Salsaludsod Dagiti Agbasbasa

Apay a saan a napapatay da David ken Bat-seba idi nakabasolda iti pannakikamalala, idinto ta natay ti kappasngay nga anakda a lalaki?

Imbatad ti Linteg Mosaiko: “No kas pagarigan ti maysa a lalaki masarakan a makikakaidda iti babai a kukua ti maysa a makinkukua, isuda a dua masapul ngarud a matayda nga agpadpada, ti lalaki a makikakaidda iti babai ken ti babai. Gapuna masapul nga ikkatem ti dakes iti Israel.” (Deuteronomio 22:22) No impalubos ni Jehova a Dios a ti hudisial a kaso ti panagbasol da David ken Bat-seba ket tamingen dagiti tattao nga ukom iti sidong ti Linteg, napapatayda koma a dua. Yantangay dagiti tattao nga ukom saanda a mabasa dagiti puso, mangukomda maibatay iti napaneknekan nga inaramid dagiti nakabasol. Patay ti pannusa dagiti makaaramid iti pannakikamalala. Saan nga autorisado dagiti Israelita nga ukom a mangpakawan iti kasta a basol.

Iti sabali bangir, ti pudno a Dios mabasana dagiti puso ken pakawanenna dagiti basol no adda makitana a pagibatayan tapno mangpakawan. Yantangay ti nairaman iti kaso ket ni David a nakitulaganna mainaig iti Pagarian, ammo ni Jehova a naiduma daytoy a kaso. Gapuna, inkeddengna nga isu a mismo ti mangtaming iti dayta. (2 Samuel 7:12-16) ‘Ti Ukom ti intero a daga’ ket addaan iti kalintegan a mangaramid iti kasta a pangngeddeng.​—Genesis 18:25.

Ania ti nakita ni Jehova idi sinukimatna ti puso ni David? Dakamaten ti superskripsion ti Salmo 51 a daytoy a salmo ipalgakna dagiti rikna ni David “idi a ni Natan a mammadto napan kenkuana kalpasan a nakidenna ken Bat-seba.” Kuna ti Salmo 51:1-4: “Ipaayannak iti parabur, O Dios, maitunos iti naayat a kinamanangngaasim. Maitunos iti kinaruay dagiti asim punasem dagiti salungasingko. Naan-anay a bugguannak iti biddutko, ket dalusannak uray pay iti basolko. Ta siak ammok dagiti salungasingko, ket ti basolko adda a patinayon iti sanguanak. Maikaniwas kenka, kenka laeng, nagbasolak, ket no ania ti dakes kadagita matam inaramidko.” Nakita la ketdi ni Jehova daytoy a nasged a ladingit iti puso ni David kas pammaneknek ti napudno a panagbabawi ket inkeddengna nga adda pagibatayan tapno kaasianna dagiti nagbasol. Kanayonanna, naasi a tao ni David, ket ni Jehova kaasianna dagiti naasi. (1 Samuel 24:4-7; Mateo 5:7; Santiago 2:13) Gapuna, idi binigbig ni David ti basolna, kinuna kenkuana ni Natan: “Kasta met ni Jehova inikkatna ti basolmo. Dikanto matay.”​—2 Samuel 12:13, Ti Biblia.

Saan a maliklikan da David ken Bat-seba ti amin a bunga ti basolda. “Agsipud ta di pagduaduaan a saanmo a rinaem ni Jehova babaen itoy a banag,” kinuna ni Natan ken ni David, “ti met mismo nga anak, a kayanak kenka, di bumurong a matayto.” Nagsakit ti anakda ket natay iti laksid ti panagayunar ken panagdung-aw ni David iti pito nga aldaw.​—2 Samuel 12:14-18.

Saan a matarusan ti dadduma no apay a natay ti anak, yantangay kuna ti Deuteronomio 24:16: “Saan a rebbeng a mapapatay ti annak maigapu iti amma.” Ngem masapul a laglagipentayo a no tattao nga ukom ti nangtaming iti kaso, napapatay koma dagiti nagannak agraman ti di naipasngay nga anak. Nakatulong met ken ni David ti pannakapukaw ti anak tapno ad-adda a mabigbigna no kasano kakaro ti pannakadismaya ni Jehova iti nagbasolanda ken ni Bat-seba. Makapagtalektayo a nainkalintegan ti panangtaming ni Jehova iti dayta a banag, agsipud ta “perpekto ti dalanna.”​—2 Samuel 22:31.

[Ladawan iti panid 31]

Imparangarang ni David ti pudno a panagbabawi