Maysa a Lubong nga Awan ti Kinapanglaw​—Asidegen

DAGITI ladawan ti Paraiso, a kas iti makita iti akkub daytoy a magasin, ket makaay-ayo kadagiti napanglaw. Ti damo a pagassawaan, da Adan ken Eva, tinagiragsakda idi ti maysa a paraiso. Ti minuyongan ti Eden ti pagtaenganda. (Genesis 2:7-23) Nupay napukaw dayta a Paraiso, saan a tagtagainep ti panamati iti maysa a masanguanan a paraiso​—iti maysa a baro a lubong nga awan ti kinapanglaw. Naan-anay a naibatay dayta kadagiti kari ti Biblia.

Usigenyo ti kari ni Jesu-Kristo iti maudi nga aldaw ti biagna ditoy daga. Maysa kadagiti managdakdakes a pimmusay a kadua ni Jesus ti nangipakita iti pammatina iti abilidad ti Dios a mangrisut kadagiti parikut ti sangatauan. Kinunana: “Jesus, laglagipennak inton makagtengka iti pagariam.” Dagita a sasao ipakitana a mamati ti managdakdakes nga agturayto ni Jesus kas Ari ken mapagungarto dagiti natay. Insungbat ni Jesus: “Pudno ibagak kenka ita nga aldaw, makikaduakanto kaniak idiay Paraiso.”​—Lucas 23:42, 43.

Iti panangtukoyna kadagidiay agbiag iti Paraiso, kuna ti Biblia: “Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada.” (Isaias 65:21) Wen, “pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada; ta ti mismo a ngiwat ni Jehova ti buybuyot sinaona dayta.”​—Mikias 4:4.

Ngem apay ngarud a naipalubos nga adda kinapanglaw ita? Ania a tulong ti ipaay ti Dios kadagiti agsagsagaba iti kinapanglaw? Kaanonto ti panagpatingga ti kinapanglaw?

Apay a Naipalubos ti Kinapanglaw?

Napukaw da Adan ken Eva ti Paraiso a pagtaenganda kas resulta ti panagalsada nga insungsong ti maysa a dakes nga anghel, ni Satanas a Diablo. Inusar ni Satanas ti maysa a serpiente kas pannakangiwatna ket sinulisogna ni Eva a manglabsing iti linteg ti Dios a mangiparparit iti pannangan iti bunga ti maysa a kayo. Babaen ti panangallilawna, namati ti babai a ti isisiasi iti Dios ket mangyeg kenkuana iti nasaysayaat a biag. Idi intukon ni Eva ti maiparit a bunga ken ni Adan, nangan met ti lalaki, a mangipakita nga impangpangrunana ni baketna ngem iti Dios.​—Genesis 3:1-6; 1 Timoteo 2:14.

Nainkalintegan a napapanaw ti rebelioso a pagassawaan manipud iti Paraiso ket kasapulanen nga igaedda ti agtrabaho tapno makapagbiagda. Agingga ita, ipalpalubos ni Jehova a ni Satanas ti mangituray iti managbasol a sangatauan, a nangibatad kadagiti resulta ti panagsukir iti Dios. Paneknekan ti pakasaritaan ti sangatauan a saan a maiyeg ti tao ti Paraiso ditoy daga. (Jeremias 10:23) Imbes ketdi, ti panagwaywayas manipud iti Dios nagresulta kadagiti makadidigra a parikut, a pakaibilangan ti kinapanglaw.​—Eclesiastes 8:9.

 Nupay kasta, saan a naan-anay a nabaybay-an dagiti napanglaw iti daytoy lubong a napnuan iti riribuk. Ti naipaltiing a Sao ti Dios, ti Biblia, ket naglaon iti nainsiriban a giya agpaay kadakuada.

