Inranudna ti Patpatienna Kadagiti Kaklasena

KAYATMO kadi a tulongan dagiti kaklasem tapno ad-adda a maawatanda dagiti patpatiem a naibatay iti Biblia? Ni Magdalena, nga agtawen iti 18 ken estudiante ti haiskul idiay Poland, masansan nga isaritana kadagiti kaklasena ti maipapan iti patpatienna kas maysa kadagiti Saksi ni Jehova. Kas resultana, masansan a mayimtuod kenkuana dagiti saludsod nga ‘Ania ti ramanen ti panagbalin a Saksi ni Jehova?’ ken ‘Saanka kadi a mamati ken ni Jesu-Kristo?’ Kasanona a tulongan dagiti kaklasena? Nagkararag ni Magdalena ken ni Jehova tapno maiwanwan sa nagtignay maitunos kadagiti kararagna.​—Santiago 1:5.

Naminsan, kiniddaw ni Magdalena iti mannakaawat a maestrana no mabalinna nga ipabuya iti klase ti video a Jehovah’s Witnesses​—The Organization Behind the Name. * Immannugot ti maestra. Isu a kinuna ni Magdalena kadagiti kaklasena: “Adda kinatungtongko a gayyem a mangiparang iti 90-minuto a programa iti klase. Karaman ti panangipabuya iti video ken diskusion maipapan kadagiti Saksi ni Jehova. Kayatyo kadi ti umay?” Immannugot ti amin. Para iti dayta a programa, nagsagana da Magdalena ken Wojciech, maysa nga aduan kapadasan nga amin-tiempo nga ebanghelisador.

Naiplano a maluktan ti programa babaen ti 20-minuto a palawag a naibatay iti broshur a Dagiti Saksi ni Jehova​—Siasinoda? Ania ti Patpatienda? * a sarunuen ti saludsod ken sungbat a diskusion. Kalpasanna, maipabuya ti video iti libraria ti eskuelaan. Tunggal estudiante iti klase ket maipaayan iti sagut​—maysa a dakkel a sobre a naglaon iti sumagmamano a broshur, tract, magasin, ken ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo. *

Iti aldaw ti presentasion, immay ti 14 a kaklase, ti mannursuro, ken uppat pay a dadduma nga estudiante a nairana nga adda iti libraria. Umuna, inlawlawag ni Wojciech nga adu a Polaco a mannaniw ken mannurat ti nangusar iti nagan ti Dios a Jehova kadagiti publikasionda. Dinakamatna met ti dadduma a daan a katekismo ti Katoliko a nakailanadan ti nagan ti Dios. Iti panangilawlawagna iti agdama nga aktibidad dagiti Saksi ni Jehova, impakitana dagiti broshur a nangitampok iti nagduduma a sanga nga opisina ken retrato ti adu nga Assembly Hall.

Simmaruno ti maysa a narayray a diskusion. Da Magdalena ken Wojciech inusarda ti Biblia a nangsungbat kadagiti saludsod. Natukay ti rikna dagiti agdengdengngeg ken nakombinsirda a saan a ti bukod a kapanunotan dagiti Saksi ni Jehova ti ikaskasabada. Ania ti dadduma kadagiti saludsod, ken ania ti insungbatda?

Saludsod: Adu ti nauneg a sasao ken metapora iti Biblia, a mabalin a tarusan iti adu a pamay-an. Kasano ngarud a posible ti agbiag a maitunos iti Biblia?

Sungbat: Adda dagiti mangibaga a ti Biblia ket kasla maysa a biolin a mabalinmo a tokaren ti aniaman a sonata a kayatmo. Ngem panunotem: No kayatmo a maammuan no ania ti kayat a sawen ti mannurat iti imbagana, saan kadi a kasayaatan no imtuodem kenkuana? Saan a kas kadagiti natayen a mannurat kadagiti sekular a  libro, sibibiag ti Autor ti Biblia, ni Jehova a Dios. (Roma 1:20; 1 Corinto 8:5, 6) Ti konteksto ti maysa a kasuratan ti mangibaga no ania ti umiso a kaipapananna. Kanayonanna, masansan a saritaen ti Biblia ti isu met laeng a suheto a masarakan iti nagduduma a bennegna, isu a makatulong ti panangidilig kadakuada. Iti kasta, ti Dios ti mangiwanwan iti panunottayo, a kasla isu a mismo ti mangilawlawag iti kasuratan. Babaen ti panangaramid iti dayta, maammuantayo ken makapagbiagtayo a maitunos iti pagayatanna kas naipalgak iti Biblia, saan aya?

