Tagipatgen ni Jehova ti Panagtulnogmo

“Agmasiribka, anakko, ket pagrag-oem ti pusok.”​—PROVERBIO 27:11.

1. Ania nga espiritu ti agraraira ita iti kagimongan?

 AGRARAIRA ti kinaindependiente ken kinasukir iti lubong ita. Inlawlawag ni apostol Pablo ti makagapu iti suratna kadagiti Kristiano idiay Efeso: “Nagna[kayo] idi naminsan maitunos iti sistema ti bambanag daytoy a lubong, maitunos iti agturay iti autoridad ti angin, ti espiritu nga agtigtignay ita iti annak ti kinasukir.” (Efeso 2:1, 2) Wen, mabalintay a kunaen a ni Satanas a Diablo, ti “agturay iti autoridad ti angin,” inakaranna ti intero a lubong iti espiritu ti kinasukir. Ar-aramidenna dayta idi umuna a siglo, ken pakpakaruenna pay sipud idi napaksiat manipud langit idi agarup tiempo ti Gubat Sangalubongan I.​—Apocalipsis 12:9.

2, 3. Ania dagiti rason nga agtulnogtayo kenni Jehova?

² Ngem kas Kristiano, ammotayo a maikari ni Jehova a Dios a pagtulnogantayo a naimpusuan agsipud ta isu ti Namarsua kadatayo, ti Mangtagtaginayon iti biagtayo, ti managayat a Soberano, ken ti Manangisalakan kadatayo. (Salmo 148:5, 6; Aramid 4:24; Colosas 1:13; Apocalipsis 4:11) Dagiti Israelita idi kaaldawan ni Moises ammoda a ni Jehova ti Manangted-Biag ken Manangispalda. Gapuna, kinuna ni Moises kadakuada: “Masapul nga annadanyo nga aramiden ti kas iti imbilin kadakayo ni Jehova a Diosyo.” (Deuteronomio 5:32) Wen, maikari ni Jehova a pagtulnoganda. Ngem naglakada a simmukir iti Diosda.

³ Kasano kapateg ti panagtulnogtayo iti Namarsua iti uniberso? Naminsan, babaen kenni propeta Samuel, kinuna ti Dios kenni Ari Saul: “Ti panagtulnog nasaysayaat ngem iti sakripisio.” (1 Samuel 15:22, 23) Apay a kasta?

No Kasano a ti Panagtulnog “Nasaysayaat Ngem iti Sakripisio”

4. Ania ti mabalintayo nga ited kenni Jehova?

⁴ Kas ti Namarsua, kukua ni Jehova ti amin a material a banag nga adda kadatayo. Gapuna, adda kadi aniaman a banag a maitedtayo kenkuana? Wen, adda ti nakapatpateg a mabalintayo nga ited kenkuana. Ania dayta? Maammuantayo ti sungbat manipud iti daytoy a balakad: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” (Proverbio 27:11) Mabalintayo nga ited kenni Jehova ti panagtulnogtayo. Nupay agduduma ti kasasaad ken nalikudantayo, no la ket ta natulnogtayo, tunggal maysa kadatayo masungbatanna ti dakes a pammabasol  ni Satanas a Diablo a dagiti tattao ket saan a makapagtalinaed a nasungdo iti Dios no masuotda. Anian a pribilehio dayta!

5. Kasano a maapektaran ti Namarsua no sumukirtayo? Iyilustraryo.

⁵ Interesado ti Dios kadagiti desision nga aramidentayo. No sumukirtayo, makaapektar dayta kenkuana. Kasano? Masaktan no makitana ti maysa a mangaramid iti kasta a di nainsiriban a tignay. (Salmo 78:40, 41) Kas pagarigan ta saan nga itultuloy ti maysa a diabetiko ti makapasalun-at a dieta a nairekomenda para iti pagimbaganna ket itultuloyna latta ti mangan iti maikontra. Ania ti marikna ti maseknan a doktorna? Masiguradotayo a masaktan ni Jehova no sumukir kenkuana dagiti tattao, gapu ta ammona dagiti ibunga ti panangyaleng-aleng kadagiti balakadna.

