“Dagiti Naemma Tawidendanto ti Daga”​—Kasano?

“NALABIT a pagaammom ti makaliwliwa a sasao ni Jesus a ‘dagiti naemma tawidendanto ti daga.’ Ngem gapu kadagiti ar-aramiden dagiti tattao iti padada ken iti daga, ania pay koma ti mabalin a tawiden dagiti naemma?”​—Mateo 5:5; Salmo 37:11, King James Version.

Kasta ti inyimtuod ni Myriam, maysa kadagiti Saksi ni Jehova, kas panangirugi iti pannakipatangna maipapan iti linaon ti Biblia. Insungbat ti lalaki a nakasaona a no ni Jesus ti nangikari iti dayta, ti daga ket talaga a makuna a maysa a tawid imbes a maysa laeng a langalang wenno di mapagnaedan a rebbek.

Talaga a positibo dayta a sungbat. Ngem adda kadi pakaibatayan ti kasta a positibo a panangmatmat? Talaga nga adda, ngamin ipaayannatayo ti Biblia kadagiti nabileg a rason tapno mamati a matungpal dayta a kari. Kinapudnona, ti kaitungpalan dayta a kari ket nainaig unay iti panggep ti Dios agpaay iti sangatauan ken iti daga. Ken naipanamnama kadatayo nga itungpal ti Dios dagiti panggepna. (Isaias 55:11) Ania ngarud ti orihinal a panggep ti Dios agpaay iti sangatauan, ken kasano a naan-anay a maibanag dayta?

Ti Agnanayon a Panggep ti Dios Agpaay iti Daga

Ni Jehova a Dios pinarsuana ti daga gapu iti maysa nga espesipiko a panggep. “Daytoy ti kinuna ni Jehova, ti Namarsua iti langlangit, Isu ti pudno a Dios, ti Nangporma iti daga ken ti Nangaramid iti dayta, Isu Daydiay sititibker a nangipasdek iti dayta, a saanna a pinarsua a maipaay laeng iti awan kapapay-anna, a nangbukel iti dayta tapno mapagnaedan a mismo: ‘Siak ni Jehova, ket awanen ti sabali.’” (Isaias 45:18) Gapuna, ti espesipiko a panggep a naparsua ti daga ket tapno pagnaedan ti tao. Kanayonanna, panggep ti Dios a ti daga ket agnanayon a pagtaengan ti sangatauan. “Imbangonna ti daga kadagiti naipasdek a dissona; saanto a mapagdiwengdiweng dayta agingga iti tiempo a di nakedngan, wenno iti agnanayon.”​—Salmo 104:5; 119:90.

Ti panggep ti Dios mainaig iti daga ket nagminar met iti annongen nga imbilinna iti umuna a pagassawaan. Kinuna ni Jehova kada Adan ken Eva: “Agbungakayo ken agadukayo ket punnuenyo ti daga ken parukmaenyo, ket pagpasakupenyo dagiti ikan iti baybay ken dagiti agtaytayab a parsua iti langlangit ken tunggal sibibiag a parsua nga aggargaraw iti rabaw ti daga.” (Genesis 1:28) Ti daga, nga intalek ti Dios kada Adan ken Eva, ket nairanta nga agnanayon a pagtaenganda ken dagiti kaputotanda. “No maipapan iti langlangit, kukua ni Jehova ti langlangit,” kinunana ti salmista adun a siglo ti napalabas, “ngem ti daga intedna iti annak ti tattao.”​—Salmo 115:16.

 Tapno dayta a nakaskasdaaw a namnama ket matagiragsak da Adan ken Eva, agraman dagiti annakda, masapul a tunggal maysa kadakuada bigbigenna ni Jehova a Dios, ti Namarsua ken Manangted-Biag, kas ti Soberanoda ken sidadaan nga agtulnogda kenkuana. Imbatad daytoy ni Jehova idi imbilinna iti tao: “Manipud iti tunggal kayo iti minuyongan mabalinmo ti agpennek a mangan. Ngem no maipapan iti kayo ti pannakaammo iti naimbag ken dakes dika mangan manipud iti dayta, ta iti aldaw a manganka manipud iti dayta mataykanto a di bumurong.” (Genesis 2:16, 17) Tapno agtultuloy nga agnaed da Adan ken Eva iti minuyongan ti Eden, masapul nga agtulnogda iti dayta simple ken nalawag a bilin. Ti panangaramid iti dayta ket ebkas ti panagyamanda kadagiti amin nga inaramid ti nailangitan nga Amada.

