Dagiti Anghel​—No Kasano nga Apektarandatayo

ITI panangdeskribirna iti nasirmatana mainaig iti nailangitan a pamilia ti Dios, insurat ni propeta Daniel: “Adda sangaribu a rinibu [nga anghel] a nagtultuloy a nagserbi [iti Dios], ken sangapulo a ribu a maminsangapulo a ribu a nagtalinaed a sitatakder iti mismo a sanguananna.” (Daniel 7:10) Ibuksilan daytoy a bersikulo no ania ti panggep ti Dios iti panangparsuana kadagiti anghel. Naparsua dagitoy tapno agserbida kenkuana ken sisasaganada a mangitungpal kadagiti bilinna.

Adda dagiti masinunuo a pangusaran ti Dios kadagiti anghel mainaig kadagiti tattao. Usigentayo no kasano nga us-usarenna ida a mangpabileg ken mangsalaknib iti ilina, mangidanon iti mensahe kadagiti tattao, ken mangukom iti nadangkes.

Mangpabileg ken Mangsalaknib Dagiti Anghel

Sipud idi nakita dagiti espiritu a parsua ti pannakaparsua ti daga ken dagidi umuna a tattao, nangipakitada iti nasged nga interes iti sangatauan. Iti panagsaona kas personipikasion ti sirib, kinuna ni Jesu-Kristo sakbay ti kaaddana kas tao: ‘Ti bambanag a pakaay-ayatak ket mainaig iti annak ti tattao.’ (Proverbio 8:31) Ken ibaga kadatayo ti Biblia a “tartarigagayan dagiti anghel a matmatan” dagiti bambanag maipapan ken Kristo ken ti masanguanan a naipalgak kadagiti propeta ti Dios.​—1 Pedro 1:11, 12.

Iti panaglabas ti panawen, napaliiw dagiti anghel a kaaduan kadagiti tattao ti saan nga agserserbi iti naayat a Namarsua. Nagladingit la ketdi dagiti matalek nga anghel gapu iti dayta! Iti sabali a bangir, no agbabawi ken agsubli ken ni Jehova ti maysa a managbasol, “adda panagrag-o kadagiti anghel ti Dios.” (Lucas 15:10) Maseknan unay dagiti anghel iti pagimbagan dagidiay agserserbi iti Dios, ket maulit-ulit nga inusar ida ni Jehova a mangpabileg ken mangsalaknib kadagiti matalek nga adipenna ditoy daga. (Hebreo 1:14) Usigenyo ti sumagmamano a pagarigan.

Dua nga anghel ti timmulong iti nalinteg a ni Lot ken kadagiti babbalasangna tapno malasatanda ti pannakadadael dagiti nadangkes a siudad ti Sodoma ken Gomorra babaen ti panangbayabayda kadakuada a rummuar iti dayta a lugar. a (Genesis 19:1, 15-26) Sinigsiglo kalpasanna, nupay  naipisok ni propeta Daniel iti rukib dagiti leon, saan a nadangran. Apay? “Ti bukodko a Dios imbaonna ti anghelna ket kinaemna ti ngiwat dagiti leon,” kinunana. (Daniel 6:22) Dagiti anghel sinuportaranda ni Jesus idi rugrugi ti ministeriona ditoy daga. (Marcos 1:13) Ken di nagbayag sakbay ti ipapatay ni Jesus, nagparang kenkuana ti maysa nga anghel ket “isu pinabilegna.” (Lucas 22:43) Nagdakkel la ketdi a bendision ken ni Jesus dayta a suporta ti anghel kabayatan dagidi a napateg a tiempo iti biagna! Maysa met nga anghel ti nangruk-at ken ni apostol Pedro manipud iti pagbaludan.​—Aramid 12:6-11.

Salaknibandatayo kadi ita dagiti anghel? No agdayawtayo ken ni Jehova sigun iti Saona, manamnamatayo a salaknibandatayo dagiti mannakabalin, di makita nga anghelna. Ikarkari ti Biblia: “Ti anghel ni Jehova agpakpakarso iti intero nga aglikmut dagidiay agbuteng kenkuana, ket alawenna ida.”​—Salmo 34:7.