6. Ania ti tumulong kadatayo nga agbalin a natulnog iti Dios?

⁶ Ania ti tumulong iti tunggal maysa kadatayo tapno agbalintayo a natulnog? Maiparbeng a tunggal maysa kadatayo kiddawenna iti Dios ti “puso a natulnog,” kas iti inaramid ni Ari Solomon. Kiniddawna a maaddaan iti kasta a puso tapno “mailasinna ti naimbag ken dakes” ket iti kasta, kabaelanna ti mangukom kadagiti padana nga Israelita. (1 Ar-ari 3:9) Iti daytoy lubong a nasaknap ti espiritu ti kinasukir, kasapulantayo ti “puso a natulnog” tapno mabigbigtayo ti naimbag ken dakes. Ti Dios impaayna kadatayo ti Saona, dagiti literatura a katulongan iti panagadal iti Biblia, dagiti Nakristianuan a gimong, ken dagiti maseknan a panglakayen iti kongregasion tapno mapatanortayo ti “puso a natulnog.” Ap-aprobetsarentayo kadi dagita a naayat a probision?

7. Apay a napatpateg kenni Jehova ti panagtulnog ngem kadagiti daton?

⁷ Mainaig iti dayta, lagipenyo nga impakaammo idi ni Jehova iti nagkauna nga ilina a napatpateg ti panagtulnog ngem kadagiti animal a daton. (Proverbio 21:3, 27; Oseas 6:6; Mateo 12:7) Apay a kasta, idinto ta ni Jehova ti nangibilin a mangidaton ti ilina kadagiti kasta a sakripisio? Bueno, ania ti motibo ti maysa nga agdatdaton? Ar-aramidenna kadi dayta tapno maay-ayona ti Dios? Wenno sursurotenna laeng ti maysa a ritual? No ti maysa nga agdaydayaw ket talaga a kayatna a paragsaken ti Dios, ikagumaanna ti agtulnog iti amin a bilin ti Dios. Ti Dios saanna a kasapulan dagiti daton nga animal, ngem ti panagtulnogtayo ket maysa a napateg a banag a mabalintayo nga ited kenkuana.

Ti Pakaballaagantayo

8. Apay a ti Dios linaksidna ni Saul kas ari?

⁸ Ti salaysay ti Biblia maipapan kenni Ari Saul ipaganetgetna a nakapatpateg unay ti panagtulnog. Nangrugi ni Saul nga agturay kas maysa a napakumbaba ken naemma nga ari, a ‘bassit iti bukodna a matmata.’ Ngem idi agangay, ipakita dagiti desisionna nga agminaren ti kinatangsit ken di umiso a panagrasrasonna. (1 Samuel 10:21, 22; 15:17) Naminsan, masapul a makigubat ni Saul kadagiti Filisteo. Imbaga ni Samuel iti ari nga urayenna ti iyaayna a mangidaton kadagiti sakripisio kenni Jehova ken mangipaay iti kanayonan a panangiwanwan. Ngem naladaw ni Samuel, isu a nangrugin a pumanaw dagiti Israelita. Idi makita ni Saul dayta, “indatonna ti mapuoran a sakripisio.” Saan a naay-ayo ni Jehova iti dayta. Idi nakasangpet met laengen ni Samuel, inkalintegan ti ari ti panagsukirna, a kinunana a gapu iti pannakaladaw ni Samuel, ‘napilitan’ a mangidaton iti mapuoran a sakripisio tapno maay-ayo ni Jehova. Para kenni Ari Saul, ti panangidaton iti dayta a sakripisio ket napatpateg ngem iti panagtulnog iti bilin nga urayenna ni Samuel a mangaramid iti dayta a panagidaton. Kinuna ni Samuel kenkuana: “Nagtignayka a simamaag. Saanmo a sinalimetmetan ti bilin ni Jehova a Diosmo nga imbilinna kenka.” Naikkat ni Saul kas ari gapu ta simmukir kenni Jehova.​—1 Samuel 10:8; 13:5-13.

