Salsaludsod Dagiti Agbasbasa

Ania ti pannakaselio a natukoy iti Apocalipsis 7:3?

Kuna ti Apocalipsis 7:1-3: “Nakakitaak iti uppat nga anghel nga agtaktakder iti uppat a suli ti daga, a siiirut a tengtenglenda ti uppat nga angin ti daga, tapno awan ti angin nga agpuyupoy iti daga wenno iti baybay wenno iti aniaman a kayo. Ket nakakitaak iti sabali nga anghel nga umul-uli manipud iti leleggakan ti init, nga addaan iti selio ti sibibiag a Dios; ket nagikkis buyogen ti natbag a timek iti uppat nga anghel a napalubosan a mangdangran iti daga ken iti baybay, a kunkunana: ‘Dikay dangran ti daga wenno ti baybay wenno dagiti kayo, agingga a malpasmi a selioan dagiti adipen ti Diostayo kadagiti mugingda.’”

Inton mapalusposan “ti uppat nga angin,” bumtaken ti “dakkel a rigat,” ti pannakadadael ti palso a relihion ken ti amin a paset daytoy dakes a lubong. (Apocalipsis 7:14) “Dagiti adipen ti Diostayo” isuda dagiti napulotan a kakabsat ni Kristo ditoy daga. (1 Pedro 2:9, 16) Gapuna, ipamatmat daytoy a padto a nalpasen ti pannakaselio dagiti kakabsat ni Kristo inton bumtak ti dakkel a rigat. Nupay kasta, ipamatmat ti dadduma a teksto ti Biblia nga adda nasapsapa a panangselio kadagiti napulotan. Gapuna, no dadduma, usarentayo dagiti sasao nga umuna a pannakaselio ken maudi a pannakaselio. Ania ti nagdumaanda?

Usigentayo ti kaipapanan ti sao a “naselioan.” Kadagiti nagkauna a panawen, ti pangselio ket maysa nga instrumento a pagmarka iti dokumento. Ngem dayta a sao mabalin met a tumukoy iti mismo a marka. Kadagidi a panawen, kadawyan ti panangselio iti maysa a dokumento wenno iti dadduma a banag kas pammatalged nga autentiko dayta wenno mangipakita no siasino ti makinkukua iti dayta.​—1 Ar-ari 21:8; Job 14:17.

Ni apostol Pablo inyarigna ti nasantuan nga espiritu iti maysa a marka idi kinunana: “Daydiay  mamatalged a dakayo ken dakami kukua ni Kristo ken daydiay nangpulot kadatayo isu ti Dios. Inkabilna met ti markana kadatayo ket intedna kadatayo ti tanda ti banag a dumteng, a dayta ket, ti espiritu, iti puspusotayo.” (2 Corinto 1:21, 22) Gapuna, ni Jehova pinulotanna iti nasantuan nga espirituna dagitoy a Kristiano kas pammatalged a kukuana ida.

Nupay kasta, adda dua nga aspeto ti pannakaselio dagiti napulotan. Agduma ti umuna a pannakaselio ken ti maudi a pannakaselio no maipapan iti (1) panggep ken (2) tiempo. Ti umuna a pannakaselio ket mangipamatmat iti pannakapili ti maysa kas baro a kameng dagiti napulotan a Kristiano. Ti maudi a pannakaselio ket mangipamatmat a naan-anay a napaneknekan a nasungdo dagitoy napili ken naselioan nga indibidual. Gapuna, sa la permanente a maikabil ti marka ‘iti muging’ ti maysa a napulotan inton maudi a pannakaselio, a mangtanda kenkuana kas maysa a naan-anayen a nasubok ken matalek nga “adipen ti Diostayo.” Ti pannakaselio a nadakamat iti Apocalipsis kapitulo 7 tukoyenna ti maudi a pannakaselio.―Apocalipsis 7:3.

No maipapan iti tiempo a pannakapasamak ti umuna a pannakaselio, nagsurat ni apostol Pablo kadagiti napulotan a Kristiano: “Nanginanamakayo met kenkuana kalpasan a nangngegyo ti sao ti kinapudno, ti naimbag a damag maipapan iti pannakaisalakanyo. Babaen met kenkuana, kalpasan a namatikayo, naselioankayo iti naikari a nasantuan nga espiritu.” (Efeso 1:13, 14) Iti adu a kaso, ipakita ti rekord ti Biblia a pudno a naselioan dagiti Kristiano idi umuna a siglo di nagbayag kalpasan a nangngegda ti naimbag a damag ken nagbalinda a manamati ken ni Kristo. (Aramid 8:15-17; 10:44) Dayta a pannakaselio ipamatmatna nga anamongan ida ti Dios. Ngem dina kayat a sawen a siguradon a mataginayonda dayta nga anamong. Apay?

Kinuna ni Pablo a dagiti napulotan a Kristiano ‘naselioanda a maipaay iti aldaw ti pannakaluk-at.’ (Efeso 4:30) Daytoy ti mangipamatmat nga aglabas pay ti panawen, masansan nga adu a tawen, kalpasan ti umuna a pannakaselio. Masapul nga agtalinaed a matalek dagiti napulotan manipud iti aldaw ti pannakaselioda iti nasantuan nga espiritu agingga iti ‘aldaw a maluk-atanda’ manipud kadagiti pisikal a bagida―kayatna a sawen, agingga a matayda. (Roma 8:23; Filipos 1:23; 2 Pedro 1:10) Gapuna, idi laeng agngudon ti biag ni Pablo a naikunana: “Tinarayko ti tarayen agingga iti pagpatinggaan, inalagadko ti pammati. Manipuden itoy a tiempo sisasaganan maipaay kaniak ti korona ti kinalinteg.” (2 Timoteo 4:6-8) Malaksid iti dayta, kinuna ni Jesus iti kongregasion dagiti napulotan a Kristiano: “Paneknekam ta bagim a matalek uray agingga ken patay, ket itedkonto kenka ti korona ti biag.”​—Apocalipsis 2:10; 17:14.

Ti sao a “korona” mangted iti kanayonan a pammaneknek nga aglabas ti tiempo manipud iti umuna a pannakaselio agingga iti maudi a pannakaselio. Kasano? Kadagiti nagkauna a panawen, kaugalian ti panangted iti korona iti maysa a tumataray a nangabak iti lumba. Tapno magun-odna ti korona, saan laeng a makisalip iti lumba. Masapul pay nga agtaray agingga iti pagpatinggaan. Umasping iti dayta, sa la makoronaan iti imortal a biag idiay langit dagiti napulotan a Kristiano no agibturda agingga nga agpatingga ti biagda​—manipud iti umuna a pannakaselioda agingga iti maudi a pannakaselioda.​—Mateo 10:22; Santiago 1:12.

Kaano nga awaten dagiti natda a napulotan a Kristiano ti maudi a pannakaselioda? Asinoman kadakuada a sibibiag pay ditoy daga maselioanto ‘dagiti mugingda’ sakbay a bumtak ti dakkel a rigat. Inton mapalusposanen ti uppat nga angin ti rigat, naawatton ti amin a kameng ti naespirituan nga Israel ti maudi a pannakaselioda, nupay addanto pay ti sumagmamano kadakuada a sibibiag ditoy daga ken masapul a mangleppas iti naindagaan a biagda.