Nupay kasta, masapul a tarusantayo a ti Dios ti kangrunaan a pagserserbian dagiti anghel, saan ket a dagiti tattao. (Salmo 103:20, 21) Agtungpalda iti bilin ti Dios, saan nga iti ipaaramid wenno kalikaguman ti tao. Gapuna, agpatulongtayo ken ni Jehova a Dios, saan a kadagiti anghel. (Mateo 26:53) Siempre, gapu ta saantayo a makita dagiti anghel, saantayo nga ammo no agingga iti ania nga us-usaren ida ti Dios a tumulong kadagiti tattao iti nagduduma a banag. Ngem ammotayo a ni Jehova “ipakitana ti pigsana maigapu kadagidiay a ti pusoda naan-anay kenkuana.” (2 Cronicas 16:9; Salmo 91:11) Ken addaantayo iti pammatalged nga “uray ania ti dawatentayo maitunos iti pagayatanna, denggennatayo” ti Dios.​—1 Juan 5:14.

Ibaga pay kadatayo ti Kasuratan nga iti laeng Dios ti rumbeng a pangiturongantayo kadagiti kararag ken panagdayawtayo. (Exodo 20:3-5; Salmo 5:1, 2; Mateo 6:9) Iparparegta dagiti matalek nga anghel nga aramidentayo dayta. Kas pagarigan, idi pinadas a pagdayawan ni apostol Juan ti maysa nga anghel, isu ket binabalaw dayta nga espiritu a parsua, a kunana: “Agannadka! Dika aramiden dayta! . . . Agdaydayawka iti Dios.”​—Apocalipsis 19:10.

Idanon Dagiti Anghel Dagiti Mensahe ti Dios

Ti sao nga “anghel” kaipapananna “mensahero,” ket dayta ti sabali pay a pamay-an nga agserbi dagiti anghel iti Dios​—kas mensaherona kadagiti tattao. Kas pagarigan, “naibaon ni anghel Gabriel manipud iti Dios a mapan iti maysa a siudad ti Galilea a managan Nazaret.” Apay? Tapno ipakaammona iti balasang nga agnagan Maria a nupay maysa isu a birhen, iyinaw ken ipasngayna ti maysa nga anak a mapanaganan iti Jesus. (Lucas 1:26-31) Maysa met nga anghel ti naibaon a mangipakaammo kadagiti pastor iti tay-ak a naipasngayen ti “Kristo nga Apo.” (Lucas 2:8-11) Umasping iti dayta, dagiti anghel indanonda dagiti mensahe ti Dios kada Abraham, Moises, Jesus, ken dadduma pay a salaysayen ti Biblia.​—Genesis 18:1-5, 10; Exodo 3:1, 2; Lucas 22:39-43.

Kasano a dagiti anghel agserbida ita kas mensahero ti Dios? Usigenyo ti trabaho nga impakpakauna ni Jesus nga aramiden dagiti pasurotna sakbay ti panungpalan daytoy a sistema dagiti bambanag. Kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:3, 14) Dagiti Saksi ni Jehova tinawen a mangbusbosda iti nasurok a maysa a bilion nga oras a mangikasaba iti naimbag a damag ti Pagarian ti Dios. Ngem ammoyo kadi a makipaspaset met dagiti anghel iti daytoy a trabaho? Tinukoy ni apostol Juan ti maysa a nasirmatana, a kunkunana: “Nakakitaak iti  sabali pay nga anghel . . . , ket addaan iti agnanayon a naimbag a damag nga ideklarana kas naragsak a damag kadagidiay agnanaed iti daga, ken iti tunggal nasion ken tribu ken pagsasao ken ili.” (Apocalipsis 14:6, 7) Daytoy a kasuratan itampokna ti kapatgan a trabaho dagiti anghel para kadagiti tattao ita.

Dagiti Saksi ni Jehova makitada dagiti pammaneknek nga iturturong ida dagiti anghel bayat nga itungpalda ti trabahoda a panangasaba iti binalaybalay. Masansan a makasaritada dagiti indibidual a kalkalpas laeng a nangikararag nga adda koma mangtulong kadakuada a mangtarus kadagiti pangpanggep ti Dios. Kas resulta ti panangiwanwan dagiti anghel ken panangikagumaan dagiti Saksi, tinawen a ginasgasut a ribu ti masursuruan maipapan ken ni Jehova. Sapay koma ta mabenepisiaranka iti daytoy a mangispal-biag a trabaho nga iwanwanwan dagiti anghel.

