Report Dagiti Manangiwaragawag iti Pagarian

Surat ni Alejandra

TI PANAGSURAT ket nabayagen nga epektibo a pamay-an iti panangasaba. Nupay saan a kanayon a sigurado ti resultana, sibabaknang a nabendisionan dagidiay nangitultuloy iti dayta a pamay-an. Malagipda ti nainsiriban a balakad ti Biblia: “Iti bigat imulam ti bin-im ket agingga iti rabii saanmo a paginanaen ta imam; ta saanmo nga ammo no sadino nga agballiginto daytoy, no ditoy wenno sadiay, wenno no isuda a dua agpadadanto a naimbag.”​—Eclesiastes 11:6.

Ni Alejandra, maysa nga agkabannuag a Saksi nga agserserbi iti sanga nga opisina dagiti Saksi ni Jehova idiay Mexico iti agarup sangapulo a tawenen, ket maipaspasidong iti chemotherapy gapu iti sakitna a kanser. Gapu ta kimmaro ti kasasaadna, kimmapuy unay ket marigatanen a mangaramid iti inaldaw nga aktibidadna. Ngem gapu ta saanna a kayat a mabaybay-an ti ministeriona, nangasaba ni Alejandra babaen ti surat. Nagsurat maipapan iti urnos a libre a panagadal iti Biblia ken inlanadna ti numero ti telepono ni nanangna. Kalpasanna, intedna dagitoy a surat ken ni nanangna tapno maibati kadagiti pagtaengan dagiti tattao a di madanon iti panagbalaybalay ni nanangna.

Kabayatanna, manipud Guatemala, maysa a balasitang nga agnagan Diojany ti napan idiay Cancún, Mexico tapno agtrabaho kas babaonen. Adda dagiti naam-ammona a Saksi ni Jehova sadiay ket naragsakan iti pannakipatangna kadakuada maipapan iti linaon ti Biblia. Idi agangay, dagiti amona nga agassawa inkeddengda ti umakar idiay Siudad ti Mexico ket kayatda nga itugot ni Diojany. Bumdeng ni Diojany a sumurot agsipud ta saanna a kayat a mayadayo kadagiti Saksi.

“Dika madanagan,” kuna kenkuana dagiti amona, “addada Saksi iti sadinoman. Sapulentay ida apaman a makagtengtayo sadiay.” Gapu iti dayta, immannugot ni Diojany a sumurot kadakuada. Apaman a nakasangpetda idiay Siudad ti Mexico, nagsapul dagiti amona kadagiti Saksi. Gapu iti sumagmamano a rason, awan ti nasarakanda a Saksi, nupay adda ti nasurok a 41,000 a Saksi ken 730 a kongregasion iti siudad.

Di nagbayag, nangrugi a maupay ni Diojany gapu ta awan ti masarakanna a Saksi a makasaritana maipapan iti Biblia. Naminsan, inasitgan ti amona a babai, a kunkunana: “Adda sorpresak kenka! Dinengngeg ti Dios dagiti kararagmo.” Inyawatna ti surat ket kinunana: “Imbati dagiti Saksi daytoy a surat para kenka.” Dayta ket surat ni Alejandra.

Naam-ammo ni Diojany ti nanang ni Alejandra ken ti kabsatna, ni Blanca, ket nagpayadal iti Biblia. Kalpasan ti sumagmamano a lawas, nagkitada ken ni Alejandra ket kasta unay ti ragsakda a dua. Imparegta ni Alejandra nga itultuloyna nga iyaplikar ti maad-adalna iti Biblia tapno rumang-ay iti naespirituan.

Sumagmamano a bulan kalpasanna, idi Hulio 2003, pimmusay ni Alejandra, a nangibati kadagiti kapammatianna iti nasayaat nga ulidan ti pammati ken bileg. Iti pamumpon, adu ti natukay ti riknada idi naam-ammoda ni Diojany ken nangngegda a kunana: “Nagsayaat ti inyulidan kaniak ni Alejandra ken ti pamiliana. Determinadoak nga agserbi ken ni Jehova ken agbautisar iti di agbayag. Il-iliwek unay a makitanto manen ni Alejandra iti umad-adanin a Paraiso!”

Wen, mabalin a bassit laeng a banag ti surat. Ngem anian a nagsayaat ken manayon dagiti iyegna a resulta!