Salsaludsod Dagiti Agbasbasa

Apay a ni napagungar a Jesus kiniddawna ti panangsagid kenkuana ni Tomas idinto ta sakbayna, linapdanna ni Maria Magdalena a mangaramid iti kasta?

Iparipirip ti dadduma a dadaan a patarus ti Biblia a kinalikaguman ni Jesus ti saan a panangsagid kenkuana ni Maria Magdalena. Kas pagarigan, kastoy ti panangipatarus ti Naimbag a Damag Biblia iti sasao ni Jesus: “Dinak iggaman, ta diak pay nagsubli ken ni Ama.” (Juan 20:17) Ngem ti orihinal a Griego a sao, a kaaduanna a maipatarus “iggaman,” kaipapananna met “kumpet, aguy-oy, kumarapet, petpetan, tenglen.” Gapuna, saan a ti basta panangsagid kenkuana ni Maria Magdalena ti ipawil ni Jesus, agsipud ta di nagbayag kalpasanna, pinalubosanna ti dadduma a babbai nga adda iti aglawlaw ti pagtaneman nga ‘iggamanda dagiti sakana.’​—Mateo 28:9.

Makatulong ti adu a moderno a patarus, kas iti Baro a Lubong a Patarus ti Nasantuan a Kasuratan, The New Jerusalem Bible, ken The New English Bible, tapno matarusantayo ti umiso a kaipapanan dagiti sasao ni Jesus babaen ti kastoy a panangipatarusda: “Isardengmo ti kumpet kaniak.” Apay nga imbaga ni Jesus dayta ken ni Maria Magdalena, a maysa a nasinged kenkuana?​—Lucas 8:1-3.

Nabatad nga impagarup ni Maria Magdalena a pumanawen ni Jesus nga agsublin idiay langit. Gapu iti kasta unay a tarigagayna a makadua ti Apona, kimpet ken ni Jesus, ket dina kayat a palusposan. Tapno maipanamnamana a saan pay a pumanaw, binilin ni Jesus ni Maria nga isardengna ti kumpet kenkuana ken mapanna ketdi ipadamag kadagiti adalan ti maipapan iti panagungarna.​—Juan 20:17.

Naiduma ti saritaan da Jesus ken Tomas. Idi nagparang ni Jesus kadagiti dadduma nga adalan, awan ni Tomas. Idi agangay, pinagduaduaan ni Tomas ti panagungar ni Jesus, a kunkunana a saanna a patien dayta malaksid no makitana dagiti sugat ni Jesus a nakaipalokan ti lansa ken maiserrekna ti imana iti naduyok a bakrang ni Jesus. Kalpasan ti walo nga aldaw, nagparang manen ni Jesus kadagiti adalanna. Iti dayta a gundaway, adda ni Tomas, ket kiniddaw kenkuana ni Jesus a sagidenna dagiti sugatna.​—Juan 20:24-27.

Gapuna, iti kaso ni Maria Magdalena, nagtignay ni Jesus mainaig iti di umiso a pananglapped iti ipapanawna; iti kaso ni Tomas, tultulongan ni Jesus ti maysa nga agduadua. Kadagita a pasamak, nainrasonan dagiti tignay ni Jesus.