Dagiti Anghel Itungpalda ti Panangukom ti Dios

Nupay saanda nga autorisado a mangukom kadagiti tattao, saan nga agpalpaliiw lattan dagiti anghel. (Juan 5:22; Hebreo 12:22, 23) Intungpalda dagiti panangukom ti Dios kadagiti naglabas a panawen. Kas pagarigan, ti Dios inusarna dagiti anghel iti pannakidangadangna kadagiti nagkauna nga Egipcio a nangkautibo kadagiti Israelita. (Salmo 78:49) Iti maysa laeng a rabii, pinapatay “ti anghel ni Jehova” ti sangagasut walopulo ket lima a ribu a soldado iti kampo dagiti kabusor ti ili ti Dios.​—2 Ar-ari 19:35.

Kasta met laeng iti masanguanan, itungpal dagiti anghel ti panangdadael ti Dios. Umay ni Jesus a “kadua dagiti mannakabalin nga anghelna iti dumardarang nga apuy, bayat nga iyegna ti pammales kadagidiay saan a makaammo iti Dios ken kadagidiay saan nga agtulnog iti naimbag a damag.” (2 Tesalonica 1:7, 8) Ngem dayta a panangdadael ket lak-amento laeng dagidiay saan a mangawat iti mensahe a sangalubongan a maikaskasaba ita iti tulong dagiti anghel. Saan a madangran dagidiay mangsapul iti Dios ken mangannurot kadagiti pannursuro ti Kasuratan.​—Sofonias 2:3.

Anian a yamantayo kadagiti matalek nga anghel, a kanayon a mangitungpal kadagiti bilbilin ti Dios! Us-usaren ni Jehova ida a tumulong ken mangsalaknib kadagiti nasungdo nga ad-adipenna ditoy daga. Nangnangruna a makaliwliwa daytoy kadatayo agsipud ta adda dagiti napeggad nga espiritu a parsua a naawagan kas sairo nga agtarigagay a mangdangran kadatayo.

Dagiti Sairo​—Siasinoda?

Bayat dagiti 15 a siglo sipud daydi panangallilaw ni Satanas ken ni Eva idiay Eden, dagiti anghel a pamilia ti Dios napaliiwda ti panagballigi ni Satanas a Diablo iti panangisiasina manipud iti Dios ti amin a tattao malaksid iti sumagmamano  a matalek a tattao, kas kada Abel, Enoc, ken Noe. (Genesis 3:1-7; Hebreo 11:4, 5, 7) Dadduma kadagiti anghel ti nagpaimpluensia met ken ni Satanas. Tinukoy ida ti Biblia kas dagiti nasukir nga espiritu “idi kaaldawan ni Noe.” (1 Pedro 3:19, 20) Kasano a nagminar ti kinasukirda?

Idi kaaldawan ni Noe, adda dagiti saan a nadakamat ti bilangda a rebelioso nga anghel a nangpanaw iti lugarda iti pamilia ti Dios idiay langit, immayda ditoy daga ket naglasagda. Apay? Rimmusing ti tarigagayda a makidenna kadagiti babbai. Kas resultana, nagputotda kadagiti annak a naawagan iti Nefilim, dagiti nagbalin a naranggas a higante. Kanayonanna, “ti kinadakes ti tao naruay iti daga ken tunggal pagannayasan ti pampanunot ti pusona dakes laeng iti amin a tiempo.” Nupay kasta, saan nga impalubos ni Jehova a Dios nga agtultuloy daytoy a kinarinuker ti sangatauan. Nangyeg iti sangalubongan a Layus, a nangdadael kadagiti amin a dakes a tattao agraman dagiti Nefilim. Dagiti laeng matalek nga adipen ti Dios ti kakaisuna a naitalimeng a sibibiag.​—Genesis 6:1-7, 17; 7:23.

