“Ti Tulongko Aggapu Ken ni Jehova”

Dagiti Pamilia a Pinabileg ti Pannakaammo iti Dios

TI “Berlin Wall.” Dayta ti impanagan ti agassawa idiay Argentina iti literal a diding nga inkabilda a manggudua iti balayda! Saanda nga agkatunosan; kagurgurada ti maysa ken maysa.

Makapaladingit ta saan a karkarna ti kasasaad dagita nga agassawa. Adu a pamilia ti agsagsagaba iti riribuk, pananggulib, ken agdadata a kinaulpit. Nakalkaldaang daytoy yantangay ti Dios a mismo ti nangipasdek iti pamilia kas maysa nga institusion. (Genesis 1:27, 28; 2:23, 24) Daytoy a sagut ti Dios ket nagsayaat nga urnos a pangipakitaan iti nauneg a panagayat. (Ruth 1:9) No aramidenda dagiti obligasion nga inted ti Dios kadakuada, dagiti kameng ti pamilia maidaydayawda ni Jehova ken agbalinda a bendision iti maysa ken maysa. *

Gapu ta ti Dios ti nangyussuat iti urnos ti pamilia, nasken a tuladentayo ti panangmatmatna no kasano ti rumbeng a panagandar dagiti pamilia. Mangipapaay ti Saona iti adu a praktikal a balakad a nairanta a tumulong kadagiti pamilia tapno agballigida, nangruna no adda dagiti tumaud a karit. No maipapan iti akem dagiti assawa a lallaki, kuna ti Biblia: “Dagiti lallaki ayatenda dagiti assawada a kas kadagiti bukodda a bagi.” No tungpalen ti asawa a lalaki daytoy a rebbengen, maragsakan ti asawa a babai a mangipakita iti “nauneg a panagraem iti asawana.”​—Efeso 5:25-29, 33.

Maipapan iti relasion dagiti nagannak ken annak, insurat ni apostol Pablo: “Dakayo, nga amma, dikay ruroden ti annakyo, no di ket itultuloyyo a padakkelen ida iti disiplina ken panangiturong-panunot ni Jehova.” (Efeso 6:4) Agresulta dayta iti nabara a relasion ti pamilia, a mamagbalin kadagiti annak a nalaklaka nga agtulnog kadagiti dadakkelda.​—Efeso 6:1.

Dagiti nadakamat a punto ket sumagmamano a pagarigan ti nainsiriban a balakad ti Biblia mainaig iti biag ti pamilia. Adu a sangakabbalayan ti agbalin a naragsak no iyaplikarda dagiti nadiosan a prinsipio. Alaentayo a pagarigan ti agassawa idiay Argentina a nadakamat itay. Kalpasan ti tallo a bulan a pannakipagadalda iti Biblia kadagiti Saksi ni Jehova, inrugida nga iyaplikar ti nainsiriban a balakadna maipapan iti panagasawa. Inkagumaanda a pinarang-ay ti komunikasionda, a nagbalinda a sensitibo kadagiti kasapulan ti tunggal maysa, ken nagbalinda a manangpakawan. (Proverbio 15:22; 1 Pedro 3:7; 4:8) Nasursuroda a medmedan ti pungtotda ken nagpatulongda iti Dios no kasla saandan a magawidan dagiti bambanag. (Colosas 3:19) Di nagbayag, narpuog ti “Berlin Wall”!

Ti Dios Mapabilegna ti Pamilia

Bumileg ti pamilia a mangdaer kadagiti pakarigatan no ammoda ken iyaplikarda dagiti pagalagadan ti Dios. Napateg daytoy agsipud ta naipadto a maipasango dagiti pamilia iti makadadael a panangraut iti kaaldawantayo. Impadto ni Pablo ti agdama a panagrakaya ti moralidad ken ti kagimongan ti tattao. Kinunana a “kadagiti maudi nga aldaw” saanen a nasungdo dagiti tattao, awanandan iti “nainkasigudan a panagayat,” ken nasukirda kadagiti nagannakda, uray kadagidiay ‘addaan iti langa ti nadiosan a debosion.’​—2 Timoteo 3:1-5.

