“Ammom Kadi ti Nagan ti Dios?”

DAYTA a saludsod ti nangtukay iti interes ti maysa a babai iti makin-abagatan a laud a paset ti Sentral Asia. Mabasa dayta a saludsod iti akkub ti Enero 22, 2004 a ruar ti sabali pay a magasinmi nga Agriingkayo! Kastoy ti insurat dayta a babai kadagiti manangipablaak: “Nagustuak a dagus ti magasinyo ket tinulongannak a mangpanunot kadagiti nasayaat a prinsipio. Sumaysayaaten ti panangmatmatko iti biag. Iranranudkon iti sabsabali ti maipapan iti Diostayo ken ti talna nga ipaay dayta a pannakaammo.”

Iti adu a lugar, kinapudnona, “agingga iti kaadaywan a paset ti daga,” maam-ammuanen dagiti tattao a ti nagan ti Dios ket Jehova. (Aramid 1:8) Kas pagarigan, dayta a nagan a Yehowa iti lenguahe a Turkmen ket masarakan iti Turkmen a patarus ti Nasantuan a Kasuratan. Kastoy ti mabasa iti Salmo 8:1: “O Jehova nga Apomi, anian a nagdaeg ti naganmo iti intero a daga!”

Tapno maammuanna ti ad-adu pay nga impormasion maipapan ken Jehova a Dios, nagkiddaw dayta a babai iti kopia ti 32 ti panidna a broshur a Ti Nasantuan a Nagan nga Agtalinaed iti Agnanayon. Mabalinmo met ti agkiddaw iti dayta a broshur manipud iti maysa kadagiti Saksi ni Jehova.