Saan Laeng nga Ay-ayam

PAGAY-AYAT dagiti ubbing ti agay-ayam. Ngem “adda kapapay-anna dayta,” inlawlawag ti libro a The Developing Child. “Dayta ti aktibidad a kangrunaan a mangparang-ay iti panangmatmat ti ubing.” Babaen ti panagay-ayam, masursuro dagiti ubbing ti mangusar kadagiti sentidoda, mangtarus iti aglawlawda, ken makilangen kadagiti sabsabali.

No agtawenda iti uppat wenno lima, mangrugi dagiti ubbing nga agakto a nataengan kas paset dagiti ay-ayamda. Naminsan, nadakamat ni Jesus dagiti agaayam nga ubbing. Adda dagiti mayat a mangyakto iti “panagkasar,” dagiti dadduma kayatda nga iyakto ti “pamumpon,” ken kas masansan nga aramiden dagiti ubbing, agsusupiatda agsipud ta adda dagiti di mayat a makipaset. (Mateo 11:16, 17) Makatulong daytoy a kita ti panagay-ayam tapno dagiti napapateg nga akem iti biag ket maipasagepsep iti panunot ti rumangrang-ay nga ubing.

Ti ladawan iti daytoy a panid ipakitana dagiti ubbing nga agak-akto kas mangyad-adal ken mayad-adalan iti Biblia. Maysa la daytoy nga ay-ayam, ngem nalawag iti panunotda ti ideya a panangiranud iti mensahe ti Biblia. Ken napateg daytoy a leksion, agsipud ta imbilin ni Jesus kadagiti amin a pasurotna a mangaramidda iti adalan ken isuroda dagiti tattao a tungpalenda dagiti amin nga imbilinna kadakuada.​—Mateo 28:19, 20.

Rumbeng laeng a maragsakan dagiti nagannak no kaay-ayo dagiti annakda nga iyakto ti panangyadal iti Biblia, panagpalawag, wenno panangasaba iti binalaybalay. Dagiti ubbing natural a tuladenda ti mapaliiwda nga ar-aramiden dagiti adulto. Dagiti ay-ayamda mainaig kadagiti naespirituan a bambanag ipasimudaagna a mapadpadakkelda “iti kita ti panangisuro ken pammagbaga nga anamongan ti Apo.”​—Efeso 6:4, Charles B. Williams.

Tarigagayan ni Jehova a makipaset dagiti ubbing iti pudno a panagdayaw. Imbilinna ken ni Moises a mairaman dagiti “ubbing” a dumngeg no maibasa ti Linteg. (Deuteronomio 31:12) No marikna dagiti ubbing a nairamanda, mabalin a mayanninaw dayta kadagiti ay-ayamda. Ken ti ubing nga agay-ayam kas maysa a ministro ti Dios ket mangar-aramid iti umuna nga addang tapno agbalinto a ministro.