INSURO ni Jesu-Kristo kadagiti pasurotna: “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.’” (Mateo 6:9, 10) Daytoy a kararag, a pagaammo kas ti Amami, wenno ti Kararag ti Apo, ilawlawagna ti panggep ti Pagarian ti Dios.

Babaen ti Pagarian, masantipikar ti nagan ti Dios. Madalusan ti naganna manipud kadagiti amin a pammadakes kas resulta ti panagrebelde ni Satanas ken ti tao. Napateg dayta. Ti kinaragsak ti amin nga anghel ken tattao ket agpannuray iti panangmatmatda a sagrado ti nagan ti Dios ken iti sidadaan a panangbigbigda iti kalinteganna a mangituray.—Apocalipsis 4:11.

Kanayonanna, naipasdek ti Pagarian tapno ‘maaramid ti pagayatan ti Dios, kas sadi langit, kasta met iti daga.’ Ania dayta a pagayatan? Isu ti pannakaisubli ti relasion ti Dios ken ti sangatauan, banag a napukaw idi ni Adan. Itungpal met ti Pagarian ti panggep ni Jehova, ti Soberano iti Uniberso, nga agbalin a paraiso ti daga a pangtagiragsakan dagiti tattao iti biag nga agnanayon. Wen, ti Pagarian ti Dios isublina ti amin a napukaw gapu iti orihinal a basol ken itungpalna ti amin a naayat a panggep ti Dios agpaay iti daga. (1 Juan 3:8) Kinapudnona, daytoy a Pagarian ken dagiti itungpalna isu ti kangrunaan a mensahe ti Biblia.

Ti Pagarian ti Dios ket maysa a pudno a gobierno a naindaklan ti pannakabalinna. Ipaayannatayo ni propeta Daniel iti pamalatpatan no kasano kabileg dayta. Nabayagen nga impadtona: “Mangipasdekto ti Dios ti langit iti maysa a pagarian . . . [ket dayta] rumekennanto ken pagpatinggaenna amin dagitoy a pagarian [ti tao].” Kanayonanna, saan a kas kadagiti agkarasukat a gobierno ti tao iti panaglabas ti tiempo, “saanto a pulos madadael” ti Pagarian ti Dios. (Daniel 2:44) Saan laeng a dayta. Iti aniaman nga aspeto, natantan-ok daytoy a Pagarian ngem iti aniaman a gobierno ti tao.

Addaan iti natantan-ok nga Ari ti Pagarian ti Dios.

Usigenyo no asino dayta nga Ari. Babaen ti “tagtagainep ken sirsirmata,” naipakita ken ni Daniel ti Agturay iti Pagarian ti Dios kas “maysa a kasla anak ti tao” a naidatag iti saklang ti mannakabalin-amin a Dios ken naipaayan iti agnanayon a “panagturay ken dayaw ken pagarian.” (Daniel 7:1, 13, 14) Dayta nga Anak ti tao ket awan sabali no saan a ni Jesu-Kristo—ti Mesias. (Mateo 16:13-17) Ni Jehova a Dios dinutokanna ti bukodna nga Anak, ni Jesus, kas Ari iti Pagarianna. Idi adda ni Jesus ditoy daga, kinunana kadagiti nadangkes a Fariseo a ‘ti pagarian ti Dios adda iti tengngada,’ a kaipapananna nga isuna, ti masanguanan nga Ari ti Pagarian, ket adda ditoy daga a kaduada.—Lucas 17:21.

Siasino koma iti sangatauan ti addaan kadagiti kualipikasion nga ik-ikutan ni Jesus kas Agturay? Napaneknekanen a ni Jesus ket maysa a nalinteg, mapagpannurayan, ken naasi a Lider. Dagiti Ebanghelio deskribirenda ni Jesus kas manangtulong,  nadungngo ken mannakipagrikna. (Mateo 4:23; Marcos 1:40, 41; 6:31-34; Lucas 7:11-17) Kanayonanna, ni Jesus ket saan a kas kadagiti tattao a matay ken addaan kadagiti dadduma a limitasion.—Isaias 9:6, 7.

