Salsaludsod Dagiti Agbasbasa

Idi insurat ni apostol Juan a ti “naan-anay nga ayat paksiatenna ti buteng,” ania ti kayatna a sawen ti “naan-anay nga ayat,” ken ania ti “buteng” a mapaksiat?

“Awan ti buteng iti ayat,” insurat ni apostol Juan, “no di ket ti naan-anay nga ayat paksiatenna ti buteng, agsipud ta ti buteng agserbi a pangmedmed. Kinapudnona, ti adda iti sidong ti buteng saan a nagbalin a naan-anay iti ayat.”​—1 Juan 4:18.

Sigun iti konteksto, salsalaysayen ni Juan ti wayawaya nga agsao​—nangnangruna ti pakainaigan ti ayat iti Dios ken ti wayawaya a makisao Kenkuana. Ipamatmat dayta ti mabasatayo iti bersikulo 17: “Kastoy ti pannakaan-anay kadatayo ti ayat, tapno maaddaantayo iti wayawaya nga agsao iti aldaw a panangukom.” Ti kinauneg ti panagayat ti maysa a Kristiano iti Dios ken ti pannakariknana iti panagayat ti Dios kenkuana adda epektona iti wayawayana nga agsao​—wenno ti kinaawan dayta​—no umadani iti Dios babaen ti kararag.

Napateg ti ebkas a “naan-anay nga ayat.” Ti sao a “naan-anay” a nausar iti Biblia saanna a kanayon nga ipasimudaag ti naan-anay a kinaperpekto, no di ket relatibo no dadduma. Kas pagarigan, iti Sermonna iti Bantay, kinuna ni Jesus: “Masapul nga agbalinkayo a perpekto, a kas iti nailangitan nga Amayo a perpekto.” Ibagbaga ni Jesus kadagiti pasurotna a no dagidiay laeng mangay-ayat kadakuada ti ayatenda, saan a naan-anay ti ayatda, adda pagkuranganna, adda pakapilawanna. Naan-anay koma ti panagayatda babaen ti panangipategda uray kadagiti kabusorda. Umasping iti dayta, idi insurat ni Juan ti maipapan iti “naan-anay nga ayat,” sarsaritaenna ti maipapan iti naimpusuan, naan-anay a panagayat iti Dios, a mangsaklaw iti amin nga aspeto ti biag ti maysa a tao.​—Mateo 5:46-48; 19:20, 21.

No agkararag iti Dios, ammo ti Kristiano nga isu ket managbasol ken imperpekto. Nupay kasta, no naan-anay ti panagayatna iti Dios ken mariknana a naan-anay ti panagayat ti Dios kenkuana, dina panunoten nga isu ket makondenar wenno mailaksid. Imbes ketdi, siwayawaya a mangyebkas iti adda iti pusona ken dumawat iti pammakawan maibatay iti pangsubbot a daton a siaayat nga impaay ti Dios babaen ken Jesu-Kristo. Natalged ti riknana nga ipangag ti Dios dagiti ararawna.

Kasano a ti maysa a tao “agbalin a naan-anay iti ayat” ket iti kasta ‘paksiatenna’ ti panagamak a makondenar wenno mailaksid? “Siasinoman a mangtungpal iti saona [ti Dios], pudno unay nga iti daytoy a tao nagbalin a naan-anay ti ayat ti Dios,” kinuna ni apostol Juan. (1 Juan 2:5) Usigenyo: No inayatnatayo ti Dios idi managbasoltayo pay laeng, saan kadi nga ad-adda nga ayatennatayo no pudno nga agbabawitayo ken sipapasnek a ‘tungpalentayo ti saona’? (Roma 5:8; 1 Juan 4:10) Kinapudnona, no la ketdi ta agtalinaedtayo a matalek, maaddaantayo iti kompiansa a kas ken apostol Pablo idi kinunana maipapan iti Dios: “Daydiay saan a nangipaidam uray pay ti bukodna nga Anak no di ket inyawatna a maipaay kadatayo amin, apay a saannanto a siaasi nga ipaay met kadatayo mairaman kenkuana ti amin a dadduma a bambanag?”​—Roma 8:32.