Saludsod: Ania ti nagdumaan dagiti Kristiano ken dagiti Saksi ni Jehova?

Sungbat: Kristianokami! Ngem imbes a basta kunaenmi a Kristianokami, dagiti Saksi ni Jehova ikagkagumaanda ti agbiag a maitunos iti patpatienda ken iti isursuro kadakuada ti Dios a pagimbaganda. (Isaias 48:17, 18) Yantangay naibatay iti Biblia ti amin a sursuroda, ammoda nga adda kadakuada ti kinapudno.​—Mateo 7:13, 14, 21-23.

Saludsod: Apay nga asitganyo ti diyo pulos am-ammo ket idagadagyo a dumngegda kadakayo? Saan kadi a panangpilit dayta tapno sumurotda iti pammatiyo?

Sungbat: Tagidaksenyo kadi no adda sidadayaw nga umasideg kadakayo iti lansangan ket iyimtuodna no ania ti kapanunotanyo iti maysa a banag? (Jeremias 5:1; Sofonias 2:2, 3) (Kalpasanna, indemostra da Wojciech ken Magdalena no kasanoda nga agimtuod kadagiti lumablabas no maseknan ti Dios kadagidiay nalayus iti nabiit pay idiay Poland.) Kalpasan a mangngegmi ti kapanunotan ti tao, ibasaanmi iti Biblia. No adda ti agkedked a makisarita, nainggayyeman nga agpakadakami ket mapankami iti sabali. (Mateo 10:11-14) Panangpilit kadi dayta kadagiti sabsabali tapno makisarita? Wenno rumbeng kadi a saanen a pulos a makisarita dagiti tattao?

Saludsod: Apay a diyo rambakan dagiti nangina nga aldaw?

Sungbat: Rambakanmi ti kakaisuna a pasken nga imbilin ti Biblia nga angayenmi​—ti Panglaglagip iti ipapatay ni Jesu-Kristo. (1 Corinto 11:23-26) No maipapan kadagiti nangina nga aldaw, mabalinyo nga ammuen ti nagtaudan dagita babaen ti panagsirarakyo kadagiti ensiklopedia ken dadduma pay a mapagtalkan a reperensia. No aramidenyo dayta, nalaka la a maawatanyo no apay a saanmi a rambakan ti aniaman kadagita a pasken.​—2 Corinto 6:14-18.

Adu pay a saludsod ti nayimtuod ken nasungbatan. Nagpaut ti diskusion isu a naitantan ti pannakaipabuya ti video.

Ania ti reaksion dagiti estudiante? Bay-antayo a ni Magdalena ti mangibaga: “Nasorpresaak ta serioso a nagimtuod ti dadduma nga estudiante a masansan a mangrabak ken mangumsi kadagiti sabsabali. Nupay kunada nga ateistada, bayat dayta a diskusion, inyebkasda a mamatida iti Dios!” Dagidiay timmabuno siyayaman nga inawatda dagiti naipaima kadakuada a sagut​—a pakabuklan a 35 a libro, 63 a broshur, ken 34 a magasin.

Anian a nagsayaat a resulta ti maysa a nayurnos a programa iti eskuelaan! Saanna laeng a tinulongan dagiti kaklase ni Magdalena tapno ad-adda a maam-ammo ken matarusanda dagiti Saksi ni Jehova no di ket pinaregtana met ti adu kadagiti agtutubo a mangusig iti panggep ti biag. Apay a diyo ikagumaan a tulongan dagiti kaklaseyo a mangadal iti ad-adu pay maipapan iti patpatienyo?

[Footnote]

[Ladawan iti panid 31]

Ti panagsagana da Magdalena ken Wojciech para iti diskusion