“Dikay Pulos Maringgoran”

Idi dumdumngeg kenkuana ti dakkel a bunggoy a pakaibilangan ti adu a napanglaw, kinuna ni Jesus: “Paliiwenyo a sipapasnek dagiti tumatayab iti langit, agsipud ta saanda nga agmula iti bin-i wenno agani wenno agipempen kadagiti kamalig; kaskasdi a ti nailangitan nga Amayo taraonanna ida. Saan kadi a napatpategkayo ngem isuda? . . . Gapuna dikay pulos maringgoran ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ Ta amin dagitoy isuda ti bambanag a sigagagar a sapsapulen dagiti nasion. Ta ammo ti nailangitan nga Amayo nga amin dagitoy a banag ket kasapulanyo. Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.”​—Mateo 6:26-33.

Ti nakurapay a tao saanna a kasapulan ti agtakaw. (Proverbio 6:30, 31) Maipaay ti kasapulanna no ipangpangrunana ti Dios iti biagna. Imutektekanyo ti kaso ni Tukiso, maysa a lalaki idiay Lesotho, makin-abagatan nga Africa. Idi 1998, dagiti ganggannaet a tropa simrekda iti Lesotho tapno pasardengenda ti iyaalsa maibusor iti gobierno. Kas resulta dayta a gubat, nasamsam dagiti pagtagilakuan, napukawan iti trabaho dagiti tattao, ken nakaro ti kinakirang ti taraon.

Agnanaed ni Tukiso iti kapanglawan a paset ti kabisera. Adu kadagiti kaarrubana ti nagsamsam kadagiti pagtagilakuan tapno makapagbiagda. Idi nagawid ni Tukiso iti maysa a siled a pagnanaedanna, nakitana nga adu a taraon ti nasamsam ni Maseiso, ti babai a kabbalayna. “Iruarmo dagitoy,” kinuna ni Tukiso, nga inlawlawagna a ti panagtakaw ket mailabsing iti linteg ti Dios. Nagtulnog ni Maseiso. Inumsi ida dagiti kaarrubada ken innalada dagiti tinakaw a taraon.

Ti takder ni Tukiso ket maigapu iti nasursurona iti pannakipagadalna iti Biblia kadagiti Saksi ni Jehova. Nagbisin kadi gapu iti panagtulnogna iti linteg ti Dios? Saan. Di nagbayag kalpasanna, dagiti panglakayen iti kongregasion dagiti Saksi ni Jehova a pakigimgimonganna sinapulda ni Tukiso ket inikkanda iti taraon. Kinapudnona, dagiti Saksi ni Jehova iti kabangibang a South Africa nangipatulodda iti dua a tonelada a tulong a pannaranay kadagiti Kristiano a kakabsatda idiay Lesotho. Natukay ti rikna ni Maseiso gapu iti kinatulnog ni Tukiso iti Dios ken iti naayat a tulong ti kongregasion. Nakipagadal met iti Biblia. Nagangayanna, legal a nagkasarda ket nakualipikarda a mabautisaran kas Saksi ni Jehova. Agingga ita, simamatalek nga agserserbida iti Dios.

Ni Jehova a Dios aywananna dagiti napanglaw. (Kitaenyo ti kahon a napauluan “Ania ti Panangmatmat ti Dios Kadagiti Napanglaw?”) Siaayat a  nangaramid kadagiti urnos tapno matulongan dagiti sabsabali a kas ken ni Tukiso ken Maseiso a mangadal iti ad-adu pay maipapan kenkuana. Ken iti Saona, nangipaay iti praktikal a balakad para iti inaldaw a panagbiag.

Nasayaat a Probision

Dagiti Saksi ni Jehova kanayon nga ikagumaanda a tuladen ti pannakaseknan ti Dios kadagiti napanglaw. (Galacia 2:10) Masansan a no madidigra ti maysa a pagilian ken adda dagiti pudno a Kristiano nga apektado, maaramid dagiti urnos a panangsaranay. Ngem nangnangruna a maseknan dagiti Saksi iti naespirituan a kasapulan ti amin, agraman dagiti napanglaw. (Mateo 9:36-38) Bayat ti naglabas nga 60 a tawen, rinibu a nasanay a ministro ti nagboluntario nga agserbi kas misionero kadagiti ganggannaet a pagilian. Kas pagarigan, ti nangisuro kada Tukiso ken Maseiso nga agbalin nga adalan ni Jesus ket agassawa a misionero manipud Finland, a nangadal iti lenguahe a Sesotho. (Mateo 28:19, 20) Ti kasta a trabaho a panagmisionero masansan nga iramanna ti panangisakripisio iti komportable a biag iti nasaliwanwan a pagilian ket umakar iti napanglaw a pagilian.