Idi a sipapakinakem a nagsukir da Adan ken Eva maibusor iti Dios babaen ti panangsalungasingda iti naibilin kadakuada, kaipapananna a linaksidda daydiay nangited iti amin nga ik-ikutanda. (Genesis 3:6) Gapu iti dayta, napukawda ti napintas a Paraiso a pagnaedanda koma ken dagiti agbalin a kaputotanda. (Roma 5:12) Ti kadi panagsukir ti umuna a pagassawaan ti manglapped iti panggep ti Dios iti panangparsuana iti daga?

Saan a Nagbalbaliw a Dios

Babaen ti propetana a ni Malakias, impakaammo ti Dios: “Siak ni Jehova; saanak a nagbaliw.” (Malakias 3:6) Maipapan iti daytoy a bersikulo, ti Pranses nga eskolar ti Biblia a ni L. Fillion kinunana a dayta a deklarasion ket nainaig unay iti kaitungpalan dagiti kari ti Dios. “Mabalin koma a dinadael ni Jehova ti rebelioso nga ilina,” insurat ni Fillion, “ngem gapu ta saan nga agbalbaliw no maipapan kadagiti karina, salimetmetanna dagidi inkarina aniaman ti mapasamak.” Dagiti kari ti Dios, iti man maysa a tao, iti maysa a nasion, wenno iti intero a sangatauan, saannanto a lipaten no di ket ibanagna iti umiso a tiempona. “Linagipna ti tulagna agingga a mismo iti tiempo a di nakedngan, ti sao nga imbilinna, agingga iti sangaribu a kaputotan.”​—Salmo 105:8.

Ngem kasano a masiguradotayo a saan a binaliwan ni Jehova ti orihinal a panggepna no maipapan iti daga? Masiguradotayo dayta agsipud ta iti amin a paset ti naipaltiing a Sao ti Dios, ti Biblia, nadakamat ti panggep ti Dios nga itedna ti daga iti natulnog a sangatauan. (Salmo 25:13; 37:9, 22, 29, 34) Kanayonanna, ti Kasuratan dineskribirna dagidiay binendisionan ni Jehova kas agtataeng iti kinatalged, tunggal maysa agtugtugaw “iti sirok ti puon ti  ubasna ken iti sirok ti kayona a higos,” nga “awanto ti asinoman a mamagpigerger kadakuada.” (Mikias 4:4; Ezequiel 34:28) Dagidiay pinili ni Jehova “pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada.” Tagiragsakendanto ti talna uray kadagiti atap nga animal.​—Isaias 11:6-9; 65:21, 25.

Iti sabali pay a pamay-an, ti Biblia mangipaay iti pamalatpatan mainaig iti kari ti Dios. Bayat ti panagturay ni Ari Solomon, natalna ken narang-ay ti nasion ti Israel. Iti sidong ti panangiturayna, “ti Juda ken ti Israel nagtultuloy nga agnaed iti kinatalged, tunggal maysa iti sirok ti bukodna a puon ti ubas ken iti sirok ti bukodna a kayo a higos, manipud Dan agingga idiay Beer-seba, iti amin nga al-aldaw ni Solomon.” (1 Ar-ari 4:25) Kuna ti Biblia a ni Jesus ket “nangnangruna ngem ni Solomon,” ken no maipapan iti panagturayna, naimpadtuan nga impakaammo ti salmista: “Iti al-aldawna agtubonto daydiay nalinteg, ken ti kinaruay ti talna agingga nga awanen ti bulan.” Iti dayta a tiempo, “maaddanto ti naruay a bukbukel iti daga; iti tapaw dagiti bantay addanto ti panaglaplapusanan.”​—Lucas 11:31; Salmo 72:7, 16.

