maysa nga aldaw, ket inwarwaragawagna ken kinunkunana: ‘Uppat a pulo laengen nga aldaw, ket ti Nineve maduprakto.’” (Jonas 3:4) Nakaskasdaaw ti epekto ti panangasaba ni Jonas: “Dagiti tattao ti Nineve nangrugida a maaddaan iti pammati iti Dios, ket nangiwaragawagda iti panagayunar ken nangikawesda iti tinakpil, manipud iti daydiay kadadakkelan kadakuada agingga a mismo iti daydiay kanunumuan kadakuada.” (Jonas 3:5) Gapuna, ni Jehova, maysa a Dios a ‘saan nga agtarigagay a madadael ti asinoman no di ket tarigagayanna a makagteng ti isuamin iti panagbabawi,’ inispalna ti siudad.​—2 Pedro 3:9.

Ania ti reaksion ni Jonas? Kuna ti salaysay: “Ken Jonas, nupay kasta, makaparurod unay dayta, ket nagpudot buyogen ti unget.” (Jonas 4:1) Apay? Nalabit marikna ni Jonas a naibabain kas mammadto gapu ta saan a napasamak ti inwaragawagna a pannakadadael iti naikeddeng a petsa. Nabatad nga ad-adda a maseknan iti reputasionna ngem iti panangipakita iti asi ken panangisalakan kadagiti sabsabali.

Saan met ketdi a naglusulos ni Jonas kas propeta. Nupay kasta, nagur-uray “tapno makitana no ania ti pagbalinan ti siudad.” Wen, nagim-impen ken nagur-uray laeng. Gapu ta saan a natungpal ti ninamnamana a mapasamak, nangaramid iti abong-abong ket nagtugaw iti sirokna ken naalidunget a nagur-uray tapno makitana  no ania ti mapasamak. Ngem saan nga inanamongan ni Jehova dayta a kababalin ni Jonas isu a siaayat a tinubngarna ti di umiso a panagpampanunot ti mammadto.​—Jonas 4:5, 9-11.

No Apay a Naanus ni Jehova

Nupay nagbabawi ti Nineve, nagsubli met laeng iti dakes nga ar-aramidna. Babaen kada mammadto a Nahum ken Sofonias, impadto ni Jehova ti pannakadadaelna. Maipapan “ti siudad ti panangibukbok ti dara,” inwaragawag ni Jehova a dadaelenna ti Asiria ket pagbalinenna ti Nineve a langalang a rebbek. (Nahum 3:1; Sofonias 2:13) Idi 632 K.K.P., nadadael ti Nineve, ket saanen a pulos a naibangon.

Kasta met ti lubong itatta, a nakabasol iti kasta unay a panangibukbok iti dara a nakarkaro pay ngem ti nagkauna a Nineve. Gapu iti daytoy ken dadduma pay a rason, inkeddeng ni Jehova nga agpatingganto daytoy agdama a dakes a sistema ti bambanag iti awan kaaspingna a “dakkel a rigat.”​—Mateo 24:21, 22.

Iti agdama, saan pay nga inyeg ni Jehova ti naikari a pannakadadael tapno adda gundaway nga agbabawi ken maispal dagiti napasnek a tattao, kas kadagiti nagbabawi idiay Nineve. Kastoy ti kinuna ni apostol Pedro maipapan iti kinaanus ti Dios: “Saan a nabannayat ni Jehova maipapan iti karina, kas ti panangibilang ti dadduma a tattao a kinabannayat, no di ket an-anusannakayo agsipud ta saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.”​—2 Pedro 3:9, 10, 13.

Umiso a Panagur-uray

Intuloy a kinuna ni Pedro: “Yantangay marunawto a kasta dagitoy amin a banag, anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova!” (2 Pedro 3:11, 12) Paliiwenyo ta bayat nga ur-urayentayo ti aldaw ni Jehova, rumbeng nga ipakitatayo ti “nasantuan a panagbiag ken ar-aramid ti nadiosan a debosion”​—agbalin nga aktibo, saan nga agsardeng nga agtrabaho.