Saan a maipalubos kadagiti pudno a Kristiano ti panagtakaw tapno laeng adda pagbiagda. Imbes ketdi, addaanda iti pammati a kabaelan ni Jehova a Dios ti mangipaay. (Hebreo 13:5, 6) Ti maysa a pamay-an a mangipapaay ni Jehova iti ilina ket babaen ti sangalubongan nga organisasion dagiti agdaydayaw kenkuana, a maseknan iti maysa ken maysa.

Ti sabali pay a pamay-an a tumultulong ni Jehova kadagiti nakurapay ket babaen ti panangipaayna kadakuada iti praktikal a balakad iti inaldaw a panagbiag. Kas pagarigan, ibilin ti Biblia: “Ti agtatakaw saan koma nga agtakawen, no di  ket agtrabaho koma a sipipinget, nga aramidenna babaen kadagiti imana ti aramid a naimbag, tapno adda koma maibunongna iti asinoman nga agkasapulan.” (Efeso 4:28) Adu nga awanan trabaho ti nakapataud iti bukodda a trabaho, kas iti nadagsen a trabaho a panagmula. Ti Biblia tulonganna met dagiti tattao nga agsalimetmet iti kuarta babaen ti panangisurona kadakuada a mangliklik kadagiti bisio, kas iti panangabuso iti arak.​—Efeso 5:18.

Maysa a Lubong nga Awan ti Kinapanglaw​—Kaano?

Ipasimudaag ti Biblia nga agbibiagtayo kadagiti “maudi nga aldaw” ti turay ni Satanas. (2 Timoteo 3:1) Iti din agbayag, ni Jehova a Dios ibaonna ni Jesu-Kristo a mangukom iti sangatauan. Anianto ti mapasamak iti dayta a kanito? Impaay ni Jesus ti sungbat iti maysa kadagiti pangngarigna. Kinunana: “Inton ti Anak ti tao dumteng iti dayagna, ket amin dagiti anghel maikuyogda kenkuana, iti kasta agtugawto iti nadayag a tronona. Ket amin dagiti nasion maurnongdanto iti sanguananna, ket paglalasinennanto dagiti tattao iti maysa ken maysa, a kas ti maysa a pastor ilasinna dagiti karnero manipud kadagiti kalding.”​—Mateo 25:31-33.

Dagiti karnero iti daytoy a pangngarig isuda dagidiay agpasakup iti kinaari ni Jesus. Inyarig ida ni Jesus iti karnero agsipud ta sumursurotda kenkuana kas ti Pastorda. (Juan 10:16) Dagitoy nga arig karnero magun-odda ti biag iti sidong ti perpekto a turay ni Jesus. Naragsakto dayta a biag iti maysa a baro a lubong nga awan ti kinapanglaw. Dagiti arig kalding a tattao, a mangilaksid iti turay ni Jesus, madadaeldanto iti agnanayon.​—Mateo 25:46.

Ti Pagarian ti Dios pagpatinggaenna ti kinadakes. Kalpasanna, awanton ti kinapanglaw. Imbes ketdi, ti daga ket pagnaedanto dagiti tattao nga addaan iti panagayat ken pannakaseknan iti maysa ken maysa. Ti kasta a baro a lubong ket posible a makita iti naayat nga internasional a panagkakabsat dagiti Saksi ni Jehova, agsipud ta kinuna ni Jesus: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”​—Juan 13:35.

[Kahon/Dagiti Ladawan iti panid 6, 7]

ANIA TI PANANGMATMAT TI DIOS KADAGITI NAPANGLAW?

