No Ania ti Basaen​—Ti Nainsiriban a Balakad ni Solomon

“TI PANAGARAMID iti adu a libro awan pagnguduanna, ket ti adu a debosion kadakuada makapakil iti lasag.” (Eclesiastes 12:12) Idi insuratna dagita a sasao agarup 3,000 a tawenen ti napalabas, ni Solomon nga ari ti Israel saanna nga up-upayen dagiti managbasa. Imbes ketdi, ibagbagana a nasken a pilien ti basaen. Anian a naintiempuan ita dayta a balakad, agsipud ta binilion a panid ti pagbasaan ti tinawen a mayim-imprenta iti sangalubongan!

Nabatad a saan a makapabileg wenno makapabang-ar dagiti “adu a libro” a tuktukoyen ni Solomon. Gapuna, inkalinteganna a ti debosion kadagita ket “makapakil iti lasag” imbes a mangipaay kadagiti nasayaat ken manayon a gunggona.

Ngem ibagbaga kadi ni Solomon nga awan dagiti libro a makaipaay iti makapasayaat, mapagtalkan a panangiwanwan a pagimbagan ti agbasbasa? Saan, agsipud ta insuratna: “Ti sasao dagidiay masirib kaslada kadagiti tirad a pagabug iti kapon a baka, ket dagidiay maigamgamer iti inummong a sarsarita kaslada kadagiti lansa a naipalok; isuda ket naited manipud iti maysa a pastor.” (Eclesiastes 12:11) Kinapudnona, adda dagiti naisurat a sasao a makaiwanwan kadatayo, a “kaslada kadagiti tirad a pagabug.” Maiturongda ti tao iti umiso a dalan. Kanayonanna, ‘kas kadagiti lansa a naipalok,’ pabilgenda ti determinasion ken mangpatalgedda.

Pakasarakantayo iti kasta a nainsiriban a sasao? Sigun ken ni Solomon, masarakan dagiti kasta a sasao kangrunaanna kadagidiay agtaud iti daydiay maysa a Pastor, ni Jehova. (Salmo 23:1) Gapuna, ti kasayaatan a libro a pakasarakan kadagiti nainsiriban a sasao ket ti libro nga impaltiing ti Dios​—ti Biblia. Ti regular a panangbasa kadagiti kasta a naipaltiing a sasao matulonganna ti maysa nga agbalin a “naan-anay a nakabalan maipaay iti tunggal naimbag nga aramid.”​—2 Timoteo 3:16, 17.