Agturay ni Jesus ken dagiti kakaduana manipud iti natantan-ok a disso.

Iti sirmatana babaen ti tagtagainep, nakita met ni Daniel a “ti pagarian ken ti panagturay . . . naited kadagiti tattao isuda a sasanto.” (Daniel 7:27) Saan nga agmaymaysa ni Jesus iti panagturayna. Adda kakaduana nga agturay kas ar-ari ken agserbi kas papadi. (Apocalipsis 5:9, 10; 20:6) Mainaig kadakuada, insurat ni apostol Juan: “Nakitak, ket, adtoy! ti Kordero nga agtaktakder iti Bantay Sion, ket kaduana ti sangagasut uppat a pulo ket uppat a ribu . . . a nagatang manipud iti daga.”—Apocalipsis 14:1-3.

Ti Kordero isu ni Jesu-Kristo kalpasan ti pannakaisaadna kas Ari iti Pagarian. (Juan 1:29; Apocalipsis 22:3) Daytoy a Bantay Sion tuktukoyenna ti langit. * (Hebreo 12:22) Ni Jesus ken dagiti 144,000 a kakaduana agturturayda manipud langit. Anian a nakatantan-ok ti pagturayanda! Yantangay addada idiay langit, nalawlawa ti panangmatmatda. Yantangay idiay langit ti ayan dayta a turay, “ti pagarian ti Dios” ket naawagan met “ti pagarian ti langlangit.” (Lucas 8:10; Mateo 13:11) Awan ti igam, wenno uray pay nuklear nga iraraut, ti mamagpeggad ken mangdadael iti dayta a nailangitan a gobierno. Saan a pulos a maparmek ken itungpalna ti panggep ni Jehova agpaay iti dayta.—Hebreo 12:28.

Ti Pagarian ti Dios ket addaan kadagiti mapagtalkan a pannakabagi ditoy daga.

Kasanotayo nga ammo dayta? Kuna ti Salmo 45:16: “Dutokamto . . . [dagiti] piprinsipe iti intero a daga.” Ti Anak ti Dios ti naipadto ditoy a ‘mangdutok.’ (Salmo 45:6, 7; Hebreo 1:7, 8) Gapuna, ni Jesu-Kristo a mismo dutokanna dagiti prinsipe a mangibagi kenkuana. Masiguradotayo a situtulnogdanto a mangitungpal iti bilinna. Uray ita, dagiti kualipikado a lallaki nga agserserbi kas panglakayen iti kongregasion Kristiano maisursuro kadakuada a saanda a ‘dominaran’ dagiti kapammatianda, no di ket salakniban, pabilgen, ken liwliwaenda ida.—Mateo 20:25-28; Isaias 32:2.

Dagiti nalinteg ti iturayan ti Pagarian.

Awan ti pakapilawanda ken napalungdoda iti imatang ti Dios. (Proverbio 2:21, 22) “Dagidiay naemma tagikuaendanto ti daga,” kuna ti Biblia, “ket pudno a maragsakandanto iti napalalo iti kinaruay ti talna.” (Salmo 37:11) Naemma dagiti iturayan ti Pagarian—nalakada a maisuro ken napakumbaba, naamo, ken naalumamayda. Dagiti naespirituan a bambanag ti kangrunaan a pakaseknanda. (Mateo 5:3) Tarigagayanda nga aramiden ti umiso ken agpapaiwanwanda iti Dios.

Ti Pagarian ti Dios ket tartarawidwidan dagiti natantan-ok a linteg.