9. Kasano nga imparangarang ni Saul ti maulit-ulit a panagsukir iti Dios?

⁹ Nagnakem kadi ti ari iti dayta a kapadasanna? Saan! Kalpasanna, imbilin ni Jehova kenni Saul a talipuposenna ti nasion ti Amalek,  nga immunan a nangraut iti Israel nga awan gapgapuna. Naibilin a papatayenna uray dagiti naamo nga animal. Kas panagtulnog, “kinabil ni Saul ti Amalek manipud Havila agingga iti Sur.” Idi simmabet kenkuana ni Samuel, naragsakan ti ari gapu iti balligi ket kinunana: “Benditonaka ni Jehova. Intungpalko ti sao ni Jehova.” Ngem, maikontra iti nalawag a bilbilin a naawatda, ni Saul ken dagiti tattaona pinagtalinaedda a sibibiag ni Ari Agag ken ti “kasayaatan iti arban ken iti pangen ken kadagidiay nalulukmeg ken kadagiti kalakian a karnero ken iti isuamin a naimbag.” Inkalintegan ni Ari Saul ti kinasukirna babaen ti panangibagana: “Naasian dagiti tattao iti kasayaatan iti arban ken iti pangen, iti panggep a panagisakripisio ken Jehova a Diosmo.”​—1 Samuel 15:1-15.

10. Ania ti saan a nasursuro ni Saul?

¹⁰ Gapu iti dayta, kinuna ni Samuel kenni Saul: “Ad-adda kadi a pakaragsakan ni Jehova dagiti daton a mapuoran ken sakripisio ngem ti panagtulnog iti timek ni Jehova? Adtoy! Ti panagtulnog nasaysayaat ngem iti sakripisio, ti panangipangag ngem iti taba dagiti kalakian a karnero.” (1 Samuel 15:22) Yantangay inkeddeng ni Jehova a madadael dagidi nga animal, saanda ngarud a mabalin a maidaton kas sakripisio.

Agtulnogkayo iti Amin a Banag

11, 12. (a) Ania ti panangmatmat ni Jehova kadagiti panagreggettayo a mangay-ayo kenkuana iti panagdayawtayo? (b) Kasano a ti maysa mabalin nga al-allilawenna ti bagina no pagarupenna nga ar-aramidenna ti pagayatan ti Dios ngem iti kinapudnona isu ket agsuksukir?

¹¹ Anian a pannakaay-ayo ni Jehova no makitana dagiti nasungdo nga adipenna a natibkerda latta uray no maidadanesda, iwaragawagda ti Pagarian uray manangyaleng-aleng ti kaaduan a tattao, ken tumabunoda kadagiti Nakristianuan a gimong uray pay marigrigatanda a mangisakad iti panagbiagda! Maragsakan unay no ipakitatayo ti kinatulnog kadagita a napateg nga aspeto ti naespirituan a biagtayo! Dagiti panagreggettayo nga agdayaw kenni Jehova ket napateg kenkuana no idatontayo dayta buyogen ti ayat. Mabalin a saan nga ikankano dagiti tattao ti kinaaneptayo, ngem makitkita ni Jehova ti naimpusuan a datdatontayo ken laglagipenna dagita.​—Mateo 6:4.

¹² Ngem tapno naan-anay a makaay-ayotayo iti Dios, masapul a natulnogtayo iti amin nga aspeto ti biagtayo. Ditay koma pulos allilawen ti bagitayo iti panangpanunot a mabalintayo ti sumiasi kadagiti bilin ti Dios no la ketdi ta agdaydayawtayo kenkuana iti dadduma nga aspeto ti biagtayo. Kas pagarigan, mabalin nga allilawen ti maysa a tao ti bagina no pagarupenna a mabalinna latta ti agaramid iti imoral wenno dadduma pay a nadagsen a basol no la ketdi ta makiraman iti dadduma a paset ti pormal a panagdayaw. Dakkel a biddut dayta!​—Galacia 6:7, 8.

