‘Ti Umuna a Panagungar’​—Madaman!

“Dagidiay natay a naikaykaysa ken Kristo bumangondanto nga umuna.”​—1 TESALONICA 4:16.

1, 2. (a) Ania ti namnama dagiti natay? (b) Apay a mamatikayo nga adda panagungar? (Kitaenyo ti footnote.)

“DAGITI sibibiag sipapanunotda a mataydanto.” Pudno dayta sipud idi nagbasol ni Adan. Iti intero a historia, ammo ti amin a tao a mataydanto, isu nga adu ti mangisaludsod: ‘Ania ti mapasamak kalpasan ti ipapatay? Ania ti kasasaad dagiti natay?’ Sumungbat ti Biblia: “No maipapan kadagiti natay, saanda a pulos sipapanunot iti aniaman.”​—Eclesiastes 9:5.

² Gapuna, adda pay kadi namnama dagiti natay? Adda. Kinapudno, masapul nga adda namnamada tapno matungpal ti orihinal a panggep ti Dios para iti sangatauan. Iti sinigsiglon, impakita dagiti nasungdo nga adipen ti Dios nga agtalekda iti kari ni Jehova nga adda maysa a Bin-i a mangdadaelto ken ni Satanas ken mangrisut  kadagiti parikut a pinataud daytoy a kabusor. (Genesis 3:15) Natayen ti kaaduan kadagiti nasungdo nga adipen ti Dios. Masapul a mapagungarda tapno makitada ti kaitungpalan dayta a kari ken ti dadduma pay nga inkari ni Jehova. (Hebreo 11:13) Posible kadi dayta? Wen. Kinuna ni apostol Pablo: “Addanto panagungar agpadpada dagiti nalinteg ken dagiti nakillo.” (Aramid 24:15) Pinagungar ni Pablo ti maysa nga agtutubo nga agnagan iti Eutico, a natnag manipud iti tawa ti maikatlo a kadsaaran ket “innalada a natay.” Dayta ti maudi kadagiti siam a panagungar a nadakamat iti Biblia.​—Aramid 20:7-12, Ti Biblia. *

3. Apay a makaliwliwa kenka ti sasao ni Jesus a nailanad iti Juan 5:28, 29?

³ Dagita a siam a panagungar mangipaayda iti pammatalged a mapagtalkan ti kinuna ni Pablo. Patibkerenda ti panagtalektayo iti kinuna ni Jesus: “Um-umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Jesus] ket rummuarda.” (Juan 5:28, 29) Anian a makapabileg a sasao! Ken anian a makaliwliwa para iti minilion a tattao a napukawan kadagiti ing-ingungoten!

4, 5. Ania nga agduma a panagungar ti dinakamat ti Biblia, ken ania kadagita ti mausig iti daytoy nga artikulo?

⁴ Kaaduan kadagidiay mapagungar ti agbiagto iti maysa a natalna a daga iti sidong ti Pagarian ti Dios. (Salmo 37:10, 11, 29; Isaias 11:6-9; 35:5, 6; 65:21-23) Nupay kasta, dadduma ti mapagungar sakbay pay a mapasamak dayta. Umuna, masapul a mapagungar ni Jesu-Kristo tapno maidatagna iti Dios ti pateg ti datonna maipaay kadatayo. Natay ken napagungar ni Jesus idi 33 K.P.

⁵ Kalpasanna, dagiti napulotan a kameng ‘ti Israel ti Dios’ masapul a maitiponda ken ni Apo Jesu-Kristo idiay langit tapno ‘kanayonto nga addada iti denna ti Apo.’ (Galacia 6:16; 1 Tesalonica 4:17, Ti Naimbag a Damag Biblia) Dayta a pasamak ket naawagan kas “ti nasapsapa a panagungar” wenno ‘ti umuna a panagungar.’ (Filipos 3:10, 11; Apocalipsis 20:6) No malpas dayta a panagungar, sumarunonto met nga agungar ti minilion ditoy  daga buyogen ti namnama a biag nga agnanayon iti Paraiso. Gapuna, nailangitan man wenno naindagaan ti namnamatayo, magagarantayo a mangammo no ania ‘ti umuna a panagungar.’ Ania a panagungar dayta? Kaano a mapasamak?