Gapu ta matalek iti saona, siguraduen ni Jehova a Dios a saan laeng a magun-od ti naikari a tawid no di ket maisubli ti amin a kinangayedna. Iti Apocalipsis 21:4, ibaga kadatayo ti Sao ti Dios nga iti naikari a baro a lubong, ti Dios “punasennanto ti amin a lua kadagiti mata [ti tattao], ket awanton ni patay, awanto metten ti panagleddaang wenno panagsangit wenno ut-ot.” Talaga a maysanto a Paraiso dayta a naikari.​—Lucas 23:43.

No Kasano a Magunggonaan iti Naikari a Tawid

Agbalinto a paraiso ti daga iti sidong ti maysa a gobierno nga agturay manipud langit, maysa a Pagarian a ni Jesu-Kristo ti Ari. (Mateo 6:9, 10) Umuna, dayta a Pagarian ‘dadaelenna dagidiay mangdaddadael iti daga.’ (Apocalipsis 11:18; Daniel 2:44) Kalpasanna, kas ti “Prinsipe ti Kappia,” ibanag ni Jesu-Kristo daytoy a padto: “Ti kinaruay ti naprinsipean a panagturay ken ti kappia awanto ti ngudona.” (Isaias 9:6, 7) Iti sidong ti Pagarian, minilion a tattao, agraman dagidiay mapagungar, maaddaandanto iti gundaway a mangtawid iti daga.​—Juan 5:28, 29; Aramid 24:15.

Siasinonto dagiti mangtagiragsak iti dayta a naisangsangayan a tawid? Usigenyo dagiti sasao  ni Jesus: “Naragsak dagiti naalumamay ti kababalinda, yantangay tawidendanto ti daga.” (Mateo 5:5) Ania ti kaipapananna ti panagbalin a naalumamay, wenno naemma? Dagiti diksionario kaaduanna a depinarenda ti “naemma” wenno “naalumamay,” kas naamo, namayamay, managpasakup, kalmado, managbuteng pay ketdi. Ngem naun-uneg pay ti kaipapanan ti orihinal a Griego a sao a nausar. Ipasimudaag dayta a sao ti “kinaamo,” kuna ti New Testament Wordbook ni William Barclay, “ngem iti likudan dayta a kinaamo, adda kinatibker a kas iti asero.” Ipasimudaagna ti panagpampanunot a tumulong iti tao a mangibtur iti pannakadangran a di agsakit ti nakemna wenno agpanggep nga agibales, gapu ta nasayaat ti relasionna iti Dios, ket dayta a relasion ti gubuayan ti bilegna.​—Isaias 12:2; Filipos 4:13.

Ti maysa a naemma sipapakumbaba nga awatenna dagiti pagalagadan ti Dios iti amin nga aspeto ti personal a biagna; saanna nga ipilit nga aramiden no ania ti kayatna wenno no ania ti kapanunotan dagiti sabsabali. Nalaka met a maisuro, a situtulok nga agpaisuro ken ni Jehova. Insurat ni salmista a David: “Dagidiay naemma papagnaento [ni Jehova] iti hudisial a pangngeddengna, ket kadagidiay naemma isuronanto ti dalanna.”​—Salmo 25:9; Proverbio 3:5, 6.

Maysakanto kadi kadagidiay “naemma” a mangtawid iti daga? No am-ammuem ni Jehova ken ti pagayatanna babaen ti naanep a panangadal iti Saona ken no iyaplikarmo dagiti maad-adalmo, mainanamam met a maysaka kadagiti agtawid iti paraiso a daga ken agbiag nga agnanayon iti dayta.​—Juan 17:3

[Ladawan iti panid 5]

Ti panggep ti Dios ket nagminar iti annongen nga imbilinna kada Adan ken Eva

[Ladawan iti panid 6, 7]

Ti talna ken kinatalged ti turay ni Solomon nangipaay iti pamalatpatan no ania ti naikari a tawid

[Credit Lines]

Karnero ken turod: Pictorial Archive (Near Eastern History) Est.; oryx ti Arabia: Hai-Bar, Yotvata, Israel; agar-arado a mannalon: Garo Nalbandian

[Ladawan iti panid 7]

Mapaspasungadanen ti nalinteg a baro a lubong​—addakanto kadi sadiay?