Madaeram ti Pakarigatan

KADAGITOY napeggad a tiempo, adu a tattao ti mangan-andur dagiti kasla bagyo a pakarigatan. Ngem makatulong kadagiti Kristiano ti panagayatda iti Dios ken ti kinasungdoda kadagiti prinsipiona tapno madaeranda dagiti pakarigatan. Kasano? Mangipaay iti sungbat ti ilustrasion nga insalaysay ni Jesu-Kristo. Impadisna dagiti natulnog nga adalanna iti ‘masirib a lalaki, a nangbangon iti balayna iti rabaw ti dakkel a bato.’ Kinuna ni Jesus: “Nagbuyat ti tudo ken immay dagiti layus ket nagpuyupoy dagiti angin ken immablatda iti dayta a balay, ngem saan a narba, ta naibangon iti rabaw ti dakkel a bato.”​—Mateo 7:24, 25.

Paliiwem ta uray no masirib ti lalaki iti ilustrasion, nakapasar latta kadagiti rigat​—nga inladawan ti tudo, dagiti layus, ken dagiti makadadael nga angin. Saan ngarud nga impamatmat ni Jesus a mailisi dagiti adalanna kadagiti amin a rigat ket bin-ig lattan a kappia ken kinatalingenngen ti sagrapenda. (Salmo 34:19; Santiago 4:13-15) Ngem imbagana a dagiti matalek nga adipen ti Dios mabalinda a masaganaan ken madaeran dagita a kasla bagyo a pakarigatan ken krisis.

Rinugian ni Jesus ti ilustrasionna babaen ti panangikunana: “Tunggal maysa a dumngeg kadagitoy a sasaok ket aramidenna ida mayaspingto iti masirib a lalaki, a binangonna ti balayna iti rabaw ti dakkel a bato.” Siempre, saan a sarsaritaen ni Jesus ti panangbangon kadagiti literal a balay, no di ket ti panangaramid kadagiti Nakristianuan a pangngeddeng ken tignay. Dagidiay mangipangag kadagiti sasao ni Kristo usarenda ti pannakaawat ken nasayaat a pangngeddeng. Babaen ti panangipakatda kadagiti nasursuroda, makaaramidda kadagiti pangngeddeng ken tignay a naibatay iti arig natangken a dakkel a bato a pannursuro ni Kristo. Makapainteres ta saan laeng a naiparabaw daytoy a piguratibo a dakkel a bato. Ti lalaki iti ilustrasion ket masapul nga agkali iti ‘nauneg.’ (Lucas 6:48) Kasta met, dagiti adalan ni Jesus sipapasnek nga intultuloyda a pinatanor dagiti agpaut a galad nga ad-adda a nangyadani kadakuada iti Dios.​—Mateo 5:5-7; 6:33.

Ania ti mapasamak no masubok ti kinatibker ti Nakristianuan a pamuon dagiti pasurot ni Jesus babaen kadagiti kasla bagyo a pakasuotan? Kanayonto a mapabilegda babaen kadagiti Nakristianuan a kababalinda ken ti kinatulnogda kadagiti pannursuro ni Kristo iti sidong dagita a pakarigatan, ken kamaudiananna, bayat ti umadani a bagyo ti Armagedon. (Mateo 5:10-12; Apocalipsis 16:15, 16) Wen, babaen ti panangipangag kadagiti pannursuro ni Kristo, adu ti sibaballigi a makadaer kadagiti kasla bagyo a pakasuotan. Maaramidmo met ti kasta.​—1 Pedro 2:21-23.