13. Iti pribado, kasano a mabalin a masubok ti kinatulnogtayo kenni Jehova?

 ¹³ Mainaig iti dayta, mabalin nga iyimtuodtayo iti bagitayo, ‘Agtultulnogak kadi kenni Jehova iti inaldaw nga ar-aramidek, uray kadagiti kasla pribado a banag?’ Kinuna ni Jesus: “Ti tao a matalek iti kabassitan matalek met iti adu, ket ti tao a nakillo iti kabassitan nakillo met iti adu.” (Lucas 16:10) ‘Magmagnatayo [kadi] buyogen ti kinatarnaw ti pusotayo,’ uray ‘iti uneg ti balaytayo,’ nga awan ti makakitkita kadatayo? (Salmo 101:2) Wen, mabalin a masubok ti kinatarnawtayo bayat nga addatayo iti pagtaengantayo. Iti adu a pagilian a gagangayen ti kaadda ti kompiuter iti pagtaengan, nakalaklaka ti agsapul kadagiti naalas a bubuyaen. Kaano laeng idi kasapulan a mapan ti maysa kadagiti lugar nga ayan dagiti imoral a paglinglingayan tapno makabuya kadagiti kasta nga imoral a paglinglingayan. Situtulnog kadi nga ipangagtayo ti kinuna ni Jesus: “Tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona”? Wen, liklikantayo kadi uray ti kumita laeng kadagiti imoral a bubuyaen? (Mateo 5:28; Job 31:1, 9, 10; Salmo 119:37; Proverbio 6:24, 25; Efeso 5:3-5) Dagiti ngay naranggas a bubuyaen kadagiti programa ti telebision? Tultuladentayo kadi ti Dios, a ‘pudno unay a guraen ti kararuana ti asinoman a mangay-ayat iti kinaranggas’? (Salmo 11:5) Wenno ti ngay nalabes a panaginum iti arak iti pribado? Konkondenaren ti Biblia ti panagbartek, ngem pakpakdaaranna met dagiti Kristiano a saanda nga iyugali ti uminum iti “adu nga arak.”​—Tito 2:3; Lucas 21:34, 35; 1 Timoteo 3:3.

14. Kadagiti ania a sumagmamano a pamay-an a maipakitatayo ti panagtulnog iti Dios no iti pinansial a bambanag?

¹⁴ Kasapulantayo met ti agannad no asikasuentayo ti pinansial a bambanag. Kas pagarigan, makiramantayo kadi iti pangbiitan a panagpabaknang a mabalin a maibilang a panagsaur? Magargaritayo kadi nga agaramid iti ilegal a pamuspusan tapno ditay agbayad kadagiti buis? Wenno, imbes ketdi, simamatalek kadi nga agtultulnogtayo iti bilin nga ‘ipaay kadagiti amin dagiti karbenganda, kenkuana a mangalikagum iti buis, ti buis’?​—Roma 13:7.

Panagtulnog a Maigapu iti Ayat

15. Apay nga agtulnogkayo kadagiti bilin ni Jehova?

¹⁵ Pagimbagantayo ti panagtulnog kadagiti pagannurotan ti Dios. Kas pagarigan, babaen ti saan a panagsigarilio, panagbiag a nadalus iti moral, ken panangraem iti kinasagrado ti dara, mabalin a maliklikantayo ti dadduma a sakit. Kanayonanna, babaen ti panagbiagtayo a maitunos iti kinapudno iti Biblia iti dadduma nga aspeto ti biagtayo, mabalin a sumayaat ti panggedantayo, ti relasiontayo iti sabsabali, wenno ti biag ti pamiliatayo. (Isaias 48:17) Amin a pisikal a pagimbagan ket siuumiso a maibilang kas bendision a mangpaneknek iti kinapraktikal dagiti linteg ti Dios. Kaskasdi, ti kangrunaan a rason nga agtulnogtayo kenni Jehova ket gapu iti panagayattayo kenkuana. Saantayo nga agserserbi iti Dios gapu kadagiti managimbubukodan a rason. (Job 1:9-11; 2:4, 5) Impaayannatayo ti Dios iti wayawaya nga agpili iti siasinoman a kayattayo a pagtulnogan. Pilientayo ti agtulnog ken ni Jehova agsipud ta kayattayo a paragsaken ken kayattayo nga aramiden ti naimbag.​—Roma 6:16, 17; 1 Juan 5:3.

16, 17. (a) Kasano nga impakita ni Jesus ti kinatulnogna iti Dios gapu iti naimpusuan a panagayatna? (b) Kasano a matuladtayo ni Jesus?