Wen, ti umiso a panaguray mangiparangarang iti naan-anay a panagtalek nga umay ti aldaw ni Jehova iti eksakto a kanito a pinanggepna. Ti kasta a pammati patanorenna ti nasantuan a panagbiag ken ar-aramid ti nadiosan a debosion, a ti kangrunaan kadagitoy isu ti panangikasaba iti naimbag a damag ti Pagarian ti Dios. Nangipaay ni Jesus iti nasayaat nga ulidan iti panangasaba, ket insurona kadagiti napulotan a pasurotna: “Mabariksan koma dagiti lomoyo ken sigagangat dagiti pagsilawanyo, ket dakayo agbalinkayo a kas kadagiti tattao nga agur-uray iti apoda inton agsubli manipud iti kasar, tapno iti idadatengna ken panagtuktokna madagdagus nga ilukatanda. Naragsak dagidiay adipen nga iti idadateng ti apoda masarakanna ida nga agbambantay!”​—Lucas 12:35-37.

Dagiti adipen idi umuna a siglo ‘bariksanda dagiti lomoda’ babaen ti panangkayumkom kadagiti kawesda sada bariksan tapno nawaya ti panagtrabahoda. No kasta, ti maysa a Kristiano masapul a napinget ken naregta kadagiti naimbag nga ar-aramid. Masapul a lapdanna  ti aniaman a ‘panagpallailang’ kadagiti naespirituan nga ar-aramid, a nalabit usarenna ti pigsana kadagiti ragragsak wenno iti pananggun-od kadagiti material a bambanag. Imbes ketdi, ‘aduan koma ti aramiden iti trabaho ti Apo’ bayat nga ur-urayenna ti naindaklan ken nakaam-amak nga aldaw ni Jehova.​—Roma 12:11; 1 Corinto 15:58.

Aktibo Bayat nga Agur-uray

Okupado dagiti Saksi ni Jehova bayat nga ur-urayenda ti aldaw ni Jehova. Kas pagarigan, idi 2003 a tawen serbisio, binusbosda ti promedio a 3,383,000 nga oras kada aldaw a nangikasaba iti sao ni Jehova. Agasenyo, dayta a gapuanan iti maysa nga aldaw ket maaramid ti maysa a tao no awan sardayna a mangasaba iti uneg ti 386 a tawen!

Nupay kasta, naimbag no imtuodentayo ti bagitayo, ‘Ania ti kababalinko nga agur-uray?’ Nangted ni Jesus iti pangngarig a mangiladawan iti kinagaget a manamnama kadagiti matalek a napulotan a Kristiano. Dinakamatna ti tallo nga adipen: “Iti daydiay maysa isu [ti apoda] nangted iti lima a talento, iti sabali dua, iti sabali pay maysa, iti tunggal maysa sigun iti bukodna a kabaelan, ket isu napan iti sabali a daga. Dagus a daydiay immawat iti lima a talento napan ket pinagnegosiona ida ket nakagun-od iti lima pay. Iti isu met laeng a pamay-an daydiay immawat iti dua nakagun-od iti dua pay. Ngem daydiay immawat iti maysa laeng napan, ket nagkali iti daga ket inlemmengna ti pirak a kuarta ni apona. Kalpasan ti nabayag a tiempo immay ti apo dagidiay nga adipen ket nakikuenta kadakuada.”​—Mateo 25:15-19.

Amin dagiti tallo nga adipen nagurayda iti panagsubli ti apoda. Kastoy ti naibaga kadagiti dua a nagbalin nga okupado bayat nga agur-uray iti isasangpet ti apoda: “Nasayaat unay, naimbag ken matalek nga adipen!” Ngem, naiduma ti pannakatrato daydiay nagpamayan a naguray. Kinuna ti apona: “Ipalladawyo ti awan kaes-eskanna nga adipen iti sipnget iti ruar.”​—Mateo 25:20-30.