Ni Jehova a Dios mismo ti paggapuan dagiti linteg ken prinsipio a mangtartarawidwid iti Pagarian. Pagimbagantayo dagita, saan ket a pakadagsenan. (Salmo 19:7-11) Adu a tattao ti mabembenepisiaranen gapu iti panagbiagda maitunos kadagiti nalinteg a pagannurotan ni Jehova. Kas pagarigan, pagsayaatan ti pamiliatayo ti panangipangag iti balakad ti Biblia kadagiti assawa a lallaki, assawa a babbai, ken annak. (Efeso 5:33–6:3) No pagtulnogantayo ti bilin a ‘kawesantayo ti bagbagitayo iti ayat,’ sumayaat ti relasiontayo kadagiti sabsabali. (Colosas 3:13, 14) Bayat nga agbibiagtayo kadagiti Nainkasuratan a prinsipio, mapatanortayo met dagiti naimbag nga ugali iti panagtrabaho ken ti natimbeng a panangmatmat iti kuarta. (Proverbio 13:4; 1 Timoteo 6:9, 10) No liklikantayo ti panagbartek, seksual nga imoralidad, panagtabako, ken ti pannakaadikto iti droga, matulongantayo a mangsaluad iti salun-attayo.—Proverbio 7:21-23; 23:29, 30; 2 Corinto 7:1.

Ti Pagarian ti Dios ket maysa a gobierno nga impasdek ti Dios. Ti Ari iti dayta—ti Mesias, ni Jesu-Kristo—ken amin a kakaduana nga agturay pagrebbenganda iti Dios nga itandudo dagiti awan pakapilawanna a linteg ken naayat a  prinsipiona. Dagiti iturayan ti Pagarian, agraman dagiti pannakabagina ditoy daga, pakaragsakanda ti agbiag a maitunos kadagiti linteg ti Dios. Ti Dios ngarud ti kangrunaan iti biag dagiti mangituray ken iturayan ti Pagarian. Gapuna, ti Pagarian ket maysa a pudno a teokrasia wenno panangituray ti Dios. Sigurado a maibanagna ti nakairantaanna. Ngem kaano a mangrugi nga agturay ti Pagarian ti Dios, a naawagan met kas ti Mesianiko a Pagarian?

Ti tulbek tapno maawatan no kaano a mangrugi ti panagturay ti Pagarian ket masarakan iti sasao ni Jesus. “Ti Jerusalem ibaddebaddekto dagiti nasion,” kinunana, “agingga a matungpal ti naituding a pampanawen dagiti nasion.” (Lucas 21:24) Ti Jerusalem ti kakaisuna a siudad iti intero a daga a direkta a nainaig iti nagan ti Dios. (1 Ar-ari 11:36; Mateo 5:35) Isu dayta ti kabesera ti pagarian nga inanamongan ti Dios. Dagiti nasion ibaddebaddekdanto dayta a siudad iti anag a dagiti gobierno ti lubong temporario a malappedanda ti panangituray ti Dios iti ilina. Kaano a mangrugi dayta?

Naibaga iti maudi nga ari nga agturay iti trono ni Jehova idiay Jerusalem: “Ikkatem ti turbante, ket uksotem ti korona. . . . Sigurado nga awanto ti agtagikua iti dayta agingga nga umay daydiay addaan iti legal a kalintegan, ket itedkonto dayta kenkuana.’’ (Ezequiel 21:25-27) Maikkat ti korona iti ulo ti ari, ket temporario a malappedan ti panangituray ti Dios iti ilina. Napasamak dayta idi 607 K.K.P. idi dinadael dagiti taga-Babilonia ti Jerusalem. Bayat ti simmaganad a “naituding a pampanawen,” awan ti gobierno ti Dios ditoy daga a mangibagi iti turayna. Inton agpatingga dagita a pampanawen sa laeng ipaay ni Jehova ti pannakabalin a mangituray iti daydiay “addaan iti legal a kalintegan”—ni Jesu-Kristo. Kasano kaunday dayta a tiempo?

Kuna ti padto iti Daniel a libro ti Biblia: “Pukanenyo ti kayo, ket dadaelenyo dayta. Nupay kasta, ibatiyo ti mismo a puonna iti daga, ngem sibebedbed iti landok ken gambang . . . agingga a ti met laeng pito a panawen aglabas iti dayta.” (Daniel 4:23) Kas maammuantayo, ti “pito a panawen” a nadakamat ditoy ket kas kaunday “ti naituding a pampanawen dagiti nasion.”

