Ti Kadi Tao Mapagpatinggana ti Kinapanglaw?

RINIWRIW ti dimmakkel a saan a nakapasar iti kinapanglaw. Dida pulos napadasan ti maturog a mabisbisin wenno agpigpigerger gapu iti lam-ek. Kaskasdi, adu kadagitoy nga indibidual ti maasian kadagiti napanglaw ket ikagkagumaanda a tulongan ida.

Nupay kasta, ti kinapanglaw ket agtultuloy a maysa a nakas-ang a kinapudno para kadagiti tattao a dinidigra ti gerra sibil, layus, tikag, ken dadduma pay a parikut. Dagitoy ti mangdiddidigra kadagiti nanumo a mannalon iti Africa. Dadduma ti napilitan a mangpanaw kadagiti pagtaenganda ken umakar kadagiti dadakkel a siudad wenno agbiag kas nagbakuit iti sabali a pagilian. Dadduma a tagaaway umakarda kadagiti siudad gapu ta maguyugoyda kadagiti kari a matagiragsakda ti nasaysayaat a biag.

Masansan nga agraira ti kinapanglaw kadagiti siudad nga aduan unay iti tao. Bassit unay ti pagtalonan, no adda man. Narigat ti agsapul iti panggedan. Gapu iti nakaro a pannakaupay, adu ti agbalin a kriminal. Agpatulong dagiti agnanaed iti siudad ngem dagiti gobierno ti tao saanda a kabaelan a risuten ti kumarkaro a kinapanglaw. Iti panangtukoyna iti report ti United Nations idi Nobiembre 2003, kinuna ti The Independent ti London: “Umadu nga umadu ti mabisbisin ditoy lubong.” Innayonna: “Iti sangalubongan, mapattapatta a 842 a milion ita ti di umdas ti taraonda​—ket ngumatngato dayta a bilang, iti kanayonan a 5 a milion a mabisbisinan iti inaldaw.”

Ti sanga nga opisina dagiti Saksi ni Jehova idiay South Africa ket makaaw-awat no dadduma kadagiti surat manipud kadagiti tattao nga agsagsagaba iti kinapanglaw. Kas pagarigan, insurat ti maysa a lalaki manipud Bloemfontein: “Awan trabahok ditoy siudad, isu nga agtakawak tunggal adda gundaway. Ta no saan, adu nga aldaw nga agsagabakami iti bisin​—malaksid pay iti nakaro a lam-ek. Talaga nga awan ti pagtrabahuan. Adu ti adda kadagiti lansangan tapno agsapul iti trabaho ken iti mabalinda a kanen. Adda dagiti ammok nga agsapsapul iti taraon kadagiti basuraan. Adda dagiti agpakamatay. Adu a kas kaniak ti agledleddaang ken naawananen iti namnama. Kasla awanen ti naraniag a masakbayan. Ti kadi Dios, a nangparsua kadatayo nga addaan iti panagkasapulan a mangan ken agkawes, saanna a makitkita daytoy?”

Adda dagiti makaliwliwa a sungbat kadagitoy a pakaseknan dayta a lalaki. Kas ipakita ti sumaganad nga artikulo, dagitoy a sungbat ket masarakan kadagiti panid ti Sao ti Dios, ti Biblia.