Nupay agaplikar daytoy a pangngarig kadagiti napulotan a Kristiano, adda leksion para kadatayo amin aniaman ti namnamatayo. Namnamaen ti Apotayo a ni Jesu-Kristo a sigagaget nga agserbi kenkuana ti tunggal maysa kadatayo bayat nga ur-urayentayo a dumteng ti naindaklan nga aldaw ni Jehova. Apresiarenna ti magapuanan ti tunggal maysa “sigun iti abilidad” ken  kasasaadna. Maragsakantayto a makangngeg iti komendasion a “nasayaat unay” manipud iti Apo inton malpasen ti panagur-uray!

Pannakaisalakan ti Kaipapanan ti Kinaanus ti Apotayo

Ania ngay no nagpaut daytoy a sistema ti bambanag ngem ti impagaruptayo wenno ninamnamatayo? Adda rason no apay. Insurat ni apostol Pedro: “Ibilangyo ti kinaanus ni Apotayo kas pannakaisalakan.” (2 Pedro 3:15) No umiso ti pannakaammotayo iti panggep ti Dios ken no sipapakumbaba a bigbigentayo a dagiti panggep ti Dios ket napatpateg ngem kadatayo, mabalinantayo ti aganus a kas ken ni Jehova agingga iti maitutop a tiempo a panangdadaelna iti daytoy daan a sistema.

Tapno maparegta nga aganus dagiti Kristiano, nangted iti ilustrasion ti mannurat iti Biblia a ni Santiago. Insuratna: “Adtoy! Ti mannalon agtultuloy nga agur-uray iti napateg a bunga ti daga, a watwatwatenna ti kinaanus iti dayta agingga a magun-odna ti nasapa a tudo ken ti naladaw a tudo. Watwatenyo met ti kinaanus; patibkerenyo ti puspusoyo, agsipud ta ti kaadda ti Apo ket immasidegen.”​—Santiago 5:7, 8.

Saan a kayat ni Jehova a mabannog wenno sumukotayo bayat nga agur-uraytayo. Adda trabaho nga ipapaaramidna kadatayo ket maay-ayo no sigagaget nga aramidentayo dayta bayat nga agur-uraytayo. Kayatna a maibilangtayo kadagidiay dinakamat ni apostol Pablo iti suratna kadagiti Hebreo: “Tarigagayanmi a tunggal maysa kadakayo mangipakita iti isu met laeng a kinagaget tapno maaddaan iti naan-anay a pammasiguro iti namnama agingga iti panungpalan, tapno saankayo nga agbalin a nabuntog, no di ket agbalin a tumutulad kadagidiay a babaen ti pammati ken kinaanus tawidenda dagiti kari.”​—Hebreo 6:11, 12.

Gapuna, saantayo koma a mabannog. Imbes ketdi, ti personal a relasiontayo ken ni Jehova a Dios, ti pammatitayo iti pangsubbot a daton ni Jesus, ken ti naraniag a namnama iti baro a sistema ti kanayon koma a mangpabileg kadatayo. Kas iti “naimbag ken matalek” nga adipen iti pangngarig ni Jesus, sapay koma ta paneknekantayo a maikaritayo iti komendasion ken gunggona babaen ti panagtalinaedtayo nga okupado a mangidaydayaw iti Diostayo, kas inaramid ti salmista a nagkuna: “No maipapan kaniak, agurayakto a patinayon, ket nayonakto ti isuamin a pakaidaydayawam.”​—Salmo71:14.

[Ladawan iti panid 21]

Gapu ta naupay, naguray ni Jonas tapno makitana no ania ti mapasamak iti Nineve

[Dagiti Ladawan iti panid 22, 23]

Iparangarangtayo ti nadiosan a debosion bayat nga ur-urayentayo ti aldaw ni Jehova