Ti Biblia deskribirenna ti Namarsua iti sangatauan kas “Daydiay mangted iti tinapay kadagidiay mabisin.” (Salmo 146:7) Naglaon dayta iti nasurok a sangagasut a bersikulo a mangitampok iti pannakaseknan ti Dios kadagiti napanglaw.

Kas pagarigan, idi inted ni Jehova ti Linteg iti nagkauna a nasion ti Israel, imbilinna kadagiti Israelita a mannalon a saanda nga apiten a naan-anay ti igid ti talonda. Saanda a burasen dagiti natedda a bunga babaen ti panagapitda iti kayo nga olibo wenno kaubasan iti maikadua a daras. Dagitoy a linteg ket naayat nga urnos agpaay kadagiti ganggannaet, ulila, balo, ken dadduma pay a marigrigat.​—Levitico 19:9, 10; Deuteronomio 24:19-21.

Kanayonanna, imbilin ti Dios kadagiti Israelita: “Dikay parigaten ti asinoman a balo a babai wenno awan amana nga ubing. No parigatem latta, ngarud no umkis latta kaniak, di bumurong a denggek ti ikkisna; ket pudno a gumil-ayabto ti ungetko, ket sigurado a papatayenkayto babaen ti kampilan, ket ti assawayo a babbai mabalodanto ket ti annakyo agbalinda nga awan ammada nga ubbing.” (Exodo 22:22-24) Makapaladingit, adu a nababaknang nga Israelita ti di nangikankano kadagita a sasao. Gapu iti dayta ken dadduma pay a basol, nangipaay ni Jehova a Dios iti nagduduma a ballaag kadagiti Israelita babaen kadagiti propetana. (Isaias 10:1, 2; Jeremias 5:28; Amos 4:1-3) Nagultimuanna, ti Dios tinignayna dagiti Asiriano ken kalpasanna dagiti taga-Babilonia a mangparmek iti teritoria dagiti Israelita. Adu nga Israelita ti natay, ket dagiti nakalasat nakautiboda kadagiti ganggannaet a pagilian.

Ni Jesu-Kristo, ti patpatgen nga Anak ti Dios, imparangarangna met ti naayat a pannakaseknan ni Amana kadagiti napanglaw. Iti panangilawlawagna iti panggep ti ministeriona, kinuna ni Jesus: “Ti espiritu ni Jehova adda kaniak, agsipud ta pinulotannak a mangideklara ti naimbag a damag kadagiti napanglaw.” (Lucas 4:18) Dina kaipapanan daytoy a dagiti laeng napanglaw ti nakaiturongan ti ministeriona. Siaayat a tinulonganna met dagiti nabaknang a tattao. Ngem bayat ti panangaramidna iti dayta, masansan nga inyebkas ni Jesus ti pannakaseknanna kadagiti napanglaw. Kas pagarigan, kastoy ti imbalakadna iti maysa a nabaknang nga agturay: “Ilakom amin a bambanag nga adda kenka ket ibunongmo kadagiti napanglaw a tattao, ket maaddaankanto iti gameng iti langlangit; ket umayka agbalinka a pasurotko.”​—Lucas 14:1, 12-14; 18:18, 22; 19:1-10.

Ni Jehova a Dios ken ti Anakna maseknanda unay kadagiti napanglaw. (Marcos 12:41-44; Santiago 2:1-6) Kas panangipakita iti pannakaseknanna kadagiti napanglaw, silalagip ni Jehova iti minilion a napanglaw a tattao a pimmusay. Mapagungarto amin dagitoy iti baro a lubong nga awan ti kinapanglaw.​—Aramid 24:15.

[Dagiti Ladawan]

Ti internasional a panagkakabsat dagiti Saksi ni Jehova ipakitana a posible ti baro a lubong

[Ladawan iti panid 5]

Da Tukiso ken Maseiso a kaduada ti misionero a nangyadal iti Biblia ken ni Tukiso

[Ladawan iti panid 5]

Ni Maseiso iti ruangan ti pagtaenganna, a kaduana ti misionera a nangyadal kenkuana iti Biblia