Iti Biblia, dagiti kayo isimboloda no dadduma dagiti indibidual, agturay, ken pagarian. (Salmo 1:3; Jeremias 17:7, 8; Ezequiel, kapitulo 31) Ti simboliko a kayo “ket makita agingga iti ungto ti intero a daga.” (Daniel 4:11) Gapuna, ti turay nga isimbolo ti kayo a mapukan ken mabedbedan masakupanna “agingga iti ungto ti daga,” a pakairamanan amin a pagarian ti sangatauan. (Daniel 4:17, 20, 22) Isimbolo ngarud ti kayo ti katan-okan a turay ti Dios, partikular no mainaig iti daga. Adda idi daytoy a panangituray babaen ti pagarian ni Jehova a naipasdek iti nasion ti Israel. Napukan ti simboliko a kayo, nabedbedan ti puonna iti landok ken gambang tapno malappedan ti panagtubona. Ipasimudaag daytoy nga agsardeng ti panangituray ti gobierno nga us-usaren ti Dios, ket napasamak dayta idi 607 K.K.P.—ngem  saan nga agnanayon. Ti kayo ket agtalinaed a nabedbedan iti “pito a panawen.” Kalpasan dayta a tiempo, ipaay ni Jehova ti turay iti legal nga agtawid, ni Jesu-Kristo. Nalawag a maymaysa a tiempo ti tuktukoyen ti “pito a panawen” ken “ti naituding a pampanawen dagiti nasion.”

Tulongannatayo ti Biblia a mangammo iti kawatiwat ti “pito a panawen.” Ibagana a ti 1,260 nga aldaw ket katupag ti “maysa a panawen ken pampanawen [dua a panawen] ken kagudua ti maysa a panawen”—a pakadagupan ti tallo ken kagudua a “panawen.” (Apocalipsis 12:6, 14) Kayatna a sawen a ti mamindua dayta a bilang, wenno pito a panawen, ket agdagup iti 2,520 nga aldaw.

No mangrugi ti 2,520 nga aldaw manipud idi 607 K.K.P., dumtengtayo iti 600 K.K.P. Ngem ti pito a panawen ket adayo a naun-unday ngem dayta. Di pay nagpatingga dayta idi dinakamat ni Jesus “ti naituding a pampanawen dagiti nasion.” Ngarud, naimpadtuan ti pito a panawen. Gapuna, masapul a surotentayo ti Nainkasuratan a pagannurotan: “Maysa nga aldaw maipaay iti maysa a tawen.” (Numeros 14:34; Ezequiel 4:6) No kasta, ti pito a panawen nga awan ressat a panangituray ditoy daga dagiti nailubongan a pannakabalin ket agdagup iti 2,520 a tawen. No mangrugi ti 2,520 a tawen manipud idi 607 K.K.P., dumtengtayo iti 1914 K.P. Isu dayta ti tawen a nagpatingga “ti naituding a pampanawen dagiti nasion,” wenno ti pito a panawen. Kaipapananna dayta nga idi 1914, nangrugin nga agturay ni Kristo kas Ari iti Pagarian ti Dios.

Yantangay naipasdeken idiay langit ti Mesianiko a Pagarian, rumbeng kadi nga itultuloytayo a kiddawen ti iyaayna, kas insuro ni Jesus iti modelo a kararag? (Mateo 6:9, 10) Wen. Umiso ken nainrasonan pay laeng ti panangkiddaw iti dayta. Ti Pagarian ti Dios saanna pay a naan-anay nga iturturayan ti daga.

Anian dagiti bendision a sagrapen ti matalek a sangatauan inton mapasamak dayta! “Ti Dios a mismo addanto kadakuada,” kuna ti Biblia, “ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” (Apocalipsis 21:3, 4) Iti dayta a tiempo, “awanto ti agtataeng nga agkuna: ‘Masakitak.’” (Isaias 33:24) Ti agnanayon a biag ket tagiragsakento dagidiay mangay-ayo iti Dios. (Juan 17:3) Bayat nga ur-urayentayo ti kaitungpalan dagitoy ken dagiti dadduma pay a nakaskasdaaw a padto ti Biblia, ‘itultuloytayo ngarud koma a sapulen nga umuna ti pagarian ken ti kinalinteg ti Dios.’—Mateo 6:33.