Dagiti rebelioso nga anghel naliklikanda ti pannakadadael bayat daydi Layus. Imbatida dagiti pisikal a bagida ket nagsublida iti lugar dagiti espiritu a parsua. Kalpasan dayta, nangrugidan a maawagan kas sairo. Dimmasigda ken ni Satanas a Diablo, a naawagan “ti agturay kadagiti sairo.” (Mateo 12:24-27) Kas iti agturay kadakuada, tartarigagayan dagiti sairo a dayawen ida dagiti tattao.

Napeggad dagiti sairo, ngem saantayo a rumbeng a pagbutngan ida. Limitado ti pannakabalinda. Idi nagsubli idiay langit dagiti nasukir nga anghel, saandan a napalubosan nga agsubli iti pamilia ti Dios a buklen dagiti matalek nga anghel. Imbes ketdi, nailaksidda iti aniaman a naespirituan a lawag manipud iti Dios, ket napukawdan ti namnamada iti masanguanan. Kinapudnona, naipupokda iti naespirituan a kinasipnget a naawagan Tartaro. (2 Pedro 2:4) ‘Agnanayon a pinarautan’ ida ni Jehova tapno agtalinaedda iti naespirituan a kinasipnget. Kanayonanna, saandan a mabalin ti aglasag kas tattao.​—Judas 6.

Ania ti Masapul nga Aramidem?

Dagiti kadi sairo im-impluensiaanda pay latta dagiti tattao? Wen, ar-aramidenda dayta babaen kadagiti “pangallilaw a pamuspusan,” kas kadagiti us-usaren ni Satanas a Diablo a mangiturturay kadakuada. (Efeso 6:11, 12) Ngem babaen ti panangyaplikar iti balakad ti Sao ti Dios, sititibker a masarangettayo dagiti sairo. Kanayonanna, dagidiay agayat iti Dios salakniban ida dagiti mannakabalin nga anghel.

Anian a nagpateg a maammuanyo dagiti bilbilin ti Dios a naipasdek iti Kasuratan ken agtignaykayo maitunos iti maad-adalyo! Ad-adu pay ti maammuanyo maipapan kadagiti pannursuro ti Biblia babaen ti pannakisaritayo kadagiti Saksi ni Jehova iti lugaryo wenno babaen ti panagsurat kadagiti mangipabpablaak iti daytoy a magasin. Maragsakan dagiti Saksi ni Jehova a mangyadal kadakayo iti Biblia nga awan bayadna ken iti tiempo a nawaya kadakayo.

[Footnote]

[Kahon Ladawan iti panid 6]

DAGITI ANGHEL​—NO KASANO TI PANNAKAORGANISARDA

Kastoy ti pannakaorganisar dagiti nakaad-adu nga anghel ni Jehova:

Ni Miguel nga arkanghel, wenno Jesu-Kristo, isu ti anghel a kangrunaan iti pannakabalin ken autoridad. (1 Tesalonica 4:16; Judas 9) Adda iti babaenna dagiti serafin, kerubin, ken dadduma pay nga anghel.

Nakatantan-ok ti saad dagiti serafin iti urnos ti Dios. Agserbida iti saklang ti trono ti Dios. Karaman kadagiti annongenda ti panangipakaammo iti kinasanto ti Dios ken ti panangtaginayon iti naespirituan a kinadalus ti ilina.​—Isaias 6:1-3, 6, 7.

Adda dagiti kerubin iti aglikmut ti trono ti Dios, nga itantandudoda ti kinadaeg ni Jehova.​—Salmo 80:1; 99:1; Ezequiel 10:1, 2.

Dagiti dadduma nga anghel ket ahente ni Jehova, nga itungpalda ti pagayatan ti Dios.

[Ladawan iti panid 4]

Dagiti anghel binayabayda ni Lot ken dagiti babbalasangna iti natalged a lugar

[Ladawan iti panid 5]

Idi pinadas ni apostol Juan a pagdayawan ti anghel, naibaga kenkuana: “Dika aramiden dayta!”

[Ladawan iti panid 6]

Dagiti anghel itungpalda ti panangukom ti Dios

[Ladawan iti panid 7]

Mabembenepisiaranka kadi iti trabaho a panangasaba nga iwanwanwan dagiti anghel?