Maysa a Tawid a Mapangnamnamaanyo

“NO NAKAAWATKA iti pakaammo nga adda agur-uray a tawidmo, agannadka. Mabalin a puntirianaka ti maysa a nasikap a manangallilaw.”

Dayta ti ballaag iti Web site ti United States Postal Inspection Service. Apay? Agsipud ta rinibu a tattao ti nakaawat iti koreo a mangibagbaga, ‘Natay ti maysa a kabagiam ket adda impatawidna kenka.’ Kas resultana, adu ti naallilaw a nangipatulod iti $30 wenno dakdakkel pay kas bayad tapno maipakaammo no ayanna dayta a tawid ken no kasano a magun-od. Ngem anian ti pannakaupayda. Agpapada a report ti naawat dagiti nagbayad​—bugos ti namnamaenda a tawid.

Epektibo dagiti kasta a kinasikap yantangay natural a tarigagayan ti tao ti maaddaan iti tawid. Kaskasdi, anamongan ti Biblia dagidiay mangipaay iti tawid idi kunana: “Ti maysa a naimbag mangibatinto iti tawid iti annak ti annak.” (Proverbio 13:22) Kinapudnona, ni Jesu-Kristo a mismo ti naggapuan daytoy a nalatak ken nagpateg a sasao iti Sermonna iti Bantay: “Naragsak dagiti naalumamay ti kababalinda, yantangay tawidendanto ti daga.”​—Mateo 5:5.

Dagiti sasao ni Jesus ipalagipda ti naipaltiing a surat ni David nga ari iti nagkauna nga Israel sinigsiglon ti napalabas: “Dagiti naemma tawidendanto ti daga; ken maragsakandanto gapu iti kinaruay ti talna.”​—Salmo 37:11, King James Version.

‘Panangtawid iti daga’​—anian a makapagagar a namnama! Ngem masiguradotayo kadi a saan a nasikap a panangallilaw dayta? Wen, masiguradotayo. Yantangay ti daga ket paset ti nakaskasdaaw a parsua ni Jehova, adda legal a kalinteganna kas ti Namarsua ken Agtagikua a mangipatawid iti dayta iti siasinoman a pilienna. Babaen ken ni Ari David, kastoy ti naipadto a kari ni Jehova iti dungdungnguenna nga Anak, ni Jesu-Kristo: “Agkiddawka kaniak, tapno maitedko ti nasnasion kas tawidmo ken dagiti ungto ti daga kas bukodmo a sanikua.” (Salmo 2:8) Gapu iti dayta, ni apostol Pablo dineskribirna ni Jesus kas daydiay “dinutokan [ti Dios] nga agtawid iti amin a bambanag.” (Hebreo 1:2) Naan-anay ngarud a makapagtalektayo a napudno ni Jesus idi kinunana a dagiti naemma “tawidendanto ti daga,” ken autorisado a mangitungpal iti karina.​—Mateo 28:18.

Nagpateg ngarud nga iyimtuod, Kasano a pumudno dayta a kari? Iti sadinoman, agparang a dagiti agresibo ken natangsit ti ad-adda a naballigi ken makagun-od iti kayatda. Ania pay koma ti tawiden dagiti naemma?  Kanayonanna, madiddidigra ti daga kadagiti nakaro a parikut iti polusion, ken siaagum ken simamaag a sinamsam ti tattao dagiti kinabaknangna. Addanto pay kadi mabati a matawid ditoy daga? Awisendakayo a mangbasa iti sumaganad nga artikulo tapno masungbatanyo dagitoy ken ti dadduma pay a napateg a saludsod.

[Ladawan iti panid 3]

Umawatkayto ngata iti pudpudno a tawid?