“Iti Ania a Kita ti Bagi?”

6, 7. (a) Ania ti masapul a mapasamak sakbay a makapan idiay langit dagiti napulotan a Kristiano? (b) Mapagungarda iti ania a kita ti bagi?

⁶ Iti umuna a suratna kadagiti taga-Corinto, insaludsod ni Pablo ti maipapan iti umuna a panagungar: “Kasano ti pannakaibangon dagiti natay? Wen, iti ania a kita ti bagi nga umayda?” Kalpasanna, sinungbatanna dayta: “Ti imulam di mapagbiag malaksid no umuna pay a matay . . . ngem ikkan ti Dios iti bagi kas iti nakaay-aywanna . . . Ti dayag ti nailangitan a bagbagi maysa a kita, ket ti naindagaan a bagbagi sabali a kita.”​—1 Corinto 15:35-40.

⁷ Ipakita ti sasao ni Pablo a dagiti Kristiano a napulotan iti nasantuan nga espiritu masapul a matayda sakbay a magun-odda ti nailangitan a gunggonada. No matayda, agsubli iti tapuk ti pisikal a bagida. (Genesis 3:19) Iti tiempo nga intuding ti Dios, mapagungarda iti maysa a kita ti bagi a mayanatup iti biag idiay langit. (1 Juan 3:2) Ti Dios paraburanna met ida iti imortalidad. Dayta ket saan a maysa a banag nga ik-ikutanda sipud idi naipasngayda, a kunam la no adda imortal a kararua a naikabil iti bagida. “Daytoy a mortal masapul nga agkawes iti imortalidad,” kuna ni Pablo. Ti imortalidad ket sagut a naggapu iti Dios, nga ‘ikawes’ dagidiay karaman iti umuna a panagungar.​—1 Corinto 15:50, 53; Genesis 2:7; 2 Corinto 5:1, 2, 8.

8. Kasanotay nga ammo a ti Dios dina pilien ti 144,000 manipud kadagiti kameng ti nadumaduma a relihion?

⁸ Adda laeng 144,000 a makiraman iti umuna a panagungar. Nangrugi ti panangpili kadakuada ni Jehova idi Pentecostes 33 K.P., di nagbayag kalpasan a pinagungarna ni Jesus. Addaanda amin iti “nagan [ni Jesus] ken iti nagan ni Amana a naisurat kadagiti mugingda.” (Apocalipsis 14:1, 3) Gapuna, saanda a naggapu iti nadumaduma a relihion. Imbes ketdi, Kristianoda amin ken sipapannakkel nga awitda ti nagan ni Jehova nga Amada. No mapagungarda, adda annongenda nga agur-uray idiay langit. Magagaranda iti namnamada a mapagserbianda a direkta ti Dios.

Madaman?

9. Kasano a makatulong ti Apocalipsis 12:7 ken 17:14 tapno mapattapattatayo no kaano a nangrugi ti umuna a panagungar?

⁹ Kaano a mapasamak ti umuna a panagungar? Adda nabileg a pammaneknek a madaman dayta. Kas pagarigan, pagdiligentayo ti dua a kapitulo ti Apocalipsis. Umuna, kitaentayo ti Apocalipsis kapitulo 12. Mabasatayo a ti kabbaro a naitrono a ni Jesu-Kristo, agraman dagiti nasantuan nga anghelna, makibakalda maibusor ken ni Satanas ken kadagiti demoniona. (Apocalipsis 12:7-9) Kas masansan nga ipatuldo daytoy a magasin, nangrugi dayta a gubat idi 1914. * Ngem imutektekanyo ta awan kadagiti napulotan a pasurot ni Kristo ti naibaga a kadua ni Jesus iti dayta a gubat idiay langit. Ita, mapantayo iti kapitulo 17 ti Apocalipsis. Mabasatayo a kalpasan a madadael ti “Babilonia a Dakkel,” ti Kordero parmekenna dagiti nasion. Kalpasanna, kunana: “Kasta met, dagidiay naayaban ken napili ken matalek kenkuana aramidendanto ti kasta.” (Apocalipsis 17:5, 14) Gapuna iti dayta a tiempo, masapul a nagungaren dagidiay “naayaban ken napili ken matalek” tapno makuna a kaduada ni Jesus a naan-anay a mangparmek iti lubong ni Satanas. No kasta, nainkalintegan a dagiti napulotan nga adipen a natay sakbay ti Armagedon napagungardan iti baet ti 1914 ken Armagedon.