¹⁶ Impasdek ni Jesus ti perpekto nga ulidan iti panagtulnog kenni Jehova gapu iti naimpusuan a panagayat Kenkuana. (Juan 8:28, 29) Bayat ti kaaddana ditoy daga, ‘nasursuro ni Jesus ti panagtulnog manipud iti bambanag a sinagabana.’ (Hebreo 5:8, 9) Kasano? Ni Jesus “impakumbabana ti bagina ket nagtulnog agingga iti ipapatay, wen, ipapatay iti kayo a pagtutuokan.” (Filipos 2:7, 8) Nupay siguden a natulnog ni Jesus idiay langit, ad-adda a nasubok ti kinatulnogna idi adda ditoy daga. Masiguradotayo a naan-anay a kualipikado ni Jesus nga agserbi kas Nangato a Padi para kadagiti naespirituan a kakabsatna ken kadagiti dadduma pay a manamati iti sangatauan.​—Hebreo 4:15; 1 Juan 2:1, 2.

 ¹⁷ Datayo ngay? Matuladtayo ni Jesus no ipangpangrunatayo ti panagtulnog iti pagayatan ti Dios. (1 Pedro 2:21) Mariknatayo a mismo ti pannakapnek no ti panagayattayo iti Dios ti mangtignay kadatayo mangsurot iti bilbilin ni Jehova, uray kadagiti gundaway a marigatantayo a mangaramid iti dayta wenno sabali ti kayattayo nga aramiden. (Roma 7:18-20) Iraman daytoy ti sidadaan a panagtulnogtayo kadagiti bilin manipud kadagidiay mangidadaulo iti pudno a panagdayaw, nupay imperpektoda. (Hebreo 13:17) Tagipatgen unay ni Jehova ti panagtulnogtayo kadagiti bilinna iti pribado a biagtayo.

18, 19. Ania ti resulta ti naimpusuan a panagtulnogtayo iti Dios?

¹⁸ Ita, ti panagtulnogtayo kenni Jehova mabalin nga iramanna ti panangibturtayo iti pannakaidadanes kas panangtaginayon iti kinatarnawtayo. (Aramid 5:29) Kasta met, tapno matungpaltayo ti annongentayo a mangasaba ken mangisuro kas imbilin ni Jehova, masapul nga agibturtayo agingga iti panungpalan daytoy sistema ti bambanag. (Mateo 24:13, 14; 28:19, 20) Kasapulantayo ti panagibtur tapno maitultuloytayo ti makitaripnong kadagiti kakabsattayo, uray pay madagdagsenantayo gapu kadagiti pakarigatan iti lubong. Ti managayat a Diostayo ket naan-anay nga ammona dagiti panagreggettayo nga agtulnog iti sidong dagita a kasasaad. Ngem tapno naan-anay a makapagtulnogtayo, masapul a parukmaentayo ti managbasol a lasagtayo ken liklikantayo ti agaramid iti dakes bayat a pabpabilgentayo ti panangipategtayo iti naimbag.​—Roma 12:9.

¹⁹ No agserbitayo kenni Jehova gapu iti ayat ken buyogen ti managyaman a puso, “agbalin [kadatayo] a mananggunggona kadagidiay sipapasnek a mangsapsapul kenkuana.” (Hebreo 11:6) Napateg dagiti maitutop a panagdaton ken makaay-ayo dagita, ngem nangnangruna a maparagsaktayo ni Jehova no naan-anay nga agtulnogtayo kenkuana gapu iti ayat.​—Proverbio 3:1, 2.

Ania ti Sungbatyo?

• Apay a makunatayo nga addaantayo iti banag a maited ken Jehova?

• Ania dagiti nagbasolan ni Saul?

• Kasanoyo a maipakita a patienyo a nasaysayaat ti panagtulnog ngem iti daton?

• Ania ti mangtigtignay kadakayo nga agtulnog kenni Jehova?

[Salsaludsod]

[Ladawan iti panid 26]

Ania ti mabalin a marikna ti maysa a maseknan a doktor no iyaleng-aleng ti pasientena dagiti balakadna?

[Ladawan iti panid 28]

Apay a napukaw ni Ari Saul ti anamong ni Jehova?

[Dagiti Ladawan iti panid 30]

Agtultulnogka kadi kadagiti bilin ti Dios no awan ti makakitkita kenka iti uneg ti pagtaengam?