Ania a Pamuon ti Pagibangbangonam?

TI KINATIBKER ti maysa a pasdek agpannuray kangrunaanna iti pamuon, wenno pundasionna. Ti Biblia usarenna no dadduma daytoy a prinsipio iti piguratibo nga anag.

Kas pagarigan, ni propeta Isaias tukoyenna ni Jehova a Dios kas daydiay “nangisaad iti pamuon ti daga.” (Isaias 51:13) Daytoy a pundasion buklenna dagiti di agbaliwbaliw a linteg ti Dios a mangkonkontrol iti panaggaraw ti daga ken mangtengtengngel iti dayta iti lugarna. (Salmo 104:5) Ti Sao ti Dios, ti Biblia, saritaenna met ‘dagiti pamuon’ a pagbatbatayan ti kagimongan ti tao. Dagitoy isu ti hustisia, linteg, ken pammilin. No “marba,” wenno kumapuy dagitoy, babaen ti kinaawan hustisia, kinarinuker, ken kinaranggas, madadael ti urnos ti kagimongan.​—Salmo 11:2-6; Proverbio 29:4.

Agaplikar met daytoy a prinsipio kadagiti tattao kas indibidual. Iti ngudo ti nalatak a Sermonna iti Bantay, kinuna ni Jesu-Kristo: “Tunggal maysa a dumngeg kadagitoy a sasaok ket aramidenna ida mayaspingto iti masirib a lalaki, a binangonna ti balayna iti rabaw ti dakkel a bato. Ket nagbuyat ti tudo ken immay dagiti layus ket nagpuyupoy dagiti angin ken immablatda iti dayta a balay, ngem saan a narba, ta naibangon iti rabaw ti dakkel a bato. Kanayonanna pay, tunggal maysa a dumngeg kadagitoy a sasaok ket saanna nga aramiden ida mayaspingto iti maag a lalaki, a binangonna ti balayna iti rabaw ti darat. Ket nagbuyat ti tudo ken immay dagiti layus ket nagpuyupoy dagiti angin ken immablat iti dayta a balay ket narba, ket nakaro idi ti pannakarpuogna.”​—Mateo 7:24-27.

Iti ania a pamuon ti pangibangbangonam iti biagmo? Iti kadi nakapuy a kadaratan ti natauan a pilosopia a di mangikabkabilangan iti Dios, nga agresulta iti pannakarba? Wenno iti arig solido a kabatbatuan a panagtulnog kadagiti sasao ni Jesu-Kristo, a tumulong kenka a mangdaer kadagiti piguratibo a bagyo iti biag?