10, 11. (a) Siasino dagiti 24 a panglakayen, ken maysa kadakuada ti nangipalgak ken ni Juan iti ania? (b) Ania ti maawatantayo iti dayta?

¹⁰ Mabalintayo kadi nga ipatuldo ti mas eksakto a panagrugi ti umuna a panagungar? Maysa a makapainteres a panirigan ti masarakan iti Apocalipsis 7:9-15, idi inladawan ni apostol Juan ti nasirmatana a “maysa a dakkel a bunggoy, nga  awan ti tao a nakabael a mangbilang.” Maysa kadagiti 24 a panglakayen ti nangipalgak ken ni Juan no siasino ti dakkel a bunggoy. Dagitoy a panglakayen isimboloda ti 144,000 a makipagtawid ken ni Kristo iti nailangitan a turay. * (Lucas 22:28-30; Apocalipsis 4:4) Nailangitan met ti namnamana ni Juan; ngem gapu ta isu ket maysa pay la a tao idi kinasarita dayta a panglakayen, iti dayta a sirmata isimbolo ni Juan dagiti napulotan nga adipen ditoy daga a saan pay nga immawat iti nailangitan a gunggonada.

¹¹ Ania ngarud ti maawatantayo sigun iti impormasion a maysa kadagiti 24 a panglakayen ti nangipalgak ken ni Juan maipapan iti kinasiasino ti dakkel a bunggoy? Agparang nga adda paset dagiti napagungar a kameng ti 24 a panglakayen no maipapan iti pannakayallatiw dagiti nadiosan a mensahe iti kaaldawantayo. Apay a napateg dayta? Gapu ta idi 1935 a naipalgak kadagiti napulotan nga adipen ti Dios ditoy daga no siasino a talaga ti dakkel a bunggoy. No maysa kadagiti 24 a panglakayen ti nausar a nangyallatiw iti dayta a napateg a kinapudno, sigurado nga isu ket napagungar idiay langit saan a naladladaw ngem 1935. Dayta ti mangipamatmat a nangrugi ti umuna a panagungar iti baet ti 1914 ken 1935. Ngem mabalintayo kadi nga ipatuldo ti mas eksakto a tiempo a pannakapasamak dayta?

12. Ilawlawagyo no apay a posible nga idi primavera ti 1918 a nangrugi ti umuna a panagungar?

¹² Iti daytoy a punto, makatulong no usigentayo ti maysa nga agpada a pasamak iti Biblia. Napulotan ni Jesu-Kristo kas ti masanguanan nga Ari iti Pagarian ti Dios idi otonio ti 29 K.P. Tallo ket kagudua a tawen kalpasanna, iti primavera ti 33 K.P., isu ket napagungar kas maysa a mannakabalin nga espiritu. Mabalin kadi ngarud a kunaen a yantangay naitrono ni Jesus idi otonio ti 1914, nangrugi met a mapagungar dagiti matalek a napulotan a pasurotna tallo ket kagudua a tawen kalpasanna, idi primavera ti 1918? Makapainteres dayta. Nupay awan ti teksto ti Biblia a direkta a mangpatalged iti dayta, maitunos met dayta kadagiti dadduma a teksto a mangipasimudaag a nangrugin ti umuna a panagungar di nagbayag kalpasan a nangrugi ti kaadda ni Kristo.

13. Iti ania a pamay-an a ti 1 Tesalonica 4:15-17 ipasimudaagna a nangrugi ti umuna a panagungar idi rugrugi ti kaadda ni Kristo?