Makatulong ti panangikagumaan a mangay-ayo iti Dios tapno maparmek dagiti kasta a makadadael nga epekto iti pamilia. Natakuatan ti  adu a pamilia a naespirituan ti solusion dagiti karit a pakaipaspasanguanda. No tarigagayan dagiti miembro ti pamilia a taginayonen ti nasayaat a relasionda iti Dios, kangrunaan iti amin a nasken nga iyaplikarda dagiti prinsipio ti Biblia ken bigbigenda a “malaksid no ni Jehova ti mangbangon ti balay, awan mamaayna a nagtrabaho a sipipinget iti dayta dagiti managibangon iti dayta.” (Salmo 127:1) Ti kadakkelan a balligi iti panangitandudo iti kinaragsak ti pamilia ket agtaud iti panangyun-una iti Dios iti biag ti pamilia.​—Efeso 3:14, 15.

Idiay Hawaii, napaneknekan dayta ti lalaki nga agnagan iti Dennis. Nupay ibagbagana nga isu ket Kristiano, naalas ti panagsasaona ken mannakiapa. Kalpasan ti panagserbina iti armada, ad-adda a nagbalin a nauyong ken mananggura. “Kanayon a makiapaak,” malagipna. “Diak ikabkabilangan no ania ti mapasamak kaniak, ken saanak a mabuteng a matay. Nagtultuloy ti naalas a panagsasaok ken ti pannakiapak. Ti asawak, a maysa kadagiti Saksi ni Jehova, pinaregtanak nga agadal iti Biblia.”

Saan nga inkankano ni Dennis ti panagregget ni baketna. Ngem ti Nakristianuan a kondukta ni baketna ti namagbalbaliw iti negatibo a kababalinna. Idi agangay, timmabuno met laeng ni Dennis iti Nakristianuan a gimong a kaduana ni baketna ken dagiti annakda. Di nagbayag, nangrugi a mayadalan iti Biblia ni Dennis, ket nagsayaat ti panagrang-ayna. Insardengnan ti 28 a tawenen a panagsigsigariliona ken ti pannakitimpuyogna kadagiti gagayyem nga agar-aramid kadagiti banag a kayatnan nga isardeng. Buyogen ti panagyaman ken ni Jehova, kinuna ni Dennis: “Simmayaat ti biag ti pamiliak. Sangapamiliaankami a tumabuno kadagiti gimong ken makipaset iti ministerio. Saanen nga agbuteng kaniak dagiti dua nga annakko, ta nasursurokon ti agteppel ken saanakon nga agus-usar kadagiti nabassawang a sasao. Makapagpapatang ken matagtagiragsakmin dagiti saritaan maipapan iti Biblia. No saanko a naadal ti Biblia, awanak koma ditoy ita; managpudpudotak unay idi.”

Naragsak dagiti pamilia no pagreggetanda nga aramiden ti pagayatan ni Jehova. Ipakita ti kapadasan a nasaysayaat dagiti bambanag no adda uray maysa a kameng ti pamilia a mangyap-aplikar kadagiti prinsipio ti Biblia no idilig iti pamilia nga awan ti mangar-aramid iti kasta. Narigat ti mangbangon iti Nakristianuan a pamilia, agkasapulan dayta iti abilidad ken panawen. Ngem dagiti miembro dagiti kasta a pamilia masiguradoda a pagballigien ni Jehova ti panagreggetda. Maibagada dagiti sasao ti salmista: “Ti tulongko aggapu ken Jehova.”​—Salmo 121:2.

[Footnote]

[Blurb iti panid 9]

Ti Dios ti “nakautangan ti tunggal pamilia idiay langit ken iti daga ti naganna.”​—EFESO 3:15

[Kahon iti panid 8]

NAPATEG KEN NI JEHOVA TI URNOS TI PAMILIA

“Binendisionan ida ti Dios ket kinuna kadakuada ti Dios: ‘Agbungakayo ken agadukayo ket punnuenyo ti daga.’”​—Genesis 1:28.

“Naragsak ti tunggal maysa nga agbuteng ken Jehova . . . Ti asawam a babai kaslanto iti puon ti ubas a manangpataud-bunga iti kaunggan a paspaset ti balaymo.”​—Salmo 128:1, 3.