¹³ Kas pagarigan, insurat ni Pablo: “Datayo a sibibiag a makalasat agingga iti kaadda ti Apo [saan nga, agingga iti arinunos ti kaaddana] saantayto a pulos un-unaan dagidiay naturogen ken patay; agsipud ta ti Apo a mismo bumabanto manipud langit buyogen ti agbilbilin nga awag, buyogen ti timek ti maysa nga arkanghel ken buyogen ti trumpeta ti Dios, ket dagidiay natay a naikaykaysa ken Kristo bumangondanto nga umuna. Kalpasanna datayo a sibibiag a makalasat, a maikuyog kadakuada, marabsuttayto a maipangato kadagiti ulep a sumabet iti Apo iti angin; ket iti kasta kankanayon nga addatayto iti Apo.” (1 Tesalonica 4:15-17) No kasta, dagiti napulotan a Kristiano a natay sakbay ti kaadda ni Kristo umun-unada a mapagungar ngem kadagidiay sibibiag bayat ti kaadda ni Kristo. Kaipapanan daytoy a nangrugi ti umuna a panagungar idi rugrugi ti kaadda ni Kristo, a nagtultuloy “kabayatan ti kaaddana.” (1 Corinto 15:23) Imbes a naggigiddanda amin a napagungar, napasamak ti umuna a panagungar iti las-ud ti sumagmamano a tiempo.

“Maysa a Puraw a Pagan-anay ti Naited iti Tunggal Maysa Kadakuada”

14. (a) Kaano a natungpal dagiti sirmata a nailanad iti Apocalipsis kapitulo 6? (b) Ania ti nailadawan iti Apocalipsis 6:9?

¹⁴ Usigentayo met ti pammaneknek a nadakamat iti Apocalipsis kapitulo 6. Sisasakay ni Jesus kas maysa a mangparmek nga Ari. (Apocalipsis 6:2) Makiraman dagiti nasion iti gubat nga awan kaaspingna. (Apocalipsis 6:4) Adda nasaknap a bisin. (Apocalipsis 6:5, 6) Dagiti makapapatay a saplit dinidigrada ti sangatauan. (Apocalipsis 6:8) Amin dagitoy a naipadto a pasamak nalawag a natungpalda sipud idi 1914. Ngem adda sabali pay a napasamak. Naiturong ti atensiontayo iti  maysa nga altar a pagidatonan. Adda iti sirokna “dagiti kararua dagidiay napapatay gapu iti sao ti Dios ken gapu iti panangsaksi a trabaho nga adda kadakuada idi.” (Apocalipsis 6:9) Yantangay “ti kararua [wenno, biag] ti lasag adda iti dara,” ti talaga a mailadladawan nga adda iti sirok ti altar isu ti dara dagiti matalek nga adipen ni Jesus a napapatay gapu iti natured ken naregta a panangsaksida.​—Levitico 17:11.

15, 16. Ilawlawagyo no apay a ti sasao iti Apocalipsis 6:10, 11 tuktukoyenda ti umuna a panagungar.

¹⁵ Kas iti dara ni nalinteg nga Abel, agkidkiddaw iti hustisia ti dara dagitoy a martir a Kristiano. (Genesis 4:10) “Nagikkisda buyogen ti natbag a timek, a kunkunada: ‘Agingga iti kaano, Soberano nga Apo a nasantuan ken napudno, nga agkedkedka a mangukom ken mangibales iti darami kadagidiay agnanaed iti daga?’” Ania ti simmaruno a napasamak? “Maysa a puraw a pagan-anay ti naited iti tunggal maysa kadakuada; ket naibaga kadakuada nga aginanada iti bassit pay a kanito, agingga a ti bilang ket napno met kadagiti padada nga adipen ken ti kakabsatda a dandanin mapapatay a kas met kadakuada idi.”​—Apocalipsis 6:10, 11.

¹⁶ Naited kadi dagitoy a puraw a pagan-anay kadagiti dara nga adda iti sirok ti altar? Siempre saan! Dagiti pagan-anay ket naited kadagiti indibidual nga arigna a naibukbok ti darada iti altar. Insakripisioda ti biagda maigapu iti nagan ni Jesus ket napagungarda itan kas espiritu. Kasano nga ammotayo? Iti rugrugi ti libro nga Apocalipsis, mabasatayo: “Ti agballigi makawesanto a kasta iti puraw a makinruar a kawkawes; ket saankonto a pulos punasen ti naganna iti libro ti biag.” Laglagipenyo met a “nakakawes [ti 24 a panglakayen] iti puraw a makinruar a kawkawes, ket iti rabaw dagiti uloda nabalitokan a korkorona.” (Apocalipsis 3:5; 4:4) Gapuna, kalpasan a ti daga ket dinidigra ti gubat, bisin, ken sakit, napagungar iti nailangitan a biag ken nakawesan iti simboliko a puraw a pagan-anay dagiti natay a kameng ti 144,000, nga isimbolo dagiti dara nga adda iti sirok ti altar.

17. Iti ania nga anag a masapul nga ‘aginana’ dagidiay immawat iti puraw a pagan-anay?

¹⁷ Nasken nga ‘aginana’ dagidiay napagungaren. Masapul a siaanus nga urayenda ti aldaw ti panagibales ti Dios. ‘Dagiti padada nga adipen,’ dagiti napulotan a Kristiano nga adda pay la ditoy daga, nasken a paneknekanda ti kinatarnawda iti sidong ti pakasuotan. Inton dumteng ti panangukom ti Dios, nalpaston dayta a ‘panaginana.’ (Apocalipsis 7:3) Iti dayta a tiempo, dagidiay napagungar makiramandanto ken ni Apo Jesu-Kristo a mangdadael kadagiti nadangkes, agraman dagidiay nangpapatay kadagiti inosente a Kristiano.​—2 Tesalonica 1:7-10.

 No Ania ti Kaipapananna Kadatayo

18, 19. (a) Apay a makunayo a madaman ti umuna a panagungar? (b) Ania ti mariknayo maipapan iti nagun-odyo ita a pannakaawat mainaig iti umuna a panagungar?

¹⁸ Saan nga ibaga ti Sao ti Dios no kaano nga eksakto a nangrugi ti umuna a panagungar, ngem ipalgakna a mapasamak dayta iti las-ud ti maysa a panawen, kabayatan ti kaadda ni Kristo. Immuna a napagungar dagidiay napulotan a Kristiano a natay sakbay a nangrugi ti kaadda ni Kristo. Bayat a nagtultuloy ti kaadda ni Kristo, dagiti napulotan a Kristiano a nagtalinaed a matalek agingga iti panagturpos ti biagda ditoy daga nabalbaliwanda “iti panagkirem ti mata” kas mannakabalin nga espiritu a parparsua. (1 Corinto 15:52) Amin ngata a napulotan awatenda ti nailangitan a gunggonada sakbay ti gubat ti Armagedon? Ditay ammo. Ngem ammotayo nga iti panawen nga intuding ti Dios, addanto amin ti 144,000 iti nailangitan a Bantay Sion.

¹⁹ Ammotayo met a kadua itan ni Kristo ti kaaduan a kameng ti 144,000. Manmano laeng ti nabati ditoy daga. Anian a nagbileg a panirpatan a nakaas-asidegen ti panangdadael ti Dios! Iti din agbayag, madadaelen ti intero a sangalubongan a sistema ni Satanas. Ni Satanas a mismo maigarangugong iti mangliwengliweng nga abut. Kalpasanna, mangrugin ti naindagaan a panagungar, ket maibatay iti pangsubbot a daton ni Jesus, mangrugi metten ti pannakaisubli dagiti matalek a tattao iti perpekto a kasasaad nga umasping iti napukaw ni Adan. Makapikapik ti agdama a pannakatungpal ti padto ni Jehova iti Genesis 3:15. Anian a naindaklan a pribilehio a sibibiagtayo kadagitoy a tiempo!

[Footnotes]

Mailawlawagyo Kadi?

Kasano a makatulong dagiti sumaganad a teksto tapno maawatantayo no kaano a napasamak ‘ti umuna a panagungar’?

• Apocalipsis 12:7; 17:14

• Apocalipsis 7:13, 14

• 1 Corinto 15:23; 1 Tesalonica 4:15-17

• Apocalipsis 6:2, 9-11

[Salsaludsod]

[Dagiti Ladawan iti panid 26]

Ania a panagungar ti mapasamak sakbay a mangrugi a mapagungar ti sangatauan?

[Ladawan iti panid 29]

Iti ania a pamay-an a naited ti maysa a puraw a pagan-anay kadagidiay matmaturog ken patay?